Huuccattotenni Magano Lubbote Jaalakki Assiꞌri

1, 2. Huuccatto dancha kaayyo gede assine laꞌꞌa hasiissannonkehu mayiraati? Qullaawu Maxaafi huuccatto lainohunni rosiisannore afa hasiissannonkehu mayiraati?

LOWO geeshsha halaꞌlado ikkitinote kalqete alame ledo heewisiinsiro, uulla lowo geeshsha shiimate. Isinni ‘iiminna uulla Kalaqaanchira’ Yihowara albaanni mannu ooso baala gambayichchu giddo noo wayi cophpho geeshshite. (Faarso 115:15; Isayyaasi 40:15) Ikkeennano, Qullaawu Maxaafi togo yaanno: “Yihowa woshshidhannosirira baalaho mule no; halaalunni woshshidhannorira baalaho mule no. Iso waajjitannorira hasattonsa wonshanno; qoleno kaaꞌlo afiꞌrate raartanno raare macciishshanno.” (Faarso 145:18, 19) Hanni hatto yaa mayyaatero huwati! Duuchchanka dandaanno Kalaqaanchi ninkera mule no yaatenna ‘halaalunni woshshiꞌnummoro’ macciishshannonke yaate. Togoo Maganiwa huuccattotenni shiqa dancha kaayyo diꞌꞌikkitino?

² Yihowa huuccattonke macciishshara hasiꞌneemmoha ikkiro, isi hasiꞌranno garinni huucciꞌra hasiissannonke. Qullaawu Maxaafi huuccatto lainohunni rosiisannore anfummokki Maganu hasiꞌranno garinni huucciꞌra dandiineemmo? Huuccatto Yihowa ledo noonke fiixooma seekkine cuꞌmiꞌneemmo gede assitannonkehura, Qullaawa Borro huuccatto lainohunni rosiissannore afa lowo geeshsha hasiissannonke.

YIHOWA HUUCCIꞌNEEMMOHU MAYIRAATI?

3. Yihowa huucciꞌneemmohu mittu qaru korkaati maati?

³ Yihowa huucciꞌneemmohu mittu qaru korkaati, Yihowa umisi iso huucciꞌneemmo gede koyisinonkehuraati. Qaalisi togo yaannonke: ‘Coyi duuchchunni huuccattotenninna eeggotenni galatu ledo Maganoho hasattoꞌne kulle ikkinnina mittu coyinnino [yaaddinoonte]. Mannu [wodancha] duuchchate aleenni ikkinohu Maganu keeri wodanaꞌneno hedoꞌneno Kiristoosi Yesuusinni agarannoꞌne.’ (Filiphphisiyusi 4:6, 7) Kalqete alamera Aliidi Gashshaanchi uyinonketa tenne kaayyo shotinse laꞌꞌa dihasiissannonke!

4. Ganynyine huucciꞌra Yihowa ledo roore fiixoommeemmo gede kaaꞌlitannonkehu hiittoonniiti?

⁴ Huuccatto assiꞌneemmohu wolu korkaati, ganynye Yihowa huucciꞌra isi ledo noonke jaalooma kaajjishshannohuraati. Lubbo baxantanno jaalla mimmitu ledo hasaabbannohu mitore hasidhuro calla diꞌꞌikkino. Isinni togoo jaalla lowo geeshsha baxantannohura hedonsa, huluullisannonsarenna giddonsata mimmitoho fushshite hasaaphphitanno. Maganinke Yihowa ledo noonke fiixoomino mito ragaanni hattooho. Qullaawu Maxaafi Yihowa lainohunni rosiisannore, yaano isi ayeetironna alaamasi konni maxaafi kaaꞌlonni halaꞌladunni rosootto. Konni daafira Yihowa jaalooꞌma dandiinanni Magano ikkinota xa buuxootto. Huuccatto hedokkinna giddokkita iimi Annikkira hasaaphphate faro fantannohe. Hatto assattoha ikkiro, Yihowawa albinni roore shiqatto.—Yaaqoobi 4:8.

HUUCCATTONKE MACCIISHSHANTANNO GEDE MA ASSA HASIISSANNONKE?

