Bohamino Manchi Ledo Hiittoo Xaadi Heeꞌrankera Hasiisanno?

Fiixinke woyi mittu lubbote jaalinke loosino cubbira maaro ea giwe songotenni bohamiro lowonta xissiisanno. Qullaawu Maxaafi tenne hajo lainohunni aanno biddishsha ayirrisanke woyi ayirrisa hooganke, Magano mageeshshi geeshsha banxeemmoronna isi assino qixxaawo mageeshsha dagganfeemmoro leellishshanno.a Tenne hajo lainohunni hanni mite mite xaꞌmo laꞌno.

Bohamino manchi ledo hiittoo xaadi heeꞌrankera hasiisanno? Qullaawu Maxaafi togo yaanno: ‘Ammanino manni giddo mittu foorannoha, woyi woxe yogorannoha, woyi kakkalo kakkalannoha [“kaphphu maganna magansiꞌrannoha,” NW], woyi xonamannoha, woyi dimbannoha, woyi manna mulqiꞌrannoha ikkiro, isi ledo sumuu yitinoonte. Hattoore assannohu ledo sagale nafa ittinoonte.’ (1 Qorontoosi 5:11) Maganu Qaali, ‘Kiristoosi rosinni kaajje’ uurrannokkiha ayee manchono “wosinchimma adhitinoonte, keere nafa haadhinoonte” yaannonke. ‘Hakkuno mayiraati? Keere haaꞌrannosihu bushu loosisi beeqqaancho ikkannohuraati.’ (2 Yohaannisi 9-11) Songotenni bohantinori ledo ayyaanaamitteteno ikko dagoomittete xaadi diheeꞌrannonke. Tenne hajo lainohunni Wocawaaro 15, 1981 Agarooshshu Shae qoola 25 aana togo yitanno: “Mitto mancho haranchunni ‘Keereho?’ yaa nafa hasaawu widira soorrantaranna hakkiinni nafa saꞌe jaaloomu widira massitara dandiitannote umi qaafooti. Bohamino manchi ledo xaadissannonketa tenne umi qaafo adha hasiꞌneemmo?”

Bohamino manchiwiinni woꞌmunni woꞌma xeertiꞌra hakkeeshsha hasiissanno? Ee, hasiissanno; tennera haammatu korkaati no. Bohamino manchiwiinni xeertiꞌranke umihunni, Maganohonna Qaalisira ammanammoommore ikkinoommota leellishshanno. Yihowara hajajammeemmohu injaannonke wote calla diꞌꞌikkino; hajajama kabbaade ikkitanno woteno hajajammeemmo. Maganoho noonke baxilli, isi ayeewoteno gara ikkinore assannohanna baxillaancho ikkinota, hattono higguwasi duuchchunkunni roore xaqqantannota ikkitinota huwante, hajajosi woꞌmanta ayirrinseemmo gede xixxiiwannonke. (Isayyaasi 48:17; 1 Yohaannisi 5:3) Layinkihunni, loosino cubbira maaro einokki manchiwiinni xeertiꞌranke, hakko manchihu ayyaanaamittetenna amanynyootu xuri ninkewano ikko songonniwa saꞌꞌannokki gede assitanno; qolteno songonnihu danchu suꞌmi baꞌꞌannota agartanno. (1 Qorontoosi 5:6, 7) Sayikkihunni, Qullaawu Maxaafiha xintu seera seekkine harunsanke, bohamino manchira nafa xaqqantara dandiitanno. Cimeeyyete bisi wossanino wussaane dagganfeemmoha ikkiro, cimeeyye iso kaaꞌlate assitino sharro dunqulli asse keeshshino manchi godowisi shashshafameenna qaafo adhara dandaanno. Baxanno manni ledo noosi jaaloomi tainota afasi, “wodanisi” raga higanno gede, loosino cubbi mageeshsha kabbaade ikkinoro wodanchanno gedenna Yihowawa higate qaafo adhanno gede assitasira dandiitanno.—Luqaasi 15:17.

Bohamino manchi fiixanke ikkirona? Maatete miilla mimmitu ledo lubbora baxantanno ayiddi giddo togoori kalaqamiro, tenne maatera Yihowa higgera ammanama kabbaade ikkitara dandiitanno. Bohamino fiixinke ledo hiittoo xaadi heeꞌrankera hasiisanno? Kalaqantara dandiitannotera mitte mittente ikkitora koye dawaro qola didandiinanni; ikkeennano hanni qara ikkinoha lame coye laꞌno.

Mito wote bohamino manchi maatete ledo mitto mine heeꞌrannoha ikkara dandaanno. Kuni manchi songotenni bohamasi maatesi ledo noosi fiixooma gatissannokki daafira, maatete ledo addi addi looso loosanni mitteenni heeꞌrara dandaanno. Ikkollana, kuni manchi haꞌrino haꞌrinshonni ammaꞌnitino maatesi ledo noosiha ayyaanaamittete fiixooma umisi tayise huꞌnino. Konni daafira, Yihowara ammanammoommore ikkinoommota leellisha hasiꞌnummoro, bohamino fiixinke Magano magansiꞌneemmo wote tasaattafara faqqada dihasiissannonke. Lawishshaho, maate Qullaawa Maxaafa xiinxallitanno wote bohamino manchi ledonsa ofollannoha ikkirono, tasaattafa kayinni didandaanno. Ikkollana, bohaminohu annunna amate anga nooha shiima beetto ikkiro, annahonna amate xaano iso rosiisatenna seejjate halaafinatu noonsa. Konni daafira, annunna ama beettinsara noonsa baxilli iso Qullaawa Maxaafa xiinxallisate qixxaawo assitanno gede assansara dandaanno.b—Lawishsha 6:20-22; 29:17.

Wole widoonni kayinni, bohaminohu mine baxxinohanna maatetewiinni baxxe heeꞌrannoha ikkara dandaanno. Lowonta hasiissannota ayiddu hajo wonshate yine konni manchi ledo saꞌne saꞌne xaada dandiinanniha ikkirono, togoo xaado ajisha hasiissanno. Maganoho ammanantinori maatete miilla, xiwinoreno xiwinokkireno korkaata assite bohamino fiixinsa ledo xaadate faro dihasidhanno. Hatteentenni insa Yihowaranna dirijjitesira ammanantinore ikka hasidhanno daafira, cubbo loosse maaro eꞌannokkire boha lainohunni Qullaawa Borro uyitanno biddishsha harunsitanno. Yihowara noonsa baxillinni isira ammanantinore ikkansa, bohamino manchira roorenka xaqqantara dandiitanno; hattono uyinoonnisi seejjonni roore xiqime afiꞌranno gede kaaꞌlitasira dandiitanno.c—Ibiraawuyaani 12:11.