Cimeeyye—Soqqamaasinchu Phaawuloosi Lawishsha Agurtinikkinni Harunse

1-2. Soqqamaasinchu Phaawuloosi lawishshi xaa yannara songote cimeeyye kaaꞌlannonsahu hiittoonniiti?

SOQQAMAASINCHU PHAAWULOOSI ammanate roduuwasi lowo geeshsha baxanno. Isi insa towaatate diinaggaawe loosino. (Soq. 20:31) Ammanate roduuwisi Phaawuloosi lowo geeshsha baxxannohu iseraati. Mitte yannara, Efesooni songora heedhanno cimeeyye galagalte isinni xaaddannokkita affuti iso “cuꞌmidhe wiꞌlitino.” (Soq. 20:37) Diinaggaabbe loossanno cimeeyyeno ammanate roduuwansa lowo geeshsha baxxanno hattono insa kaaꞌlate dandiiture baala assitanno. (Fil. 2:16, 17) Ikkirono mito woyite cimeeyyete qarra ikkanno coyi tuncu yaannonsa. Insa konne qarra dandiite saꞌanno gede kaaꞌlannonsari maati?

² Diinaggaabbe loossannori songonke cimeeyye Phaawuloosi lawishsha xiinxalla dandiitanno. (1 Qor. 11:1) Phaawuloosino ninke gedee manchootilla. Isino guuntete xeꞌne noosi mancho ikkino daafira gara ikkinore assate mito woyite sharrama hasiissinosi. (Rom. 7:18-20) Isira addi addi qarri iillinosi. Kayinni Phaawuloosi hexxo dimudhino hattono hagiirrisi dibaino. Songote cimeeyye Yihowara soqqantanno woyite, Phaawuloosi lawishsha harunsite iillannonsa qarra dandiite saꞌꞌanna hagiirrinsa baꞌꞌannokki gede assiꞌra dandiitanno. Hanni insa tenne assa dandiitannohu hiittoonniitiro laꞌno.

3. Konni birxichira maa xiinxallineemmo? Wolere maa laꞌneemmo?

³ Konni birxichira songote cimeeyyera qarra ikkannonsaha shoole coye xiinxallineemmo: (1) wole looso loossanni heedhenni sabbakate looso loosa, (2) ammanate roduuwansa towaatate yanna gaaꞌma, (3) uminsa laanfe ledo sharramanna (4) wolootu laanfe dandiite saꞌꞌa. Phaawuloosi konne mitto mittonka qarra dandee saino garanna songote cimeeyye isi lawishsha harunsa dandiitanno garano laꞌneemmo.

WOLE LOOSO LOOSSANNI HEEDHENNI SABBAKATE LOOSO LOOSA

4. Songote cimeeyyera sabbakate looso albisa ikkite loosa qarra ikkitansara dandiitannohu mayiraati?

⁴ Tini qarra ikkitansara dandiitannohu mayiraati? Songote cimeeyyera, sabbakate looso albisa ikkite loosano agurranna wolu lowo loosi noonsa. Lawishshaho insa giddo batinyu Kiristaanu Heeshshonna Soqqansho gambooshshira liqambarticha ikkitanno hattono Songonnita Qullaawu Maxaafi Xiinxallo massagganno. Wole kifillano shiqishshannoha ikkara dandaanno. Insa songote soqqamaano qajeelsate lowore assitanno hattono agurtukkinni ammanate roduuwansa jawaachishshanno. (1 Phe. 5:2) Mite cimeeyye Gambooshshu Addaraashenna wole Magano magansiꞌnanni minna minanna gatamarano kaaꞌlitanno. Ikkirono songote giddo noori baalunku roduuwinte gede cimeeyyennihu qaru loosi Maganu Mangisteha dancha duduwo duduwate.—Mat. 28:19, 20.

