Uddidhinanni Gari Maganoho Ayirrinye Abbannoho?

1, 2. Yihowa Farciꞌraasine kawajjaame uddano uddidhannohu mayiraati? (Hanafote noo misile lai.)

MITTU Dachete gaazeexi ammaꞌnote sooreeyye assidhino gambooshshi daafira kulanni togo yiino: “Mannu hakko iso iibbillu batiꞌri yannara garimale uddano uddiꞌrino. Yihowa Farciꞌraasine kayinni gambooshshinsa yannara konni garinni diuddidhanno. . . . Labballu ajuno akkaluno koote uddiꞌre karawaata usudhanno; seennunna meentu kayinni haꞌraꞌmitinokkitanna yannate uddano uddiꞌranno.” Yihowa Farciꞌraasine ‘lowo woxinni hirranni imaana uddiꞌratenni seesa agurte, arshimmatenninna kawajjotenni . . . Magano magansiꞌneemmo yaanno’ mannira malino garinni seessannohura duucha wote mannu naadannonsa. (1 Xim. 2:9, 10) Soqqamaanchu Phaawuloosi tenne kulinohu meentoho ikkirono kuni xintu seeri labballuno harunsa hasiissannonsaho.

² Ninke Yihowa soqqamaano ikkinoommohura danchu garinni uddiꞌra hasiissannonke; qoleno soqqammeemmo Magani tenne assinammora hasiꞌranno. (Kal. 3:21) Qullaawu Maxaafi uddiꞌratenna seesate daafira kulannori, kalqete alame woꞌmate Aliidiha ikkino Magani iso halaalunni magansiꞌranno manni kawajjaame uddano uddiꞌrara hasiꞌrannota leellishanno. Hakko daafira, uddiꞌratenna seesate daafira mitto doorsha doodhineemmo yannara ninke hasatto calla balaxisiisa dihasiissannonke. Hatteentenni, Aliidi Mootichanke Yihowa hagiirsiisannori maatiro afate woꞌnaala hasiissannonke.

3. Maganu Israeelete uyino Higgenni uddiꞌrate daafira maa ronseemmo?

³ Lawishshaho, Maganu Israeelete mannira uyino Higge giddo, insa qooxeessinsara noo manni faale harunse amanyoote bainore assannokki gede agarooshshe ikkannonsa seeri no. Tini Higge, labbaahoronna meyatero bande afate qarrisanno garinni uddiꞌnannita Yihowa effire giwannota leellishshanno. (Marro 22:5 nabbawi.) Maganu uddiꞌrate daafira fushshino biddishshi, meyaati labbaaha labbanno gede assitannota, woy labbaahu meyata lawanno gede assitannota, woy labbaahanna meyata bada qarra ikkitanno gede assitanno uddano uddiꞌnanita baxannokkita xawise leellishanno.

4. Kiristaanu kawajjaame uddano doodhanno gede mayi kaaꞌlannonsa?

⁴ Maganu Qaali giddo, Kiristaanu kawajjaame uddano doodhanno gede kaaꞌlannonsa seeri no. Heeꞌneemmowi woy budinke woy ayyarete gari baxiha ikkirono, konne seera harunsa hasiissannonke. Hiitti uddano danchateronna hiitti bushatero tittire kulanno biddishshi dihasiisannonke. Qullaawa Borro seera harunsine uddiꞌneemmo uddano uminkenni doodha hasiissannonke. Konninni aanchine uddiꞌneemmo uddano doodhineemmo yannara, ‘Magano hagiirsiisannoha’ hattono qullaawa fajjosi ledo sumuu yaanno doorsha doodhineemmo gede kaaꞌlannokeha Qullaawu Maxaafi seera ronseemmo.—Rom. 12:1, 2.

“MAGANU SOQQAMAANO IKKANKE LEELLINSHEEMMO”

5, 6. Uddiꞌneemmo uddano hiittoota ikka hasiissannose?

⁵ Soqqamaasinchu Phaawuloosi qullaawu ayyaaninni 2 Qorontoosi 6:4 giddo nooha lowo geeshsha hasiisanno seera kulino. (Qummeeshsha nabbawi.) Uddiꞌneemmo uddano ayimmanke daafira lowore kultanno. Batinyu manni, uddiꞌneemmonna seenseemmo gara lae ninke daafira coyiꞌranno. (1 Sam. 16:7) Hakko daafira, ninke Maganu soqqamaano ikkinoommohura, mitte uddano baxissinonkehura woy injiitinonkehura calla uddiꞌra dihasiissannonke. Maganu Qaali giddo noo seeri, bisoho qaꞌmitinota, biso leellishshannotanna busha yorto kakkayissanno uddano uddiꞌneemmokki gede assannonke. Qoleno kuni seeri, teeda leellishshanno uddano uddiꞌra hasiissannonkekkita leellishanno. Mannu ninke lae saalanno woy shawwu yaanno gede assitanno uddano uddiꞌra horo dihasiissannonke.

