Geerra Towaata Dandiinanni Doogga

1, 2. (a) Duucha maatera hiittoo mitiimma tuncu yitannonsa? Hiittee xaꞌmuwara dawaro afiꞌra hasiissannonsa? (b) Geerrunna oosonsa tuncu yitannonsa mitiimma tira dandiitannohu hiittoonniiti?

KONNI albaanni jawaantetenni umonsa dandee heeꞌranno anninke woy amanke, umonsa towaaxxa dandaannokki deerra maranna laꞌꞌa lowonta xissiissannonke. Miteekke anninke woy amanke uwe lekka hiiqqamara, doogote aana raga hawe baꞌꞌara, woy buuto xiwamara dandiitanno. Hakkiinni saeno, geerra mannimmansa woy heeshshonsa gari soorraminotanna bashshonsa gede ikka dandaannokkita ammane adha qarrissansara dandiitanno. (Iyo. 14:1) Insa kaaꞌlate maa assa dandiinanni? Towaata dandiineemmohuna hiittoonniiti?

² Geerra towaantanni gara kultannoti mitte borro togo yitanno: “Geedhimmate daafira kayise hasaawa kabbaade ikkiturono, geerra towaatate kaaꞌlannori mayi mayi nooronna hiittoo iqqide fushsha hasiissannoro hasaabbe afoo xaaddino maate, tuncu yaannoha aye coyeno qeela hakkeya diqarrissannonsa.” Togoo hasaawi lowo geeshsha hasiisannota huwanteemmohu, geedhimma abbitanno mitiimma gattannokkita ammanne adhineemmoha ikkirooti. Geedhimma hoolle afano hoongiro, balanxe qixxaawanna hasiissanno coyibba wossana dandiinanni. Hanni maate tuncu yitanno mitiimma tirate baxillunni kaaꞌlamanna iqqide fushshiꞌra dandiitanno gara laꞌno.

“SHETTOTE YANNA” DAGGANNO WOTIRA QIXXAAWA

3. Geerraho kaaꞌlo hasiissanno yanna iillitanno wote, maate maa assa hasiissannonsa? (Umi misile lai.)

³ Rooru geerri insaneeto seekke towaaxxate wolqa hooganno daafira, kaaꞌlo hasiissannonsa woti heeꞌranno. (Mekibibi 12:1 nabbawi.a) Geedhino anni woy ama hasiisannonsare assiꞌra hoogganno deerra martanno wote, insanna oosonsa gamba yite roore woyyitino kaaꞌlo afidhanno gara wossana hasiissannonsa. Maatete miilla kaaꞌlama dandiitanno gara, mayi mayi hasiisannoro, hattono konni kaꞌira ma assituro woyyannoro gamba yite hasaabburo woyyate. Baalunku maatete miilla, roorenkanni annu woy ama, noo coye xawisse hasaawa hasiissannonsa. Annunna ama mitore kaaꞌlinannansa qaensara qarru nookkiha heeꞌra dandaannoronna teꞌee hasaawa dandaanno.b Woy, fiixa ikkannohu mittu mittunku manchi ma garinni kaaꞌla dandaannoro hasaawa dandaanno. (Law. 24:6) Lawishshaho, mitu barru barrunku qaete mare towaatanna wolu kayinni woxunni kaaꞌlara dandaanno. Mittu mittunku, loosu qeechisi maatiro afa hasiissannosi; ikkollana, yannate gedensaanni, mito coye tara gaꞌnine assa hasiissannoha ikkara dandaanno.

