Yihowa Iyosaafiixi Kaaꞌli

Yihudu Moote Iyosaafiixi Baꞌꞌaaliha kakkalote bayichonna kaphu maganna hunino. Isi mannu Yihowa seera afara hasiꞌrino. Konni daafira, gashshaanonna Leewaawoota Yihowa seera Yihudu gobba baalate rosiissanno gede soyino.

Yihudu mule nooti wole daga, Yihowa mannasi kaaꞌlannota affino daafira insa kisiꞌra waajjitino. Wole agurina insa Moote Iyosaafiixira mitore uyitinosi. Kayinni Moaabi, Amooninna Edoomi daga Yihudu ledo olantara daggu. Iyosaafiixi Yihowa kaaꞌlo hasiissannosita afino. Isi baalunku labballi, meentinna qaaqquulli Yerusaalame daanno gede assi. Iyosaafiixi insa baalunku albaanni togo yee huuccatto assi: ‘Yihowa, ati kaaꞌla hoogittonkero, qeelle dianfeemmo. Eeggatena maa assineemmoro kulinke.’

Yihowa Iyosaafiixi huuccatto macciishshe togo yii: ‘Kaaꞌleemmoꞌnena waajjitinoonte. Gatiseemmoꞌne gara laꞌinannina, kiꞌne darga dargaꞌne calla amaddine uurre.’ Yihowa insa gatisinohu hiittoonniitiro afootto?

Layinki soodo, Iyosaafiixi faarsanno manna doore, olantote albaanni haꞌranno gede assi. Insa Yerusaalamete kataminni kayisse Teqoa yinannihu olammanni dargi geeshsha mitteenni hadhu.

Faarsaano qoonqonsa naggi assite Yihowa guwissuta, Isi mannisira olami. Yihowa Amooninna Moaabi olantora garu baꞌꞌannonsa gede asseenna insa mimmito qasse shitu; insa giddo mittuno gatinohu dino. Yihowa kayinni Yihudu daga, olantonna kakkalaasine agarinonsa. Hakko qooxeessira heeꞌranno manni baalu Yihowa assinore macciishshiti xaano isi dagasira haꞌlanni noota huwati. Yihowa mannasi gatisannohu hiittoonniiti? Duucha doogonniiti. Yihowa mannasi gatisanno gede kaaꞌlannosi manchi dihasiisannosi.