Kiristaanu Heeshshonna Soqqansho Gambooshshi Biddishsha

Furcho

1. Tenne borrora noo biddishshi, Kiristaanu Heeshshonna Soqqansho Gambooshshiwa kifile noonsarira baalaho kaaꞌlannoho. Kifile noonsari baalunku kifilensa qixxaabbara albaanni, Kiristaanu Heeshshonna Soqqansho Xiinxallote Maxaafichoranna tenne borrora kifilensa daafira uyinoonni biddishsha laꞌꞌa hasiissannonsa. Baalanti halashshaano rosaanote kifile shiqishshanno gede koyisa hasiissanno. Songote ledo halantannori wolootuno, Qullaawu Maxaafi roso ammantannorenna heeshshonsa giddo Kiristaanu wodho harunsitannore ikkituro kifile shiqisha dandiitanno. Halashshaancho ikkinokkihu mittu manchi kifile shiqisha hasiꞌrannota kuliro, tennera wonsha hasiissanno guunte lainohunni Kiristaanu Heeshshonna Soqqansho Gambooshshihu aliidi laꞌꞌaanchi hasaawisannosi. Hakkiinni kifile shiqishate ikkadohoronna teꞌee kulannosi. Konne hasaawa hasaawa hasiissannohu kifile shiqisha hasiꞌri mancho xiinxallisanno rodii (woy Kiristaancho ikkino anni woy ama) noowaati. Rosaanote kifile shiqishate wonsha hasiissanno guunte, cuuaminokki halashshaancho ikkate wonshinanni guunte ledo mittete.—od fool. 8 guf. 8.

HANAFOTE HEDO

2. Mitto daqiiqa. Lamalate kiiro, hanafote faarsonna huuccatto gedensaanni, Kiristaanu Heeshshonna Soqqansho Gambooshshi liqambartichi macciishshaano shiqanno roso quqquxante agadhitanno gede assanno. Liqambartichu songote roore kaaꞌlanno rosi aana illachisha hasiissannosi.

MAGANU QAALI GIDDO NOOTA MUXXE JIRO

3. Lallawo: Tonne daqiiqa. Cuꞌmonna lame woy sase qara hedo amadino fushshaati Kiristaanu Heeshshonna Soqqansho Xiinxallote Maxaaficho aana fulanno. Tenne kifile cimeessaho woy ikkadu songote soqqamaanchira aa hasiissanno. Lamalate giddo nabbambannite Qullaawu Maxaafi niwaawera haaro maxaafa hananfanniha ikkiro, hakko maxaafa egensiissanno viidiyo fannanni. Kifile shiqishanno rodii, hatti viidiyo cuꞌmote ledo mayi xaadooshshe afidhinoro qummi assa dandaanno. Ikkirono, xiinxallote maxaafichora noo hedo shiqishe guda hasiissannosi. Qoleno yanna assitu deerrinni, hakkonne roso kaajjishate hende qixxeessinoonni misilla seekke horoonsiꞌra hasiissannosi. Xiinxallote maxaafichora noo hedo roore xawisate kaaꞌlitannota ikkitu geeshsha, wole borrora noo hedono horoonsiꞌra dandaanno.

4. Maganu Qaalinni Ronseemmore: Tonne daqiiqa. Tenne kifile cimeessaho woy ikkadu songote soqqamaanchira aa hasiissanno. Shiqishanno rodii bitimu woy gumulshu nookkiha xaꞌmotenninna dawarotenni shiqishanno. Roduu lamenta xaꞌmo macciishshaano xaꞌma hasiissannosi. Qoleno, qummeeshsha nabbambiro woyyannoronna teꞌee doora dandaanno. Macciishshaano dawaro qola hasiissannonsahu 30 sokondi woy hakkuyi woro ikkitanno yanna giddooti.

