Mereeroꞌne Noo Geerra Ayirrisse

1. Mannu heeshsho dadillissannota ikkitanno gede assinohu maati?

YIHOWA hunda manna kalaqinohu geedhe wolqa baꞌꞌara hede diꞌꞌikkino. Isi hedinohu, meentuno labballuno guuta ordu keere afiꞌre Gannatete heeꞌranno gedeeti. Xa kayinni “kalaqamu baalunku mitteenni uranninna xissiisiꞌranni no.” (Rom. 8:22) Maganu cubbu mannu ooso gawajjino gara laꞌꞌanno wote mayi macciishshamannosiha lawannohe? Qoleno, batinyu jajjabbu manni heeshshonsa giddo roore kaaꞌlo hasiissannonsa yannara caaqqi yee nafa laꞌꞌannonsaha hooganno.—Far. 39:5; 2 Xim. 3:3.

2. Kiristaanu jajjabba roduuwa kaffi asse laꞌꞌannohu mayiraati?

² Yihowa daga mereeronsa jajjabbu roduuwi noo daafira hagiidhitanno. Jajjabbu roduuwi hayyo lowore kaaꞌlitannonke; qoleno ammanansa jawaachishshannonke. Kuri roduuwi giddo mitu fiixanke ikkitara dandiitanno. Kayinni jajjabbu roduuwinke fiixanke ikkiturono ikka hooggurono, towaanyo afidhanni nootanna teꞌee afa hasiꞌneemmo. (Gal. 6:10; 1 Phe. 1:22) Ninke baalunku Maganu geerra ma garinni laꞌꞌannoro xiinxallanke kaaꞌlitannonke. Qoleno muxxe geerra roduuwanke towaatate mini mannirano songoteno mayi halaafinati nooro laꞌneemmo.

“TUGGOOTIE”

3, 4. (a) Faarso 71te borreessaanchi Yihowa mayyee eegamino? (b) Songote giddo noori jajjabbu roduuwi Magano maa huucciꞌra dandiitanno?

³ Qullaawu ayyaani marraeennasi Faarso 71:9 borreessi manchi Magano togo yee eegamino: “Geedhimmaꞌya yannara tuggootie; dhukiꞌya baino woteno agurtootie.” Tini faarso, Faarso 70tenni gatte dagginota labbanno. Konni daafira Faarso 71:9 noo huuccatto assiꞌrinohu Daawiti ikkikki digatino. Daawiti anjesi dirinni kayise geedhimmasi yanna geeshsha Maganoho soqqamino; Yihowa qole iso horoonsiꞌre dhagge ikkitanno coyibba assino. (1 Sam. 17:33-37, 50; 1 Neg. 2:1-3, 10) Ikkollana, Daawiti geedhi yannara Yihowa towaatannosi gede huucciꞌra hasiissannosita huwatino.—Faarso 71:17, 18 nabbawi.a

⁴ Yannankerano Daawiti gedeeri duuchu roduuwi no. Kuri roduuwi geedhimmatenna “shettote yanna” giddo nooha ikkirono, wolqansa assitu geeshsha Magano guwisiꞌra diagurtino. (Mek. 12:1-7) Batinyu geerru roduuwi duuchare bashsho geeshsha assa hooggara, hattono albi geeshsha soqqama nafa hooggara dandiitanno. Ikkollana, Yihowa maassiꞌrannonsa gedenna towaatannonsa gede eegama dandiitanno. Yihowa Daawiti isi towaanyonna atoote afiꞌrate huuccatto assiꞌranno gede ayyaanisinni marrainosi daafira, huuccattosi macciishshe qolinoti dihuluullissannote. Ammanantinori jajjabbu roduuwino Yihowa Daawiti huuccatto macciishshinonte gede insatano macciishshannota addaxxa dandiitanno.