5. Yihowa baalanta huuccatto macciishshannokkita mayinni anfeemmo?

⁵ Yihowa baalanta huuccatto macciishshannoni? Isi masaalaanchu Isayyaasi yannara finqilaasine Isiraeele yiinore lai: “Batissine huuccidhiniro nafa dimacciishsheemmoꞌne; angaꞌne mundeetenni battaabbino.” (Isayyaasi 1:15) Konni daafira Maganu huuccattonke macciishshannokki gede assannori no yaate. Maganu huuccattonke macciishshara hasiꞌnummoro assa hasiissannonkehu mitu mitu qaru coyi no.

6. Maganu huuccattonke macciishshanno gede umihunni mayi heeꞌrankera hasiisanno? Ammana noonketa leellisha dandiineemmohu mayinniiti?

⁶ Umihunni ammana heedhankera hasiisanno. (Maarqoosi 11:24) Hawaariya Phaawuloosi togo yee borreessino: ‘Ammana nookkiha Magano hagiirsiisa didandiinanni; [korkaatuno] Maganunniwa shiqanno manchi Maganu nootanna iso hasiꞌranno mannira elto aannoha ikkinota ammana hasiissannosi.’ (Ibiraawuyaani 11:6) Halaalaancho ammana, Maganu nootanna huuccatto macciishshannota hattono dawaro qolannota ammana calla diꞌꞌikkitino. Ammana assineemmorinni leeltanno. Barru baala heeꞌneemmo heeshshonni ammana noonketa leellisha hasiissannonke.—Yaaqoobi 2:26.

7. (a) Yihowa huucciꞌneemmo wote ayirrinynyunni huucciꞌra hasiissannonkehu mayiraati? (b) Magano huucciꞌneemmo wote rambaoota ikkankenna huuccattonke giddota ikkitinota leellinsheemmohu hiittoonniiti?

⁷ Qoleno Yihowa, huuccattotenni isiwa shiqannohu ayiino rambaꞌnetenninna giddonni kae huucciꞌrasira hasiꞌranno. Yihowa ledo hasaawate rambaoota ikkineemmohu ikkadu korkaati noonke. Mannu nugusa coyishiishate faro afiꞌriro coyishiishannohu silxaanesi ayirrisanno garinniiti. Yihowawa shinqeemmo wote hakkiinni roorsine ayirrinynyunni shiqa hasiissannonke! (Faarso 138:6) Isinni Yihowa “Duuchchanka Dandaanno Maganooti.” (Kalaqo 17:1) Magano huucciꞌneemmo wote, rambaꞌnetenninna isi albaanni anjoommore ikkanke ammanneemmota leellishanno garinni huucciꞌra hasiissannonke. Togoo rambaꞌne huucciꞌneemmo wote yinoommota yaantenni wodaninkenninna giddonkenni huucciꞌneemmo gede assitannonke.—Maatewoosi 6:7, 8.

8. Huuccattonke ledo sumuu yaate ma assa dandiineemmo?

⁸ Assa hasiissannonkehu wolu coyi, Maganu huuccattonke macciishshanno gede huuccattonke ledo sumuu yaannore assate. Yihowa, huucciꞌneemmo coye afiꞌrate wolqanke dandiitannore baala assinammora hasiꞌranno. Lawishshu gedera, “Barru sagale techcho uyinke” yine huucciꞌnummoro, dandiinummo geeshsha heeꞌri looso baala jawaante loosa hasiissannonke. (Maatewoosi 6:11; 2 Teselonqe 3:10) Shamu maalinke abbannore qeelate fatanu giddora eessannonke coyinni horonta xooqa hasiissannonke. (Qolasiyaasi 3:5) Kore assa hasiissannonkere agurranna, huuccatto lainohunni dawaro qola hasiissannonketi wole xaꞌmo no.

HUUCCATTO LAINOHUNNI MITE MITE XAꞌMORA DAWARO QOLA

9. Huucciꞌra hasiissannonkehu ayeeti? Huucciꞌneemmohuna ayee widoonniiti?

⁹ Huucciꞌra hasiissannonkehu ayeeti? Yesuusi rosaanosi “iima heeꞌranno Annanke” huuccidhanno gede rosiisinonsa. (Maatewoosi 6:9) Konni daafira huucciꞌra hasiissannonkehu Magano Yihowa callaati. Ikkeennano, Yihowa Beettisi Yesuusi Kiristoosi silxaane ayirrinsammora hasiꞌranno. Fooliishsho 5 aana ronsummonte gede, Yesuusi uullara dayinohu ninkera wodo ikke cubbunninna reyotenni gatisankeraati. (Yohaannisi 3:16; Roomu Sokka 5:12) Isi Kakkalaanote Biilonna Daanynya assine shoommoonniho. (Yohaannisi 5:22; Ibiraawuyaani 6:20) Konni daafira Qullaawa Borro huuccattonke Yesuusi widoonni huucciꞌra hasiissannonketa xawissanno. Yesuusi umisi togo yiino: ‘Doogonna halaalu heeshshono aneeti. Ane widoonni agurranna mittuno Anniꞌyawa shiqannohu dino.’ (Yohaannisi 14:6) Huuccattonke macciishshantanno gede huucciꞌra hasiissannonkehu Beettisi widoonni qolle Yihowa callaati.