5. Qullaawu Maxaafi Niwaawe: Shoole daqiiqa. Tenne rosaanote kifile labbaa rosaanchi niwaawetenni shiqishanno. Tenne kifile shiqishanno rosaanchi bitima woy gumulsha qixxeessiꞌra dihasiissannosi. Gambooshshu liqambartichi roorenkanni rosaano mommodditukkinni, qarummatenni, hasiisanno bayicho duudhanni, qoonqonsa soorritanni, hasiisanno bayicho taxxi yitanni, hattono coyiꞌne galloonni garinni nabbawa dandiitanno gede kaaꞌlanno. Qullaawu Maxaafi niwaaweti mite kifilla seeda, mite kayinni harancho ikkitino daafira, Kiristaanu Heeshshonna Soqqansho Gambooshshihu aliidi laꞌꞌaanchi tenne kifilla aanno woyite rosaanote dandoo heda hasiissannosi.

SOQQANSHOTE DANDOOKKI WOYYEESSIꞌRI

6. Tonaa onte daqiiqa. Konne gafa qixxeessinoonnihu, baalanti halashshaano soqqanshote rosiisidhanno gede, hattono mannu ledo hasaawate, sabbakatenna rosiisate dandoonsa woyyeessidhanno gede kaaꞌlate hendeeti. Hasiisanno woyite, cimeeyyeno rosaanote kifile shiqishshara dandiitanno. Mittu mittunku rosaanchi kifilesi shiqishanno woyite, Nabbawanna Rosiisa woy Manna Baxxe yitanno birosherera kulloonnita amaalete hedo harunsa hasiissannosi. Amaalete hedo Kiristaanu Heeshshonna Soqqansho Xiinxallote Maxaafichora kifiletenni aanchine gombote malaati giddo worranni. Mito woyite, macciishshaanote ledo hasaambanni kifileno heedhara dandiitanno. Togoo kifile cimeessaho woy ikkadu songote soqqamaanchira uyinanni.—Hasaawunni shiqqanno kifile shiqinshanni gara afate gufo 15 lai.

7. Hasaawa Hanafa: Tenne rosaanote kifile labbaa woy meya rosaanchora uyinanni. Labbaa rosaanchira uyinanni woyite, kaaꞌlaanchisi labbaaha woy maatesi miila ikka hasiissannosi; meya rosaanchora uyinanni woyite kaaꞌlaanchise maatese miila woy meya rosaancho ikka hasiissannose. Rosaanchunna kaaꞌlaanchisi ofolte woy uurrite shiqisha dandiitanno.—Tenne kifile amadonna mamiwaro daafira ledde afate, gufo 12 nna 13 lai.

8. Faana Gana: Tenne rosaanote kifile labbaa woy meya rosaanchora uyinanni. Tenne kifile shiqishanno rosaanchinna kaaꞌlaanchisi lamunku labbaaha woy lamunku meyata ikka hasiissannonsa. (km 12/06 qool. 4) Rosaanchunna kaaꞌlaanchisi ofolla woy uurra dandiitanno. Rosaanchu konni albaanni hasaawinsoonni mancho galagalle hasaawinsanni woyite mayyaa dandiinanniro leellisha hasiissannosi.—Tenne kifile amadonna mamiwaro daafira ledde afate, gufo 12 nna 13 lai.

9. Rosaano Assa: Tenne rosaanote kifile labbaa rosaanchira woy meya rosaanchora aa dandiinanni. Tenne kifile shiqishanno rosaanchinna kaaꞌlaanchisi lamunku labbaaha woy lamunku meyata ikka hasiissannonsa. (km 12/06 qool. 4) Rosaanchunna kaaꞌlaanchisi ofolla woy uurra dandiitanno. Tenne kifile Qullaawu Maxaafi rosaanchinna rosiisaanchisi wonanni hasaawa hanaffe noohu gede assine shiqisha hasiissanno. Shiqishanno rosaanchi bitima woy gumulo qixxeessiꞌra dihasiissannosi; amaallannisi hedo tenne ikkituro kayinni konne assa dandaanno. Xiinxallisanno gede kulloonnisi gufo baalanta huuro gotti asse nabbawa hasiissannosi yaa diꞌꞌikkino; hasiꞌriro kayinni hatto assa dandaanno.

