Yihowa Ninkewa Shiqannohu Hiittoonniiti?

1. Mannu oosora mayi hasatto noonsa? Tenne hasattonsa wonshitannori ayeooti?

MANNU oosora mimmitunniwa gamba yaate lowo hasatto noonsa. Mannoota “mimmitunniwa gamba yitannoreeti yinannihu, mimmito lubbora baxxannohanna mimmito seekkite egentinoha” ikkirooti. Baxannonkehu, naadannonkehunna seekke egenninonkehu mininke manninna jaallanke ledo noonke aante lowo geeshsha baxissannonke. Ikkirono, baalunkunni rooranno jaalooma kalaqiꞌra hasiissannonkehu Bayiru Kalaqaanchinke ledooti.—Mek. 12:1.

2. Yihowa mayyee qaale einonke? Ikkirono, batinyu manni konne qaale ammanannokkihu mayiraati?

² Yihowa Qaalisi widoonni isiwa ‘shinqeemmo’ gede amaalinonke; qoleno hatto assinummoro, ‘isino ninkewa shiqara’ qaale eino. (Yaq. 4:8) Tini lowo geeshsha jawaachishshannote! Ikkirono, batinyu mannira Maganu isiwa shinqammora hasiꞌrannota ammana qarrissannonsa; insa, ninke isiwa shiqa hasiissannonkere diꞌꞌikkinoommo woy isi mannuwiinni lowo geeshsha xeertiꞌrinoho yite heddanno. Ikkina, addinta Yihowawa shiqa dandiinanni?

3. Yihowa daafira dea hasiissannonkekki coyi maati?

³ Yihowa hasiꞌrannosihu ‘mittu mittunku manchiwiinni xeertiꞌrinoha ikkinokkita’ dea dihasiissannonke; iso seekkine afa dandiinanni. (Looso 17:26, 27; Faarso 145:18 nabbawi.a) Guuntete xeꞌne noonkere ikkinummorono, Maganinke isiwa shinqammora hasiꞌranno; hattono ninke muli jaallasi assiꞌra difokkifatanno. (Isa. 41:8; 55:6) Faarsaanchu umisi heeshshonni lainore hede Yihowa togo yiino: “Huuccatto macciishshatto Magano, duuchunku gari manni atewa shiqanno. Ati doorattohunna . . . atewa gamba assiꞌratto manchi hagiirraamoho.” (Far. 65:2, 4) Qullaawu Maxaafi Maganunniwa shiqino manni giddo mittu Yihudu Nugusa Asa ikkinota qummi assanno; qoleno Yihowa isira assinore kulannonke.b

HUNDIHU MAGANU SOQQAMAANCHI XAGGENNI RONSEEMMORE

4. Nugusu Asa Yihudu dagara dancha lawishsha ikkinohu hiittoonniiti?

⁴ Nugusu Asa hakkawaro gobbate batidhinota beetemeqidesete giddo noo foorrenna kaphu magansiꞌra hune, halaalu magansiꞌrara lowonta diinaggaawannota leellishino. (1 Neg. 15:9-13) Isi umisi Yihowawa shiqinohanna Higgesi ayirrisannoha ikkino daafira, Yihudu daga “annuwansa Magano Yihowa hasidhanno gedenna Higgesinna hajajosi agadhitanno gede” seekke kulino. Yihowa Asa gashshinohu umihu tonnu diri giddo salaame woꞌmitanno gede asse maassiꞌrinosi. Asa salaame heedhanno gede assinohu maati yiino? Isi daga togo yiino: “Maganonke Yihowa hasiꞌnoommo daafira gobba xaano anganke no. Ninke iso hasiꞌnoommo daafira, duuchunku raginni fooliishsho uyinonke.” (2 Zee. 14:1-7) Hanni hakkiinni aane ikkinore laꞌno.

5. Asara Maganoho noosi ammana fatanannori mayi iillinosi? Gedensaanni mayi ikkiyya?

⁵ Hanni Asara iillinori iillinohe gede assite hedi. Ziri yinannihu Itophiyu manchi Yihudu daga qasate 1,000,000 olantonna 300 saragalla adhe dayino. (2 Zee. 14:8-10) Kageeshshi saraawite mangistekki qassara dagganni noota laittoro mayi macciishshamannohe? Ate wottaaddari qole 580,000 callaho! Diinu wottaaddari ate saraawitenni ero ikkannota hedatto wote, Maganu kuni ikkara worinohu mayiraati yite hedatto? Konne hedeweelcho tuncu yiinoheha buutote qarra umikki hayyonni fulate woꞌnaalatto? Asa assinori, isira Yihowa ledo muli jaaloomi noositanna iso addaxxannota leellishanno. Isi wodanisi hedo fushshe togo yee eeggifatino: “Maganonke Yihowa, addaxxineemmohu ateetina kaaꞌlinke; tenne daga qasate kaꞌnoommohuno ate suꞌminniiti. Yihowa, ati Maganonkeeti. Reyanno manchi wolqisara worte laꞌooti.” Isi togo buxuqqame huucciꞌrino huuccattora Maganu dawaro qolinohu ma garinniitiyya? “Yihowa Itophiyu daga gani.” Hakkiinni aane kaino olinni diinu wottaaddari coꞌo yee goofino!—2 Zee. 14:11-13.