10. Huucciꞌneemmo wote baxxino gari heeꞌra hasiissannosikkihu mayiraati?

¹⁰ Huucciꞌneemmo wote ikka hasiissannonkehu addi gari no? Dino. Yihowa huucciꞌneemmo wote angankenni ikko woꞌma mannimmankenni baxxitino ikkito ikkinammora dihasiꞌranno. Qullaawu Maxaafi Maganu macciishshannohu huucciꞌnannihu duuchchu gari noota rosiisanno. Konni gari giddo gamu, ofollate, albunni gombisamate, guluphphatenna uurrate. (1 Zeena 17:16; Nehimiya 8:6; Daanieeli 6:10; Maarqoosi 11:25) Qaru coyi wolu manni laꞌꞌankera baxxitino ikkito leellisha ikkikkinni suwashshu wodaninni huucciꞌrate. Isinni barru baali diinagge assiꞌneemmo wote woyi hedeweelcho jajjarsannori iillinkero ayeewano heeꞌne qoonqo fushshinummokki huucciꞌra dandiineemmo. Togoo huuccatto mulenke noo manni nafa wodancha hoogara dandaanno; Yihowa kayinni macciishshanno.—Nehimiya 2:1-6.

11. Gillenkera maa maa huucciꞌra dandiineemmo?

¹¹ Huucciꞌra hasiissannonkehu maahooti? Qullaawu Maxaafi togo yee xawisanno: “Ayee coyeeno isi fajjo gede huucciꞌnummoro [Yihowa] macciishshannonke.” (1 Yohaannisi 5:14) Konni daafira Maganu fajjo ledo sumuu yaannore baala huucciꞌra dandiineemmo. Gillete hasiisannonkerira huucciꞌra Maganu fajjo ikkitino? Ee Maganu fajjooti! Yihowa huucciꞌra lubbote jaali ledo hasaawate gedeeti. Huxuxxi yinummokki Maganoho ‘wodaninketa fushshine duna’ dandiineemmo. (Faarso 62:8) Gara ikkinore assate kaaꞌlo afiꞌneemmo gede qullaawa ayyaana afiꞌrate huucciꞌra hasiissannonke. (Luqaasi 11:13) Qoleno biddishsha afiꞌne dancha wussaane wossaꞌnatenna babbaxxino qarra dandee heeꞌrate huucciꞌra dandiineemmo. (Yaaqoobi 1:5) Cubbo loonsummoro Kiristoosi kakkalo widoonni maaro xaꞌmira hasiissannonke. (Efesooni 1:3, 7) Kayinnilla huucciꞌra hasiissannonkehu gillete hasiisannonkerira calla diꞌꞌikkino. Kunino uminkera calla ikkikkinni wolu mannirano, maatenkeranna ninke gedee ammanaanorano huucca hasiissannonke.—Soqqamaanote Looso 12:5; Qolasiyaasi 4:12.

12. Huuccattonke giddo iimi Anninke ledo xaado afiꞌrinore balaxisiinseemmota leellinsheemmohu hiittoonniiti?

¹² Roorenkanni huucciꞌra hasiissannonkehu Yihowa ledo noonke fiixoomiraati. Danchummasira baalate Yihowa giddonkenni galatanna guwisa hasiissannonke. (1 Zeena 29:10-13) Yesuusi Maatewoosi 6:9-13 aana huucciꞌneemmo gara rosiisanni Maganu suꞌmi maassamara huucciꞌneemmo gede rosiisino. Aancheno Maganu Mangiste dagganno gedenna fajjosi iima ikkitinonte gede uullano ikkitanno gede huucciꞌnammora rosiisino. Yesuusi gillete hasiisannore qummi assinohu umo Yihowa ledo xaado afiꞌrinore xawisi gedensaanniiti. Ninkeno huucciꞌneemmo wote Magano balaxisiinseemmoha ikkiro, ninke keerinni roore Maganunniri huluullisannonketa leellinsheemmo.

