2015nnihu Tiokiraasennihu Soqqanshote Rosi Mini Rosiisate Dandoonke Woyyeessiꞌrate Kaaꞌlannonke

¹ Faarsaanchu Daawiti togo yee borreessino: “Goloꞌyanna Gatisaanchoꞌya Yihowa, afiiꞌya qaalinna wodaniꞌya hedo ate hagiirsiissannota ikkito.” (Far. 19:14) Ninkeno, songote giddono ikko soqqanshote yannara halaalu daafira coyiꞌrate qoossonke lowonta naandeemmo daafira, coyiꞌneemmo qaali Yihowa hagiirsiisannoha ikkara hasiꞌneemmo. Yihowa soqqanshote qajeelsannonke doogga giddo mittu Tiokiraasenniho Soqqanshote Rosi Mineeti. Konne qajeelsha alamete deerrinni lamalate kiiro 111,000 saꞌanno songuwara uyinanni. Kuni qajeelshi alamete deerrinni duuchunku gari heeshsho giddo noo roduuwi dancha duduwo duduwate ikkadda ikkanno gede, ammansiisanno garinni, hayyotenninna waajjikki rosiisa dandaanno gede kaaꞌlino.—Looso 19:8; Qol. 4:6.

² 2015nniti konni rosi mini pirogiraame, addi addi borro giddonni haaꞌnoonni kifilla amaddino. Qoleno, Qullaawu Maxaafi niwaaweti luphi yitino naxibbanna Kifile Kir. 1 shiqqanno yanna taashshinoonni. Tenne taashshonna kifilla shiqqanno gara kulanno biddishsha aantanno guffara laꞌneemmo.

³ Qullaawu Maxaafi Niwaaweta Luphi Yitino Naxibba: Tenne kifile shiqishshanno roduuwi lamu daqiiqi giddo, lamalate giddo nabbamboonnite Qullaawu Maxaafi niwaawenni mitte kaaꞌlitanno naxiwe shiqishshanno. Seekkine qixxaambiro, uyinoonni yanna giddo horo afidhino assaawe songote shiqisha dandiinanni. Hakkiinni, songo albinte gede lee daqiiqa horoonsidhe lamalate giddo nabbamboonnite Qullaawu Maxaafi niwaawenni wodanchitino assaawe 30 sokondi woy hakkuyi woro ikkitanno yanna giddo coyidhanno. Sajjuu sokondi giddo kaajja assaawe coyiꞌrate, dancha gede qixxaawanna meessaneeto qeeꞌla hasiissanno; ikkirono tini ninkenkura dancha qajeelsha ikkitanno. Qoleno, wolu roduuwino qixxaawe dayino assaawe coyiꞌranno gede kaaꞌlitanno.

⁴ Kifile Kir. 1: Qullaawu Maxaafi niwaawenni shiqqanno kifilera uyinoonni yanna ajinshe sase daqiiqa woy hakkuyi woro ikkitanno gede assinoonni; niwaaweno ajinshoonni. Niwaawetenni shiqqanno kifile uyinanni rosaano, assaawe garunni shiqisha dandiitanno gede qoonqonsa gotti assite, qaalla garunni coyishiishshanni, hattono qarummatenni nabbabbanni marro marro higge rosiisiꞌra hasiissannonsa. Niwaawe magansiꞌrankera lowore kaaꞌlitanno daafira, Yihowa soqqamaano baalanti dancha gede nabbawate sharrama hasiissannonsa. Qaaqquullinke giddo batinyu dancha gede nabbawa dandiitannore ikkansa hagiirsiissannote! Annuwunna amuuwu oosonsa nabbawa dandiitanno gede baxillunni kaaꞌlitannonsa daafira galanteemmonsa.

⁵ Kifile Kir. 2: Ontu daqiiqinni shiqqannota tenne kifile mitte rodoora uyinanni. Rodoo uyinoonnise cuꞌmo horoonsiꞌra hasiissannose. Tini kifile Maganu Qaalinni Ronseemmo Roso aana xintantinota ikkitanno wote, rodoo qanchu soqqansho yannara tuncu yaara dandaannore hedde qooxeessaho rosamino garinni shiqishshanno. Tini kifile addi addi borronke giddo xawinsoonnihu Qullaawu Maxaafi giddo kulloonni manchi aana xintantinota ikkituro, rosaancho hakko manchi daafira kultannota shiqqino borro xiinxalla, nabbabbanno xiqisubba dooranna hakko manchi lawishshinni maa ronseemmoro xawisa hasiissannose. Cuꞌmote ledo xaado afidhinota wole xiqiseno horoonsiꞌra dandiinanni. Rosu mini aliidi laꞌꞌaanchi mitte kaaꞌlaancho woy miila gaamannose.

