ROSO 15
Cimeeyye Songote Giddo Soqqantannohu Hiittoonniiti?
Finilaande
Rosiisa
Towaata
Sabbaka
Dirijjitenke giddo damooza baantanna soqqantanno qeesooti dino. Kiristaanu songo kalaqantu warinte gede, yannankerano “Maganu songo allaaltanno gede” ikkado ikkitino cimeeyye shoommanni. (Soqqamaanote Looso 20:28) Tini cimeeyye ayyaanaamittetenni gikki yitinoreetinna songote giddo albisa ikkitannoreeti; qolteno soqqantannohu ‘giddetenni ikkikkinni uminsa fajjonniiti, hattono garimale horo afiˈrate yorte ikkikkinni soqqamate quqquxanteeti.’ (1 Pheexiroosi 5:1-3) Insa ninke kaaꞌlate maa maa loossanno?
Insa ninke daafira heddanno, hattono towaattannonke. Cimeeyye Qullaawa Borronni biddishsha uyitannonke, qolteno songo Yihowawa roore shiqqanno gede kaaꞌlitanno. Konne lowonta hasiisanno qeecha uyinonsahu Magano ikkinota affino daafira, mannisira mootoolle diꞌꞌikkitanno, hatteentenni keerinkera heddanno, qolteno hagiirraamma ikkineemmo gede kaaꞌlitannonke. (2 Qorontoosi 1:24) Mittu allaalaanchi mitte mittenta geꞌrecho hixamanye towaatannonte gede, cimeeyyeno songote giddo nooha mitto mittonka rodoo seekkite egennate woꞌnaaltanno.—Lawishsha 27:23.
Maganu fajjo assineemmo gara rosiissannonke. Cimeeyye ammananke jawaachishate lamalate kiiro songote gambooshshe massagganno. (Soqqamaanote Looso 15:32) Insaneeto qooffattukki soqqantannori kuri labballi, duuchunku gariha sabbakate looso ninke ledo loossanno, hattono konni loosira qajeelsitannonke; konni garinni wongeelu loosirano albisa ikkite loossanno.
Mitto mittonka jawaachishshannonke. Cimeeyye mitti mittinke Yihowa ledo lubbora jaaloommeemmo gede kaaꞌlate, qaenke dagge woy Gambooshshu Addaraashera xaadde Qullaawa Borronni jawaachishshannonke, hattono sheshifachishshannonke.—Yaaqoobi 5:14, 15.
Rooriidi cimeeyye songote loosono agurranna, maalaamittete hasiisannonsare afiˈrateno loossanno, hattono maate noonsareeti; kurirano yannansa uyitanno. Diinaggaabbe soqqantannore kore roduuwa ayirrisa dihasiissannonke?—1 Teselonqe 5:12, 13.
Songote cimeeyyehu loosu qeechi hiikkonneeti?
Cimeeyye mitti mittinkera heddannota leellishshannohu hiittee doogganniiti?