5. Yihowa ammanamino geerra ma garinni laꞌꞌanno?

⁵ Yihowa ammanamino geerra lowo geeshsha kaffi asse laꞌꞌannotanna soqqamaanosino konne geerra ayirrissara hasiꞌrannota Qullaawa Borro xawisse kultanno. (Far. 22:24-26; Law. 16:31; 20:29) Zelewaawuyaani 19:32 togo yitanno: “Awuuwino manchira gotti yii; hattono jawa ayirrisi; Maganokki waajji. Ani Yihowaati.” Ee, Maganu daga mereero noo geerra ayirrisa, kuni qaali borreessami yannara lowo geeshsha kaffi assine laꞌnanni halaafinateeti; yannankerano tini disoorrantino. Ikkina geerra towaata aye halaafinateeti?

MINI MANNI HALAAFINATE

6. Yesuusi annanna ama towaatate dancha lawishsha ikkinohu hiittoonniiti?

⁶ Maganu Qaali, “Annakkinna amakki ayirrisi” yaanno. (Wol. 20:12; Efe. 6:2) Yesuusi anninsaranna amansara hasiisannore assa gibbinore Ferisaanonna borreessaano boroori wote, tenne hajajo luphi asse xawisino. (Marq. 7:5, 10-13) Yesuusi umisi dancha lawishsha ikkino. Lawishshaho, qarru haqqi aana sutame reyara kae heeꞌre, baxanno rosaanchisira Yohaannisira amasi hadara wodhino; amasi hakkawote gunnitte ikkitukki digattino.—Yoh. 19:26, 27.

7. (a) Hawaariya Phaawuloosi annanna ama towaata lainohunni borreessinohu xintu seeri hiikkoyeti? (b) Phaawuloosi xawise kulinohu mayi daafiraati?

⁷ Hawaariya Phaawuloosi qullaawu ayyaani marraeennasi Kiristaanu mininsa mannira hasiisannore wonsha hasiissannonsata borreessino. (1 Ximootewosi 5:4 nabbawi.b) Phaawuloosi Ximootewosira tenne assaawe borreessi wote mayi daafira coyiꞌranni no? Songotewiinni woxu kaaꞌlo afiꞌra hasiissannonsari hiittoo gunnootaatiro xawisino. Isi gunnoota roorenka kaaꞌla hasiissannonsari halaalu giddo noo oosonsa, oosonsa oosonna wole fiixansa ikkinota xawise kulino. Konni garinni, songo hasiisannokki duha duqqa gattanno. Yannankerano Kiristaanu ‘Magano waajjannota’ leellishanno doogga giddo mitte, qarramino fiixansa kaaꞌlate.

8. Qullaawu Maxaafi annanna ama towaatate kaaꞌlitanno higge tittire aa hoogasi hayyote yineemmohu mayiraati?

⁸ Gikki yitinori Kiristaana ikkitino ooso, anninsaranna amansara maalaamittete hasiisannori woꞌminotanna teꞌee buuxate halaafinati noonsa. Phaawuloosi borreessinohu ammanino fiixa towaatate daafiraati; ikkirono, Kiristaanu songo wido ikkinokki annanna amano towaata hasiissanno. Ooso annansanna amansa towaattanno gari babbaxxinoho. Mittu mittunku manchihu fayyimmate gari, hasiisannosi coyinna akatisi baxxinoho. Mitu geerri haammata ooso afiꞌrino; mitoho kayinni mittu calla heeꞌranno. Mito geerra mangiste kaaꞌlitannoha ikkara dandaanno; mitu kayinni togoo kaaꞌlo diafiꞌranno. Towaanyo hasiissanno manni hasattono babbaxxitara dandiitanno. Hakko daafira, geedhino fiixasi towaatate woꞌnaalanni noo manchi assannore misha woy arrassa hayyo woy baxille diꞌꞌikkitino. Yihowa hundinni jammare mannisira assanni keeshshinonte gede, wossaꞌnineemmoha Qullaawa Borro ledo sumuu yaanno coye baalanka maassiꞌranno.—Zeh. 11:23.

