ROSO 03
Qullaawu Maxaafi Yaannore Ammana Dandiineemmo?
Qullaawu Maxaafi giddo batinye hexxonna lowo amaale no. Qullaawu Maxaafi kulannore afa hasiꞌrattoha ikkirono, miteekkite huluullamattohano ikkara dandaanno. Konni biꞌree Maxaafi giddo noo hexxonna amaale ammana dandiinanni? Qullaawu Maxaafi xaano ikko albillitte hagiirru noo heeshsho heeꞌra dandiinanni yaannota ammana dandiineemmo? Lowo miliyoone ikkanno manni tenne ammananno. Atino ammanatto gede assitahera dandiitanno taje hanni laꞌno.
1. Qullaawu Maxaafi kulannori halaalehonso maattote?
Qullaawu Maxaafi giddosi “halaalaancho yoo” woy qaale amadinota kulanno. (Rosiisaancho 12:10) Qullaawu Maxaafi giddo kulloonni manninna xaggensa addinta nooreeti. (Luqaasi 1:3; 3:1, 2 nabbawi.) Batinye xaggete borreessaanonna arkiyolojete xiinxallaano, Qullaawu Maxaafi giddo kulloonni barruwa, manni, bayichinna ikkito addinta noore ikkinota buuxxino.
2. Qullaawu Maxaafi yannankerano kaaꞌlannoho yineemmohu mayiraati?
Qullaawu Maxaafi, Qullaawa Maxaafa borreessini waro noo manni afinokkiha batinye coye kulanno. Lawishshaho, Qullaawu Maxaafi sayinsete coye kulanno. Qullaawa Maxaafa borreessini waro heeꞌrinohu batinyu manni kayinni tenne coyibba dihuwatino. Ikkollana, yannankera noo sayinse Qullaawu Maxaafi kulannori adda ikkinota buuxxino. Qullaawu Maxaafi kulannori ‘hegerera disoorramannoho.’—Faarso 111:8.
3. Qullaawu Maxaafi albillittete yanna daafira kulannore ammana hasiissannonkehu mayiraati?
Qullaawu Maxaafi giddo albillitte “ikkara noore” kultannoti addi addi masaaloa no. (Isayaasi 46:10) Qullaawu Maxaafi lowo diri albaanni masaalinohu batinyu coyi mitturino gatikkinni woꞌmino. Qoleno Qullaawu Maxaafi yannankera alamete aana ikkanni nooha mitto mittonka coye balaxe kulino. Konni rosira, Qullaawu Maxaafi kulannota mite masaalo laꞌneemmo. Tini masaalo woꞌmitino gari dhagge ikkannoho!
LEDDE XIINXALLI
Dirinke sayinse Qullaawu Maxaafi ledo sumuu yitanno garanna dhagge ikkitannota mite Qullaawu Maxaafi masaalo xiinxalli.
4. Sayinse Qullaawu Maxaafi ledo sumuu yitanno
Biꞌree waro, rooru manni baatto mitiri duhe no yee ammananno. VIIDIYO laꞌe.
Mitu 3,500 diri albaanni Iyyoobi maxaafira mayine borreessinoonniro wodanchi. Iyyoobi 26:7 nabbabbe; hakkiinni, aante noo xaꞌmo hasaabbe:
Baatto “mulla darga” rarraꞌino yitanno yaatto dhagge ikkitannote yineemmohu mayiraati?
Qullaawu Maxaafi lowo diri albaanni, xeena ganihu gedensaanni, wayi foorare gomichoho soorrame, hakkiinni wirro xeena ikke dirrannota kulino. Mannu tenne garunni huwatinohu kayinni, Qullaawu Maxaafi tenne kulihunni 3,000 saꞌꞌanno diri gedensaanniiti. Iyyoobi 36:27, 28 nabbabbe; hakkiinni, aante noo xaꞌmuwa hasaabbe:
Qullaawu Maxaafi wayi doyicho daafira kulannori dhagge ikkannohu mayiraati?