10. Ammanakki Xawisse Kuli: Tini kifile lallawo ikkituro, labbaa rosaanchira uyinanni. Loonse leellinshanni ikkito ikkituro kayinni, labbaa woy meya rosaanchora aa dandiinanni. Rosaanchu labbaaha ikkiro, kaaꞌlaanchuno labbaaha woy maatesi miila ikka hasiissannosi; rosaancho meyata ikkituro, kaaꞌlaanchono meyata woy maatese miila ikka hasiissannose. Rosaanchu worroonni borrora noo hedo horoonsiꞌre cuꞌmote xaꞌmora xabbe leeltanno dawaro hayyotenni qola hasiissannosi. Kifilesi shiqishanno woyite, horoonsiꞌrino borro qummi assa woy qummi assikki saꞌꞌa dandaanno.

11. Lallawo: Tenne kifile labbaa rosaanchira uyineenna songote shiqinshanni lallawo gede asse shiqishanno. Tini kifile Manna Baxxe yitanno biroshere guwuursha A aana xintantinota ikkitanno woyite, rosaanchu qummeeshsha (qummeeshshuwa) soqqanshote horoonsiꞌra dandiinanni gara seekke leellisha hasiissannosi. Lawishshaho, hakkoye qummeeshsha hiittoo woyite horoonsiꞌra dandiinanniro, qummeeshshu tiro maatiro, hattono iso horoonsiꞌne hasaawinseemmo manchi heeshshi gotti asse hedanno gede assa dandiinanni gara xawisa dandaanno. Lallawo Manna Baxxe yitanno birosherera noo rosi aana xintantinota ikkituro, rosaanchu hattee hedo soqqanshote horoonsiꞌra dandiinanni gara seekke xawisa hasiissannosi. Shiqishanno woyite, rosu giddo umi hedora kulloonni lawishsha luphi assa woy roso guwuursate lendoonni qummeeshshuwa giddo hasiꞌrinota horoonsiꞌra dandaanno.

12. Amado: Tennenna aantanno gufora noo biddishshi, “Hasaawa Hanafa” hattono “Faana Gana” yitanno kifillara kaaꞌlannoho. Bande kulloonniri heeꞌriro ikkinnina, rosaanchu mixo hasaawisanni noo manchira malinoha huwatate qarrisannokkiha Qullaawu Maxaafi halaale kulatenna wolu woyitira hasaawaho injeessate. Rosaanchu qooxeessaho maltinota yannate hasaambanni heeꞌnoonni hajo doora hasiissannosi. Rosiisate Horoonsiꞌneemmo Uduunni giddonni mitte borro woy viidiyo egensiisannoronna teꞌee umisi doodha dandaanno. Rosaano mitto hasaawu bitima rosiisidhe hakkoye calla yaantenni, mannu ledo hasaambanni gara rosiisiꞌra, lawishshaho mannaho baxille leellishanna rosamino garinni hasaawisa dandiinanni gara leellisha hasiissannonsa.

13. Mamiwaro: Rosaanchu kifilete ledo xaphi assine kulloonni mamiwaro, qooxeessaho malino garinni horoonsiꞌra hasiissannosi. Lawishshaho:

(1) Minunni Mine: Tini mamiwaro, minunni mine marre, silketenni, woy sokka borreessine soqqammanni soqqansho, hattono alba minunni mine soqqammanni hasaawinsoonni mancho galagalle hasaawinsannita kultannote.
(2) Sabbakate Fulloommokki Woyite: Tini mamiwaro mannu ledo hananfoommoha mulla hasaawa ayyaanaamittete hasaawira qolle soorrineemmota kultannote. Togoo yannara loosu basera, rosu mine, qachaho, dagate hodhishshi aana, woy uminke dilgo assiꞌnanni heeꞌne xaandeemmohu wolu mannira Qullaawa Borro hedo kula dandiineemmo.
(3) Gudumaalu Soqqansho: Tini mamiwaro borrote gaarenni, dikkotenna daddalu basera, doogote, woy paarkete, makeenu uurrannowa, woy manna anfanniwa baalawa soqqammeemmo soqqansho kultannote.

14. Viidiyonna Borro Horoonsiꞌra: Kifile kifilete garinni, rosaanchu viidiyo woy borro horoonsiꞌra doodha dandaanno. Rosaanote kifile viidiyo noota ikkituro, woy rosaanchu viidiyo horoonsiꞌra doodhiro, hattee viidiyo egensiisanna hasaawaho horoonsiꞌra hasiissannosi ikkinnina fana dihasiissannosi.