⁶ Doofaartinokkitanna likkanya uddano uddiꞌneemmoha, hattono danchu garinni seenseemmoha ikkiro, Aliidi Mootichinke Yihowa soqqamaano ikkinoommotera mannu ayirrisankera dandaanno. Qoleno, kuni manni halaalaancho Magano magansiꞌrannoha ikkara dandaanno. Hattono, kawajjaame uddano uddiꞌranke ninke hiitte dirijjite miillaatiro badde leellishshanno. Qoleno kawajjaame uddano uddiꞌnemmoha ikkiro, sabbankeemmo manni kulleemmonsata heeshsho gatissanno sokka macciishshara dandaanno.

7, 8. Roorenkanni kawajjaame uddano uddiꞌra hasiissannonkehu mamooteeti?

⁷ Qullaawa Maganonke Yihowa, ayyaanaamittete roduuwankenna sabbankeemmo manna ayirrinseemmohura, Maganoho ayirrinye abbitannotanna mannu sabbankeemmo sokka macciishshanno gede assitanno uddano uddiꞌneemmo. (Rom. 13:8-10) Roorenkanni ayyaanaamittete coye assineemmo wote lawishshaho, gambooshshe haꞌneemmonna sabbankeemmo yannara kawajjaame uddano uddiꞌra hasiissannonke. “Magano magansiꞌneemmo” yaanno manni uddiꞌranno garinni uddiꞌra hasiissannonke. (1 Xim. 2:10) Mittowa kawajjaame assine laꞌnanni uddano wolewa kawajjaame ikka hooggara dandiitanno. Ikkollana baalanti Yihowa Farciꞌraasine qooxeessinsa budi ledo sumuu yaanno garinni manna giwissannokki uddano uddidhanno.

⁸ 1 Qorontoosi 10:31 nabbawi. Jajjabba gambooshshuwa haꞌneemmo yannara, uddiꞌneemmo uddano alamete faale haꞌrunsineemmota leellishannota ikkitukkinni, kawajjaamenna likkanya ikka hasiissannose. Galleemmo hoteelewa milli yineemmo yannara, woy qoqqowu gambooshshi hanafara albaanninna goofihu gedensaanni boohaarreemmo wote garimalenna doofaara uddano uddiꞌneemmokki gede qoropha hasiissannonke. Hatto ikkiro, Yihowa Farciꞌraasine ikkankenni disaalleemmo. Qoleno, faro afiꞌneemmo yanna baalantera salfantummokkinni sabbankeemmo.

9, 10. Uddiꞌneemmore doodhineemmo yannara Filiphisiyusi Sokka 2:4 harunsa hasiissannonkehu mayiraati?

⁹ Filiphisiyusi Sokka 2:4 nabbawi. Kiristaanu uddiꞌranno gari ayyaanaamittete roduuwansa kaaꞌlanno woy gawajjanno gara heda hasiissannonsahu mayiraati? Tenne assa hasiissannonsahu mittu korkaati Maganu soqqamaano aante noota Qullaawu Maxaafi amaale harunsate sharrantannohuraati: ‘Uullate aana noota tenne gobba yorto duucha shiiyye. Hakkurino foorrete, battaawate, maalu yortooti, busha halchooti, kaphu maganna magansiꞌrate yortooti.’ (Qol. 3:2, 5) Ayyaanaamittete roduuwinkera tenne amaale harunsa qarra ikkitannonsa gede assa dihasiissannonke. Alba amanyoote bainore assitanno roduuwi xaano busha yorto qeeꞌlate sharrantanni nooha ikkara dandaanno. (1 Qor. 6:9, 10) Konnira, insara tenne assa qarra ikkitannonsa gede assa dihasiissannonke.

¹⁰ Ayyaanaamittete roduuwinke ledo heeꞌnoommo wote uddiꞌneemmo gari, songo amanyootu xuri nookkita ikkitinota leellishannoha ikka hasiissannosi. Gambooshshu yannarano ikko wolewa xaandeemmo wote tenne assa hasiissannonke. Uddiꞌneemmo uddano doodhate qoosso noonke. Ikkollana, baalinke wolootu amanyootu xuri nookkire ikkite heedhanno gede, ayewoteno Maganu albaanni qullaawa ikkinore heddannonna coyidhanno gede, hattono danchu amanyooti heeꞌrannonsa gede kaaꞌlitanno uddano uddiꞌra hasiissannonke. (1 Phe. 1:15, 16) Qoleno, addu baxilli “seerimale gede diꞌꞌikkanno; . . . umisira diroorsiꞌranno.”—1 Qor. 13:4, 5.

