Meyaati Umo Gugguꞌla Hasiissannosehu Hiikka Woteeti? Mayira?

Qullaawu Maxaafi yaanno garinni, mitte Kiristaancho umo gugguꞌla hasiissannosehu hiikka woteeti? Qoleno gugguꞌla hasiissannosehu mayiraati? Hawaariya Phaawuloosi qullaawu ayyaani marraeennasi tenne hajo lainohunni mayyee borreessinoro hanni laꞌno. Isi borreessino biddishshi, danchanna Maganoho ayirrinynye abbitanno wussaane wossaꞌnate kaaꞌlannoho. Umi Qorontoosi 11:3-16 (NW) geeshsha, Phaawuloosi tennera seekke assaawa hasiissannonkeha lame coye kulino; hakkuno: (1) mitte Kiristaancho umo gugguꞌla hasiissannosehu hiikka woteetinna, (2) konne biddishsha harunsitanno gede assannose korkaati maati yaannoho.

Mitte Kiristaancho umo gugguꞌla hasiissannosehu hiikka woteeti? Tennera Phaawuloosi lamere xaqqasino: huuccatto assinanni yannanna masaalo coyiꞌnanni yanna. (Kiiro 4, 5) Huuccatto assiꞌranna Yihowa magansiꞌra lowonta quraanynyantinote. Xaa yannara, mittu Kiristaanchi Qullaawu Maxaafi aana xintamino roso mannaho rosiisi kiiro masaalo coyiꞌranni no yaate. Ikkina Phaawuloosi mitte mancho huuccatto assidhunna Qullaawu Maxaafi halaale rosiissu kiiro umo gugguꞌla hasiissannose yaasiitini? Deeꞌni. Umo gugguꞌla hasiissannoseti yanna no.

Phaawuloosi, mitte rodoo maatetenna songote giddo umo gugguꞌla hasiissannose yanna hiitteetiro xawisino. Togo yiino: “Meyaate umi labbaaho . . . Umose gugguꞌlitukki huuccatto assitannoti woyi masaalo coyidhanno meyaati baalanti umose shollishshanno.” (Kiiro 3, 5) Yihowa maatete giddo minaanna meyaatera umo ikkara shoomino. Meyaati Yihowa minaannisera uyino halaafinate wonshitanno wote minaannise silxaanera gabbaꞌꞌanno ayirrinynye uyitannokkiha ikkiro, iso shollishshanni no yaate. Lawishshaho minaannise laꞌꞌa woyi macciishsha dandaanno basera heeꞌreenna Qullaawa Maxaafa xiinxallissannoha ikkiro, silxaanesi ayirrissannota leellishate umose gugguꞌlitanno. Minaannise cuuaminohano ikko ikkano hoogo, maatete umo ikki geeshsha gugguꞌla hasiissannose.a Qoleno cuuaminohu shiimu iltino beetti noowa huuccatto assitannoha woyi rosiissannoha ikkiro, umo gugguˈlitanno; togo assitannohu kayinni beettu maatete umo ikkeenna ikkikkinni, Kiristaanu songo giddo cuuantino labballira uyinoonni silxaane ayirrisateeti.

Phaawuloosi songote siraatire xawisanni togo yiino: “Ayee manchino wole bude harunsa hasiissannonke yee karakkarama hasiꞌriro, ninkerano ikko Maganu songora konninni baxxinohu wolu budi dinonke.” (Kiiro 16) Kiristaanu songo giddo umo ikkate silxaane uyinoonnihu cuuantino labballiraati. (1 Ximootewosi 2:11-14; Ibiraawuyaani 13:17) Maganu uyinoha hoshshasi towaatate halaafinate adhite cimeeyyenna songote soqqamaano ikkite shoomantannori labballo callaho. (Soqqamaanote Looso 20:28) Mito wote kayinni, cuuaminohu ikkadu rodii wonshanno halaafinate Kiristaancho meyaati wonshitanno gede assitanno ikkito kalaqantara dandiitanno. Lawishshaho, cuuamino rodii hoogiro woyi marikki gatiro simirriitete gambooshshe marraꞌara dandiitanno. Woyi Qullaawa Maxaafa mitteenni xiinxallisate mitto cuuamino rodoo koyissanno yanna heedhara dandiitanno. Togoore assa, Kiristaanu songo Qullaawa Maxaafa rosiisate loossanno loosi widira kiirantanno daafira, tini rodoo labbaahu loosannore loossanni noota leellishate umo gugguꞌlitanno.