4. Maatete miilla kaaꞌlo afiꞌra dandiitannohu hiikkiinniiti?

⁴ Annaꞌne woy amaꞌne towaata jammartinanni wote, dandaami deerrinni rakkine xibbinsa gara huwatate woꞌnaalle. Xibbu baasanni haꞌranno gedeeha ikkiro, albillitte tuncu yaaꞌnera dandaannore huwatte. (Law. 1:5) Qooxeessiꞌnera geerra kaaꞌlitannoti mangistete dirijjitta heedhuro, insa ledo xaadde. Towaanyo roore injiitannoꞌne gede assitannoti dagoomaho qixxeessinoonni qixxaawo nooha ikkiro xaꞌmisiisse. Maatete giddo addi addi coyi soorramanna laꞌinanni wote, lowo geeshsha dadillitinara, massinara woy coyi gurchaawaꞌnera dandaanno. Togoori macciishshamiꞌnero, ammantinanni jaaliꞌnera hasaaphe. Roorenka kayinni, giddoꞌne hedo gudissine Yihowara kuꞌle. Isi iillitannoꞌne mitiimma baalanta qeeltinanni gede kaaꞌlitannoꞌneta giddiidi salaame aannoꞌne.—Far. 55:22; Law. 24:10; Fil. 4:6, 7.

5. Geerra towaata dandiinanni doogga balanxe hasanna qixxaawa hayyo ikkitinohu mayiraati?

⁵ Mitu geerrinna oosonsa geerra towaatate kaaꞌlitanno doogga balaxxe hassanno; lawishshaho, annu woy ama beettinsa woy beettonsa qaera heeꞌra, geerra gamba assine towaantanniwa heeꞌra, woy qooxeessaho noota wole qixxaawo horoonsiꞌra rosantinoteronna teꞌee buuxxanno. Qoleno albillitte iillansara dandaanno “qarranna dadille” balaxxe hedde qixxaabbanno. (Far. 90:10) Balaxxe iqqide fushshidhinokki maatera kayinni, mitto coye qarru iillanno yannara muddame wossaꞌna gidde ikkitanno. Mittu fullahaanchi hatti yanna “togoo coye wossaꞌnate wolu wotinni roore busha” ikkitinota coyiꞌrino. Hattee mudditanno yannara maatete miilla lowo geeshsha cannaqantaranna insa insanaawa sumuu yaa hooggara dandiitanno. Xeertinse assaambe iqqide fushshiꞌra kayinni, albillitte tuncu yaannore dandee heeꞌrate kaaꞌlitanno.—Law. 20:18.

6. Jajjabbu anninna ama albillitte geedhanno wote heeꞌranno gara hasaawa kaaꞌlitannohu hiittoonniiti?

⁶ Anniꞌne woy amaꞌne wolewa heeꞌrara heddinoonnita woy albillitte heedhannowi soorramara dandaannota insara hasaawa waajjishshaꞌnera dandiitanno. Ikkirono, lowo manni togoo hasaawi gedenaanni lowo geeshsha kaaꞌlinonsata coyiꞌrino. Hiitto? Korkaatuno, qarru nookki yannara kabbaade hajo kayise hasaawa, ayirrinyunni macciishshanna iqqide fushshiꞌra diqarrissanno. Baalanti maatete miilla hedonsa baxillunninna shaqqillunni xawisse coyiꞌransa, ganaanni wossana hasiissanno coyi tuncu yaanno wote wossanate injaanno gede assitanno. Geerru dandaami geeshsha umonsa dandee heeꞌra hasiꞌrannoha ikkiro nafa, albillitte kaaꞌlo hasiissannonsa wote hiittoo towaanyo hasiꞌrannoro oosonsara balaxe hasaawansa lowore kaaꞌlitanno.

7, 8. Maate hiikkuri coyibba kayisse hasaawa hasiissannonsa? Mayira?

⁷ Annuwanna amuwa, togoo hasaawi yannara hasattoꞌne, miinjiꞌne jilba, hattono doodhitinanni coye miniꞌne mannira kulle. Tini, kiꞌne miteekkitine hasiisanno coye wossaꞌna dandaa hoogginanni wote, insa wossananno gede kaaꞌlitanno. Mini manni hasattoꞌne ayirrisansanna dandaami deerrinni umiꞌne heeshsho heedhinanni gede assansa digattanno. (Efe. 6:2-4) Lawishshaho, oosoꞌne giddo mittu qaesira masse towaataꞌnera hasidhinanninso, wolere assaꞌnera hasidhinanni? Ikkanno coye calla agadha danchate; baalunku manni kiꞌne heddinanni garinni hedannokkita huwatte; hattono baalunkura yaano annuwanna amuwahono ikko oosote hedonsa biddi assiꞌrate yanna hasiissannonsata qaagge.

