“Yihowa Isire Ikkitinore Egennino”
“Mittu manchi Magano baxannoha ikkiro, Maganu hakkoye mancho egennino.”—1 QOR. 8:3.
1. Maganu daga giddo mitootu insaneeto gowwissino gara kulanno lawishsha qummi assi. (Umi misile lai.)
MITTO barra soodo, Kakkalaanote Biili Aarooni hixaana worre shilqinshanni uduunnicho haare Yihowahu xaadooshshu dunkaani xullora uurre no. Hakko mulenni, Qorenna 250 ikkanno mannino mittu mittunku uminsa hixaana Yihowara shiqishanni no. (Zeh. 16:16-18) Iimi adda laꞌniro, kuri baalunku mannooti Yihowara ammanante soqqantannore labbanno. Ikkollana, Aarooni agurranna kuꞌuri gudisante giddetenni kakkalaano ikkate kaꞌino finqilaasineeti. (Zeh. 16:1-11) Insa shiqishshanno kakkalo Maganu adhannohu gede assite hedde insaneeto gowwissino. Hatto yite hedansa kayinni, wodaninsa hedo afanno Magano Yihowa xonate gedeeti; isi insa ikkitinokkire ikkate woꞌnaaltanni noota huwata dandaanno.—Erm. 17:10.
2. Muse balaxe mayino? Isi yiinori woꞌminohu hiittoonniiti?
2 Hatte yannara Muse beꞌro gede, togo yee balaxe coyiꞌrino: “Yihowa isiha ikkinohu . . . ayetiro gaꞌa soodo egensiisanno.” (Zeh. 16:5) Addaho, “giira Yihowawiinni fulte [Qorenna] hixaana shiqishshanni noore 250 manna ittu” yannara, Yihowa iso halaalunni magansidhannorenna magansidhannokkire bade egensiisino. (Zeh. 16:35; 26:10) Qoleno, Yihowa hakkawote Aarooni gatanno gede asse halaalaanchu kakkalaanchinna isi soqqamaanchi iso ikkinota buuxisino.—1 Qorontoosi 8:3 nabbawi.a
3. (a) Hawaariya Phaawuloosi yannara Kiristaanu songo giddo mayi maikkino? (b) Yihowa Muse yannara assinori maa rosiisannonke?
3 Mitu 1,500 diri gedensaanni hawaariya Phaawuloosi yannarano hattoori ikkino. Hakkawaro, ninke Kiristaanaho yitannori mitootu kaphu roso cuꞌmidhe heedhenni songote ledo gamba yitanno. Iimi adda laꞌꞌanno manchira, kuri kaadaasine songote giddo wolootuwiinni baxxitinore diꞌꞌikkitino. Ikkirono, akatinsa ammanamino Kiristaanira lowo gawajjo abbannoho. Geꞌreewu lande uddidhinori kuri hiyyeeyye “mitootu ammana huna” jammartino. (2 Xim. 2:16-18) Ikkollana, Yihowa laꞌꞌannohu iimi adda diꞌꞌikkino; Maganu hunda Qorenna isi ledo finqiltinore ma assinoro kultanno xaggenni Phaawuloosi tenne huwatikki digatino. Hanni tenne ledo xaado afidhinota mitte Qullaawa Borro assaawenna hatte assaawenni ronseemmo roso laꞌno.
“ANI YIHOWAATI; DISOORRAMEEMMOHO”
4. Phaawuloosi seekke ammanino coyi maati? Isi Ximootewosira borreessino sokka aana tenne ammanasi xawisinohu hiittoonniiti?
4 Yihowa iso dogatenni magansidhannore bade afa dandaannotanna isira hajajantannori ayeootiro huwatannota Phaawuloosi dihuluullamino. Phaawuloosi qullaawu ayyaani marraeennasi Ximootewosira borreessino sokka aana horoonsiꞌrino qaali kaajjado ammanasi leellishannoho. Isi kaadaasine songote giddo nooha mito Kiristaana ayyaanaamittetenni gawajjitanni noo gara xawisi gedensaanni togo yiino: “Ikkollana, ‘Yihowa isire ikkitinore egennino’ hattono ‘Yihowa suꞌma woshshannohu baalunku bunshetewiinni xeertiꞌro’ yaanno maattama afiꞌrinohu kaajjadu Maganu xinti kaajje heeꞌranno.”—2 Xim. 2:18, 19.
