Yesuusi Reyinohu Mayiraati?
Qullaawu Maxaafi mayyaanno?
Yesuusi reyinohu mannu ooso cubbinsara maaro afidhe gawalo nookki heeshsho heedhanno gedeeti. (Rooma 6:23; Efessooni 1:7) Hatteeno agurranna, Yesuusi reyo mannu buutote qarri amadinsaro nafa Maganoho ammanama dandaannota buunxanni gede assitino.—Ibiraawoota 4:15.
Hanni mittu manchi reyo konne baala assitanno gara laꞌno.
Yesuusi reyinohu “cubbinkera maaro afiꞌneemmo [gedeeti].”—Qolaasiyaasi 1:14.
Umi manchi Addaami kalaqami woyite, guutahonna cubbu nookkiho. Ikkollana, isi Maganoho hajajama giwa doodhino. Addaami hajajama hooga woy cubbisi, sirchosi baala baasa gawajjino. Qullaawu Maxaafi tenne xawisanni, “Mittu manchi hajajama giweenna lowo manni cubbaataamma [ikkino]” yaanno.—Rooma 5:19.
Yesuusino guutaho; isi kay horo cubbo diloosino. Hakko daafira, isi “cubbinkera keeraaꞌmate kakkalo” ikka dandaanno. (1 Yohaannisi 2:2) Addaami finqille mannu ooso baala cubbaataamma assitunte gede, Yesuusi reyono iso ammantannori baalu cubbunni keeraaꞌmitanno gede assitanno.
Wole yaattonni, Addaami mannu sircho cubboho sayse hirino. Yesuusi umisi fajjonni ninke daafira reye, mannu ooso umisira woxxino. Konninni kainohunni, “ayino cubbo loosiro . . . Anninkewa kaaꞌlaanchu noonke; isino keeraancho Yesuusi Kiristoosiiti.”—1 Yohaannisi 2:1.
Yesuusi reyinohu “[iso] ammanannohu baalu hegere heeshsho afiꞌranno gede ikkinnina baꞌꞌannokki [gedeeti].”—Yohaannisi 3:16.
Addaami kalaqaminohu hegerera heeꞌrara ikkirono, loosino cubbi reyote qoricha abbinosi. Addaami widoonni “cubbu alame eino; cubbu widoonni reyo daggino; baalunku cubbo loosino daafira reyo manna baalaho iillitino.”—Rooma 5:12.
Hatti hattee ikkitanna, Yesuusi reyo cubbu muso huntannoha calla ikkikkinni iso ammantannorira baalaho reyote yoo agurantannonsa gede assitanno. Qullaawu Maxaafi tenne xaphi asse kulanni togo yaanno: “Cubbu reyote ledo moohinonte gede, Mootichinke Yesuusi Kiristoosi widoonni hegere heeshsho afiꞌnanni gede Maganu eltono keeraanchimmate widoonni mookkaraati.”—Rooma 5:21.
Hige xaa yannara, mannu ooso giddo hegerera heeꞌrinohu dino. Ikkirono, Maganu keeraano mannu oosora hegere heeshsho aara qaale eino; qoleno reyitinorino reyotenni kaꞌe Yesuusi reyonni horo afidhanno gede assanno.—Faarso 37:29; 1 Qorontoosi 15:22.
Yesuusi “reyote geeshsha . . . hajajamannoha ikkino”; konni garinni, mannu aye geeshshano jifamiro woy qarramiro Maganoho ammanama dandaannota leellishino.—Filiphisiyusi 2:8.
Addaami guuta surrenna guuta mannimma noosiha ikkirono, uyinoonnisikkire yore Maganoho finqilino. (Kalaqama 2:16, 17; 3:6) Gedensoonni, qaru Maganu diini Sheexaanu, ‘Magano baxe hajajamanno manchi dino; hakko iso heeshshosi qarru giddo tugannori heeꞌriro hajajamannohu diheeꞌranno’ yee hettisino. (Iyyoobi 2:4) Ikkollana, guutu manchi Yesuusi shettotenna shollinyu reyo reyate geeshsha nafa Maganoho hajajamino hattono isira ammanamino. (Ibiraawoota 7:26) Tini, kaꞌino yekkeero dawaro afidhanno gede assitino: Mittu manchi aye geeshshano jifamiro woy aye geeshshano shetinsisiro, Maganoho ammanama dandaanno.
