Magano Hagiirsiisanno Garinni Heeꞌra

1, 2. Yihowa muli jaallasi asse doodhino manni giddo gamu ayeooti?

JAALAKKI ikkara hasiꞌrattohu hiittoo manchooti? Atete gedee laonna hasatto noosiha hattono ati kaffi assite laꞌꞌatto coye kaffi asse laꞌꞌanno mancho jaalakki assiꞌrattoti dihuluullissannote. Qoleno ammanaminohunna shaqqadu manchi hattono wole dancha akatta afiꞌrino manchi baxisannoheti dihuluullissanno.

² Seeda yanna giddo, Maganu isira muli jaala ikkanno manna doodhanni keeshshino. Lawishshaho, Yihowa Abirahaami jaalaꞌyaati yiino. (Isayyaasi 41:8; Yaaqoobi 2:23) Daawiti Yihowa baxanno manni gedee mancho ikkino daafira, Yihowa iso “wodaniꞌya gede ikkinoho” yiinosi. (Soqqamaanote Looso 13:22, NW) Qoleno masaalaanchu Daanieeli Yihowa albaanni “lowo geeshsha baxamino manchooti.”—Daanieeli 9:23.

3. Yihowa mito manna jaallasi ikkitara doodhannohu mayiraati?

³ Yihowa Abirahaami, Daawitinna Daanieeli jaallasi assiꞌrinohu mayiraati? Isi Abirahaami, “Qaaleꞌya macciishshootto” yiinosi. (Kalaqo 22:18) Konni daafira Yihowa umonsa heeshshi assite isi asse yiinonsa coye assitannore muli jaallasi assiꞌranno. Yihowa Isiraeelete gosa togo yiinonsa: “Qaaliꞌyara hajajamme; hatto assitiniro ani Maganoꞌne ikkeemmo, kiꞌne gosaꞌya ikkitinanni.” (Ermiyaasi 7:23) Yihowara hajajamattoha ikkiro, atino isi jaala ikka dandaatto!

YIHOWA JAALLASI JAWAACHCHISHANNO

4, 5. Yihowa mannasi jawaachchishannohu hiittoonniiti?

⁴ Maganu jaala ikka mayi atoote afidhinoro hanni hedi. Qullaawu Maxaafi, Yihowa “woꞌmu wodaninsanni iso addaxxitannore jawaachchishara” faro hasiꞌrannota xawisanno. (2 Zeena 16:9) Yihowa ate jawaachchishannohehu hiittoonniiti? Mitte doogo Faarso 32:8 aana qummi assinoonnite. Xiqise togo yitanno: “Ani [Yihowa] wodancha eemmohe, hattono haꞌra hasiissannohe doogo rosiiseemmohe. Illeꞌya aanikkinni hoolummokki amaaleemmohe.”

⁵ Tini xiqise Yihowa agarannoheta tashshi assanno garinni xawissanno! Yihowa hasiisanno biddishsha aannohe; hakkonne biddishsha harunsatto woteno agarannohe. Maganu iillannohe qarranna fatana dandiite heeꞌratto gede kaaꞌlahera hasiꞌranno. (Faarso 55:22) Konni daafira Yihowara woꞌmu wodaninni soqqamattoha ikkiro, aante noo assaawe coyiꞌrino faarsaanchi gede bashshi yiittokki heeꞌratto: “Ayeewoteno albaꞌyaanni Yihowa wodhoommo. Isi qiniiteꞌyaanni noo daafira, digaggaweemmo.” (Faarso 16:8; 63:8) Addaho, Yihowa iso hagiirsiisanno garinni heeꞌratto gede kaaꞌlannohe. Kayinni afittonte gede, Magano hagiirsiisanno garinni heeꞌrattota hoola hasiꞌrannohu mittu Maganu diini no.