9-11. (a) Mitu roduuwira mitiimma ikkara dandaannori maati? (Umi misile lai.) (b) Ayidduwiinni xeertidhe noo ooso woꞌma yanna soqqanshonsa muddante agura hasiissannonsakkihu mayiraati? Lawishsha kuli.

⁹ Ooso anninsanna amansawiinni xeertidhe heedhannoha ikkiro, geedhino annansanna amansa towaaxxa kabbaade ikkitansara dandiitanno. Annu woy ama ubbe gaꞌnituro woy hiiqqanturo, woy hedeweelcho xiwanturo, ooso rakke marte laꞌꞌa hasiissannonsaha ikkanno. Togoo wote, yannate geeshshi woy seeda yanna towaanyo hasiissannoha ikkara dandaanno.c

¹⁰ Qaetenni xeertidhe hadhe woꞌma yanna soqqansho soqqantanni noo roduuwi ayiddensa towaaxxate ma assituro woyyannoro roorenka qarrantara dandiitanno. Beeteelete soqqantannori, misiyoone, hattono woradunna awuraajju aliidi laꞌꞌaano soqqanshonsa Yihowawiinni afidhinohu muxxe atooti gede assite laꞌanno. Ikkirono, anninsa woy amansa xiwantanno wote umonni, ‘Agure qaera hige ayiddeꞌya towaaxxa hasiissannoe’ yite heddannoha ikkara dandaanno. Kayinni, tenne hajo lainohunni huuccatto assiꞌra hasiissanno; qoleno annahonna amate addanka hasiisinohu maatiro, woy annunna ama ma assinara hasidhannoro seekke assaawa hasiissanno. Yihowa uyinonketa soqqanshote qoosso muddamme agura dihasiissanno; qoleno tuncu yiinonkeri hakkeeshsha massannoha ikka hoogara dandaanno. Xiwanu mulenni higanno gedeehalla ikka? Annu woy ama noo songo giddo insa kaaꞌle oosonsa soqqanshonsa agurtannota gatisannohu heeꞌrakka?—Law. 21:5.

¹¹ Hanni qaetenni xeertidhe hadhe soqqantinore lame roduuwa lawishsha assine adhino. Maaꞌniidihu Wodiidi Ameerikira misiyoone ikke soqqamanno; kuꞌu kayinni Niwu Yoorkete Biruukiliinira waanna biirora soqqamanno. Anninsanna amansa geedhino daafira kaaꞌlo hasiissunsa. Lamenti ooso hiittoo kaaꞌlo hasiissinoronna ma garinni kaaꞌla dandiitannoro afate galtensa ledo, anninsanna amansa noowa Jaappaane hadhu. Gedensaanni, Wodiidi Ameerikira soqqamanno rodiinna galtesi, agurre qae hinge towaantokka yee heda jammari. Hakkiinnino, annisinna amasi noo songora noohu cimeeyyete bisi qineessaanchi silke dowwolisi. Hatte songo cimeeyye tenne hajo kayisse hasaabbu gedensaanni, dandaami geeshsha kuni rodii misiyoone ikke soqqamanni heeꞌrara hasidhino. Tini cimeeyye konni rodiinna galtesi soqqansho lowo geeshsha kaffi assite laꞌino daafira ayiddesi kaaꞌlate kaꞌino. Cimeeyye baxillunni assitinorira hatte maate lowo geeshsha galattino.

12. Kiristaanu maate ayiddensa towaaxxate wossaꞌnitanno coyibba lainohunni maa heda hasiissannonsa?

¹² Mitte maate geedhino annansanna amansa towaaxxate wossaꞌnitanno coyi aye garihano ikkiro, assootinsa Maganu suꞌmi ayirranno gede assannoha ikkinotanna teꞌee buuxa hasiissannonsa. Yesuusi waro noori ammaꞌnote marooti gede ikka horonta dihasiꞌneemmo. (Mat. 15:3-6) Wossaꞌnineemmo coyi Maganu ayirranno gedenna songote suꞌmi seyanno gede assannoha ikkara hasiꞌneemmo.—2 Qor. 6:3.