5. Phaawuloosi sabbakate dancha lawishsha ikkinohu hiittoonniiti?

⁵ Phaawuloosi lawishsha. Phaawuloosira qinaannosi gede kaaꞌlitinositi qara hedo Filiphisiyusi Sokka 1:10 noote; isi hakkiicho “woyyanno coye baddine affinoonnire” ikke yee jawaachishinonke. Phaawuloosi umisi tenne amaale harunsino. Iso soqqamaancho assine shoommoonnisi; isi lowo diro tenne soqqanshosi baalunku coyinni roorse laino. Phaawuloosi ‘gudumaalehonna minunni mine’ haꞌre sabbakino. (Soq. 20:20) Isi sabbakinohu barru giddo boode saate woy lamalate giddo mitto barra calla diꞌꞌikkino. Phaawuloosi afiꞌri faro baalate sabbakino! Lawishshaho isi Ateenaho jaallasi agarinowa heeꞌre maccaha ikkino mannira dancha duduwo kule dancha guma afiꞌrino. (Soq. 17:16, 17, 34) Phaawuloosi usurame noo yannara nafa qooxeessisira noo mannira sabbakino.—Fil. 1:13, 14; Soq. 28:16-24.

6. Phaawuloosi wolootu ma assitanno gede qajeelsino?

⁶ Phaawuloosi yannasi danchu garinni horoonsiꞌrino. Isi duucha woyite wolootu ledosi soqqantanno gede koyisino. Lawishshaho isi umo misiyoone ikke haꞌri woyite Maarqoosi yinanniha Yohaannisi ledosi adhe haꞌrino; layinkimeeshsho haꞌri woyite qole Ximootewoosi adhe haꞌrino. (Soq. 12:25; 16:1-4) Phaawuloosi kuri labballi songo qineessitanno gara, roduuwa towaattanno garanna worba rosiisaano ikkitanno gara diinaggaawe qajeelsinonsati dihuluullissannote.—1 Qor. 4:17.

7. Songote cimeeyye Efesooni Sokka 6:14, 15 noota Phaawuloosi amaale harunsa dandiitannohu hiittoonniiti?

⁷ Ninke maa ronseemmo? Songote cimeeyye minunni mine hadhe calla ikkikkinni afidhu faro baalate sabbakate qixxaabbinore ikkite Phaawuloosi lawishsha harunsa dandiitanno. (Efesooni Sokka 6:14, 15 nabbawi.) Lawishshaho dikkotenni mitore hidhitanno woyite woy loosu basewa farciꞌra dandiitanno. Woy Magano magansiꞌnanni minna mina kaaꞌlitanno woyite qooxeessu mannira farciꞌra hattono mine minnanni uduunne hirtanno woyite hiranno mannira farciꞌra dandiitanno. Cimeeyye soqqantanno woyite Phaawuloosi gede songote soqqamaanonna woloota qajeelsa dandiitanno.

8. Mito woyite mittu cimeessira mayyaa hasiissannosiha ikkara dandaanno?

⁸ Cimeeyye, songote loosi woy woradinsa giddo loossanno loosi sabbakate loosira yanna hoogganno gede assansara wodha dihasiissannonsa. Insa loosoho quwa saꞌannokkire ikkate, uyinanninsa looso mito woyite didandeemmo yaa hasiissannonsaha ikkara dandaanno. Insa huuccatto assidhe hedduhu gedensaanni, uyinanninsa looso maahoyye yite adhituro roore hasiisanno coyira yanna hooggannota huwattara dandiitanno. Roore hasiisanno coyi giddo mitu lamalate kiiro maatete magansiꞌra massagate, diinaggaawe sabbakate woy oosonsa soqqanshote qajeelsate. Mitootaho uyinanninsa looso adha giwa qarra ikkitansara dandiitanno; kayinni Yihowa, insa loosoho quwa saꞌꞌa hasiissannonsakkita afinota addaxxa dandiitanno.

AMMANATE RODUUWANSA TOWAATATE YANNA GAAꞌMA

9. Loosu batiꞌrannonsa cimeeyyera qarra ikkansara dandaannori maati?

⁹ Tini qarra ikkitansara dandiitannohu mayiraati? Yihowa mannira lowo fonqoli iillannonsa. Tenne goofimarchu yannara ninke baalunkura jawaante, kaaꞌlonna shesho hasiissannonke. Mito woyite mitootaho busha gade agurate kaaꞌlo hasiissannonsa. (1 Tes. 5:14) Cimeeyye Yihowa mannira iillannonsa fonqolo baala hoola dandiitannokkiti egennantinote. Ikkirono Yihowa, cimeeyye geꞌreewosi jawaachishatenna agarate dandiiture baala assitara hasiꞌranno. Ikkina loosu batiꞌrinonsa cimeeyye kaaꞌlo hasiissannonsare kaaꞌlate yanna afiꞌra dandiitannohu ma garinniiti?