KIRISTAANU HEESHSHO

15. Konne gafa faarsotenni hananfi gedensaanni, aanannohu 15 daqiiqi giddo macciishshaano heeshshonsa giddo Maganu Qaale harunsitanno gede kaaꞌlitannoti mitte woy lame kifile shiqqanno. Bande kulloonniri heeꞌriro ikkinnina, tenne kifilla aa hasiissannohu cimeeyyete woy ikkadda songote soqqamaanoraati. Songote Hasiisannorira Horoonsidhe yitanno kifile kayinni cimeeyye calla shiqishshanno. Mitte kifile hasaawunni shiqqannote yiniro, shiqishanno rodii qixxeessinoonni xaꞌmono agurranna wole xaꞌmuwano lede xaꞌma dandaanno. Qara qara hedo gudise shiqishatenna macciishshaanote ledo hasaawira yanna ikkitannosi gede, bitima (dadhote coyiꞌrannore) haransa hasiissannosi. Kifile qaalu xaꞌmo afidhinota ikkituro, qaalu xaꞌmo xaꞌminanni manchi ofollinowa heeꞌre coyiꞌrantenni, dandaamannoha ikkiro madirake daye coyiꞌriro woyyate.

16. Songonnita Qullaawu Maxaafi Xiinxallo: Sajjoo daqiiqa. Tenne kifile aa hasiissannohu ikkadu songote cimeessiraati. (Gari cimeeyye nookki songora, hasiisanno woyite, ikkaddu songote soqqamaasine tenne kifile shiqisha dandiitanno.) Cimeeyyete bisi, Songonnita Qullaawu Maxaafi Xiinxallo massagate ikkadda ikkitinore dooranno. Tenne kifile shiqishshanno roduuwi, xiinxallote gaammoonni yanna sayissukki, qara qara qummeeshshuwa luphi assite, hattono roso loosu aana hosiisa dandiinanni gara xawisse danchu garinni massaga hasiissannonsa. Tenne kifile shiqishshara fajjinoonni roduuwi, xaꞌmotenninna dawarotenni shiqinshanni kifile massanganni gara kulanno biddishsha xiinxallansa kaaꞌlitannonsa. (w23.04 qool. 24, saaxine) Mitte lamalara gaammoonniha xiinxallote gafa seekkine xiinxalline gundi gedensaanni, daqiiqu gate noo daafira calla xiinxallo seedisa dihasiissanno. Dandaamannoha ikkiro, lamalate kiiro addi addi roduuwi massagguronna nabbabburo woyyanno. Kiristaanu Heeshshonna Soqqansho Gambooshshi liqambartichi, tenne kifile shiqishanno rodiira xiinxallo haransanno gede kulisiro, kuni rodii tenne assanno gara heda hasiissannosi. Gama guffa nabbambikkinni xaꞌmo calla xaꞌma dandaanno.

JEEFOTE HEDO

17. Sase daqiiqa. Kiristaanu Heeshshonna Soqqansho Gambooshshi liqambartichi, gambooshshunnita qara qara hedo xaphi assanno. Aantanno lamalara shiqanno rosono haranse egensiisa hasiissannosi. Yanna ikkitannoha ikkiro, aantanno lamalara kifile noonsa rosaano suꞌma kule qaagiissa dandaanno. Bande kulloonniri heeꞌriro ikkinnina, gambooshshu liqambartichi hasiisanno egensiishshanna songote sonkoonni sokka nabbawa hasiissannosihu jeefote hedo yannaraati. Rosamino coye, lawishshaho qanchu soqqansho ledo xaado afiꞌrinore, Addaraashe fiinanni pirogiraamenna woleno togoore saleedaho gannanni ikkinnina egensiishsha dikullanni. Liqambartichu jeefote hedo shiqishanno yanna egensiishsha kulate woy sokka nabbawate ikka hoogguro, Kiristaanu Heeshsho yaanno gafi hunda kifile noonsa roduuwi dandaamannoha ikkiro yanna gatissanno gede kula hasiissannosi. (Gufo 16 nna 19 lai.) Gambooshshe faarsotenninna huuccattotenni jeefinsanni.

