Iyyoobi Ayeti?

Uutsi yinanni gobbara mittu Yihowa magansiꞌranno manchi no. Suꞌmisi Iyyoobiiti. Isi dureessa manchooti, qoleno haammata ooso noosi. Isi shaqqadoho; qoleno buxane, galte shiiꞌrino meentonna annunna ama noonsakki qaaqquulle kaaꞌlannoho. Kayinni Iyyoobi dancha coye assanno daafira mittu qarrino diꞌꞌiillinosi yaateni?

Sheexaanu Iyyoobi busha illenni laino; Iyyoobi kayinni tenne diafino. Yihowa Sheexaane togo yii: ‘Soqqamaanchoꞌya Iyyoobi laittoni? Uullate aana isi gedee manchi dino. Isi anera hajajamannoho, hattono dancha coye assannoho.’ Hakkiinni Sheexaanu togo yii: ‘Iyyoobi atera hajajamannoheta afoommo. Ati iso towaatattosi, hattono maassiꞌroottosi. Isira lowo baattonna saada oottosi. Hanni afiꞌrinore baala haadhe hooli laꞌꞌattona; isi ate magansiꞌra aguranno.’ Hakkiinni Yihowa togo yii: ‘Iyyoobi fonqola dandaatto. Iso shaa calla shitooti.’ Yihowa Sheexaanu Iyyoobi fonqolara fajjinohu mayiraati? Iyyoobi Isira ammanamannota afino daafiraati.

Hakkiinni Sheexaanu Iyyoobira lowo qarri iillanno gede assi. Umo, Saabaawoota yinanni manni Iyyoobi lalonna harre moortanno gede assi. Hakkiinni Iyyoobi geꞌreewo baala giira itte guddu. Keledoota yinanniti wole daga qolte gaalasi moortu. Tini mooraano Iyyoobi saada allaalte noo soqqamaano baala shite guddino. Hakkiinni waajjishshanno hombobalatte kaꞌu. Hatte yannara Iyyoobi ooso baala jila ittanni no; hombobalatte kaꞌuta jila ittanni noo mini aanansa uweenna reyite gooffu. Konni daafira Iyyoobi lowo geeshsha dadillino; kayinni isi Yihowa magansiꞌra diagurino.

Sheexaanu xaano Iyyoobi gawajja hasiꞌrino; konni daafira bisisi baalu madiꞌranno gede assi. Iyyoobi lowo geeshsha xiwamino. Isi kuni qarri baalu iillinosihu mayiraatiro diafino. Ikkirono isi Yihowa magansiꞌra diagurino. Maganu, Iyyoobi hajajaminosi daafira lowo geeshsha hagiidhino.

Hakkiinni Sheexaanu Iyyoobi fonqolara sase manna soyino. Insa togo yitinosi: ‘Cubbo loosse maaxootto. Konni daafira Maganu qorochishanni noohe.’ Iyyoobi ‘Ani cubbo diloosoommo’ yii. Gedensaanni kayinni Iyyoobi qarra abbinoehu Maganoho yee hedi; hattono Isi baddalinoe yii.

Insa giddo maaꞌniidihu Eelihu yinannihu insa hasaabbanna sammi yee macciishshino. Gedensaanni isi togo yee coyiꞌri: ‘Kiꞌne baalunku coyidhinoonniri digaraho. Yihowa baalunkura rooriidiho. Isi bushare horo diassanno. Isi baalankare laꞌꞌanno; qoleno mannu qarramanno yannara kaaꞌlanno.’

Hakkiinni Yihowa Iyyoobi coyishiishi. Togo yiisi: ‘Ani iimanna uulla kalaqummo waro ati mama nootto? Ane baddaloottoe yiittoehu mayiraati? Afoottokki coye coyiꞌrootto.’ Iyyoobi soꞌrosi ammane togo yii: ‘Soꞌroommo. Alba ate daafira macciishshoommo; xa kayinni ate seekke afoommo. Ati dandaattokkiri dino. Gara ikkinokkire coyiꞌroommo daafira maarie ballo.’

Sheexaanu Iyyoobi fonqole kaita, Yihowa iso hursisi, hattono alba noosirinni roorinore uyinosi. Iyyoobi hagiidhanni lowo diro heeꞌrino. Yihowa, Iyyoobi lowo geeshsha qarrame heeꞌrenni Isira hajajamino daafira maassiꞌrinosi. Ati Iyyoobi gede qarru iilliherono Yihowa magansiꞌratto?