HEEꞌNOOMMO YANNARANNA BAYICHIRA MALTINO UDDANO

11, 12. Uddiꞌneemmo uddano doodhineemmo yannara maa heda hasiissannonke?

¹¹ Maganu soqqamaano uddidhanno uddano doodhitanno yannara, ‘woꞌmunkurira yanna noota’ qaagganno. (Ros. 3:1, 17) Ayyarete garinna wogga soorrantanno yannara uddiꞌneemmo garino babbaxxara dandaannoti egennantinote. Heeꞌnoommo gari babbaxxanno yannarano uddiꞌneemmo uddano babbaxxitinota ikkitara dandiitanno. Ikkollana, Yihowa seeri ayyarete garinni disoorramanno.—Mil. 3:6.

¹² Ayyare iibbitanno yannara, kawajjaamenna likkanya uddano doodha shota ikka hooggara dandiitanno. Ikkollana, roduuwinke bisoho qaꞌmitinota woy biso leellishshanno uddano uddiꞌra hoongummoro hagiidhitanno. (Iyo. 31:1) Baaru qaccera woy waa daankanni boohaarreemmo yannarano, uddiꞌneemmo uddano kawajjaame ikka hasiissannose. (Law. 11:2,20) Alamete noo manni, waa daahanno yannara biso leellishshanno uddano uddiꞌrannoha ikkirono, Yihowa soqqamaano kayinni qullaawu Maganira ayirrinye abbitanno uddano uddiꞌra hasiissannonsa.

13. Uddiꞌneemmo uddano doodhineemmo yannara 1 Qorontoosi 10:32, 33 aana noo amaale harunsa hasiissannonkehu mayiraati?

¹³ Kawajjaame uddano dhoodhate kaaꞌlannonkehu woluno Qullaawu Maxaafi seeri no. Tenne assineemmo yannara ayyaanaamittete roduuwinkerano ikko wolu manni tiiꞌꞌira guficho ikkannore assineemmokki gede qoropha hasiissannonke. (1 Qorontoosi 10:32, 33 nabbawi.) Manna giwissanno uddano uddiꞌneemmokki gede qoropha hasiissannonke. Phaawuloosi togo yee borreessino: “Mitti mittinke, ledo ammanaasine ammaꞌnatenni dhaawate danchanna hagiirsiisannonsa coye assino.” Isi tenne assa hasiissannohu mayiraatiro kulanni “Kiristoosi isonoo dihagiirsiisino” yiino. (Rom. 15:2, 3) Yesuusi umisi hoꞌro agure woloota kaaꞌlino; qoleno woloota kaaꞌla Maganu fajjo wonshate gede asse kiirino. Hakko daafira, ninkeno mitte uddano baxissinonkeha ikkiro nafa, mannu sabbankeemmo sokka macciishshannokki gede assitannoha ikkiro hattenne uddano uddiꞌra dihasiissannonke.

14. Annunna ama oosonsa Maganoho ayirrinye abbitanno uddano dhoodhitanno gede qajeelsa dandaannohu hiittoonniiti?

¹⁴ Kiristaana ikkino anninna ama oosonsa Qullaawu Maxaafi biddishsha harunsitanno gede rosiisa hasiissannonsa. Qoleno, insano ikko oosonsa Magano hagiirsiisanno garinni uddiꞌrannoro, hattono seesannoronna teꞌee buuxa hasiissannonsa. (Law. 22:6; 27:11) Annunna ama oosonsara dancha lawishsha ikke, hattono baxillunni kaaꞌlannonsa biddishsha kulensa oosonsa qullaawa Magano Yihowa ayirrissanno gede kaaꞌla dandaanno. Annunna ama oosonsa kawajjaame uddano afiꞌra dandiitanno garanna base kulansara dandaanno. Oosonsa baxissinonsa uddano calla ikkikkinni soqqantanno Magani Yihowa ayirranno gede assitanno uddano doodha hasiissannonsa.

DOODHATE QOOSSOꞌNE HAYYOTENNI HOROONSIDHE

15. Kawajjaame uddano doodhineemmo gede mayi kaaꞌlankera dandaanno?

¹⁵ Qullaawu Maxaafi giddo Maganoho ayirrinye abbanno doorsha doodhate kaaꞌlannonkehu kaajju biddishshi no. Ikkirono, uddiꞌneemmo uddano doodha dandiineemmo. Miinjinke deerri babbaxxinonte gede doodhineemmorino babbaxxinoho. Ikkirono, uddanonke duuchanka wote doofaartinokkita, likkanya, heeꞌnoommo bayichira maltinotanna qooxeessinke manna giwissannokkita ikka hasiissannose.

