Hegerera Heedhanno Mangiste

Mitto hashsha Moote Nabukadanatsoori haaqee haaqiiꞌri. Tini haaqee goxichu giwannosi gede assitu. Isi kiilaanosi isiwa woshshe, ‘Haaqee tirreꞌꞌe’ yiinsa. Insa ‘Moote, hanni haaqiiꞌrootto haaqee kulinke’ yitusi. Nabukadanatsoori kayinni, ‘Deeꞌni! Haaqiiꞌroommo haaqee kiꞌne umiꞌne kulleꞌꞌe. Kula hoogginiero sheemmoꞌne’ yiinsa. Kiilaano xaano, “Ninke tiro kulleemmohena, haaqeekki maatiro kulinke” yitusi. Hakkiinni isi, ‘Dogginanni heedhinoonnie. Haaqiiꞌroommori maatiro kulleꞌꞌe yoommoꞌne!’ yiinsa. Insa mootete, ‘Ati yoottore assa dandaanno manchi dino. Kuni dandiinannikki coyeeti’ yitu.

Nabukadanatsoori lowo geeshsha hanqe, Baabiloonete heedhanno hayyoolle baala shine gundanni gede hajaji. Daanieeli, Sidiraaqi, Misaaqinna Abidinaagono shinaraati. Daanieeli, moote shiima yanna agaranno gede xaꞌmi. Hakkiinni Daanieelinna jaallasi Yihowa kaaꞌlannonsa gede huuccatto assidhu. Yihowa maa assiyya?

Yihowa ajuujatenni Daanieelira Nabukadanatsoori haaqiiꞌrino haaqee tironte ledo leellishisi. Layinki barra, Daanieeli mootete soqqamaanchiwa mare, ‘Moote haaqiiꞌrino haaqee ani tireemmona hayyoolle mittono shitooti’ yii. Hakkiinni Mootete soqqamaanchi, Daanieeli Nabukadanatsooriwa massi. Daanieeli mootete togo yii: ‘Maganu konni kaꞌa ikkanno coye leellishinohe. Haaqiiꞌrootto haaqee tenneeti: Umiido culkunni seekkinoonnita, gagasonna anga birrunni seekkinoonnita, godowanna giwooda camotenni seekkinoonnita, mogolla siwiilunni seekkinoonnita, lekka kayinni gama darate siwiilunni, gama darate dorunni seekkinoonnita lowo misile laootto. Hakkiinni kinchu ilaalunni gongoꞌme dirre misilete lekka gane hiiqqaqqi. Misile cancanante buluulo ikkiteenna bubbe adhite hadhu. Misile gane hiiqqi kinchi kayinni baatto baala woꞌme lowo ilaala ikki.’

Hakkiinni Daanieeli togo yii: ‘Haaqiiꞌrootto haaqee tiro tenneeti: Culku umi, ate gashshooteeti. Birru gagasinna anga, atera gedensaanni daanno gashshooteeti. Hakkiinni baatto baala gashshannohu camote gede ikkino gashshooti daanno. Hakkiinni aane daanno gashshooti siwiilu gede ikke kaajjanno. Goofimarchoho, gama darate siwiilu gede kaajjadu, gama darate doru gede wolqiweelu lamewa beehamino gashshooti daanno. Ilaalu aaninni gongoꞌme dirri kinchi Maganu Mangisteeti. Tini Mangiste kuri baalanka gashshoote coꞌo assite hunte ise hegerera gashshitanno.’

Hakkiinni Nabukadanatsoori Daanieeli albaanni kumbuuli. Isi togo yii: ‘Tenne haaqee xawisinohehu Maganokkiiti. Isi gedeehu wolu Magani dino.’ Nabukadanatsoori Daanieeli shaa agure, hayyoolle baalate roorricha assisi; qoleno Baabiloonete gashshaancho assinosi. Yihowa Daanieeli huucciꞌrino huuccatto macciishshino gara afitto?