Gambooshshinke Yannara Dancha Gede Uddiꞌneemmohu Mayiraati?

Tenne biroshere giddo noo fotta aana Yihowa Farciꞌraasine gambooshshinsa yannara uddiꞌra seekkinota huwatootto? Uddiꞌrankenna seesinke gara seekkiꞌrate togo hixamanyineemmohu mayiraati?

Maganonke ayirrinseemmota leellishateeti. Maganu aaniidinni roore giddiidonke xunse laꞌꞌannoti dikaandannite. (1 Saamueeli 16:7) Ikkollana, Magano magansiꞌrate gamba yineemmo woyite, qara hasattonke isonna ammanate roduuwanke ayirrinseemmota leellishate. Lawishshaho yoote mine daanyu albira shinqeemmo woyite, silxaanesi ayirrinseemmo daafira sonanke seekkine layiꞌneemmo. Hatteente gede, gambooshsheho uddiꞌneemmonna seenseemmo gari “uulla woꞌmate Daanya” ikkinoha Yihowanna iso magansiꞌneemmo base lowonta ayirrinseemmota leellishanno.—Kalaqo 18:25.

Heeꞌneemmohu hiittoo seerinniitiro leellishateeti. Qullaawu Maxaafi, Kiristaanu “bikkunninna wodanchatenni” uddiꞌranno gede amaalanno. (1 Ximootewosi 2:9, 10) “Bikkunni” uddiꞌrate yaa, mannu danna sae maalaꞌlanno gede assitannota, busha yorto kakkayissannota woy biso leellishshanno uddano uddiꞌra hoogate yaate. Qoleno “wodancha” heedhunkero, doofaartinota woy likke saꞌino uddano agurre laꞌꞌate baxissannota uddiꞌneemmo. Ikkollana, kuni seeri duuchu manni babbaxxino dani uduunne uddiꞌrannota hoolannoha diꞌꞌikkino. Danchu garinni uddiꞌrankenna seesanke, “Gatisaanchinke roso gaamaarsitanno,” hattono “Maganoho ayirrinye abbitanno.” (Tito 2:10; 1 Pheexiroosi 2:12) Konni daafira, gambooshshu yannara laꞌꞌate baxisanno garinni uddiꞌnummoro, wolu manni Yihowa magansiꞌra dancha illenni laꞌꞌanno gede assinammora dandiineemmo.

Ati kayinni uddanoꞌya dibiiffinona yite gambooshshenke daa waajjitooti. Lowo waagihu woy danna saꞌne maalaꞌlinanni uduunni hooginkero nafa, dancha, xuru nookkitanna baxissanno uddano uddiꞌra dandiineemmo.

• Magano magansiꞌneemmo woyite dancha gede uddiꞌranke mageeshshi geeshsha hasiissinote?

• Danchu garinni uddiꞌratenna seesate kaaꞌlannonke seeri hiikkonneeti?