⁸ Baalanti maatete miilla, balanxe hasaawanna iqqide fushsha iillara dandaanno qarra gatissara dandiitannota huwata hasiissannonsa. (Law. 15:22) Hatto yaa, annuwunna amuwu ma garinni xaginsansara hasiꞌrannorono hasaawa hasiissanno yaate. Togoo hasaawi yannara, Yihowa Farciꞌraasine horoonsidhannote Hikkiminnu Biddishsha Amaddino Kaardera qummi assinoonni coyibba horoonsiꞌra hasiissanno. Mittu mittunku manchi ma garinni xaginsasira hendoonniro afate qoosso noosi; qoleno uyinasira hendoonni xagga adha woy giwa dandaanno. Hikkiminnu Kaarde wonshitine wodhaꞌne kiꞌne doodhitinanni coyibba afate kaaꞌlitanno. Hikkiminnu hajo riqiwaancho qixxeessidhiniro, (hatto assa higge fajjitannoha ikkiro) kuni manchi hasiisanno wote kiꞌne riqiwe mito coye wossananno. Towaattannoꞌneri, hattono hikkiminnu riqiwaanoꞌne hasiissanno wote horoonsidhanno gede, Hikkiminnu Kaardeꞌne galche aa hasiissanno. Mitu geerri Kaardensa dhaansa borreessidhino sanadenna wole hasiissanno sanade ledo lawishshaho, inshuraansete, baankete mini, woy wole togoo sanade ledo wodhanno.

SOORRANTANNO COYIBBA DANDEE HEEꞌRA

9, 10. Annahonna amate oosonsa kaaꞌlo roore hasiissannonsahu mamooteeti?

⁹ Maatete miilla baalanti roore wote, geedhino anninna ama dhukinsa assi deerrinni umonsa dandee heeꞌrara hasidhanno. Annunna ama sagale qishiꞌra, mine fiira, xagga uminsanni adha hattono hasaawe tidha dandaannoha ikkara dandaanno. Hakko daafira, oosonsa quwa saꞌe mittu mittunku coyi giddora eꞌannota hasiꞌra hooggara dandiitanno. Ikkollana yanna lexxitanni hadhu kiiro, annunna ama fulte milli yaa hooggannoha ikkiro, lawishshaho dikkiꞌra hooggannoha woy duuchare habbanni qarrantannoha ikkiro, ooso kaaꞌla hasiissannonsa.

¹⁰ Geedhino manni raga hawara, yaadara, shuma fuqqa hoogara, maccanna ille baꞌꞌara, hattono hawanni qarramara dandaanno; ikkirono, togoo coyibba giddo mito akime woyyeessitara dandiitanno. Togoo malaati leella jammaranni heeꞌreenna, akimete minira haadhine hadhensa. Tenne assate balaxxe kaꞌꞌa hasiissannonsari oosote. Qolteno ooso yanna saꞌu kiiro, anninsanna amansate gillete coyibba giddora ea dandiitanno. Annunna ama dancha towaanyo afidhanno gede, ooso insa riqibbe coyiꞌra, hasiissanno coyibba borreessa, makeenunni haare haꞌranna woleno kore lawinore assa dandiitanno.—Law. 3:27.