SHEEXAANU KISSE

6. Sheexaanu mannu ooso lainohunni mayi kisse kalaqino?

⁶ Konni maxaafira 11⁠^ki fooliishshora, Sheexaanu Daawuloosi Maganu aliidimma hettisinota xawinsoonni. Sheexaanu Magano kaphphaanchoho yee kassasino; qoleno Addaaminna Heewani bushanna dancha uminsanni wossaꞌnitannota hoolasi digaraho yiino. Addaaminna Heewani cubbo loossu gedensaanni oosonsa uulla woꞌma jammartuta, Sheexaanu mannu baalunkuta wodanu hasatto lainohunni kisse kalaqino. Isi togo yee kassasino: “Mannu Maganoho soqqamannohu iso baxino daafira diꞌꞌikkino. Faro uyittoero, ayee manchono Maganuwiinni fafanno gede assa dandeemmo.” Iyyoobi yinanni manchi xagge, Sheexaaneho hattoo hedo noosita kultannonke. Iyyoobi ayeeti? Sheexaanu iso kissete giddora eessinohu hiittoonniiti?

7, 8. (a) Iyyoobi yannasira noo manniwiinni mayinni baxxanno? (b) Sheexaanu, Iyyoobi Maganoho soqqamanno korkaata lainohunni mayyee kassasino?

⁷ Iyyoobi 3,600 meddi yaanno diri albaanni heeꞌrino manchooti. Isi dancha manchooti; korkaatuno Yihowa, “Uullate aana isi gedeehu minshanniri noosikkihu, keeraanchu, Magano waajjannohunna bunshetewiinni xeertiꞌrino manchi dino” yiino. (Iyyoobi 1:8) Iyyoobi Magano hagiirsiisanno manchooti.

⁸ Sheexaanu, Iyyoobi Maganoho soqqamanno korkaata lainohunni kisse kalaqino. Daawuloosi Yihowa togo yiino: “[Iyyoobiranna] minisi qooxeessira hattono noosi coyi baalunku qooxeessira dihuxxa huxxite nootto? Angasi loosono maassiꞌrootto; saadasino uullate aana hoshsha ikkitino. Hanni xa albakkiinni xonannohekkita laꞌꞌattona angakki diriirsite noosi coye baala gani.”—Iyyoobi 1:10, 11.

9. Yihowa Sheexaanu kissera dawaro qolinohu hiittoonniiti? Mayira?

⁹ Sheexaanu, Iyyoobi Maganoho soqqamannohu isiwiinni xiqime afiꞌranno daafira callaati yee heewisamino. Qoleno Sheexaanu, Iyyoobi fatanu iilloommesiro Maganoho badhe wodhanno yee kassasino. Yihowa Sheexaanu kissera dawaro qolinohu hiittoonniiti? Kisse kalaqantinohu Iyyoobi Maganoho soqqamanno korkaata lainohunni ikkino daafira, Yihowa Sheexaanu Iyyoobi fattanara faqqadi. Konni garinni Iyyoobi Magano baxannotanna teꞌee buuxa dandiinanni.

IYYOOBIRA FATANU IILLISI

10. Iyyoobira mayi fatani iillisi? Isi kayinni maa diassino?

¹⁰ Sheexaanu Iyyoobi hakkawontenni duuchchu garinni fattanisi. Iyyoobi saada gama moorantu, gama kayinni shini; hattono soqqamaanosi giddo rooriidita shini. Kuni qole miinju qarra abbinosi. Iyyoobiti tonne ooso hambabalattetenni reyituta wolu masisanno coyi iillisi. Kuni baalu qarri iillisirono, “Iyyoobi dibaddalino; gara ikkinokkire mittoreno Maganoho dicoyiꞌrino.”—Iyyoobi 1:22.

11. (a) Sheexaanu Iyyoobi layinkita mayyee kassasi? Yihowano ma assanno gede faqqadisi? (b) Iyyoobi buuto xiwamirono maa diassino?