6. Asa lawishsha harunsa dandiineemmohu hiittoonniiti?

⁶ Asa Maganu biddishshanna agarooshshe addaxxannota leellishinohu hiittoonniiti? Qullaawu Maxaafi, “Asa Yihowa albaanni gara ikkinore assino,” hattono isi “wodanasi gudise Yihowara uyinoho” yaanno. (1 Neg. 15:11, 14) Ninkeno Maganoho woꞌmu wodaninkenni soqqama hasiissannonke. Ee, xaano ikko albillitte Maganu ledo muli jaaloomi heeꞌrankera hasiꞌnummoro tenne assa hasiissannonke. Yihowa umisinni kae isiwa shinqeemmo gede assinonkehura, hattono isi ledo quraanyamme heeꞌneemmo gede kaaꞌlannonkehura lowo geeshsha galanteemmosi! Hanni Maganu tenne assinota lame doogga laꞌno.

YIHOWA WODOTE KAKKALO WIDOONNI NINKEWA SHIQINO

7. (a) Yihowa isiwa shinqeemmo gede maa maa assino? (b) Maganu isiwa shinqeemmo gede assinoti baalantenni roortanno doogo hiitteeti?

⁷ Yihowa ninkera qae ikkitara biifado uulla kalaqe, baxannonketa leellishino. Qoleno lubbote heeꞌneemmo gede maalaamittete hasiisannonkere oye baxillesi leellishannonke. (Looso 17:28; Aju. 4:11) Hakkiinni saeno, Yihowa ayyaanaamittete hasattonke wonshannonke. (Luq. 12:42) Qoleno, mittu mittunku huuccatto macciishshate qaale eino. (1 Yoh. 5:14) Ikkollana, Maganu isiwa shinqeemmo gede assinotinna baxillesi leellishinonketi baalantenni roortanno doogo wodote kakkalo qixxeessasiiti. (1 Yohaannisi 4:9 nabbawi;c 1 Yoh. 4:10, 19) Yihowa ninke cubbunninna reyotenni gatisara “mitto Beettosi” uullara soyino.—Yoh. 3:16.

8, 9. Yesuusira Yihowa alaami giddo mayi qeechi noosi?

⁸ Yihowa Kiristoosi daara albaanni noo manni nafa wodote kakkalonni horo afiꞌranno gede assino. Isi albillitte mannu oosora Gatisaancho soyannota masaali yannanni jammare, wodote kakkalo shiqqinohu gede asse laꞌꞌanno; korkaatuno isi alaamisi woꞌmikki gatannokkita afino. (Kal. 3:15) Hawaariya Phaawuloosi lowo xibbi diri gedensaanni, “Kiristoosi Yesuusi kaffalino wodonni wolapho” afiꞌneemmotera Magano galatino. Isi lede togo yiino: “Maganu alba cince saino dirrara loosamanno cubbo gatona yaanni keeshshino.” (Rom. 3:21-26) Addaho, Yesuusi ninke Maganunniwa shinqeemmo gede lowore assino!

⁹ Shooshaqu manni Yihowa afanna isi ledo jaalooma kalaqiꞌra dandaannohu Yesuusi widoonni callaati. Qullaawa Borro konne halaale luphi assite kultannohu hiittoonniiti? Phaawuloosi togo yee borreessino: “Maganu Kiristoosi ninkera yee reyanno gede asse, cubbaataamma ikkine heeꞌneenna baxannonketa leellishino.” (Rom. 5:6-8) Yesuusi wodo loosinkenni afiꞌnoommota ikkitukkinni Maganunna Yesuusi baxxannonke daafira shiqqinote. Yesuusi togo yiino: “Soyinoehu Anniꞌya goshooshinoha agurranna, anewa daa dandaannohu dino.” Wole woteno, “Ane widoonni ikkiro ikkinnina Anniꞌyawa daa dandaannohu dino” yiino. (Yoh. 6:44; 14:6) Yihowa manna Yesuusi widoonni isiwa shiqanno gede assannohunna hegere heeshsho agadhanni baxillisinni fulikki heeꞌranno gede kaaꞌlannohu qullaawu ayyaanisi widoonniiti. (Yih. 20; Yihuda 21 nabbawi.d) Hanni tenne Yihowa ninkewa shiqannota wole doogo laꞌno.