SONGOTE HALAAFINATE

13, 14. Qullaawa Borro, songuwa geerra roduuwa kaaꞌla hasiissannonsata kultannohu hiittoonniiti?

¹³ Baalunku roduuwi, woꞌma yanna soqqamaano aleenni laꞌnummo cimeeyye kaaꞌlitu garinni kaaꞌla hooggara dandiitanno. Ikkirono, songuwa ammanantinore geerra roduuwa kaaꞌla hasiissannonsata umi xibbi diro ikkinorinni huwata dandiineemmo. Qullaawu Maxaafi Yerusaalamete songore coyiꞌranni, “mereeronsa hooge qarraminohu dino” yaanno. Hatto yaa kayinni baalunku dureeyyete yaa diꞌꞌikkino. Mitootu anga ajjinore ikkitinota huwata dandiinanni; ikkirono, “mittu mittunkura hasiisannosi geeshshire beenkanni.” (Looso 4:34, 35) Gedensaanni kayinni hatte songora qarru kalaqami. ‘Barru barrunku sagale beekkannori mito gunnoota lashshi assitino.’ Hakko daafira hawaariyaate, kuri gunnooti baddalamannokki gedenna gari sagale afiꞌranno gede ikkado labballo shoontino. (Looso 6:1-5) Sagale beehate qixxaawo assinoonnihu, 33 M.D. Phenxeqosxete barra Kiristaana ikki gedensaanni ayyaanaamittensa jawaachishiꞌrate Yerusaalamete keeshshino manna yannate geeshsha towaatateetilla. Ikkirono hawaariyaate assitinori, songo geerra roduuwa towaata dandiitannota leellishanno.

¹⁴ Aleenni laꞌnummonte gede, Phaawuloosi songo Kiristaana ikkino gunnoota maalaamittetenni kaaꞌlitannohu hiittoore ikkirootiro xawisanno biddishsha Ximootewosira uyino. (1 Xim. 5:3-16) Yaaqoobino qullaawu ayyaani marraeennasi, Kiristaanu annanna ama shiidhinore, gunnootanna woloota qarrantino roduuwa kaaꞌla hasiissannonsata xawisino. (Yaq. 1:27; 2:15-17) Hawaariya Yohaannisi qole togo yiino: “Maalaamittete hasiisannori noosi manchi qarramino rodoosi afe mararannosikkiha ikkiro, Maganu baxilli giddosi hiitto ikke heeꞌranno?” (1 Yoh. 3:17) Kiristaanu gilletenni qarrantino roduuwa kaaꞌla hasiissannonsaha ikkiro, songono tenne assa dihasiissannose?

15. Geerru roduuwira uyinanni kaaꞌlo jilbi babbaxxanno gede assitanno coyibba hiikkuriiti?

¹⁵ Mite gobbara mangiste geerra kaaꞌlate xurata uyitanno, addi addi irdaata afiꞌranno gede assitanno, hattono minira mare towaatanno manna qixxeessitanno. (Rom. 13:6) Wole gobbara kayinni togoo kaaꞌlo hooggara dandiitanno. Konni daafira fiixuno ikko songo, geerru roduuwira uyitanno kaaꞌlo jilbi hasiissanno kaaꞌlo deerri garinni babbaxxanno. Kiristaana ikkitino ooso anninsanna amansawiinni xeertidhe heedhannoha ikkiro, ayiddensa kaaꞌlate assitannori qaete noori assitannori geeshsha ikka hoogara dandaanno. Togoo ooso anninsanna amansa noo songo cimeeyye ledo seekkite hasaabbe, maatensa noo gara baalunku afanno gede assa hasiissannonsa. Lawishshaho, cimeeyye qooxeessaho mangiste geerraho uyitanno kaaꞌlo heedhuro oosote anninna ama affanno gede assa dandiitannoha ikkanno. Qolteno, kaffalloonnikki asali noota woy annunna ama uyinoonninsa xagicho garunni adhitanni nookkita affuro oosote kula dandiitanno. Cimeeyyenna ooso konni garinni coye xawisse hasaabbannoha ikkiro, mitiinsanno coyira mala abbitara dandiitanno. Addaho, qaete kaaꞌlannonna amaalanno manni heeꞌriro, maate yaaddo dibatidhanno.