GALATANNA AMAALE

18. Mitte mittenti rosaanote kifile shiqqu kiiro, Kiristaanu Heeshshonna Soqqansho Gambooshshi liqambartichi mitto daqiiqa meddi yitanno yanna giddo amaalete uyinoonni hedo horoonsiꞌre rosaancho galatanno, hattono amaalanno. Liqambartichu rosaanote kifile egensiisanno woyite, rosaanchoho uyinoonnita amaalete hedo dikulanno. Ikkollana rosaanchu kifile shiqishe kaꞌꞌanno woyite, liqambartichu galatisihu gedensaanni uyinoonnita amaalete hedo egensiisanno; hattono rosaanchu dancha gede shiqishino yinanni gede assinore kulanno; woy hattee hedo roorse illachisha hasiissannosihu mayiraatironna hiittoonniitiro shaqqillunni xawise kulannosi. Gambooshshu liqambartichi rosaancho woy macciishshaano kaaꞌlitanno yee hedannoha ikkiro, kifilete aana wole hedono coyiꞌra dandaanno. Liqambartichu Manna Baxxe yitanno biroshere, Nabbawanna Rosiisa yitanno biroshere woy Soqqanshote Rosi Mini maxaafa horoonsiꞌre, rosaanchoho uyinoonnite amaalete hedo ledo xaadooshshe afidhinota woy wole kaaꞌlitannosi amaale, gambooshshu gedensaanni woy wole yannara callasi amaala dandaanno.—Kiristaanu Heeshshonna Soqqansho Gambooshshi liqambartichinna kaaꞌlaanchu amaalaanchi loosi maatiro ledde afate, gufo 19, 24 nna 25 lai.

YANNA AGARA

19. Mitte mittente kifilera uyinoonni saate sayisa dihasiissanno; Kiristaanu Heeshshonna Soqqansho Gambooshshi liqambartichino yanna agara hasiissannosi. Mitte mittente kifilera uyinoonni yanna Kiristaanu Heeshshonna Soqqansho Xiinxallote Maxaaficho aana kulloonniha ikkirono, roso duushshanno garinni shiqinshoonniha ikkiro, uyinoonni daqiiqa wonshate yine calla hedo leda dihasiissanno. Kifile shiqishshannori yanna sayissuro, Kiristaanu Heeshshonna Soqqansho Gambooshshi liqambartichi woy kaaꞌlaanchu amaalaanchi kore roduuwa calluwansa amaala hasiissannonsa. (Gufo 24 nna 25 lai.) Faarsotenna huuccattote yannano mitteenni kiirreenna, woꞌmu gambooshshi 1 saatenna 45 daqiiqi giddo goofa hasiissannosi.

WORADU ALIIDI LAꞌꞌAANCHI TOWAANYO

20. Woradu aliidi laꞌꞌaanchi songo towaatanni nooha ikkiro, gambooshshu pirogiraame kawiinni aanchine kulloonnire agurranna Kiristaanu Heeshshonna Soqqansho Xiinxallote Maxaaficho aana noo biddishshi garinni massanganni: Kiristaanu Heeshsho yaanno gafira nooti Songonniti Qullaawu Maxaafi Xiinxallo gatteenna, woradu aliidi laꞌꞌaanchi 30 daqiiqita soqqanshote lallawo shiqishanno. Soqqanshote lallawo shiqqara albaanni, Kiristaanu Heeshshonna Soqqansho Gambooshshi liqambartichi hakkuyira albaanni shiqqino pirogiraame xaphi assanno, aantanno lamala roso egensiisanno, hattono egensiishsha kulanno; hakkiinni woradu aliidi laꞌꞌaancho egensiisanno. Soqqanshote lallawo shiqquhu gedensaanni, woradu aliidi laꞌꞌaanchi umisi doorino faarsonni gambooshshe jeefisanno. Jeefote huuccatto assanno gede wole rodoo koyisa dandaanno. Woradu aliidi laꞌꞌaanchi towaanyo yannara, songo massanganni afiinni wole addaraashera shiqqanno kifilla diheedhanno. Woradu aliidi laꞌꞌaanchi wole gaamo ledo noo songo towaatanno woyite, hatti gaamo uminsa afiinni gambooshshe assiꞌra dandiitanno. Woradu aliidi laꞌꞌaanchi soqqanshote lallawo shiqishanno woyite kayinni, tini gaamo lowiidi addaraashe dagge shiqqanno lallawo songote ledo macciishsha hasiissannonsa.

