Jawa Haqqicho Daafira Kultanno Ajuuja

Mitto hashsha Nabukadanatsoori waajjishshanno haaqee haaqiiꞌri. Isi haaqeete tiro kultannosi gede hayyoolle mannasi woshshiꞌrino. Kayinni mittuno haaqiiꞌrino haaqee tira didandiitino. Hakkiinni Moote haaqiiꞌrino haaqee Daanieelira kuli.

Nabukadanatsoori Daanieelira togo yii: ‘Haaqeetenni mitte haqqicho laoommo. Tini haqqicho lophite gordo iillitu. Uullate aana noo manni baalu laꞌꞌa dandaanno geeshshita ikkitino. Haqqichote aana biifado daronna lowo laalo no. Dubbu saada hatte haqqicho hunda caaꞌlitanno; ceano sinnase aana mine miꞌnitanno. Hakkiinni mittu sokkaasinchi iiminni dayi. Isi qoonqosi naggi asse togo yii: “Hattenne haqqicho karre; sinnaseno murmurre. Cifichonna rumushsho kayinni siwiilunninna camotenni xaaxxine baattote giddo agurre. Mannu hedowiinni fule, lamalu diri geeshsha saadate gedeeha ikkanno. Mannu baalu Gashshootu Maganunniha ikkinotanna Isi mangiste baxino manchira aa dandaannota afanno.”’

Yihowa Daanieelira haaqeete tiro kulisi. Daanieeli haaqeete tiro wodanchiti lowo geeshsha masi. Isi togo yii: ‘Moote, haaqee atera ikkikkinni diinnakkira ikkitara halcheemmo; kayinni haaqee ate daafira kultannote. Karriti jawa haqqicho ateeti. Xaate gashshootu ateha diꞌꞌikkanno; ati dubbu saada gede hayisso itatto. Kayinni sokkaasinchu cifichonna rumushsho baattote giddo agurre yiino daafira galagalte moote ikkatto.’

Mittu diri gedensaanni, Nabukadanatsoori mootete minesi kawanna kaꞌa haꞌranni heeꞌre Baabiloonete katama naadanni togo yii: ‘Kuni lowohu Baabiloonete katami ani minsiisiꞌroommoho. Konni daafira ane ikkannohu ayi no!’ Isi coyiꞌre nafa gudikkinni iiminni togo yitanno huuro macciishshi: ‘Nabukadanatsoori! Kuneeti gashshootekki atewiinni haaꞌne hoolloonni.’

Hakkawoyintenni Nabukadanatsoori mannu mereerinni baxxe dubbu moyichi gede ikki. Minisinni fule moyichu ledo dubboho heeꞌrino. Nabukadanatsoori dananchi lophe doowiru baalluwa gede ikkino; culunqasino doowirunnite gedeeta ikkitino.

Lamalu diri gedensaanni, Nabukadanatsoori wodani darga higino; Yihowa iso galagale Baabiloonete moote ikkanno gede assisi. Hakkiinni Nabukadanatsoori togo yii: ‘Iimi Moote ikkinoha Yihowa guwisiꞌreemmo. Xa Yihowa Gashshaancho ikkinota afoommo. Isi naaxxanno manna shollishanno; gashshooteno baxino manchira aa dandaanno.’