¹¹ Sheexaanu konninni hexxo dimudhino. Sheexaanu Iyyoobi jajjisi, soqqamaanosinna oososi gooffeenna cince sairono, xiwamiro kayinni Magano kaadanno yee hedikki digatino. Yihowa, Sheexaanu Iyyoobira giwisannohanna buutote xibba abbanno gede faqqadisi. Ikkeennano Iyyoobi togoo xibbi nafa Magano kaadanno gede diassinosi. Isinni Iyyoobi kaajjishe togo yiino: “Reyaammo geeshsha coꞌiima uurrinshaꞌya dihuꞌneemmo!”—Iyyoobi 27:5.

12. Iyyoobi Daawuloosi kisse kaphpho ikkitinota leellishinohu hiittoonniiti?

¹² Iyyoobi konne baala qarra abbinosihu Sheexaane ikkinota diafino. Isi, Daawuloosi Yihowa aliidimma lainohunni kalaqino kisse afinokki daafira, qarra abbinosihu Magano lawinosi. (Iyyoobi 6:4; 16:11-14) Ikkeennano isi Yihowara woꞌmunni woꞌma ammanaminoha ikkino. Qoleno Iyyoobi ammanaminoha ikkasinni Sheexaanu, Iyyoobi Maganoho soqqamannohu umisi xiqimeraati yee kassasino kisse kaphpho ikkitino!

13. Iyyoobi Maganoho ammanaminoha ikkasi maa injeessitino?

¹³ Iyyoobi ammanaminoha ikkasi, Yihowa Sheexaanu kissera ikkado dawaro qolanno gede assitinosi. Iyyoobi addinta Yihowa jaalaati; Maganuno isi ammanaminoha ikkino daafira kiisinosi.—Iyyoobi 42:12-17.

SHEEXAANU ATE KISSETE GIDDORA EESSINOHEHU HIITTOONNIITI?

14, 15. Sheexaanu Iyyoobi lainohunni kalaqino kisse, mannu ooso baala laꞌanno yineemmohu mayiraati?

¹⁴ Maganoho ammanama lainohunni Sheexaanu kalaqino kisse Iyyoobi calla laꞌannota diꞌꞌikkitino. Sheexaanu ateno hatte kisse giddora eessinohe. Lawishsha 27:11 aana noohu Yihowa Qaali tenne seekke xawisanno: “Xonannoehura dawaro qoꞌla dandeemmo gede, beettoꞌya hayyichcha ikki, wodanaꞌyano tashshi assie.” Iyyoobi reyihunni lowo diri gedensaanni borreessantinoti tini xiqise, Sheexaanu Magano xona agurinokkitanna Maganu soqqamaano kassasa agurinokkita leellishshanno. Ninkeno Yihowa hagiirsiisanno garinni heeꞌneemmoha ikkiro, Sheexaanu kalaqinotera kaphphu kissera dawaro qolate kaaꞌla dandiineemmo; hakko garinnino Maganu wodana tashshi assineemmo. Kuni coyi atera ma lawannohe? Heeshshokki giddo mite mite soorro assa xaꞌmitannoheha ikkirono, Daawuloositera kaphphu kissera dawaro qolate kaayyo afiꞌrakki didanchate?

¹⁵ Sheexaanu, “Manchu lubbosira yee noosiha baala sayise aanno” yiinota wodanchi. (Iyyoobi 2:4) Sheexaanu, kissesi Iyyoobi calla ikkikkinni mannu ooso baala laꞌannota “manchu” yee coyiꞌre xawisino. Tini shotinse laꞌnanni hajo diꞌꞌikkitino. Sheexaanu Maganoho noohe ammanama lainohunni kisse kalaqino. Daawuloosi qarru iillannohe wote Maganoho hajajama gibbeenna hattono xalallete doogonni fulteenna laꞌꞌa hasiꞌranno. Sheexaanu tenne injeessiꞌrate woꞌnaalannohu hiittoonniiti?

