Yesuusi Kiristoosi Ayeti?

1. Yesuusi kalaqaminohu hiittoonniiti?

Yesuusi uullara daye ilamara albaanni iima sokkaasincho ikke heeꞌrino; uullate aana konni garinni ilaminohu iso callaati. (Yohaannisi 8:23) Maganu baalunkurinni umo asse iso kalaqino; Maganu wole baalare kalaqi woyite isi looso kaaꞌlino. Yihowa xaaddote kalaqinohu Yesuusa calla ikkinohura Maganunniha “mitto Beetto” yinanni suꞌmi isira malinoho. (Yohaannisi 1:14) Yesuusi Maganuwiinni wolu kalaqamira sokka iillishanno daafira “Qaale” yineno woshshinoonnisi.​—Lawishsha 8:22, 23, 30; Qolasiyaasi 1:15, 16 nabbawi.

2. Yesuusi uullara dayinohu mayiraati?

Maganu Bayiru Beettisi heeshsho iiminni haare, Maariyaami yinannite mitte Yihudu seemo godowira sayisino. Konni daafira Yesuusira maalu anni dinosi. (Luqaasi 1:30-35) Yesuusi uullara dayinohu (1) Maganunnire halaale rosiisate, (2) qarru giddo heeꞌne nafa Maganu fajjo assineemmo gara leellishatenna (3) guuta heeshshosi “wodo” asse aateeti.​—Maatewoosi 20:28 nabbawi.

3. Wodo hasiissannonkehu mayiraati?

Wodo mitto mancho reyote yoonni gatisate baantanni waagaati. (Wolapho 21:29, 30) Maganu manna kalaqinohu geedharanna reyara diꞌꞌikkino. Tenne mayinni anfeemmo? Maganu umo kalaqino manchira Addaamira, Qullaawu Maxaafi giddo “cubbo” yinoonnire loosiro reyannota kulinosi. Konni daafira Addaami cubbo loosa hoogoommero direyanno. (Kalaqo 2:16, 17; 5:5) Qullaawu Maxaafi yaanno garinni reyo tenne alame “dagginohu” Addaami widoonniiti. Konni garinni Addaami cubbonna cubbu waaga ikkitinota reyo sirchisira baalaho sayisino. Konni daafira Addaamiwiinni ragiꞌnoommote reyote yoonni fushshitannonketi wodo hasiissannonke.​—Roomu Sokka 5:12; 6:23 nabbawi.

Reyotenni wodankera dandaannohu ayeti? Reyineemmo woyite qaxxaꞌꞌammeemmohu uminke cubbira callaati. Guuntete xeꞌne noonsari mannu ooso wolootu cubbira wodo baata didandiitanno.​—Faarso 49:7-9 nabbawi.

4. Yesuusi reyinohu mayiraati?

Yesuusira ninke gede guuntete xeꞌne dinosi. Konni daafira reyanno gede assanno cubbi dinosi; isi horonta cubbo diloosino. Yesuusi reyinohu wolootu cubbiraati. Maganu Beettosi ninkera reyanno gede oye mannu ooso lubbora baxannota leellishino. Yesuusino Annisira hajajame, hattono heeshshosi ninke cubbira sayise oye baxannonketa leellishino.​—Yohaannisi 3:16; Roomu Sokka 5:18, 19 nabbawi.

Yesuusi Reyinohu Mayiraati? yitanno viidiyo lai.

5. Yesuusi xa ma assanni no?

Yesuusi uulla noo waro xiwamaano hursino, reyitinore kayisino, hattono buuto qarrantinore qarru giddonni fushshino. Tenne asse Maganoho hajajamanno mannira albillitte maa assannoro leellishino. (Maatewoosi 15:30, 31; Yohaannisi 5:28) Yesuusi reyihu gedensaanni, Maganu ayyaanaamo biso uddisiise reyotenni kayisinosi. (1 Pheexiroosi 3:18) Yesuusi, Yihowa Moote asse uulla woꞌma gashshate silxaane aasi geeshsha qiniitesiinni ofolle agadhino. (Ibiraawuyaani 10:12, 13) Yesuusi xa Moote ikke iima gashshanni no; iso harunsitannori konne dancha duduwo gobba gosate dudubbanni no.​—Daanieeli 7:13, 14; Maatewoosi 24:14 nabbawi.

Muli barra Yesuusi silxaanesi horoonsiꞌre baalanka qarranna qarra abbitannore hunanno. Yesuusira hajajante iso ammaꞌnitinota leellishshannori baalu uullate aana gannatete hagiidhitanni heedhanno.​—Faarso 37:9-11 nabbawi.