YIHOWA BORREESSAMINO QAALISI WIDOONNI NINKEWA SHIQANNO

10. Qullaawu Maxaafi Maganunniwa albinni roore shinqeemmo gede kaaꞌlannonkehu hiittoonniiti?

¹⁰ Konni birxichira kageeshshi geeshsha, Qullaawu Maxaafi giddonni 14 maxaafi xiqisubba qummi assinoonni. Qullaawu Maxaafi hoogoommero, Kalaqaanchinkewa shiqa dandiineemmota mayinni anfeemmo? Qoleno, isiweelo wodote daafiranna Yesuusi widoonni Yihowawa shinqeemmota hiitto ikkine anfeemmo? Yihowa qullaawa ayyaanasi horoonsiꞌre, baxissanno akattasinna dhagge ikkanno alaamasi kulannonkehu Qullaawu Maxaafi borreessamanno gede assino. Lawishshaho, Yihowa Wolapho 34:6, 7 aana isi, “maarannonna mararanno Magano, hanqoho muddamannokkiha, baꞌꞌannokki baxillinna halaalu woꞌminosiha, lowo kume ikkitannorira baꞌꞌannokki baxille leellishannoha hattono soꞌro, saonna cubbo gatona yaannoha” ikkinota Musera kulino. Togoo akatta noosi Magani ledo jaalooꞌma hasiꞌrannokkihu ayi heeꞌranno? Yihowa Qullaawa Maxaafa nabbambe iso roore anfanni haꞌnummo kiiro isi roore xawannonketanna isiwa albinni roore shinqeemmota afino.

11. Maganu akattanna doogosi daafira rosa hasiissannonkehu mayiraati? (Umi misile lai.)

¹¹ Yihowawa Shiqie yaanno maxaafi bitimi Maganu ledo muli jaalooma kalaqiꞌra dandiineemmo gara xawisanni togo yaanno: “Aye manchi ledo noonke jaaloomira xinta ikkinori, hakkoye mancho egennate, baxxitino akattasi dhagge assiꞌratenna naadate. Konni daafira, Qullaawu Maxaafi giddo xawinsoonnita Maganu akattanna dooggasi xiinxalla lowonta hasiissinote.” Konnira, Yihowa Qaalesi ninke mannu oosora leellannonke garinni borreessamanno gede assino daafira galanteemmosi!

12. Yihowa Qullaawa Maxaafa borreessiisate manna horoonsiꞌrinohu mayiraati?

¹² Yihowa hasiꞌroommero Qullaawa Maxaafa sokkaano borreessitanno gede assa dandaanno. Isinni insa ninke daafiranna assineemmore afa lowonta hasidhanno. (1 Phe. 1:12) Qoleno, sokkaano Maganu sokka mannu oosora borreessa dandiitannoti egennantinote. Ikkina insa mitto coye mannu ooso laꞌanno garinni laꞌe affannoni? Insa hasiisannonkere, laanfenkenna halchonke badde huwata dandiitannoni? Yihowa insa togoore dandiitannokkita afino. Isi Qullaawa Maxaafa mannu ooso borreessitanno gede assino daafira, Qaalisi wodananke kakkayisannoha ikkino. Qullaawa Maxaafa nabbambeemmo wote borreessaanotenna giddo qummi assinoonni manni hedonna simmeete huwata dandiineemmo. Koffi assinonsari, huluullonsa, waajjansanna guuntete xeꞌnensa leeltannonke; qoleno hagiirrinsa hagiirsiisannonke. Masaalaanchu Eeliyaasinte gede, Qullaawu Maxaafi borreessaano baalanti “ninkete gedee simmeete” noonsareeti.—Yaq. 5:17.

13. Yoonaasi huuccatto wodananke kakkayissannohu mayiraati?

¹³ Lawishshaho, masaalaanchu Yoonaasi Maganu uyinosi looso agure xooqi yannara macciishshantinosi simmeete mittu sokkaanchi seekke xawise afannoni? Yihowa Yoonaasi umisi dhagge, diimete baari giddo heeꞌre eeggifate huucciꞌrino huuccattono mitteenni umisi borreessanno gede assasi roore woyyate! Yoonaasi togo yiino: “Lubboꞌya dhuka baꞌu yannara, qaagoommohu Yihowaati.”—Yon. 1:3, 10; 2:1-9.

14. Isayyaasi umisi daafira borreessino hedo huwata dandiineemmohu mayiraati?

¹⁴ Hanni Yihowa Isayyaasi umisi daafira mayyee borreessanno gede assinoro laꞌno. Kuni masaalaanchi Maganu ayirrinye ajuujatenni lai gedensaanni cubbaataamimmasi daafira togo yiino: “Anera bayisibao! Battaabbino suume nooehanna suumensa battaabbino manni mereero heeꞌreemmo mancho ikkoommo daafira reyoommo gedeeti; illeꞌya Nugusa, saraawitete Magano Yihowa laꞌinona!” (Isa. 6:5) Togo yee coyiꞌranno sokkaanchi heeꞌrannoni? Ninkeno cubbaataamma ikkinoommohura, Isayyaasira macciishshantino hedo huwata dandiineemmo.

