Ammaꞌno Lainohunni Hagiirsiisannori Maati?

1. Baalanti ammaꞌno danchate?

Baalante ammaꞌno giddo danchu woy suwashshu wodani noonsa manni dihooganno. Maganu togoo manna dancha illenni laꞌꞌannotanna insara hedannota afa hagiirsiissannote. Ikkollana, lowo bunshe assannohu ammaꞌno harunsanno mannaati; tini dadillissannote. (2 Qorontoosi 4:3, 4; 11:13-15) Odoote rippoortuwa yitanno gara ikkiro isinni, mite ammaꞌno bala tugge manna guddannore, mitte gaꞌre fiite guddannore, olaho karsantannore, hattono qaaqquulle bushiishshannore ikkitino. Togoo coyi Magano baxannoha dancha manna lowo geeshsha dadillisanno!​—Maatewoosi 24:3-5, 11, 12 nabbawi.

Halaalaancho ammaꞌno Maganoho ayirrinye abbitanno; kaphu ammaꞌno kayinni iso dihagiirsiissanno. Togoo ammaꞌno Qullaawu Maxaafi giddo nookkire rosiissanno; lawishshaho Maganunnirenna reyino mannire kapho rosiissanno. Yihowa kayinni mannu halaalesi afara hasiꞌranno.​—Hiziqeeli 18:4; 1 Ximootewosi 2:3-5 nabbawi.

2. Ammaꞌno lainohunni hagiirsiisannori maati?

Sheexaanu alame baxxanni heedhenni Magano banxeemmo yitanno ammaꞌno Yihowa doga didandiitanno. (Yaaqoobi 4:4) Maganu Qaali kaphu ammaꞌno baalanta xaphoomunni “Bayira Baabiloone” yaanno. Baabiloone, hunda Nohi yannahu Baote wayi gedensaanni kaphu ammaꞌno hanaffino katamaati. Maganu, mannu ooso soꞌrisiissannotanna gadadissanno ammaꞌno baalanta muli yanna giddo hedeweelcho hunanno.​—Ajuuja 17:1, 2, 5, 16, 17; 18:8 nabbawi.

Woluno hagiirsiisanno coyi no. Yihowa alamete aana kaphu ammaꞌno giddo billaalle nooha dancha manna dideino. Isi togoo manna halaale rosiise gamba assanni no.​—Mikkiyaasi 4:2, 5 nabbawi.

3. Danchu manni ma assa hasiissannonsa?

Yihowa halaalenna danchare baxanno manni daafira hedanno. Isi togoo manna, ‘Kaphu ammaꞌno agurtine fulle’ yiino. Magano baxanno manni iso hagiirsiisara yee doogonsa soorriꞌrate maahoyye yaanno.​—Ajuuja 18:4 nabbawi.

Umi xibbi diro, danchu manni Yesuusi soqqamaasine dancha duduwo kultunsata hagiirrunni macciishshino. Yihowa insara danchanna hexxo afidhinota haaro hagiirraame heeshsho heeꞌnanni gara rosiisinonsa. Insa ninkera dancha lawishshaati, korkaatuno dancha duduwo macciishshitu woyite heeshshonsa giddo Yihowa balaxisiissino.​—1 Teselonqe 1:8, 9; 2:13 nabbawi.

Kaphu ammaꞌno giddonni fule iso magansiꞌranno manniwa daanno manna Yihowa anga fane haaꞌrannonsa. Yihowa ateno anga fane haaꞌrannohe gede maahoyye yaattoha ikkiro, isi ledo jaalooꞌmatto, mereeronsa baxille afidhinore Yihowa magansidhannore haaro jaalla afiꞌratto, hattono hegeri heeshsho afiꞌratto.​—Marqoosi 10:29, 30; 2 Qorontoosi 6:17, 18 nabbawi.

4. Maganu uulla woꞌmate aana hagiirre abbannohu hiittoonniiti?

Muli yanna giddo kaphu ammaꞌnora busha yoo yinanni; kuni dancha duduwooti. Tini yoo, gobba gosa gadadunni fooliishshidhanno gede assitanno. Hakkuyi gedensaanni kaphu ammaꞌno manna disoꞌrisiissanno, hattono mannu mereero babbadooshshe dikalaqqanno. Hakkawote lubbote noori baalunku mitto halaalaancho Magano calla mittimmatenni magansidhanno.​—Ajuuja 18:20, 21; 21:3, 4 nabbawi.