5, 6. Phaawuloosi “kaajjadu Maganu xinti” yee borreessino qaalinni maa huwanteemmo? Kuni qaali Ximootewosi ma garinni kaaꞌlinoha ikkara dandaanno?
5 Phaawuloosi tenne xiqisera horoonsiꞌrino qaallanni maa huwanteemmo? “Kaajjadu Maganu xinti” yaanno qaali Qullaawu Maxaafi giddo noohu tenne xiqisera callaati. “Xinta” yaanno qaali Qullaawu Maxaafi giddo duuchare xawisate eino; lawishshaho, hundi Isiraeeleha qara katama Yerusaalame kulate eino. (Far. 87:1, 2) Qoleno, Yesuusira Yihowa alaami giddo noosi qeecha xintu ledo heewisiinsoonni. (1 Qor. 3:11; 1 Phe. 2:6) Ikkina Phaawuloosi “kaajjadu Maganu xinti” yee borreessi wote hedinori maati?
6 Phaawuloosi “kaajjadu Maganu xinti” yee borreessinohu, Zehulqu 16:5 aana nooha Muse Qorenna harunsaanosi daafira coyiꞌrino qaale haare borreessino xiqise aanaanti. Isi Ximootewosi jawaachishatenna Yihowa finqilaasine bade qorichisha dandaannota isira qaagiissate Muse yannara ikkinore qummi assanni noota huwata dandiinanni. Hunda Qore Yihowa alaama diiga dandiinokkinte gede hakkawaro songote giddo noo kaadaasineno isi alaama diiga didandiitanno. Phaawuloosi “kaajjadu Maganu xinti” maatiro xawise dikulino. Ikkirono, isi borreessino qaali Ximootewosi Yihowa addaxxanno gede jawaachishinositi dihuluullissannote.
7. Yihowa ayewoteno keeraanchonna ammanaminoha ikkinota huluullammeemmokkihu mayiraati?
7 Yihowahu xintu seeri horonta disoorramanno. Faarso 33:11 togo yitanno: “Yihowa wossaninori hegerera kaajje heeꞌranno; wodanisi hedono ilamatenni ilama saꞌanno.” Wole xiqisubbano Yihowa gashshooti, baꞌꞌannokki baxilli, keeraanchimmasinna ammanamasi hegerera heedhannota kultanno. (Wol. 15:18; Far. 106:1; 112:9; 117:2) Milkiyaasi 3:6, “Ani Yihowaati; disoorrameemmoho” yitanno. Hattonni Yaaqoobi 1:17, Yihowa “bayichunni bayicho saꞌꞌanno caali gede disoorramanno” yitanno.
AMMANA KAAJJISHANNO “MAATTAMA”
8, 9. Phaawuloosi horoonsiꞌrino lawishshira noo ‘maattaminni’ maa ronseemmo?
8 Phaawuloosi 2 Ximootewosi 2:19 aana, maattamu gede assine borro aanaho sumundoonni xinti noota lawishshunni coyiꞌrino. Hundi waro, gimbe minnanni wote xintaho borro sumuda wosincho coye diꞌꞌikkitino; hatti borro gimbete anni ayetiro woy minino manchi suꞌma kultannota ikkitara dandiitanno. Qullaawu Maxaafi giddo konne lawishsha horoonsiꞌrinohu umihu Phaawuloosiiti.b “Kaajjadu Maganu xinti” aana noo maattami lame assaawe amadino. Umiti, “Yihowa isire ikkitinore egennino” yitanno; layinkiti kayinni, “Yihowa suꞌma woshshannohu baalunku bunshetewiinni xeertiꞌro” yitanno. Tini Zehulqu 16:5 noo xiqise qaagiissitannonke.—Xiqise nabbawi.c
9 Phaawuloosi horoonsiꞌrino lawishshira noo ‘maattaminni’ maa ronseemmo? Aane noohu lamu qaru halaali, Yihowa wodhonna xintu seerubbasi xaphi asse amadinota ronseemmo: (1) Yihowa isira ammanantinore baxanno; (2) Yihowa bunshe giwanno. Konne halaale huwatanke songote giddo kaꞌanno kaadaasine lainohunni kaaꞌlitannonkehu hiittoonniiti?