⁶ Kifile Kir. 3: Tenne kifile mittu rodiira woy rodoora uyinanni; tini kifile ontu daqiiqinni shiqqanno. Tenne kifile rodoote uyiniro, Kifile Kir. 2te uyinoonni biddishshi garinni shiqisha hasiissannose. Rodooho uyiniro kayinni, addi addi borronke aana xintantino assaawe gamba yitino macciishshaanora nigiggiretenni shiqishanno. Rosaanchu uyinoonni cuꞌmo halashshe xawisa, nabbawanno xiqisubba dooranna qummi assinoonnihu Qullaawu Maxaafi giddo kulloonni manchi lawishshinni maa ronseemmoro kula hasiissannosi.

⁷ Kifile Kir. 3: Labballu Roduuwira Uyinanni Wote: Tini kifile Maganu Qaalinni Ronseemmo Roso yinanni buukileetenna wole Qullaawu Maxaafi kifile aana xintantinota ikkitanno wote, maatete magansiꞌra woy qanchu soqqansho leellishanno garinni shiqisha hasiissanno. Roore wote tenne kifilera kaaꞌlaancho rosu mini aliidi gaamanno. Kaaꞌlaanchu rosaanchu maate miila woy songote giddo noo rodoo ikka hasiissannosi. Uyinoonni cuꞌmo ledo xaado afiꞌrinoha Qullaawu Maxaafiha xintu seera luphi assitannota wole xiqisubbano horoonsiꞌra dandiinanni. Tenne kifile saꞌne saꞌne cimeessu shiqishanno gede aa dandiinanni. Cimeeyye kaaꞌlaancho uminsa doodhitara dandiitanno. Cimeeyye maatensa miili ledo woy wolu rodii ledo tenne kifile shiqishshe rosiisate ogimma leellishshanna laꞌꞌa songo jawaachishshannoti dihuluullissannote.

⁸ Amaale: Rosu mini aliidi laꞌꞌaanchi mittu mittunku rosaanchi kifile shiqishe kairo, lame daqiiqa horoonsiꞌre rosaancho galatanno, hattono Tiokiraasennihu Soqqanshote Rosi Mine Uyinanni Qajeelsha Horoonsiꞌri yaanno maxaafi giddonni kaaꞌlitanno amaale aanno. Rosu mini aliidi laꞌꞌaanchi rosaanote kifile egensiisanno wote, rosaanchoho uyinoonnita amaalete naxiwe diegensiisanno. Mitte mittenti kifile shiqqu gedensaanni, rosu mini aliidi laꞌꞌaanchi rosaancho galatanna rosaanchoho uyinoonnita amaalete naxiwe egensiisa hasiissannosi; hattono rosaanchu hattee naxiwe loosino gara bade kula, woy rosaanchu albillitte hattee naxiwe roore illachisha kaaꞌlitannosi gara shaqqillunni xawisa hasiissanno.

⁹ Rosaanote amaale uyinanni naxibba amaddino forme Soqqanshote Rosi Mini maxaafira qoola 79 kayise 81 no. Mittu rosaanchi kifile shiqishe kairo, rosu mini aliidi laꞌꞌaanchi rosaanchu amaalete naxiwesi hunda noo rosiishsha loosinoronna teꞌee gilletenni xaꞌmanno; hakkiinni rosaanchu maxaafi aana hasiisanno coye borreessanno. Rosu mini aliidi laꞌꞌaanchi, rosaancho gambooshshu gedensaanni woy wole yannara kifilesira galatanna wole kaaꞌlitannosi assaawe kula dandaanno. Mittu mittunku rosaanchi rosu mine uyinannisi kaaꞌlo, ayyaanaamittete lophora kaaꞌlitannosi faro gede asse laꞌꞌa hasiissannosi.—1 Xim. 4:15.

¹⁰ Mittu rosaanchi yanna sayisiro, rosu mini aliidi laꞌꞌaanchi woy isi kaaꞌlaanchi malaatisa hasiissannosi; lawishshaho dowwola gane woy mitore gangane hayyotenni yanna gooffinota qummi assa dandaanno. Rosaanchuno tenne huwate hanafino coyi fooliishsho gude agure dirra hasiissannosi.—Soqqanshote Rosi Mini maxaafa qool. 282, guf. 4 lai.

¹¹ Hasiissanno seerubba wonshitannori baalunku Tiokiraasenniha Soqqanshote Rosi Minira ea dandiitanno. (Soqqanshote Rosi Mini maxaafa qool. 282, guf. 6 lai.) Konni rosi mine afiꞌnanni qajeelshi, Yihowa daga Mangistenniha dancha duduwo ammantannota leellishanno garinni, ayirrinyunninna baxillunni sabbakkannonna rosiissanno gede kaaꞌlino. Yihowa tiokiraasete rosinni qajeelsha afidhinori guwissannosi wote lowo geeshsha hagiidhannoti egennantinote!—Far. 148:12, 13; Isa. 50:4.