16. (a) Sheexaanu manna Maganuwiinni xeertisate hiittoo doogo horoonsiꞌranno? (b) Sheexaanu kuri hayyosi ate Maganuwinni badate hiikko garinni horoonsiꞌrara dandaanno?

¹⁶ Fooliishsho tonnete ronsummonte gede, Sheexaanu manna Maganuwiinni xeertisate addi addi doogo horoonsiꞌranno. Mitto widoonni, “egemmannoha hasiꞌranni ittananno [doobbiichchi] gede” ikke gawajjanno. (1 Pheexiroosi 5:8) Konni daafira jaallakki, fiixikki woyi wolu manni Qullaawa Maxaafa xiinxallattotanna rosootto coye loosu aana hosiisattota qawwamanno wote, konni coyira Sheexaanu anga no yaate.a (Yohaannisi 15:19, 20) Wole widoonni kayinni, Sheexaanu “xawaabbu [sokkaancho] lawara umosi soorranno.” (2 Qorontoosi 11:14) Daawuloosi ate soꞌrisiisatenna Magano hagiirsiisanno garinni heeꞌrattota hoolate xagarrote hayyo horoonsiꞌranno. Qoleno ani Magano hagiirsiise diafeemmo yite hexxo mudhatto gede assahera dandaanno. (Lawishsha 24:10) Sheexaanu “ittananno doobbiichchi” gede ikkirono, woyi “xawaabbu sokkaanchi” gede ikke soorramirono kissesi mittete: Fatanu woyi mitiinsannori illihero, Maganoho soqqama aguratto yee hettisamanno. Iyyoobi gede, atino Sheexaanu kissera dawaro qola dandaattohunna Maganoho ammanamoottoha ikkakki leellisha dandaattohu hiittoonniiti?

YIHOWA HAJAJO AYIRRISA

17. Yihowa hajajo ayirrinseemmohu qaru korkaati maati?

¹⁷ Magano hagiirsiisanno garinni heeꞌratenni Sheexaanu kissera dawaro qola dandaatto. Tini maa assa xaꞌmitanno? Qullaawu Maxaafi togo yaanno: “Yihowa Maganokki woꞌmu wodanikkinni, woꞌma lubbokkinninna woꞌma wolqakkinni baxa hasiissannohe.” (Marro 6:5) Maganoho noohe baxilli lexxanni haꞌranno wote, isi atewiinni agaranno coye assate lowo geeshsha halchatto. Hawaariya Yohaannisi, “Magano baxa hajajosi agadhate” yee borreessino. Yihowa woꞌmu wodanikkinni baxattoha ikkiro, ‘hajajosi [ayirrisa] diqarrissannohe.’—1 Yohaannisi 5:3.

18, 19. (a) Yihowa hajajo giddo gamu hiikkuriiti? (Qoola 122 aana noo saaxine lai.) (b) Maganu assine anfeemmokkire asse yaannonkekkita mayinni anfeemmo?

¹⁸ Yihowa hajajo yinanniri hiikkuriiti? Hajajosi giddo gama xeertiꞌra hasiissannonke amanynyoote kultannote. Lawishshaho, “Yihowa Giwanno Coyiwiinni Xooqi” yitannota qoola 122 aana noo saaxine lai. Hatte saaxine giddo Qullaawu Maxaafi faajjetenni giwanno amanynyoote xawinsoonni. Iimi adda laꞌnanni wote, hakko noohu mitu mitu amanynyooti hakkeeshshi geeshsha busha lawa hoogara dandaanno. Ikkollana hakko qummi assinoonni xiqissa heeshshi gotti assite assaawittohu gedensaanni, Yihowa aanno higge hayyonnita ikkitinota buuxatto. Heeshshokki giddo amanynyootu soorro assiꞌra, xaa geeshsha assiꞌrootto soorro baalantenni roore kabbaade ikkitahera dandiitanno. Ikkeennano Magano hagiirsiisanno garinni heeꞌra, heeshshokkira harshammonna hagiirre abbitanno. (Isayyaasi 48:17, 18) Kuni qole assattora dandaatto coyeeti. Tenne mayinni anfeemmo?