10. Phaawuloosi yannara kaadaasinete ikkito ammanamino Kiristaana ma assitino?
10 Ximootewosiranna wolu ammanamino Kiristaanira mereeronsa noo kaadaasine ikkito qarra ikkitunsakki digattino. Mitu Kiristaani, tenne kaadaasine songote giddo heedhara sammi yinoonnihu mayiraati yee hedinoha ikkara dandaanno. Ammanamino Kiristaani insa ammanamanna wolootu dogganni magansidhanno magansiꞌra Maganu bade afannokka yee huluullaminoha nafa ikkara dandaanno.—Looso 20:29, 30.
Ximootewosi kaadaasinete faale haꞌrinokkiti egennantinote (Gufo 10-12 lai)
11, 12. Phaawuloosi borreessino sokka Ximootewosi ammana jawaachishshukki digattino yineemmohu mayiraati?
11 Phaawuloosi borreessino sokka Ximootewosi ammana jawaachishshinoti dihuluullissannote; Phaawuloosi ammanamino manchi Aarooni ayirrinye afiꞌrinota, ikkinokkita ikkate woꞌnaalinohu Qorenna harunsaanosi kayinni fojinsa fulinota, Maganu facci asse agurinonsatanna huninota Ximootewosi qaaganno gede assino. Isi wole yaattonni, songote giddo kaphu Kiristaani heeꞌrirono Yihowa Muse yannante gede isire ikkitinore bade afino yiinohu gedeeti.
12 Yihowa horonta disoorramanno; isi ammanaminoho. Isi bunshe giwanno; qoleno maaro eꞌannokki cubbaataamma yannasira faradanno. Ximootewosi ‘Yihowa suꞌma woshshannoha’ ikkino daafira, kaphu Kiristaani bunshete widira xixxiiwannositera anga aannokki gedeno amaalloonnisi.d
MAGANO HALAALUNNI MAGANSIꞌRA BEEBBATE DAAFURO DIꞌꞌIKKITINO
13. Horonta huluullammeemmokki coyi maati?
13 Phaawuloosi qullaawu ayyaaninni borreessino qaali ninkeno jawaachishankera dandaanno. Umihunni, Yihowa isira ammanammoommore ikkinoommota seekke afanno. Isi ammanantino soqqamaanosi egenna calla ikkikkinni insara lowonta assaawanno. Qullaawu Maxaafi togo yaanno: “Woꞌmu wodaninsanni iso addaxxitannore jawaachishara, Yihowa ille uulla woꞌmate aana kawanna kaꞌa laꞌanni no.” (2 Zeena 16:9) Konni daafira, “keeraanchu wodaninni” Yihowara assineemmori mulla daafuro ikke gatanno yine horonta dihuluullammeemmo.—1 Xim. 1:5; 1 Qor. 15:58.
14. Yihowa hiittoo manna sammi yee dilaꞌꞌanno?
14 Hakkiinni saeno, Yihowa iso dogatenni magansidhannore sammi yee laꞌꞌannokkita huwata hasiissannonke. Illesi “uulla woꞌmate aana kawanna kaꞌa laꞌanni” noo daafira “woꞌmu wodaninsanni” isira galtinokkire bade afa dandaanno. Lawishsha 3:32 yitanno garinni, “Yihowa haminticha mancho” bade afanno; togoo manchi goꞌle cubbo loosanni heeꞌrenni laꞌꞌanno mannira leellate geeshshira hajajamanno. Hamintichu manchi manna doganni shiima yanna keeshsha dandaannoha ikkirono, Yihowa duuchanka dandaannohanna keeraancho ikkino daafira “cubbosi maaxanno manchira diqinaannosi.”—Law. 28:13; 1 Xim. 5:24; Ibi. 4:13.
15. Hiittoo akata hooꞌla hasiissannonke? Mayira?
15 Yihowa daga giddo rooriidi iso halaalunni magansidhannoreeti. Roore wote, songote giddo noohu mittu manchi afanni heeꞌrenni Magano kaphunni magansiꞌrannokkiti egennantinote. Ikkirono, togoo manni Musenna hundi Kiristaani waro heeꞌrinka geeshsha ninke yannara diheeꞌranno yine dianfeemmo. (2 Xim. 3:1, 5) Ikkina kayinni, Kiristaana roduuwanke ammana hooganna Yihowara noonsa ammana huluullama hasiissannonke? Horonta dihasiissannonke! Mitte tajeno nookkiha roduuwanke huluullama soꞌrote. (Roomu Sokka 14:10-12 nabbawi;e 1 Qor. 13:7) Hakkiinni saeno, songote giddo roduuwinke ammanama huluullamate dooꞌꞌo heedhunkero ninke uminke ayyaanaamittetenni gawajjammeemmo.