11. Annahonna amate heeshshonsa giddo soorramannore maahoyye yee adhate injaannonsa gede ma assa dandiinanni?

¹¹ Anniꞌne woy amaꞌne qarri woyyaawa hoogiro, towaattinanninsa gara woy heedhanno qae soorra hasiissannoha ikkara dandaanno. Soorramannori shiimare ikkiro, maahoyye yee adha qarrisa hooggansara dandiitanno. Lawishshaho, qaeꞌne shiimare xeerto ikkituro, mittu ammanate rodiiꞌne woy olluu manni yannate kiiro mare lae anniꞌne woy amaꞌne noo gara kulannoꞌne gede assa calla baqe ikkitakka? Woy anniꞌneranna amaꞌnera hasiissinoti sagale qishanna mine feya calla ikkitara dandiitanno. Woy mini giddo mitore biddi assa milli yaate, biso hayishshiꞌrate woy kore lawanno coyira roore injaannonsa gede assitakka? Mine soqqamanno manna afiꞌra calla, umonsa dandee heeꞌranno gede assitara dandiitanno. Ikkollana, calluwinsa heeꞌra gawajjitannonsaha ikkiro, ledo galle honse kaaꞌla hasiissannoha ikkanno. Insa noo gari baxihano ikkiro, qooxeessaho geerra kaaꞌlinanni qixxaawo nooronna teꞌee buuxxe.c—Lawishsha 21:5 nabbawi.d

MITU MANNI QARRA TIRA DANDIINO GARA

12, 13. Ayiddinsawiinni xeertidhe heedhanno ooso annansanna amansa ayirrisatenna towaatate maa assitino?

¹² Dancha ooso anninsanna amansa faffeennansa heeꞌrara hasidhanno. Anninsanna amansa dancha towaanyo afiꞌranni noota afansa harshammi yitanno gede assitannonsa. Ikkollana, batinye jajjabba ooso addi addi halaafinati noonsa daafira ayiddinsawiinni xeertidhe heedhanno. Mite togoo ooso fooliishshonsa yannara, hadhe ayiddensa layidhanno, hattono anninsanna amansa assiꞌra hooggino coyibba assite kaaꞌlitanno. Silketenni ganyine, dandaamiro isinni barru baala hasaawisa, dabdaabbe borreessa woy imeele soya annunna ama oosonsa baxxannonsata huwattanno gede assitanno.—Law. 23:24, 25.

¹³ Anniꞌne woy amaꞌnewiinni xeertidhine heedhinanniha ikkiro nafa, barru barrunku hiittoo towaanyo hasiissinonsaro afa hasiissannoꞌne. Insa Yihowa Farciꞌraasine ikkituro, songonsa cimeeyye ma assa woyyitanno yitannoro insa ledo amaalama dandiitinanni. Qoleno tenne hajo daafira huuccatto assiꞌra deꞌinoonte. (Lawishsha 11:14 nabbawi.e) Anniꞌne woy amaꞌne Yihowa Farciꞌraasine ikka hoogguro nafa, insa ‘ayirrissinanniti’ dihuluullissannote. (Wol. 20:12; Law. 23:22) Baalanti maate wossaꞌnitanno coyi mitto gara ikkannokkiti egennantinote. Mite maate geedhino anninsa woy amansa ledonsa woy qooxeessinsara heeꞌranno gede assitanno. Ikkollana, mitu anninna ama oosonsa qaera heeꞌra dibaxanno; qoleno manna irkiꞌre heeꞌranna duha ikka dihasiꞌranno. Mitoho kayinni miinju heeꞌransaranna soqqamannonsa mannira woxe kaffalanni qaensara heeꞌra doodhara dandaanno.—Mek. 7:12.

14. Anna woy ama roore towaatannohura, hiittoo coyi tuncu yaasira dandaanno?

¹⁴ Duucha maate giddo, anna woy ama towaatate halaafinate roore duqqannohu annahonna amate mule noo beetto ikkara dandaanno. Ikkirono, roore towaatanno beetti annisira woy amasira hasiisannorira quwa sae umisi maatera hasiisannore dea dihasiissannosi. Mittu mittunku manchi yannanna dhuki gawalo afiꞌrino. Qoleno towaatanno beetti heeshsho gari soorramara dandaanno daafira, mito coye haaro ikkine laꞌne biddi assa hasiissannoha ikkanno. Oosote giddo batinye halaafinate duqqinohu nookka? Wole ooso albinni roore kaaꞌla dandiitakka? Lawishshaho, tara gaꞌnite towaatte affakka?