¹⁹ Yihowa assine anfeemmokki coye assinammora horonta dihajajannonke. (Marro 30:11-14) Isi dandoonkenna wolqanke deerra ninkenni roore afino. (Faarso 103:14) Hakkiinni saeno, Yihowa hajajammeemmosi gede jawaante aannonke. Hawaariya Phaawuloosi togo yee borreessino: ‘Maganu ammanaminoho, hakkuno wolqaꞌnera aleenni higino [fatani] iillaꞌnera wore dilaꞌꞌanno. Roorenkanni, [fatanu iillannoꞌne] woyite cinca dandiitinanni gede, wolqa oye fultinanni doogo qixxeessannoꞌne.’ (1 Qorontoosi 10:13) Yihowa qarra dandiite heeꞌratto gede, “rosantinotenni aleenni ikkitino wolqa” nafa aannohe. (2 Qorontoosi 4:7, NW) Phaawuloosi lowo qarra dandee sai gedensaanni togo yiino: “Wolqa aannoehunni [isinni] duuchchanka assammora dandeemmo.”—Filiphphisiyusi 4:13.

MAGANU BAXANNO AKATA LOSSIꞌRA

20. Maganu baxannore hiikkore akatta lossiꞌra hasiissannohe? Togoo akatta latisira hasiissannohu mayiraati?

²⁰ Yihowa hagiirsiisanno garinni heeꞌrate, isi giwanno coyiwiinni xooqa calla baqe diꞌꞌikkitanno. Isi baxannoreno baxa hasiissannohe. (Roomu Sokka 12:9) Atete gedee laonna hasatto noosiha hattono ati kaffi assite laꞌꞌatto coye kaffi asse laꞌꞌanno mancho dibaxisannohe? Yihowano hattoo manna jaallasi assiꞌranno. Konni daafira Yihowa baxanno coye atino baxi. Kuri giddo gama Faarso 15:1-5 aana xawinsoonni; tini faarso Maganu jaallasi assiꞌrino mannire kultanno. Qullaawu Maxaafi “ayyaanu guma” yaannoha Yihowa jaalla akatinsanni leellishshanno. Ayyaanu guma yinannihu ‘baxille, hagiirre, keere, cinca, shaqqille, danchumma, ammana, [joongillenna] umo qeeꞌla’ yinanni akatta amadinoho.—Galatiya 5:22, 23.

21. Magano hagiirsiissanno akatta latisirate kaaꞌlannohehu maati?

²¹ Qullaawa Maxaafa ganynyite nabbawakkinna xiinxallakki, Yihowa baxanno akatta latisiratto gede kaaꞌlitannohe. Qoleno Maganu atewiinni maa hasiꞌrannoro rosakki, hedokki isi hedo ledo sumuu assiꞌrate kaaꞌlitannohe. (Isayyaasi 30:20, 21) Yihowara noohe baxilli lexxanno gede assiꞌritto kiiro, iso hagiirsiisanno garinni heeꞌrate lowo hasatto heedhannohe.

22. Magano hagiirsiisanno garinni heeꞌrattoha ikkiro ma assa dandaatto?

²² Yihowa hagiirsiisanno garinni heeꞌra sharro assa xaꞌmitanno. Qullaawu Maxaafi heeshshokki soorrite biddi assiꞌra, akkala mannimma fushshe haaro uddirate ledo lawisanno. (Qolasiyaasi 3:9, 10) Ikkeennano Yihowa hajajo lainohunni faarsaanchu, “Ise agadha lowo baraara afidhino” yiino. (Faarso 19:11) Magano hagiirsiisanno garinni heeꞌra aterano lowo baraara abbitahera dandiitanno. Hatto assattoha ikkiro, Sheexaanu kissera dawaro qolatto hattono Yihowa wodana tashshi assatto!