Yesuusi reyo daafira xaꞌminanni xaꞌmuwa
Yesuusi manna gatisate reya mayira hasiissusi? Maganu reyo mulla hoola didandaanno?
Maganu wodho garinni, “cubbunni afiꞌnanni damoozi reyote.” (Rooma 6:23) Maganu tenne wodho Addaamira maaxiꞌrantenni, hajajama giwa reyote qoricha abbitannota xawise kulinosi. (Kalaqama 3:3) Addaami giwe cubbo loosita, “kaphara dandaannokki Magani” qaalesi wonshino. (Tito 1:2) Addaami sirchisira cubbo calla ikkikkinni cubbu damooza yaano reyono saysino.
Cubbaataammu mannu oosora maltinoti reyo ikkiturono, Maganu ‘eltosi batinye’ leellishinonsa. (Efessooni 1:7) Isi mannu ooso wodate assino qixxaawo, yaano Yesuusa guuta kakkalo asse soyasi, dhagge ikkitanno taashshosinna taalle nookki maarosi leellishshannote.
Yesuusi reyinohu mamooteeti?
Yesuusi reyinohu Ayihudete Faasiki barra, barrihunni ‘honse saateraati.’ (Maarqoosi 15:33-37) Hakku barri yannanke kiiro garinni, Arbe, Dotteessa 1, 33 M.D. ikkanno.
Yesuusi reyinohu hiikkooti?
Yesuusa shinoonnihu “Umu Qooncho yinanni darga” yaano “Ibiraawootu Afiinni Golgoota” yinanniwaati. (Yohaannisi 19:17, 18) Yesuusi waro hakku dargi Yerusaalamete “katamu waalchi gobbaanni” nooho. (Ibiraawoota 13:12) Qullaawu Maxaafi Yesuusa shini woyite mitu manni “xeertote heeꞌre” lainota kulanno daafira, kuni dargi ilaalu aana nooha ikkikki digatino. (Maarqoosi 15:40) Ikkollana, xaa yannara Golgoota yinanni dargi noohu hiikkootiro bande afa didandiinoonni.
Yesuusi reyinohu ma garinniiti?
Batinyu manni Yesuusi masqalaho sutame reyino yaannoha ikkirono, Qullaawu Maxaafi kay togo yaanno: “Annuwanke Magani kiꞌne haqqu aana suttine shitini Yesuusa reyotenni kayisino.” (Soqqamaasinete Looso 5:30) Qullaawu Maxaafi borreessaano Yesuusa shinoonni uduunnicho kulate istawurosi nna zayloon yitannota lame qaalla horoonsidhino. Batinyu egennaammi, tini qaalla mitto mokkollicho woy hossi yiinoha mitto haqqa kultannota huwattino.
Yesuusi reyo qaaga hasiissannohu ma garinniiti?
Ayihudete Faasiki hawarro, Yesuusi rosaanosi ledo heeꞌre damboowa qixxaawo asse togo yee hajajinonsa: “Konne woꞌmanka woyite ane qaagooshshira asse.” (1 Qorontoosi 11:24) Hakkiinni haammata saate gedensaanni, Yesuusa shinoonni.
Qullaawu Maxaafi borreessaano Yesuusa Faasikaho gorrinanni geꞌrechi ledo heewisiissino. (1 Qorontoosi 5:7) Israeelete daga Faasika ayirrisansa borojjimmatenni wolaphitinota qaagiissitannonsante gede, Yesuusi Kiristoosi Reyo Qaagooshshe ayirrisano Kiristaanu cubbunninna reyotenni wolaphinota qaaganno gede assitannonsa. Aganu kiiro garinni Niisaani 14 ayirrinsanniha Faasiku ayyaana ayirrinsannihu dirunni mitte hingeeti; hattonni, umi xibbi diri Kiristaanino Qaagooshshu Ayyaana dirunni mitte higella ayirrisanno.
Diru dirunku, barru Niisaani 14 ledo xaadanno barra, kalqoomunni lowo miliyoone ikkanno manni Yesuusi reyo qaagate gamba yaanno.