WORADU WOY QOQQOWU GAMBOOSHSHI LAMALA

21. Woradu gambooshshi woy qoqqowu gambooshshi heeꞌranno lamalara, songote gambooshshi diheeꞌranno. Hatte lamalara shiqqanno kifilla annu annu woy maatete deerrinni xiinxalla hasiissannota songote qaagiissa hasiissanno.

QAAGOOSHSHU AYYAANI LAMALA

22. Qaagooshshu Ayyaana ayirrinsanni barri Sanyotenni Arbete geeshsha nooha ikkiro, hatte lamalara Kiristaanu Heeshshonna Soqqansho Gambooshshi diheeꞌranno.

KIRISTAANU HEESHSHONNA SOQQANSHO GAMBOOSHSHI ALIIDI LAꞌꞌAANCHO

23. Cimeeyyete bisi doorinohu mittu cimeessi Kiristaanu Heeshshonna Soqqansho Gambooshshi aliidi laꞌꞌaancho ikke soqqamanno. Kuni rodii gambooshshe dancha gede qinaawino garinni, hattono konni biddishshi garinni massanganni heeꞌnoonnita laꞌꞌanno. Qoleno kaaꞌlaanchu amaalaanchi ledo amaalamanni loosanno. Kiristaanu Heeshshonna Soqqansho Xiinxallote Maxaaficho iillitanni heedheenna, Kiristaanu Heeshshonna Soqqansho Gambooshshi aliidi laꞌꞌaanchi lamunku aganita Kiristaanu Heeshshonna Soqqansho gambooshshi kifilla baalanta pirogiraame fushshanno. Hatto yaa, rosaanote kifillano agurranna konni gambooshshiwa shiqqannota wole kifillano fushshanno, hattono cimeeyyete bisi fajjino roduuwi giddonni liqambarticha ikkitannore woranno yaate. (Gufo 3-16 nna 24 lai.) Rosaanote kifile aanno woyite, rosaanchu diro, woꞌnaalshanna shiqino roso afoo wonshe coyiꞌrate wolapho noosihoronna teꞌee heda hasiissannosi. Wole gambooshshu kifilla aanno woyiteno, konni garinni coye heeshshi gotti asse heda hasiissannosi. Mitte mittenta kifile shiqqara ajayi ajeenna sase lamala gatte heedheenna shiqishshannorira aa hasiissanno. Rosaanote kifile aate Kiristaanu Heeshshonna Soqqansho Gambooshshi Kifile Woraqata (S-89) horoonsiꞌra hasiissanno. Kiristaanu Heeshshonna Soqqansho Gambooshshihu aliidi laꞌꞌaanchi woꞌma gambooshshu pirogiraame egensiishshu saleedira gannanni gede assanno. Cimeeyyete bisi iso kaaꞌlannoha wole cimeessa woy songote soqqamaancho wora dandaanno. Ikkollana, rosaanote kifilla agurranna wole kifilla shiqishshannore wortannori cimeeyye callate.