Xa nabbawitto qummeeshshuwa Qullaawa Maxaafa albinni roore ammanatto gede assitinohe?
5. Qullaawu Maxaafi dhagge ikkitanno masaalo kulino
Isayaasi 44:27–45:2 nabbabbe; hakkiinni, aante noo xaꞌmo hasaabbe:
Baabiloone ubbara 200 diri albaanni, Qullaawu Maxaafi mayyee masaalino?
Faarsi moote Qiroosinna olantosi 539 K.A.,b Baabiloonete katama horrite amaddinota xagge buuxissanno. Insa katamaho huxxa ikke noo laga wolewa hige daadanno gede assitino. Hakkiinni, fanne agurroonni waalchuwa widoonni higge eꞌe, katama olu nookkiha amaddino. Xa 2,500 saꞌꞌanno diri gedensaanni, alba Baabiloonete katami noo darga diigantino kinna calla no. Hanni Qullaawu Maxaafi tenne daafira mayyee masaalinoro wodanchi.
Isayaasi 13:19, 20 nabbabbe; hakkiinni aante noo xaꞌmo hasaabbe:
Tini masaalo woꞌmitinohu hiittoonniiti?
Iraaqi gobbara noota Baabiloone diigantino kinna
6. Qullaawu Maxaafi yannankera ikkanni noore balaxe masaalino
Qullaawu Maxaafi ninke heeꞌnoommohu “goofimarchu barra” ikkinota kulanno. (2 Ximootewoosi 3:1) Hanni Qullaawu Maxaafi goofimarchu barri daafira mayyee masaalinoro wodanchi.
Maatewoosi 24:6, 7 nabbabbe; hakkiinni aante noo xaꞌmo hasaabbe:
Qullaawu Maxaafi goofimarchu barra alamete aana mayi ikkanno yee masaalino?
Layinki Ximootewoosi 3:1-5 nabbabbe; hakkiinni aante noo xaꞌmuwa hasaabbe:
Qullaawu Maxaafi goofimarchu barra batinyu manni akati hiittooha ikkanno yiino?
Ati kuri giddo mannu aana hiittee akatta laootto?
MITU MANNI TOGO YAANNO: “Qullaawu Maxaafi maattotenna masalote maxaafaati.”
Qullaawu Maxaafi halaale ikkinota roore ammanatto gede assitinohe taje hiitteeti?
XAPHISHSHA
Xagge, sayinsenna Qullaawu Maxaafi giddo noo masaalo, Qullaawu Maxaafi halaale ikkinota buuxissanno.
Kageeshsha Rosoottore
Qullaawu Maxaafi kulannori halaalehonso maattote?
Sayinse Qullaawu Maxaafi ledo sumuu yitannota leellishshannoti mite taje hiitteeti?
Qullaawu Maxaafi albillittete yanna daafira kulannori halaale lawannohe? Mayira?
EGENNO LEXXI
Qullaawu Maxaafi giddo sayinse yitannori ledo sumuu yaannokkiri no?
“Qullaawu Maxaafi Yaannori Sayinsete Ledo Sumuu Yaanno?” (Webisayitenkera fultino borro)
Heeꞌnoommohu “goofimarchu barra” ikkinota leellishshanno taje hiitteeti?
“Woꞌmitanna Laꞌnanni Heeꞌnoommota 6 Qullaawu Maxaafi Masaalo” (Agarooshshu Shae, Onkoleessa 1, 2011)
Qullaawu Maxaafi Giriikete Gashshooti daafira kulanno masaalo woꞌmitino gara wodanchi.
Qullaawu Maxaafi masaalo, mittu manchira Qullaawu Maxaafira noosi lao soorritino gara wodanchi.
“Alba Maganu Nooha Dilawannoe” (Agarooshshu Shae, Kiiro 4 2017)
a Masaalote yaa Maganu albillitte ikkanno coyi daafira kulino sokkaati.
b K.A. yaa, “Kiristoosira Albaanni” yaate; M.D. yaa kayinni “Maarote Diro” yaate.