Wole widoonni kayinni, mitte rodoo ayyaanaamittete coye assitanno wote umo gugguꞌla hasiissannosekkiti batinynye yanna no. Lawishshaho, Kiristaanu gambooshshira tasaattaffanno wote, minaannise ledo woyi wolu cuuamino rodii ledo minunni mine hadhe sabbakkanno wote, woyi cuuantinokki qaaqquullise ledo huuccatto assidhanno wote umo gugguꞌla dihasiissannose. Tenne hajo lainohunni wole xaꞌmono heedhara dandiitanno; mitte rodoo umo gugguꞌla hasiissannoseronna teꞌee huluullanturo Qullaawa Borro ledde marammara dandiitanno.b Ledde marammarteenna nafa maa assa hasiissannosero leella giwiseronna tiiꞌꞌise umo gugguꞌlitanno gede kulisero, qoola 241 noo misile leellishshannonte gede gugguꞌlase soꞌro diꞌꞌikkitino.

Umo gugguꞌlitanno gede assannose korkaata. Kiiro 10 aana mitte Kiristaancho umo gugguꞌla hasiissannoseha lame korkaata xawinsoonni. Xiqise togo yitanno: “Meyaati sokkaanote korkaatinni silxaanete woroonni ikkitinota leellishanno malaate umise aana wodhito.” Hanni umihunni, “silxaanete woroonni ikkitinota leellishanno malaate” yitanno yaatto wodanchi. Meyaati umo gugguꞌlase Yihowa songote giddo cuuantino labballira uyino silxaane ayirrissanno doogooti. Konni garinni Magano Yihowa baxxannotanna isira ammanantannota leellishshanno. “Sokkaanote korkaatinni” yaanno qaali layinki korkaata kulannonke. Mitte mancho umo gugguꞌlase wolqaataamma ikkitinorira kuri ayyaanu kalaqamira maa kaaꞌlitannonsa?

Sokkaano, Yihowa silxaane dirijjitesi woꞌmate giddo iimano ikko uulla ayirritanna laꞌꞌa lowonta hasidhanno. Qolteno guunte xeꞌinori mannu ooso silxaane ayirrisse lawishsha ikkitanna laꞌꞌansa sokkaanote xiqime uyitannonsa. Addaho, sokkaanono Yihowa assino qixxaawora maahoyye yite gala hasiissannonsa; biꞌree waro haammata sokkaano tennera hajajantukki gattino. (Yihuda 6) Xaa yannara sokkaano, songote giddo mitte Kiristaancho noose temokkironni, egennotenninna busulletenni mitto cuuamino rodoo roorte heedhenni mittore xiixantukki silxaanesira maahoyye yite galtanna laꞌara dandiitanno. Mite mite meyaati yannate gedensaanni Kiristoosi gashshoote ragiꞌrate buurantinota ikkitara dandiitanno. Togoo meyaati hattee yannara sokkaanote nafa aleenni ikkitino silxaane amadde Kiristoosi ledo iima gashshitanno. Tini sokkaanote dancha lawishsha ikkitannonsa! Meyaa roduuwi baalunku rambaꞌnetenni hajajamannore, ammanaminorenna maahoyye yee galannore ikke sokkaanote lawishsha ikkansa lowo kaayyooti!