NABBAWAANOTE XAꞌMO

Kiristaana ikkino anninna ama songote gambooshshi yannara bohamino beettinsa ledo ofolliro garaho?

Mittu bohamino manchi Mangistete Addaraashe giddo ofollanno bayicho lainohunni quwa saꞌne mitiiꞌma gara diꞌꞌikkitino. Kiristaana ikkino anninna ama mine ledonsa heeꞌrannoha bohamino beettonsa hasiisannoha ikkiro ayyaanaamittetenni kaaꞌlitanno gede jawaachishshanno assaawe borronke giddo fultanni keeshshitino. Bocaasa 15, 1988 Agarooshshu Shaera (Ingilizete Afoo) qoola 19 nna 20 aana xawinsoonninte gede, annunna ama ledonsa heeꞌrannoha bohaminoha shiima beettonsa Qullaawa Maxaafa xiinxallisa nafa dandiitanno. Konni garinni kuni beetti haꞌrinshosi biddi assiꞌranno gede kaaꞌlitannosi amaale afiꞌrara dandaanno.a

Bohaminohu shiimu beetti woloota rabbasha hoogi geeshsha, Mangistete Addaraashe giddo annisinna amasi ledo ofolliro qarru dino. Bohamino manchi Addaraashete giddo badheenni calla ofolla hasiissannosi yaa diꞌꞌikkino; konni daafira, bohamino beetti annisinna amasi ofoltuwano ofolturo insa ledo ofolliro qarrisannori diheeꞌranno. Annunna ama beettonsa ayyaanaamittetenni towaata hasidhanno daafira, gambooshshu yannara seekke macciishshanni nootanna teꞌee buuxa hasidhannoti dihuluullissannote. Beettinsa wole bayicho callisi ofollara agurantenni ledonsa ofollanno gede assansa, tennera kaaꞌlitansara dandiitanno.

Bohamino beetti annisinna amasi ledo heeꞌrannokkihalla ikki? Hatto ikkiro annisinna amasi ledo ofolla dihasiissannosi yaate? Konni albaanni, mittu Kiristaanchi ledosi heeꞌrannokkihu bohamino fiixisiwa aana hasiissannosironna teꞌee borronke giddo xawinse kulloonni.b Ikkollana, mittu bohamino manchi gambooshshu yannara maatesi miilla ledo sammi yee ofollasinna maatesi isi ledo hasiissannokki aante kalaqiꞌrate woꞌnaalansa babbaxxino coyeeti. Ammanantinori maatete miilla bohamino fiixansa garunni laꞌannohanna isi ledo hiittoo aante heedhansara hasiisannoro Qullaawu Maxaafi yaannore harunsitannoha ikki geeshsha, mitteenni ofollansa dhiwino coye diꞌꞌikkanno.—1 Qor. 5:11, 13; 2 Yoh. 11.

Bohamino manchi amanyootunni ofolli geeshsha, fiixisi ledono ofolliro woy wolu roduuwi ledono ofolliro konni coyi daafira huluullama dihasiissanno. Mittu manchi hiikko ofolla hasiissannosiro wossana qarra kalaqqannota ikkitara dandiitanno. Baalunku, ammanantinori maatete miillano mitteenni, Qullaawu Maxaafi bohamino manni daafira aanno biddishsha harunsitu geeshsha Kiristaanu gambooshshe daanno manni ofollanno bayicho lainohunni mitiiꞌma dihasiissanno.c