Yesuusi Lowo Manna Itisino

Yesuusi soqqamaasine 32 M.D. Faasiku ayyaana ayirrinsara albaanni, sabbakkara hadhinowiinni daggu. Insa daafurtino daafira fooliishshidhanno gede Yesuusi yowolotenni Beetesayida yinanniwa haaꞌre haꞌrinsa. Ikkollana yowolo baaru qaccewa shiqqi yituta, Yesuusi lowo kume ikkanno manni hoodensa daanni noota afi. Yesuusi hatte yannara soqqamaasinesi ledo fooliishshiꞌra hasiꞌrinoha ikkirono, hakkonne manna mararino daafira dihaꞌrisino. Isi xiwantinore hursino, hattono manna rosiisino. Yesuusi insara barra woꞌma Maganu Mangiste daafira rosiisanni hosino. Hawarrita Yesuusi soqqamaasine isiwa dagge togo yitu: ‘Mannu hudiꞌrinona, sagale hasiꞌranno gede haꞌrisi.’

Yesuusi togo yii: ‘Insa haꞌra dihasiissannonsa. Kowiicho heedheenna sagale kiꞌne uuyyensa.’ Yesuusi soqqamaasine ‘Haꞌne sagale hirre dangoni?’ yite xaꞌmitu. Soqqamaasinete giddonni Filiphoosi yinannihu, “Mitto mittoho shiima shiima iillishate lamu xibbi birrinni hirroonni timma nafa diꞌꞌikkitanno” yii.

Hakkiinni Yesuusi, ‘Mageeshshi sagale no?’ yee xaꞌmi. Indiriyaasi togo yee dawari: ‘Ontu timinna lame shiimmaadda qulxuꞌme noonke. Tini calla diꞌꞌikkitanno.’ Yesuusi ‘Timanna qulxuꞌme anewa abbe’ yii. Isi mannu 50, 50nna 100, 100 ikke hayissote aana ofollanno gede kuli. Yesuusi timanna qulxuꞌme haaꞌre iimira hige laꞌꞌanni huuccatto assi. Hakkiinni isi sagale soqqamaasinesira uyi; insano sagale mannaho beekku. Ontu kumi labballi, hattono meentunna qaaqquullu duuwa geeshsha itino. Soqqamaasine gattino sagale baꞌannokki gede gamba assitu. Insa inteenna gattinota 12 saffe ikkitanno sagale gamba assitino! Tini dhagge ikkitanno maalaleeti! Dihattooti?

Mannu lowo geeshsha dhagge assiꞌrino daafira, Yesuusa mootensa assiꞌra hasiꞌrino. Yesuusi kayinni Yihowa moote assannosi yanna iillitinokkita afino. Konni daafira, isi manna haꞌrise kae soqqamaasinesi Galiilu Baara tayisse saꞌanno gede kulinsa. Insa yowolo giddite hadhu; Yesuusi kayinni callisi ilaala haꞌri. Isi hakka haꞌrinohu mayiraati? Annisiwa huuccatto assiꞌra hasiꞌrino daafiraati. Yesuusi loosu batiꞌrisirono, woꞌmanka woyite huuccatto assiꞌranno.