KIRISTAANU HEESHSHONNA SOQQANSHO GAMBOOSHSHI LIQAMBARTICHA

24. Mitte mittente lamalara, mittu cimeessi Kiristaanu Heeshshonna Soqqansho Gambooshshi liqambarticha ikke soqqamanno. (Gari cimeeyye nookki songora, ikkadda songote soqqamaano Kiristaanu Heeshshonna Soqqansho Gambooshshi liqambarticha ikkitara dandiitanno.) Kiristaanu Heeshshonna Soqqansho Gambooshshi liqambartichi hanafotenna jeefote hedo qixxaawa hasiissannosi. Qoleno mitte mittenta kifile egensiisanno; hattono cimeeyyete bisi shiima ikkiro, gambooshshu yannara wole kifillano, hakko iso hasaawu nookkiha viidiyo calla leellinshanni kifilla shiqishara dandaanno. Mitte kifilenni wolete saꞌnanni woyite coyiꞌranno hedo lowo geeshsha harancho ikka hasiissannose. Liqambaroota ikkitanno cimeeyye doorannohu cimeeyyete bisooti. Ikkadda cimeeyye bado badotenni liqambaroota ikkite soqqantanno. Songo songote garinni, Kiristaanu Heeshshonna Soqqansho Gambooshshiha aliidi laꞌꞌaancho wole ikkadda cimeeyyenni roore duucha hinge liqambarticha assa dandiinanni. Mittu cimeessi Songonnita Qullaawu Maxaafi Xiinxallo massagate ikkado ikkiro, gambooshshu liqambarticha ikkateno ikkado ikkara dandaanno. Ikkollana, liqambarticha ikke soqqamanno cimeessi rosaanote kifile shiqishshannore galatanna hasiisanno woyite insara kaaꞌlitanno amaale baxillunni aannoha ikka hasiissannositano deꞌinoonte. Qoleno liqambartichu gambooshshu yannasira goofanno gede assannoha ikka hasiissannosi. (Gufo 17 nna 19 lai.) Liqambartichu hasiꞌrironna gari bayichi nooha ikkiro, madirakete wole mayikirafoone uurrinseenna hakko heeꞌre, kifile shiqishshanno roduuwi dagge madirakete bayichonsa amadda geeshsha kifile egensiisa dandaanno. Hattonni, liqambartichu Qullaawu Maxaafi Niwaawe yinanniti rosaanote kifile shiqqanno yannarano ikko Soqqanshote Dandookki Woyyeessiꞌri yaanno gafi hunda noo kifilla egensiisanno woyite madirakete ofolla dandaanno. Tini yanna gatissara dandiitanno.

KAAꞌLAANCHO AMAALAANCHO

25. Dandaamannoha ikkiro, konne loosu qeecha lallawo shiqishate danchu woꞌnaalshi noosi cimeessira aa woyyitanno. Kaaꞌlaanchu amaalaanchi kifile shiqishshanno cimeeyyenna songote soqqamaanora, lawishshaho Kiristaanu Heeshshonna Soqqansho Gambooshshi kifillanna dagate lallawo shiqishshannorira, hattono Agarooshshu Shae Xiinxallo woy Songonnita Qullaawu Maxaafi Xiinxallo massaggannorira woy tenne xiinxallo yannara nabbabbanno roduuwira hasiisanno woyite calluwu heedheenna amaale aanno. (Gufo 19 lai.) Lallawo shiqishatenna rosiisate ikkadda ikkitinori batinye cimeeyye heedhuro, diru dirunku addi addi cimeessi kaaꞌlaancho amaalaancho ikke soqqama dandaanno. Kaaꞌlaanchu amaalaanchi roduuwu kifile shiqishshu kiiro amaala dihasiissannosi.

LAYINKI ADDARAASHERA SHIQQANNO KIFILLA

26. Rosaanote batinyi garinni, songo rosaanote kifilla layinki addaraasherano shiqqanno gede assa dandiitanno. Layinki addaraashera kifilla shiqishshanno rosaanora amaale aannoha ikkado rodoo (cimeessa ikkiro woyyanno) wora hasiissanno. Hasiisanno woyite, dancha dandoo noosiha songote soqqamaanchono wora dandiinanni. Cimeeyyete bisi konni loosu qeechira malino rodoo dooranno; qoleno mittu rodii calla ikkannoronna bado badotenni massaggannori hasiissannoro muranno. Kuni rodii gufo 18te noo biddishsha harunsa hasiissannosi. Maganu Qaali Giddo Noota Muxxe Jiro yaanno gafi hunda nooti Maganu Qaalinni Ronseemmore yitanno kifile shiqquhu gedensaanni, layinki addaraashera kifile noonsa rosaano hadhanno gede kula hasiissanno. Kuri rosaano jeefonniti rosaanote kifile gooffuhu gedensaanni fulte dagganno.

VIIDIYUBBA

27. Konni gambooshshi yannara, doorantino viidiyubba shiqqanno. Kuri viidiyubba JW Layibirere aana babbaxxinohu elekitiroonikisete uduunnichinni afiꞌra dandiinanni.

S-38-DM 11/23