GAFA 3
Qarra Tira Dandiinannihu Hiittoonniiti?
“Mimmito lubbora baxxe; korkaatuno baxillu lowo cubbo diwanno.” —1 Pheexiroosi 4:8
Galtekkinna ati mittimmate heeshsho heeꞌra hanaffinanni wote, addi addi qarri iillannoꞌne. Kuni qarri kalaqamannohu lamunku heddinanni gari hattono mitto coye laꞌinanni gari babbaxxanno daafira ikkara dandaanno. Qoleno wolu raginni woy hendoonnikki coyinni qarru kalaqamara dandaanno.
Qarru tuncu yaanno wote noo coye ammane adha qarrissara dandiitanno; Qullaawu Maxaafi kayinni iillinonke qarra xooqa agurre tirreemmo gede amaalannonke. (Maatewoosi 5:23, 24) Qullaawu Maxaafiha xintu seera harunsaꞌne qarra tirate dancha mala ikkitannoꞌne.
1 IILLINOꞌNE QARRI DAAFIRA HASAABBE
QULLAAWU MAXAAFI MAYYAANNO? “Coyiꞌrate yanna no.” (Mekibibi 3:1, 7) Yanna gaaꞌmitine iillinoꞌne qarri daafira hasaabbe. Kaꞌino hajo daafira macciishshaminoꞌnere woy heddinoonnire galteꞌnera maaxxinikkinni kulle. Duuchanka wote galteꞌne ledo “halaale coyidhe.” (Efesooni 4:25) Kiꞌneneeto qeeꞌla qarra ikkitannoꞌne wote nafa galteꞌne ledo yekkeerantinoonte. Shaqqillunni coyiꞌra shiimu coyi batiꞌre gaaro kalaqannokki gede assitanno.—Lawishsha 15:4; 26:20.
Mittu coyira sumuu yaa hoogginanni wote nafa, shaqqadda ikke; galteꞌne baxxinannitanna ayirrissinannita leellisha deꞌinoonte. (Qolasiyaasi 4:6) Dandaamiꞌne deerrinni, kalaqamino qarra mulenni tirre; qoleno mimmito coyishiisha gibbinoonte.—Efesooni 4:26.
MAA ASSA DANDIITINANNI?
Kalaqamino qarri daafira hasaawate woyyitanno yanna doodhe
Galtekki coyidhanno wote, mereero eittokki macciishshi. Coyiꞌrate tarakki agadhi
2 MACCIISHSHE HATTONO WODANCHE
QULLAAWU MAXAAFI MAYYAANNO? “Kiꞌne kiꞌneneewa lubbora baxamme. Mimmito ayirrisate umire ikke.” (Roomu Sokka 12:10) Macciishshitinanni gari lowore soorranno. Galteꞌne mitto coye laꞌanno gara huwatate woꞌnaalle; konne assate “kuꞌu kuꞌuyi hedo huwattinannire ikke,” hattono “shooshaqoota ikke.” (1 Pheexiroosi 3:8; Yaaqoobi 1:19) Wodana wolewa wortine, macciishshitinanni heedhinoonniha lawissinoonte. Dandaamannoha ikkiro, assitinanni heedhinoonnire agurtine galteꞌne yitannore macciishshe woy gedensaanni hasaabbinanni gede xaꞌme. Galteꞌne qahiꞌne gede ikkikkinni aggaareꞌne gede assitine laꞌinanniha ikkiro, ‘hanqoho dimuddantinanni.’—Mekibibi 7:9.
MAA ASSA DANDIITINANNI?
Coyi adhama giwihero nafa, woꞌmu wodanikkinni macciishshi
Galtekki coyidhanno qaalla calla laꞌꞌa agurte yitara hasidhinore wodanchate woꞌnaali. Hattono galtekki coyidhanno wote bisise millimmonna qoonqose gara huwati
3 MURTINOONNI COYE ASSE
QULLAAWU MAXAAFI MAYYAANNO? “Diinaggaambe loonsanni loosi baalunku horo aanno; mullu hasaawi kayinni buxima abbanno.” (Lawishsha 14:23) Mittu qarri daafira hasaabbine ma garinni tirtiniro woyyannoro sumuu yaaꞌne calla diguddanno. Lamunku sumuu yitine murtinoonni coye assa hasiissannoꞌne. Tennera lowo looso loosanna sharrama hasiissannoha ikkiro nafa tini kiissannote. (Lawishsha 10:4) Mitteenni kaaꞌlantine woy buusantine loossinanniha ikkiro, diinaggaabbine loossinanni loosinni “dancha guma” afidhinanni.—Mekibibi 4:9.
MAA ASSA DANDIITINANNI?
Qarraꞌne tirate mittu mittunku assa hasiissannoꞌne coye hasaabbine xaadisidhe
Maa woyyeessidhinoonniro yannate kiiro layidhe