10. Umi Teselonqe 2:7 kultanno garinni Phaawuloosi Yihowa manna towaatinohu ma garinniiti?

¹⁰ Phaawuloosi lawishsha. Phaawuloosi afiꞌri faro baalate ammanate roduuwasi galatanna jawaachisha hasiꞌranno. Songote cimeeyyeno Yihowa manna shaqqillunninna baxillunni towaatte Phaawuloosi lawishsha harunsate sharrantanno. (1 Teselonqe 2:7 nabbawi.) Phaawuloosi ammanate roduuwasi baxannonsatanna Yihowano baxannonsata buuxisinonsa. (2 Qor. 2:4; Efe. 2:4, 5) Isi songote giddo noo roduuwa jaallasi gede asse laino hattono insa ledo yanna sayisino. Phaawuloosi insara waajjishinosirenna laanfesi faajjete kule insa ammanannonsata leellishino. (2 Qor. 7:5; 1 Xim. 1:15) Ikkirono Phaawuloosi umisi qarra diꞌꞌillachishino. Hatteentenni ammanate roduuwasi kaaꞌla hasiꞌrino.

11. Phaawuloosi ammanate roduuwasi amaalinohu mayiraati?

¹¹ Phaawuloosi mito woyite ammanate roduuwasi amaala hasiissinosi. Kayinni isi hatto assinohu insara hanqino daafira diꞌꞌikkino. Isi amaalinonsahu insara hedanno daafiraatinna addi addi qarrinni gatisansara hasiꞌrino daafiraati. Phaawuloosi xawe leellanno garinni amaalate woꞌnaalino hattono amaalesi macciishshitara hasiꞌrino. Lawishshaho Qorontoosi Kiristaanira borreessino sokkara insa kaajjishe amaalino. Isi hatte sokka borreessihu gedensaanni Tiito insawa soyino. Phaawuloosi soyinonsa sokka daafira insa mayitannoro afate quqquxamino. Isi soyinonsa sokka macciishshite adhitinota afiti lowo geeshsha hagiidhino!—2 Qor. 7:6, 7.

12. Cimeeyye ammanate roduuwansa jawaachisha dandiitannohu hiittoonniiti?

¹² Ninke maa ronseemmo? Cimeeyye ammanate roduuwinsa ledo yanna sayisse Phaawuloosi lawishsha harunsa dandiitanno. Togo assa dandiitannoti mitte doogo ammanate roduuwinsa ledo dancha gede hasaawate gambooshshe yannantenni haꞌrate. Jawaante hasiissannonsa roduuwa jawaachishate duucha woyite hasiisannohu shiima daqiiqaatilla. (Rom. 1:12; Efe. 5:16) Phaawuloosi lawishsha harunsanno cimeessi roduuwisi ammana kaajjishate Maganu Qaale horoonsiꞌre jawaachishannonsa; hattono Maganu baxannonsata buuxisannonsa. Hakkiino sae isino baxannonsata affanno gede assanno. Isi duucha woyite insa ledo xaadate woꞌnaalanno hattono afiꞌri faro baalate galatannonsa. Mittu cimeessi roduuwa amaala hasiissannosi woyite amaalesi Maganu Qaali aana xintantinota ikka hasiissannose. Isi roduuwu amaalesi macciishshitara hasiꞌranno daafira xawise kayinni shaqqillunni amaalannonsa.—Gal. 6:1.

