Gambooshshu Addaraashenke Feyanna Gatamara Kaaꞌla Dandiineemmohu Hiittoonniiti?

Yihowa Farciꞌraasinete baalante Gambooshshu Addaraashera Maganunnihu qullaawu suꞌmi no. Konni daafira Addaraashe ishinu nookkita, hattono laꞌꞌate baxissannota ikkitanno gede assanna gatamara, ninkera lowo ayirrinye ikkitinota, qolteno Maganonke magansiꞌneemmo doogga giddo mitte ikkitinota ammanneemmo. Baalunku konne looso kaaꞌla dandaanno.

Gambooshshu gedensaanni Addaraashe feyanna hayishsha kaaꞌli. Mittu mittunku gambooshshi gedensaanni, roduuwu Gambooshshu Addaraashe feye biddi assa hagiirsiissannonsa. Lamalate giddo mitte hinge Addaraashe seekkine fiine hayishshinanni. Mittu songote cimeessi woy songote soqqamaanchi, maa maa feyanna hayishsha hasiissannoro woraqataho borreessinoonni qaagiishshi garinni konne looso qineessanno. Roduuwu Addaraashe fiitanno, hayishshitanno, hoccunni buko fiitanno, wombarra biddi biddi assitanno, shumate mine hayishshitannonna foole hunanno xagicho duntanno, maskootenna hincilaallo fiitannonna hayishshitanno, gamba yiino ishine huntanno, addaraashete gobbayidonna hoowe fiitanno. Ajayi ajeenna dirunni mitte hinge barra murre Addaraashe woꞌmunni woꞌma fiinanninna hayishshinanni. Konni loosi yannara qaaqquullinkeno ninke ledo mitore loossanno gede assine, Magano magansiꞌneemmo bayicho ayirrisa rossanno gede qajeelsa dandiineemmo.—Mekibibi 5:1.

Addaraashe gatamarranni yannara kaaꞌli. Dirunni mitte hinge Gambooshshu Addaraashe giddiidonna gobbayido mitto mittonka coye hixamanyine laꞌnanni. Konni garinni seekkine laꞌni gedensaanni baalunkuri haarooꞌminonna biifino gedeenni heeꞌranno gede assate yanna yannante gatamarranni; tini qolte woxu hasiisikki fulannota gatissanno. (2 Zeena 24:13; 34:10) Maganonke magansiꞌrate maltinoti ishintinokkitenna danchu garinni gatamarroonni Addaraasheeti. Konne looso kaaꞌline Yihowa lubbora banxeemmotanna iso magansiꞌneemmo base lowonta ayirrinseemmota leellinsheemmo. (Faarso 122:1) Tini qolte qooxeessinke manni ninke dancha illenni laꞌꞌanno gede assitanno.—2 Qorontoosi 6:3.

• Magano magansiꞌneemmo base dea hasiissannonkekkihu mayiraati?

• Gambooshshu Addaraashe ishintannokkinna ayewoteno biiffino gedeenni heedhanno gede assate mayi qixxaawo no?