13. Maganu macciishshanno huuccatto seendille lainohunni Qullaawa Borro marichcho qummi assitanno?

¹³ Huuccattonke mageeshsha seeda hasiissannose? Qullaawu Maxaafi gillete ikko mannu gamba yinowa assiꞌneemmo huuccatto seendille diwossanino. Sagale intara kaꞌne assiꞌnannite harancho huuccattonni kayise wodaninke xisso Yihowara kuꞌlate assiꞌneemmo huuccatto geeshsha deerrise babbaxxinoho. (1 Saamueeli 1:12, 15) Ikkollana leellamate yite mannu albaanni seeda huuccatto assidhannore umonsa keereensitanno mannoota Yesuusi mishino. (Luqaasi 20:46, 47) Togoo huuccatto Yihowa dimacciishshanno. Qaru coyi, wodaninkenninna giddonkenni huucciꞌrate. Konni daafira, Maganu macciishshanno huuccatto seendilli, hasiꞌneemmo coyinna ikkitote garinni babbaxxara dandaanno.

14. Qullaawu Maxaafi ‘woꞌma wote huucciꞌneemmo’ gede uyinonke amaale mayi tiro afidhino? Tenne hajo lainohunni sheshifachchishanno coyi maati?

¹⁴ Mamoote mamoote huucciꞌra hasiissannonke? Qullaawu Maxaafi, ‘[agurrummokki] woꞌma wote huucciꞌneemmo’ gede, ‘huuccattotenni kaajjineemmo’ gedenna ‘duuchcha wote huucciꞌneemmo’ gede amaalannonke. (Luqaasi 18:1; Roomu Sokka 12:12; 1 Teselonqe 5:17) Togo yaa kayinni, mittu barri giddo saꞌꞌaatete kiiro Yihowa huucciꞌra hasiissannonke yaa diꞌꞌikkitino. Hatteentenni, assinonke danchummara Yihowa galatatenna isiwiinni biddishsha, sheshonna jawaante afiꞌrate ganynyine huucciꞌneemmo gede Qullaawu Maxaafi amaalannonke. Yihowa iso mageeshshi yanna huucciꞌra hasiissannonkeronna meꞌꞌe hinge huucciꞌneemmoro wossaninokkita afanke sheshifachchishshannota diꞌꞌikkitino? Yihowa iso huucciꞌneemmo gede uyinonke kaayyora galatu noonkeha ikkiro, iimi Anninkewa huucciꞌrate ayeewoteno faro hasiꞌneemmo.

15. Gillete huuccattora woyi mannu ledo huuccattora jeefote “Hamiiꞌni” yaa hasiissannonkehu mayiraati?

¹⁵ Huuccattote jeefora “Hamiiꞌni” yaa hasiissannonkehu mayiraati? “Hamiiꞌni” yaanno qaali, “addinta” woyi “ikkona” yitanno tiro afiꞌrino. Qullaawa Borro giddo noo lawishshi, gillete huuccattora woyi mannu ledo huuccattora jeefote “Hamiiꞌni” yaa hasiissannota xawisanno. (1 Zeena 16:36; Faarso 41:13) Gillenke huuccattora jeefote “Hamiiꞌni” yineemmoha ikkiro, huuccattonke wodanitanna giddota ikkitinota leellinshanni heeꞌnoommo. Mittu manchi mannu mereero huuccatto asse kaeenna, sununni woyi qoonqonke fushshine “Hamiiꞌni” yineemmoha ikkiro, hattee huuccatto giddo yinoonnire ninkeno banxoommota leellinshanni heeꞌnoommo yaate.—1 Qorontoosi 14:16.

MAGANU HUUCCATTONKERA DAWARO QOLANNOHU HIITTOONNIITI?

16. Huuccatto lainohunni huluullammeemmokki coyi maati?

¹⁶ Yihowa huuccattote dawaro qolanno? Mitte huluullo nookkiha qolanno! “Huuccatto macciishshanno Magani” miliyoonetenni kiirranni manni giddonsanni assiꞌranno huuccattora dawaro qolanno yineemmo gede assannonkehu ikkadu korkaati noonke. (Faarso 65:2) Yihowa huuccattonkera babbaxxitino doogonni dawaro qolankera dandaanno.