UMINSA LAANFE LEDO SHARRAMA

13. Mitto cimeessa laanfesi mayyee hedanno gede assitasira dandiitanno?

¹³ Tini qarra ikkitansara dandiitannohu mayiraati? Cimeeyyeno guuntete xeꞌne noonsareeti. Wolu manninte gede insano sodhanno. (Rom. 3:23) Insara mito woyite laanfensa daafira gara ikkitino lao heedhannonsa gede assiꞌra qarra ikkitannonsa. Mitootu quwa saꞌe laanfensa illachishshe hexxo mudhitara dandiitanno. Wolootu qolte laanfensa mulluri gede assite laꞌaranna biddi assiꞌra hasiissannonsa coyi nookkihu gede assite heddara dandiitanno.

14. Layinki Qorontoosi 4:7 kultanno garinni Phaawuloosi umosi heeshshi assasi laanfesi qeeꞌlanno gede kaaꞌlitinosihu hiittoonniiti?

¹⁴ Phaawuloosi lawishsha. Phaawuloosi umosi heeshshi assannoha ikkino daafira, laanfesi umisi wolqanni qeela dandaannokkita huwatino. Isira Maganu aanno jawaante hasiissinosi. Phaawuloosi alba, Kiristaanu daramanno gede assannoho kakkacha manchooti. Kayinni isi gedensoonni, soꞌrosi ammane adhino hattono laosinna akattasi biddi assiꞌrate maahoyye yiino. (1 Xim. 1:12-16) Yihowa kaaꞌlonni Phaawuloosi baxillaancho, shaqqadonna umosi heeshshi assanno cimeessa ikkino. Isi lowo soꞌro loosinota afino; ikkirono soꞌrosi calla diꞌꞌillachishino; hatteentenni Yihowa gatona yaannosita addaxxino. (Rom. 7:21-25) Isi guuta ikka hasiissannoe yee dihedino. Hatteentenni isi akattasi biddi assiꞌrate jawaate sharramino hattono uyinoonnisi looso umo fushshate isonooto heeshshi asse Yihowa kaaꞌlannosita addaxxino.—1 Qor. 9:27; 2 Qorontoosi 4:7 nabbawi.

15. Cimeeyye guuntete xeꞌnensa daafira hiittoo lao heedhannonsa gede assiꞌra hasiissannonsa?

¹⁵ Ninke maa ronseemmo? Cimeeyye shoommoonnihu insa guuta ikkitino daafira diꞌꞌikkino. Ikkirono Yihowa insa soꞌronsa ammante adhitaranna akatansa biddi assidhara hasiꞌranno. (Efe. 4:23, 24) Mittu cimeessi Maganu Qaale horoonsiꞌre isonooto layiꞌranna biddi assiꞌra hasiissannosi coye biddi assiꞌra hasiissannosi. Hatto ikkiro Yihowa isi hagiirraamonna worba cimeessa ikkanno gede kaaꞌlannosi.—Yai. 1:25.

WOLOOTU LAANFE DANDIITE SAꞌꞌA

16. Mittu cimeessi wolootu laanfe illachishannoha ikkiro mayi kalaqamara dandaanno?

¹⁶ Tini qarra ikkitansara dandiitannohu mayiraati? Songote cimeeyye songote giddo noo roduuwi ledo lowo yanna sayissanno daafira laanfensa huwattara dandiitanno. Cimeeyye qoropha hoogguro kayinni insara hanqitara, kaajjishshe coyidhara woy garimale togooreeti yitara dandiitanno. Phaawuloosi, Sheexaanu hatto assinara hasiꞌrannota kule Kiristaana qorowisiisino.—2 Qor. 2:10, 11.

17. Phaawuloosi ammanate roduuwisi daafira maa hedanno?

¹⁷ Phaawuloosi lawishsha. Isi ammanate roduuwisi daafira woꞌmanka woyite danchare hedanno. Insa loossino soꞌro mito woyite isono xissiissinosi daafira Phaawuloosi laanfensa seekke afino. Ikkirono Phaawuloosi mittu manchi soꞌro loosi yaa hakku manchi bushaho yaa ikkinokkita afino. Isi ammanate roduuwasi baxanno hattono dancha akattansa illachishanno. Phaawuloosi ammanate roduuwisira gara ikkinore assa qarra ikkitannonsa woyite, insa gara ikkinore assa hasidhannotanna kaaꞌlo hasiissannonsata hedanno.