16. (a) Dogate akati wodaninke giddo sunu sununni rumuxxannokki gede maa assa dandiineemmo? (b) “Kiꞌneneeto Ganyitine Fatanne . . . Kiꞌneneeto Ganyitine Layidhe” yitanno saaxinenni maa ronseemmo?
16 Mittu mittunku Kiristaanchi “umisi loosi hiittoohoro fatane layiꞌra” hasiissannosi. (Gal. 6:4) Guuntete xeꞌne noonke daafira, Yihowa woꞌmu wodaninkenni magansiꞌneemmokki gede assitanno akatta giddonke anfummokki lophitara dandiitanno. (Ibi. 3:12, 13) Konni daafira, Yihowara soqqammeemmo gede assannonkeri maatiro yannate kiiro layiꞌra hasiissannonke. Ninkeneeto togo yine xaꞌma dandiineemmo: ‘Yihowa magansiꞌreemmohu iso baxeemmo daafiraatinna duuchunkura aliidi Magano ikkino daafiraatinso, roore leellannoehu Gannatete afiꞌreemmo atooteeti?’ (Aju. 4:11) Addaho, ninke baalunku assootenke layiꞌrankenna wodaninke giddo dogate akati hilihu nafa gatannokki gede assine hooꞌlanke lowore kaaꞌlitannonke.
AMMANAMA HAGIIRRAAMMA ASSITANNO
17, 18. Yihowa woꞌmu wodaninkenninna halaalunni magansiꞌra hasiissannonkehu mayiraati?
17 Yihowa woꞌmu wodaninkenninna halaalunni magansiꞌneemmoha ikkiro, lowo atoote mixxineemmo. Faarsaanchu togo yiino: “Yihowa cubbosi kiirannokkihunna ayyaanisira doga nookki manchi hagiirraamoho.” (Far. 32:2) Ee, wodaninsa giddonni dogate akata fiite hooꞌlitannori roorenka hagiirraammaho; qolteno albillitte guuta hagiirre afidhanno.
18 Yihowa bunshe loosa roso assidhinore woy lamu gari heeshsho heedhannore yannasira fojinsa fulanno gede assanno; konni garinni, “keeraanchunna bushu manchi mereero, hattono Magano magansiꞌrannohunna magansiꞌrannokkihu mereero noo badooshshi” xawe leellanno gede assanno. (Mil. 3:18) Hakka geeshsha kayinni, ‘Yihowa ille keeraano laꞌannotanna maccasino insa eeggifatte huuccidhanno huuccatto macciishshitannota’ afanke sheshifachishshannonke.—1 Phe. 3:12.
a 1 Qorontoosi 8:3: “Ikkollana, mittu manchi Magano baxannoha ikkiro, Maganu hakkoye mancho egennino.”
b Phaawuloosi Ximootewosira sokka soyihunni lowo diri sai gedensaanni borreessantinoti Ajuuja 21:14, 12 hawaariyaate suꞌma 12 “xintu kinna” aana sumundoonnita kultanno.
c Zehulqu 16:5: “Hakkiinnino, isi Qorenna isi wido ikkitinore togo yii: ‘Yihowa isiha ikkinohu, qullaawunna isiwa shiqa hasiissannosihu ayetiro gaꞌa soodo egensiisanno; hakkiinnino isi doodhinohu isiwa shiqanno.’”
d Aananno birxichira, Yihowa faale harunsine bunshe gimbeemmota leellisha dandiineemmohu hiittoonniitiro ronseemmo.
e Roomu Sokka 14:10-12: “Rodiikkira faradattohu mayiraati? Woy rodookki ajishshe laꞌꞌattohu mayiraati? Korkaatuno ninke baalunku Maganunnite firdete wombare albira shinqeemmo. Togo yine borreessinoonni: ‘Yihowa togo yaanno: “Ani heeshshonniha ikkoommoti huluullissannokkinte gede, guluchu baalunku anera guluphannotinna arrawu baalunku Maganimmaꞌya daafira faajjete coyiꞌrannoti dihuluullissannote.”’ Hakko daafira, ninke mittu mittunku Maganu albaanni uminke daafira dawaro qolleemmo.”