Ermiyaasi Yihoware Coyiꞌra Diagurino

Mito wote mannu Yihoware kayinse coyiꞌneemmo wote haariimara woy hanqara dandaanno. Tini Maganunnire mannaho kula agurate hendeemmo gede assitankera dandiitanno. Ati hatto yite hedde egennootto?— Qullaawu Maxaafi mittu Yihowa baxanno wedellichi xagge kulannonke; isi Yihoware kayise dicoyiꞌreemmo yaate geeshsha iillino yanna no. Isi suꞌmi Ermiyaasiiti. Hanni isi xagge lende ronso.

Ermiyaasi shiimu noo waro, Yihowa mannu bunshe assa aguranno gede kulara hajajinosi. Tenne kula isira kabbaade ikkitinosi, qoleno isi waajjino. Isi Yihowa togo yiino: ‘Mayyee coyiꞌreemmoro diafoommo. Ani qaaqqohowe.’ Yihowa kayinni, ‘Waajjitooti ani kaaꞌleemmohena’ yiisi.

Konni daafira Ermiyaasi mannaho, bunshe assa agura hoogginiro qaxxaꞌꞌantinanni yee kula jammari. Mannu Ermiyaasi yiinore assinoha lawannohe?— Diassino. Isinni haariiminosi; hattono lowo geeshsha hanqinosi. Mitu manni isinni shaasira nafa kaino! Ermiyaasi hakkawote hiitto ikkinoha lawannohe?— Isi waajje togo yiino: ‘Xaate mannaho Yihoware kayise dicoyiꞌreemmo.’ Hatto yoolla ikkinnina coyiꞌra agurinoni?— Diagurino. Isi Yihowa lowo geeshsha baxanno daafira isire mannaho kula diagurino. Ermiyaasi Yihoware coyiꞌra agurinokki daafira Yihowa gawajjotenni agarinosi.

Lawishshaho, mitte higge bushuullu mannooti sabbu woꞌmino balera tuggusi. Hakko sagaleno waano afiꞌra didandaanno. Kuri mannooti iso hakko tugginohu reyara yiteeti. Ikkollana Yihowa kaaꞌleennasi reyotenni gatino!

Ermiyaasi xaggenni maa rosatto?— Isi mito wote waajjinoha ikkirono, Yihoware coyiꞌra diagurino. Yihoware kayisse coyiꞌratto wote, mannu haariimara woy hanqahera dandaanno. Tini saalfachishshahera woy waajjishshahera dandiitanno. Ikkirono Yihoware kayisse coyiꞌra horo agurtooti. Isi Ermiyaasi kaaꞌlinonte gede, ateno kaaꞌlannohe.