Qullaawu Maxaafi Xaꞌmonna Dawaro

Huuccatto assiꞌra hasiissannonkehu mayiraati?

Maganu Yihowa xiwinonke coye huxuxxi yinummokki ganyine isira kuꞌlinammora hasiꞌranno. (Luqaasi 18:1-7) Isi ninkera assaawanno daafira yineemmore macciishshanno. Iimi Anninke huucciꞌnammosira shaqqillunni koyisinke geeshsha huuccatto assiꞌra dihasiissannonke?—Filiphisiyusi 4:6 nabbawi.

Huuccatto assiꞌneemmohu kaaꞌlo afiꞌrate calla diꞌꞌikkino. Huuccatto Maganunniwa shinqeemmo gedeno kaaꞌlitannonke. (Faarso 8:3, 4) Hedonkenna simmeetenke ganyine Maganoho kulleemmoha ikkiro, isi ledo roore jaalooꞌmineemmo.—Yaaqoobi 4:8 nabbawi.

Huuccatto assiꞌra hasiissannonkehu ma garinniiti?

Maganu huucciꞌneemmo wote manna maalaꞌlissanno qaalla horoonsiꞌnammora woy yannate kiiro yinoommota yinammora dihasiꞌranno. Qoleno, baxxitino ikkito leellisha dihasiissannonke. Yihowa giddonketa kulle huucciꞌneemmo gede koyisinonke. (Maatewoosi 6:7) Lawishshaho, hunda Isiraeelete yannara Haanna minise giddo lowonta mitiinsinosere kulte huuccidhino. Dadillise hagiirreho soorrami yannara, Magano huuccatto assidhe galaxxitino.—1 Saamueeli 1:10, 12, 13, 26, 27; 2:1 nabbawi.

Addaho, kaajja qoosso noonke! Xiwinonke coye Kalaqaanchinkera kuꞌla dandiineemmo. Qoleno, iso guwisiꞌranna assinonkerira galaxxa dandiineemmo. Ee, tenne muxxe ikkitino qoosso mulluri gede assine laꞌꞌa dihasiissannonke.—Faarso 145:14-16 nabbawi.