18. Phaawuloosi Ewoodiyanna Siinxiki kaaꞌlino gara kultanno xaggenni maa rosootto? (Filiphisiyusi Sokka 4:1-3)

¹⁸ Hanni lawishshaho Phaawuloosi Filiphisiyusi songora heeꞌrannore lame meya roduuwa kaaꞌlino gara laꞌno. (Filiphisiyusi Sokka 4:1-3 nabbawi.) Ewoodiyanna Siinxikira coyi kawa kaꞌaanni higeennansa jaaloominsa bainoha ikkara dandaanno. Phaawuloosi insara kaajjishe dicoyiꞌrino woy garimale insa togooreeti diyiino; isi dancha akattansa illachishino. Kuri roduuwi ammanaminoreetinna danchu suꞌmi noonsareeti. Phaawuloosi Yihowa insa baxannonsata afino. Phaawuloosi insata dancha akatta illachishino daafira kawa kaꞌaanni higinonsa coye tidhanno gede jawaachishinonsa. Qoleno Phaawuloosi insaha dancha akata illachishasi hagiirrisi baꞌꞌannokki gedenna hatte songora heedhanno roduuwi ledo noosi jaaloomi kaajjanno gede kaaꞌlitinosi.

19. (a) Cimeeyye ammanate roduuwinsaha dancha akata illachisha dandiitannohu hiittoonniiti? (b) Cimeessu Gambooshshu Addaraashe feyanni noota leellishshanno misilenni maa rosootto?

¹⁹ Ninke maa ronseemmo? Cimeeyye ammanate roduuwikkira noonsata dancha akatta illachishate sharrantanno. Baalunku ammanate roduuwinke guuntete xeꞌne noonsareeti; kayinni mittu mittunkura naandeemmonsa gede assitanno akatta noonsa. (Fil. 2:3) Songote cimeeyye mito woyite ammanate roduuwansa amaala hasiissannonsa. Ikkirono cimeeyye Phaawuloosi gede, roduuwu coyidhinohanna assitinoha hanqisanno coye illachishshannokki gede sharrama hasiissannonsa. Hatteentenni insa mittu mittunku rodii Yihowa baxanno gara, Maganoho cince soqqamanni noo garanna assannoha dancha coye illachishshanno. Ammanate roduuwinsaha dancha akata illachishshanno cimeeyye songote giddo hagiirrunna baxillu woꞌmanno gede assitanno.

PHAAWULOOSI LAWISHSHA HARUNSA AGURTINOONTE

20. Phaawuloosi lawishshi cimeeyye kaaꞌlansara dandaannohu hiittoonniiti?

²⁰ Cimeeyye, Phaawuloosi lawishsha xiinxallaꞌne kaaꞌlitannoꞌne. Borronke giddonni lowoha Phaawuloosi lawishsha afiꞌra dandiitinanni. Lawishshaho, Maganu Mangistere Seekke Farciꞌra, yaanno maxaafa (Amaaru Afoo) fooliishsho 12 gufo 17-20 nabbawa dandiitinanni. Phaawuloosi daafira roore rossini kiiro kiꞌneneeto togo yitine xaꞌme: ‘Cimeessa ikkoommo daafira uyinoonnie looso looseemmo woyite Phaawuloosi lawishshi hagiirriꞌya baꞌꞌannokki gede kaaꞌlannoehu hiittoonniiti?’

21. Cimeeyye maa addaxxa dandiitanno?

²¹ Cimeeyye, Yihowa guuta ikka hasiissannoꞌne yiinokkita qaagge; isi ammanantinoonnire ikkitinara hasiꞌranno. (1 Qor. 4:2) Phaawuloosi jawaate loosino daafiranna ammanaminoha ikkino daafira Yihowa hagiidhino. Kiꞌneno Maganoho soqqamate assitinanniri iso hagiirsiisannota addaxxa dandiitinanni. Yihowa “loosoꞌnenna albano ikko xaano qullaawa manna kaaꞌlatenni leellishshinoonnisi baxille dihawanno.”—Ibi. 6:10.