Addu Kiristaani Magansiꞌrate Masqala Horoonsiꞌrannokkihu Mayiraati?

MILIYOONETENNI kiirranni manni masqala baxannonna ayirrisanno. Ze Insayikilopiidiya Biritaanika yinanni maxaafi, masqalu “Kiristaanu ammaꞌnara qara malaateeti” yiino. Ikkollana, addu Kiristaani magansiꞌrate masqala dihoroonsiꞌranno Mayira?

Konnira qara ikkino korkaati Yesuusi Kiristoosi masqalu aana sutaminokkihuraati. “Masqala” yine tirroonnihu Girikete qaali istawurosi yinanniho. Konni qaali tiro “hossi yiino haqqa” yaate. Ze Kompaniyeeni Bayibili yinanniti Qullaawu Maxaafi tiro togo yitino: “[Istawurosi] yinanni qaali masqalu gede assine angilete aana sarraanqoonniha lame haqqa dixawisanno . . . Girikete afiinni borreessinoonnihura [Haaru Gondoorira] lame haqqa xawissanno hedo mittowano dino.”

Qullaawu Maxaafi borreessaano Yesuusi sutamino haqqa xawisate haammata basera wole qaale horoonsidhino. Kuni qaali zayilooni yinanniho Girikete qaaleeti. (Soqqamaanote Looso 5:30; 10:39; Galatiya 3:13) Konni qaali tiro “damakkalaho” woyi “dullaho woyi siqqote woyi haqqichchote” yaate.

Hermaani Fulde qixxeessinohu Masqalanna Sutama yinanni maxaafi biꞌree yannara jaddo loosino manna sunte shinanni wote roore yanna hossi yiino haqqa horoonsiꞌnannihu mayiraatiro xawisanni togo yaanno: “Mannu albaanni manna reyotenni qorichchishate doorranni basera gari haqqe diheedhanno. Konni daafira mitto haqqa uullate qanse jaddo loossinore konni haqqi aana angansa iima qolle diriirsine usurre woyi misimaaretenni haqqaho ganne lekkansano duuꞌne eela qolle usurre woyi misimaaretenni haqqaho ganne suntanni.” (Daasi Kirotisi antidi kirotisigugi)

Ikkeennano duuchchunkura alee ikkitino taje Maganu Qaaleeti. Qullaawu Maxaafi togo yaanno: ‘“Haqqu aana sutaminohu duuchchu rumaminoho” yine borreessinoonninte gede, Kiristoosi ninkera yee rumaminohu gede ikke [Higgete] rumonni wodinonke.’ (Galatiya 3:13) Phaawuloosi tenne xiqise haarinohu Marro 21:22, 23 aaninniiti; tini xiqise xawissannohu suwino haqqa ikkinnina masqala diꞌꞌikkino. Konni garinni mitto mancho sute shaa sutami mancho ‘rumaminoha’ assitannohura, Kiristaanu Kiristoosi masqalu aana sutaminota leellishshanno misilenni minensa dibiifisidhanno.

Kiristoosi reyihunni 300 diri geeshsha ninke Kiristaanaho yaanno manni magansiꞌrate masqala horoonsiꞌrannota leellishshanno taje horonta dino. Ikkollana shoolki sanira Magano ammantinokki daga Nugusi Qosxenxinoosi ammaꞌnasi soorre kaadaano Kiristaaniwa higasinni masqalu Kiristaanu malaate ikkanno gede assino. Qosxenxinoosi alaami baxiha ikkirono masqalu Yesuusi Kiristoosi ledo mitto xaadono diafiꞌrino. Isinni masqalu dayinohu Magano ammantinokki dagawiinniiti. Niwu Kaatoliki Insayikilopiidiya yinanni maxaafi, “Masqalu Kiristaanu yanna albaannino ikko Kiristaana ikkinokki manni budirano nooho” yee halaale daheessikki coyiꞌrino. Wole babbaxxitino tajeno masqalu, kalaqo magansiꞌratenna sirote magansiꞌra ledo xaado afiꞌrinota buuxisiissanno.

Ikkina kuni Magano ammantinokki daga malaati halaꞌlinohu mayiraatiyya? Magano ammantinokki daga daafuru nookkiha suꞌmu Kiristaana assate hende assinoonniha lawanno. Ikkollana Magano ammantinokki dagawiinni daggino misile magansiꞌra Qullaawu Maxaafi effire giwanno. (2 Qorontoosi 6:14-18) Qoleno Qullaawa Borro ayee gari misile magansiꞌra hooltanno. (Wolaphpho 20:4, 5; 1 Qorontoosi 10:14) Konni daafira, addu Kiristaani magansiꞌrate masqala horoonsiꞌrannokkihu ikkadu korkaati noonsa.a