15. Towaatanno manchi likkete aleenni daafurannota gatisate ma assa dandiinanni?

¹⁵ Geedhino anni woy ama wolu kaaꞌlonni calla millissannoha ikkiro, towaatanno manchi likkete aleenni daafurara dandaanno. (Mek. 4:6) Annansanna amansa baxxanno ooso, iltinonsare towaaxxate dandaaminsare baala assa hasidhanno; towaatanni uurre gale hosa kayinni wolqansara aleenni ikkitara dandiitanno. Togoo ooso dhukinsa deerra ammane adhanna, kaaꞌlo nafa xaꞌmiꞌra hasiissannonsa. Tara tara towaantanni kaaꞌlama, anna woy ama geerra towaattanno dirijjitera yanniweelo aatenni gatissara dandiitanno.

16, 17. Ooso geedhino annansa woy amansa towaattanno wote, mayi qarra ikkansara dandaanno? Togoo coyibba dandee heeꞌrate maa assa dandiitanno? (Qoleno, “Hagiirrunni Towaata” yitanno saaxine lai.)

¹⁶ Banxanni anninna ama geedhe qarramanna laꞌꞌa giddo xissiissanno. Manna towaattannori mito wote dadillitara, caaccaabbara, hanqitara, insaneeto bushiishshara woy koffi yitara dandiitanno. Towaantanni anni woy ama mito wote koffi assannore coyiꞌrara woy assinanninsarira galata hoogara dandaanno. Togoori tuncu yiiꞌnero, koffi yaate muddantinoonte. Mittu surrete hikkiminni fullahaanchi togo yiino: “Aye simmeeteno, hakko iso baxissannokki simmeete qeela dandiitinanniti wole baalantenni roortino doogo, hatti simmeete macciishshantinoꞌneta ammane adhate. Hatti simmeete macciishshantinoꞌneta kaaddinoonte woy togoo simmeete mayira macciishshantinoe yitine giirantinoonte.” Hiittoo hedo macciishshantinoꞌnero galteꞌnera, miniꞌne mannira woy muli jaaliꞌnera hasaaphe. Togoo hasaawi simmeeteꞌne huwattinanni gedenna gaꞌlabbi yitinanni gede kaaꞌlaꞌnera dandaanno.

¹⁷ Annanke woy amanke qaete heeꞌreenna towaatate wolqa assitannokki yanna daggara dandiitanno. Mite gobbara, ooso geedhino annansa woy amansa geerra towaattanno dirijjite massitanno. Mitte Kiristaancho, geerra towaantanni basera noo amase ganyite marte layidhanno. Ise amansa hashsha barra towaata hasiissinotanna maatensa tenne towaanyo dandiitinokkita coyidhino. Ledde togo yitino: “Amanke geerra towaantanni base massa shota diꞌꞌikkitino. Tenne wossaꞌna surrete lowo geeshsha kabbaade ikkitinonke. Ikkirono, heeshshose giddo jeefote agannara hakko heedhara wossananke dancha coye ikkitino; iseno maahoyye yite adhitino.”

18. Annansanna amansa towaaxxitannori maa afidhannota dihuluullantanno?

¹⁸ Anniꞌnera woy amaꞌnera diru lexxanni haꞌranno wote, insa towaata lowo geeshsha kabbaadenna surrete ayirritannota ikkitaꞌnera dandiitanno. Geerra towaata lainohunni, baalunku mannira kaaꞌlannoha mittu gari mala afiꞌra didandiinanni. Ikkirono dancha iqqide fushshiꞌra, mimmitu ledo kaaꞌlama, hedo xawinse hasaawa, roorenkanni huuccatto assiꞌra annaꞌnenna amaꞌne towaaxxate halaafinateꞌne wonshate kaaꞌlitannoꞌne. Tenne assitiniro, anniꞌnenna amaꞌne hasiissannonsa towaanyonna kaaꞌlo afidhanni noota affinoonni daafira harshammi yitinanni. (1 Qor. 13:4-8) Konni baalunkunni roore, Yihowa annansanna amansa ayirrissannorira aannota surrete salaame afidhinannita huluullantinoonte.—Fil. 4:7.