16. Mitu roduuwi songote giddo noore jajjabba roduuwa kaaꞌlitannohu hiittoonniiti?

¹⁶ Mitu roduuwi jajjabba roduuwa baxxanno daafira, insa towaatate uminsanni yannansanna wolqansa uyite dandiitannore baala assitanno. Insa songote giddo noore jajjabba roduuwa roore towaatate woꞌnaaltanno. Mitu roduuwi, geerra roduuwa towaatate songote giddo noori wolu roduuwi ledo tara gaꞌnitanno hattono looso beeqqitanno. Insa uminsa woꞌma yanna soqqansho soqqama dandiitannokkiha ikkirono, geerra roduuwa kaaꞌlite oosonsa soqqanshonsa agurtannokki gede assitara dandiitanno. Kuri roduuwi kaaꞌlo lowo geeshsha galantannite! Insa shaqqillunni kaaꞌlansa kayinni, ooso annansanna amansa towaata facci assite agurtanno gede assitannota diꞌꞌikkitino.

GEERRU RODUUWIRA JAWAACHISHANNORE COYIDHE

17, 18. Geerra towaata hagiirsiissannota ikkitanno gede assannohu hiittoo akataati?

¹⁷ Geerru roduuwino ikko insa towaattannori, dandaami deerrinni hagiirrinsa baꞌꞌannokki gede assiꞌrate sharrama dandiitanno. Mito wote geedhimma dadillinanni gede, hakkiinnino saꞌe hexxo mudhinanni gede assitara dandiitanno. Konni daafira, geerra roduuwa ayirrisatenna jawaachishate lowonta sharrama hasiissannoheha ikkara dandaanno. Tenne assa dandaattohu hiittoonniiti? Insa ledo hasaawatto wote jawaachishannore coyiꞌri. Kuri muxxe roduuwi Yihowara ammanante soqqantanni heedhino daafira galantannireeti. Yihowa isira soqqamate assitinore horonta dihawanno; ninkeno dihambeemmo.—Mil. 3:16; Ibiraawuyaani 6:10 nabbawi.d

¹⁸ Qoleno, geerruno ikko insa towaattannori hasiisanno wote haariimanna osoꞌlansa towaanyo roore shota ikkitanno gede assitanno. (Mek. 3:1, 4) Duuchu geerri roduuwinsa insa towaatate assitannorinni kassi yaanno ikkinnina quwa disaꞌꞌanno. Shaqqadda ikkansanna dancha akata leellishansa, mannu roore towaatannonsa gede assitannota dideanno. Geerra laꞌꞌara maranno roduuwi duucha wote, “Jawaachishammora mare ani umiꞌya jawaate dawoommo” yaanno.—Law. 15:13; 17:22.

19. Ajano ikko jajjabba manna qarru yannara kaajje uurranno gede kaaꞌlannonsari maati?

¹⁹ Qarrunna guuntete xeꞌne abbitino gawajjo baalanti hoꞌlitanno yanna quqquxamme agadhineemmo. Hakka geeshsha kayinni, Maganu soqqamaano hegere heeshsho hexxonsa aana illachisha hasiissannonsa. Maganu uyinonke hexxo addaxxanke, qarrunna shettote yannara tuuqo ikkitannonketa anfoommo. Ammana noonke daafira, “hexxo dimudhineemmo; qoleno gobbayidi mannimmanke jaabbanni hadhannoha ikkirono, giddiidi mannimmanke kayinni barru barrunku haarooꞌmitanni hadhanno.” (2 Qor. 4:16-18; Ibi. 6:18, 19) Ikkina ammananke jawaattanno gede assiꞌrano agurranna, geerra towaatate kaaꞌlannori woluri maati? Aane noo birxichira towaanyote maa maa assa dandiinanniro laꞌneemmo.