17. Maganu huuccattonkera dawaro qolate sokkaanosinna uullate aani soqqamaanosi horoonsiꞌranno yineemmohu mayiraati?

¹⁷ Yihowa huuccattonkera dawaro qolate sokkaanosinna uullate aana noo soqqamaanosi horoonsiꞌranno. (Ibiraawuyaani 1:13, 14) Qullaawa Maxaafa buuxate kaaꞌlannonsa gede Magano huuccidhe kaꞌe, hakkawotenni Yihowa soqqamaano giddo mittu ledo xaaddino mannootire kultannoti haammata xagge no. Togoo xagge sokkaano Maganu Mangistere sabbakate looso marraꞌanni noota leellishshanno tajeeti. (Ajuu[j]a 14:6) Lowo geeshsha mitiiꞌmine huucciꞌneemmo huuccattora dawaro qolate, Yihowa mittu Kiristaanchi ninke kaaꞌlanno gede assara dandaanno.—Lawishsha 12:25; Yaaqoobi 2:16.

18. Yihowa soqqamaanosi huuccattora dawaro qolate qullaawa ayyaanasinna Qaalesi horoonsiꞌrannohu hiittoonniiti?

¹⁸ Maganu Yihowa soqqamaanosi huuccattora dawaro qolate, qullaawa ayyaanasinna Qaalesi yaano Qullaawa Maxaafano horoonsiꞌranno. Iillannonke fatana dandiine heeꞌrate kaaꞌlannonke gede assiꞌneemmo huuccattora Yihowa qullaawu ayyaanisinni biddishshanna jawaante oye dawaro qolannonke. (2 Qorontoosi 4:7) Biddishsha afiꞌrate huucciꞌneemmo huuccattora duuchcha wote Yihowa Qullaawu Maxaafinni dawaro qolannonke; Qullaawu Maxaafi qole gara ikkino coye wossaꞌnineemmo gede kaaꞌlannonke. Gilletenni Qullaawa Maxaafa xiinxallineemmo wotenna konni maxaafi gedeere wole Kiristaanu borro nabbambeemmo wote, kaaꞌlitanno xiqissa afiꞌnammora dandiineemmo. Kiristaanu gambooshshiwa coyiꞌnoonni assaawenni woyi ninkera mitiiꞌmannohu mittu songote cimeessi aannonke amaalenni dancha assaawe afiꞌnammora dandiineemmo.—Galatiya 6:1.

19. Maganu huuccattonkera dawaro qolikki keeshshinoha lawinkero hawa hasiissannonkekki coyi maati?

¹⁹ Yihowa huuccattonkera dawaro qola keeshshinoha lawinkero, keeshshinohu dawaro qolate wolqa hoogino daafira diꞌꞌikkino. Yihowa huuccattote dawaro qolannohu fajjosi garinninna wossanino yannara ikkinota qaaga hasiissannonke. Isi hasattonkenna hattee hasattonke wonshanno gara ninkenni roore afino. Qoleno Yihowa duuchcha wote, ‘xaꞌmiꞌranke, hasiꞌrankenna waalcho gangananke’ agurreemmokki gede hasiꞌranno. (Luqaasi 11:5-10) Togo assa agurreemmokkiha ikkiro, hasattonke iimi addita ikkitukki giddota ikkitinotanna ammananke goowi alita ikkitinokkita Maganoho leellinshanni heeꞌnoommo yaate. Hakkiinni saeno, Yihowa ninkera leellinokki garinni huuccattonkera dawaro qolara dandaanno. Lawishshaho, fatanu iillannonke wote huucciꞌneemmo huuccattora hakkonne fatana hoolikkinni dandiine heeꞌneemmo gede jawaante oye huuccattonkera dawaro qolara dandaanno.—Filiphphisiyusi 4:13.

20. Yihowa ganynyine huucciꞌra hasiissannonkehu mayiraati?

²⁰ Halaꞌlado kalqete alame Kalaqaanchi, gara ikkitino doogonni woshshitannosirira baalaho muliha ikkino daafira lowo geeshsha galanteemmore ikka hasiissannonke! (Faarso 145:18) Yihowa huucciꞌranke lowo kaayyo ikkitino daafira ganynyine iso huucciꞌno. Hatto assineemmoha ikkiro, huuccatto macciishshannohuwa Yihowawa bashshonni roore shinqeemmo.