16. Kawajjaame uddano afiꞌrate sharrama hasiissannonkehu mayiraati?

¹⁶ Kawajjaame, likkanyanna heeꞌnoommo bayichi ledo sumuu yitanno uddano doodha duucha wote shota ikkitannonkkekkiti egennantinote. Duucha suuqera faashine ikkitino uddano calla heedhanno; hakko daafira likkanyanna bisoho qaꞌmitannokki gurde, qamise, shamizenna bolaale afiꞌrate lowo yanna hasiꞌra hasiissannoha ikkara dandaanno. Ikkirono, roduuwinke danchanna kawajjaame uddano afiꞌrate sharrammeemmo sharro huwattaranna naaddara dandiitanno. Qoleno, baxillaancho ikkinohu iimi Anninke Yihowara ayirrinye abbitanno uddano afiꞌrate yine sharrammeemmo sharro gaabbissannota ikkitukkinni lowo geeshsha hagiidhineemmo gede assitannonkete.

17. Mittu rodii ereeda lossiꞌranno woy lossiꞌrannokki gede assannori maati?

¹⁷ Roduuwu ereeda lossiꞌra hasiissannonsa? Muse Higge mittu manchi ereeda loossiꞌranno gede kultanno. Ikkollana Kiristaanu massagamannohu Muse Higgenni diꞌꞌikkino. (Lew. 19:27; 21:5; Gal. 3:24, 25) Mitu budi garinni mannu dancha gede assine lossiꞌnoonni eereeda digiwanno; hattono ereedu mannu dancha duduwo macciishshannokki gede diassanno. Isinni mitu shoomamino roduuwi nafa ereeda lossiꞌranno. Ikkollana, mitu roduuwi ereeda lossiꞌra hoogara dandaanno. (1 Qor. 8:9, 13; 10:32) Mitu budira woy qooxeessira kayinni Kiristaanu ereeda lossiꞌra ayirrinye diꞌꞌikkitino. Isinni mittu rodii ereeda lossiꞌrasi Maganoho ayirrinye abbanno garinni uddiꞌrannokkihunna seesannokkihu gede, hattono mishaminohu gede assine kiirrannisi gede assitara dandiitanno.—Rom. 15:1-3; 1 Xim. 3:2, 7.

18, 19. Mikiyaasi 6:8 Magano hagiirsiissanno uddano doodhate kaaꞌlitannonkehu hiittoonniiti?

¹⁸ Yihowa uddiꞌneemmonna seenseemmo gara kulannoha mitto mittonka biddishsha tittire kulinokkihura galata hasiissannonke. Hatteentenni isi doodhate qoossonke horoonsiꞌneemmonna Qullaawa Borro seerinni dancha doorsha doodhineemmo gede fajjinonke. Hakko daafira uddiꞌneemmonna seenseemmo garinnino ‘joogoota’ woy quwa saꞌneemmokkire ikkinoommota leellisha dandiineemmo.—Mik. 6:8.

¹⁹ Yihowa qullaawanna keeraancho ikkinota bande anfe isi biddishsha harunsine quwa saꞌneemmokkire ikkinoommota leellisha dandiineemmo; qoleno Yihowa biddishshi nookkiha heeꞌne dianfeemmo. Hattono quwa saꞌneemmokkire ikkinoommota leellishate wolu manni hedo ayirrisa hasiissannonke. Konni daafira, heeshshonke giddo Yihowa biddishsha harunsinenna wolu manni hedo ayirrinse quwa saꞌnummokkinni heeꞌra dandiineemmo.

20. Uddiꞌneemmonna seenseemmo gari woloota ma assannoha ikka hasiissannosi?

²⁰ Uddiꞌneemmo uddano mannu Yihowa Farciꞌraasine ikkinoommota huluullamanno gede assitannota ikka dihasiissannose. Roduuwinkeno ikko wolu manni qullaawu Magani soqqamaano ikkanke afa hasiissannonsa. Isi kaajja seera fushshino; ninkeno konne seera hagiidhinanni harunsineemmo. Kawajjaamu garinni uddiꞌrannonna seesanno roduuwi suwashshu wodani noonsa manni heeshsho gatissannota Qullaawu Maxaafi sokka macciishshanno gede, hattono Yihowa ayirrannonna hagiidhanno gede assannohura galantanninsa. Baalinke “gaacheenanna ayirrinye uddiꞌrino” Magani Yihowara ayirrinye abbanno garinni uddiꞌranke agurroonke.—Far. 104:1, 2.