Yihowa Ermiyaasi Sabbakara Soyino

Yihowa Yihudu dagara masaalaancho ikkanno gede Ermiyaasi doorino. Yihowa Ermiyaasira, ‘Hadhe mannaho busha coye assa agurre yite kuli’ yiisi. Ermiyaasi kayinni togo yii: ‘Yihowa, ani shiima beetto ikkoommo daafira, coyiꞌnanni gara diafoommo.’ Yihowa qole togo yiisi: ‘Coyiꞌrattore ani kuleemmohena waajjitooti. Qoleno kaaꞌleemmohe.’

Yihowa, Ermiyaasi mannu giddonni jajjabba gashshaano gamba asse albansaanni gambayicho hiiqqanno gede kulisi; hakkiinni, ‘Yerusaalameno konni gambayichi gede ikkite hiiqqaqqantanno’ yii yiinosi. Ermiyaasi Yihowa assi yiinosire assita gashshaano lowo geeshsha hanqitu. Pashihuuri yinanni kakkalaanchi Ermiyaasi gananni masse angasinna lekkasi xullo fushshinoonni xaawuli giddo eesse usuri. Ermiyaasi hashsha woꞌma milli yiikkinni gali. Layinki soodo Pashihuuri mare tirisi. Hakkiinni Ermiyaasi, ‘Xaate disabbakeemmo’ yii. Kayinni isi hexxo mudhe sabbaka agurinoyya? Diagurino. Isi togo yiino: ‘Konni kaꞌa disabbakeemmo yuummoro, Yihowa sokka giddoꞌya giirate gede ittannoe. Konni daafira sammi yee diafeemmo.’ Ermiyaasi manna qorowisiisa diagurino.

Yannate gedensaanni Yihudaho wolu moote moohino. Kakkalaasinenna kaphu masaalaano Ermiyaasi kulannonsa sokka gibbu. Insa roorrootaho, ‘Kuni manchi reya hasiissannosi’ yitu. Ermiyaasi togo yii: ‘Assoommori nookkiha beebbate shitinaeraati. Konne coye kuleemmoꞌne gede soyinoehu Yihowaati.’ Roorrootu tenne macciishshituti, ‘Kuni manchi reya dihasiissannosi’ yitu.

Ermiyaasi sabbaka diagurino; konni daafira roorrootu lowo geeshsha hanqitu. Insa moote, ‘Ermiyaasi shii’ yitu. Moote ‘Iso baxxini gede assidhe’ yiinsa. Hakkiinni insa Ermiyaasi reyanno gede qile bale giddo tuggusi; hatti bale sabbu calla woꞌminote. Ermiyaasi sabbu giddo lixa hanafi.

Hakkunni gedensaanni mootete mine soqqamannohu Ebedimeleki yinanni manchi mootete togo yii: ‘Roorrootu Ermiyaasi balete tuggino! Isi hakko keeshshiro reye baꞌꞌanno.’ Moote, Ebedimeleki 30 manna adhe haꞌre Ermiyaasi balete giddonni fushshanno gede hajaji. Mittu coyino Ermiyaasi sabbakannota hoolinosikkita afitto? Ninkeno isi lawishsha harunsa dihasiissannonke?