15, 16. (a) Wolu manni simmeete huwata dandiineemmohu mayiraati? Lawishsha kuli. (b) Yihowawa albinni roore shinqeemmo gede kaaꞌlannonkehu maati?

¹⁵ Sokkaano Yaaqoobi gede “ikkado diꞌꞌikkoommoho,” woy Pheexiroosi gede “ani cubbaataamoho” yitara dandiitannoni? (Kal. 32:10; Luq. 5:8) Insa Yesuusi rosaano gede ‘waajjitara’ woy dancha duduwo sabbakate Phaawuloosinna wolootu gede ‘ikkituta ikkite jawaante afiꞌra’ hasiissannonsani? (Yoh. 6:19; 1 Tes. 2:2) Dihasiissannonsa; korkaatuno sokkaano duuchante doogonni guunte noonsareetinna mannu ooso roortannoreeti. Guuntete xeꞌne noonsari mannu ooso togoo simmeetensa kultanno wote kayinni, ninkeno insa gedeere ikkinoommo daafira bayichonko leeltannonke. Ee, Maganu Qaale nabbambeemmo wote, ‘hagiidhitannori ledo hagiidha, hattono wiꞌlitannori ledo wiꞌla’ dandiineemmo.—Rom. 12:15.

¹⁶ Yihowa hunda ammanantino soqqamaanosi amadino gara Qullaawu Maxaafinni nabbambe hiincineemmoha ikkiro, guuntete xeꞌne noonsariwa kuri soqqamaanosiwa baxillunni shiqino Maganinke daafira lowore dhagge ikkannore ronseemmo. Hakko garinni Yihowa seekkine afa dandiineemmo; hattono iso lubbora banxeemmore ikkineemmo. Tini qolte isiwa albinni roore shinqeemmo gede kaaꞌlitannonke.—Faarso 25:14 nabbawi.f

MAGANU LEDO LUBBORA JAALOOꞌME

17. (a) Azaariyaasi Asa mayyee amaalino? (b) Asa uyinoonnisi amaale lashshi assinohu ma garinniiti? Tini mayi maikkanno gede assitino?

¹⁷ Nugusu Asa Itophiyu saraawite kaajja gede qeeli gedensaanni, Maganu masaalaanchi Azaariyaasi isonna mannasi hayyote amaale amaalino. Azaariyaasi togo yiino: “Kiꞌne Yihowa ledo ikkitini geeshsha, isino kiꞌne ledo ikkanno; hasidhinisiro leellannoꞌne, agurtinisiro kayinni isino agurannoꞌne.” (2 Zee. 15:1, 2) Asa ganaanni hige tenne dancha amaale harunsikki gatino. Isiraeelenniti aliyye mangiste Yihuda qassara daggu yannara, Asa kaaꞌlo afiꞌrate Sooriyu dagawa higino. Isi albi gede kaaꞌlasira Yihowa woshshiꞌra agure, Magano magansidhannokkiri ledo mittooꞌmate kaino. Hakko daafira Yihowa togo yiinosi: “Gowwimmate looso loosootto; konni daafira xaanni jammare olu atewiinni dibaxxanno.” Gatinohu Asa gashshooti diri olu woꞌminoha ikkino. (2 Zee. 16:1-9) Tenne xaggenni maa ronseemmo?

18, 19. (a) Maganuwiinni fongonge heeꞌnoommoha ikkiro ma assa hasiissannonke? (b) Yihowawa albinni roore shiqa dandiineemmohu hiittoonniiti?

¹⁸ Yihowawiinni xeertiꞌra horonta dihasiissannonke. Isiwiinni fongonge heeꞌnoommoha ikkiro, Hose 12:6 yitannore assa hasiissannonke; xiqise togo yitanno: “Maganikkiwa higi; baꞌꞌannokki baxillinna taashsho heedhohe, hattono ayewoteno Maganokki hexxo assiꞌri.” Konnira wodote kakkalo daafira hiincinenna Maganu Qaale Qullaawa Maxaafa xiinxalline Yihowawa albinni roore shinqanni haꞌno.—Marro 13:4 nabbawi.g

¹⁹ Faarsaanchu, “Anera Maganunniwa shiqa woyyitannoe” yee borreessino. (Far. 73:28) Ninke baalunku Yihowa daafira rosanke agurroonke, hattono iso banxeemmo gede assannonkeha batinye korkaata albinni roore huwatate woꞌnaallo. Hatto ikkiro, Yihowa xaano ikko hegerera ninkewa shiqanno!