Yesuusi Jeefote Faasika Ayirrisi

Ayihudete manni diru kiiro Niisaani yinanni aganira 14^ki barra Faasiku ayyaana ayirrisanno. Insa konne ayyaana ayirrisannohu, Yihowa Gibitsete borojjimmanni fushshe Hexxote Gobba eessinonsata qaagateeti. Yesuusinna soqqamaasinesi 33 M.D. Yerusaalamete fooqete mini giddo Faasiku ayyaana ayirrissino. Insa hurbaate ittu gedensaanni Yesuusi, ‘Kiꞌne giddonni mittu ane sayise hirannoe’ yii. Soqqamaasine lowo geeshsha masse, ‘Sayise hirannohehu ayeti?’ yite xaꞌmitu. Yesuusi qole, ‘Sayise hirannoehu ani tima hiiqqe eemmosiho’ yii. Hakkiinni Yesuusi Asqorootu Yihudara tima hiiqqe uyi. Hakkawoyintenni Yihuda fule haꞌrino.

Hakkiinni Yesuusi huuccatto asse tima hiiqqaqqe gattino soqqamaasinera uyi. Isi togo yii: ‘Hiiꞌe konne tima itte. Kuni timi kiꞌne daafira eemmo maalaꞌya riqiwanno.’ Hakkiinni Yesuusi woyine haaꞌre huuccatto asse soqqamaasinesira uyi. Isi togo yiino: ‘Tenne woyine agge. Tini woyine cubbiꞌnera maaro afidhinanni gede kiꞌnera yee eemmo mundeeꞌya riqibbanno. Kiꞌne iima ledoꞌya mootoolle ikkitinanni. Tenne diru kiiro qaagge.’ Xaa geeshsha Yesuusi harunsaano diru kiiro hakkonne hashsha gamba yite ayirrissanno. Xa konne gambooshshe Mootichu Hurbaate yinanni.

Hurbaate ittu gedensaanni, Yesuusi soqqamaasine ‘Ninke mereero roorannohu ayeti?’ yite heewisantu. Yesuusi kayinni togo yiinsa: ‘Kiꞌne giddo rooriidihu, isonooto wolu baalunkunni ajinohu gede asse kiirannoho.’

‘Kiꞌne jaallaꞌyaati. Anniꞌya kulammoꞌnera hasiꞌrannore baalare kuloommoꞌne. Mulenni ani Anniꞌyawa iimira haꞌreemmo. Kiꞌne kawiicho heedhinanni; mimmito baxxinanniha ikkiro, mannu ane rosaano ikkitinoonnita konninni afanno. Ani baxummoꞌnente gede mimmitoꞌne baxxe.’

Jeefote Yesuusi Yihowa rosaanosi agarannonsa gede huuccatto assino. Insa sumuu yite mitteenni loossanno gede Yihowa kaaꞌlansara huucciꞌrino. Yesuusi Yihowa suꞌmi qullaawa ikkanno gedeno huucciꞌrino. Hakkiinni Yesuusinna soqqamaasinesi faarsotenni Yihowa guwissu gedensaanni fulte hadhino. Hakkawoyite Yesuusa diinnasi amaddanno yanna gambissino.