Heeꞌrittowano Heeꞌrittoro Yihowa Huuro Macciishshi

1, 2. Yihowa soqqamaanosi marraꞌꞌannohu hiittoonniiti?

YIHOWA hundinni jammare mannasi addi addi doogonni marraꞌꞌanni keeshshino. Mitoota sokkaanote widoonni, woy ajuujatenni, woy haaqetenni coyishiishe albillitte ikkannore affanno gede assino. Qoleno hakko garinni looso uyinonsa. (Zeh. 7:89; Hiz. 1:1; Dan. 2:19) Yihowa mitu mannira biddishsha uyinohu dirijjitesi giddo uullayidi kifilera iso riqibbe soqqantannori widoonniiti. Yihowa biddishsha uyinonsa doogo baxxutano ikkituro, hakkoye biddishsha harunsituri maassantino.

² Yannankera Yihowa mannasi marraꞌꞌate Qullaawa Maxaafa, ayyaanasinna Kiristaanu songo horoonsiꞌranno. (Looso 9:31; 15:28; 2 Xim. 3:16, 17) Isi aannonke biddishshi goꞌlinokkiha ikkino daafira, ‘maccanke badhenkeenni, “Doogo tenneetina, kawaanni higge haꞌri” yitanno huuro macciishshitanni’ noohu gedeeti. (Isa. 30:21) Yesuusino “ammanaminohunna wodanaamu borojjichi” widoonni songo marraꞌꞌanni, Yihowa huuro macciishshineemmo gede assanni no. (Mat. 24:45) Konne biddishsha hixamanyine macciishshine harunsa hasiissannonke; korkaatuno hegere heeshsho afiꞌneemmohu hajajammummorooti.—Ibi. 5:9.

3. Yihowa biddishsha macciishshineemmokki gede ataawe ikkankera dandaannori maati? (Umi misile lai.)

³ Sheexaanu Daawuloosi, Yihowa aannonkeha heeshshote woranno biddishsha macciishshineemmokki gede assate murciꞌre kaino. Hakkiinni saeno, ‘hantaalaamu wodaninke’ Yihowa wodho harunsineemmokki gede ataawe ikkankera dandaanno. (Erm. 17:9) Konni daafira, hanni Maganu huuro macciishshineemmokki gede guficho ikkannonkere qeela dandiineemmo gara laꞌno. Qoleno, Yihowa yaannonkere macciishshankenna iso huucciꞌranke isiwa gamba yine heeꞌneemmo gede kaaꞌlitannonkehu hiittoonniitiro laꞌneemmo.

SHEEXAANU XAGARRO QEELA

4. Sheexaanu mannu hedanno gara daafate woꞌnaalannohu hiittoonniiti?

⁴ Sheexaanu mannu hedanno gara daafate kapho ikkinorenna doganno totao gobba tuqisano; ‘ninke kayinni Maganu wido ikkinoommota anfoommo.’ (1 Yoh. 5:19) Attammeenna fulannoreno agurranna, raadoonenna televizhiine hattono Interneete mashalaqqe gaxareno gattukki gobba tuqqanno gede assitanno. Kuri xaadooshshu buussa kaaꞌlannore kultanno woti nooha ikkirono, roore wote Yihowa seeri ledo sumuu yaannokkire tareessitanno. (Erm. 2:13) Lawishshaho, odoonna boohaarsha shiqishshanno uurrinshuwa labbaahu labbaahu ledo woy meyaati meyaate ledo adhama gara ikkitino gede assite kultanno; hakko daafira lowo manni Qullaawu Maxaafi tenne hajo daafira kulannori quwa sainore ikkino gede asse hedanno.—1 Qor. 6:9, 10.

5. Sheexaanu totai lolahu gede adhe saꞌꞌannonkekki gede ma assa dandiineemmo?

⁵ Keeraanchimma baxxannori Sheexaanu totai lolahu gede adhe saꞌꞌannonsakki gede maa assa dandiitanno? Qoleno danchanna busha bada dandiitannohu hiittoonniiti? ‘Ayewoteno Maganu qaali garinni heedhannoha’ ikkirooti! (Far. 119:9) Borreessaminohu Maganu Qaali halaale ikkinore kaphu totaiwiinni badate kaaꞌlannonke biddishsha amadino. (Law. 23:23) Yesuusi Qullaawa Borro yitannore qummi asse, ‘manchu Yihowa afiinni fulanno qaalinni heeꞌra’ hasiissannosita coyiꞌrino. (Mat. 4:4) Heeshshonke giddo Qullaawu Maxaafiha xintu seera harunsa dandiineemmo gara rosa hasiissannonke. Lawishshaho aju beetti Yooseefi, Muse soorro hooltannota Yihowa higge borreessara lowo diri albaanni kuni assooti cubbo ikkinota huwatino. Isi Phoxifaari galte bushare assara xixxiibbusi yannara, “Tenne bayira bunshe asse Maganu aana cubbo hiitto looseemmo?” yee giwino ikkinnina Yihowara finqilate heda nafa dihedino. (Kal. 39:7-9) Yooseefi, tini mancho barru barrunku wotto wortinosiha ikkirono, ise yitannori Maganu huuro macciishshannota hoolasira diwodhino. Aana aanaho daggannota Sheexaanu huuro agurre Yihowa huuro macciishsha danchanna busha badate kaaꞌlitannonke.

6, 7. Sheexaanunnite busha amaalewiinni xeertiꞌrate ma assa hasiissannonke?

⁶ Isi isiniiwa xaadannokkihu kaphu ammaꞌno rosi batiꞌrino daafira, lowo manni addu ammaꞌno hasiꞌra mulla daafurooti yee hedanno. Ikkirono, Yihowa iso macciishsha hasidhannori biddishshasi qarrantukki afidhanno gede assino. Ninke aye huuro macciishshineemmoro doodha hasiissannonke. Lame huuro mitteenni macciishsha didandiinanni; hakko daafira, Yesuusi ‘huuro bade afanna’ isi yaannore macciishsha hasiissannonke. Yihowa geꞌreewisira allaalaancho asse iso shoomino.—Yohaannisi 10:3 nabbawi;a Yoh. 10:4, 5.

⁷ Yesuusi, “Macciishshitinannire hixamanyitine macciishshe” yiino. (Marq. 4:24) Yihowa aannonke amaale xabbe leeltannotenna garaho; ninke kayinni hajajamate wodananke qixxeessiꞌne macciishsha hasiissannonke. Qoropha hoongummoro, Maganu baxillunni aannonke amaale agurre Sheexaanunnita busha amaale macciishshinammora dandiineemmo. Alamete muuziiqi, viidiyo, televizhiine, maxaaffa, ammantinokki jaalla, rosiisaano woy mannu hayyoolete yee hedannori marraꞌaꞌnera horonta wodhitinoonte.—Qol. 2:8.

8. (a) Wodaninke Sheexaanu woshshaado giddora eꞌneemmo gede assankera dandaannohu hiittoonniiti? (b) Wodaninke bunshete widira dooanni noota leellishshanno malaatta lashshi assinummoro mayi iillankera dandaanno?

⁸ Sheexaanu giddonke cubbu dooꞌꞌo noota afino; qoleno tenne dooꞌꞌonke harunsineemmo gede assate woꞌnaalanno. Sheexaanu laanfenkenni qeelammeemmo gede assate woꞌnaalannoha ikkiro, ammanama qarra ikkitankera dandiitanno. (Yoh. 8:44-47) Tenne mitiimma qeela dandiineemmohu hiittoonniiti? Hanni yannate geeshsha hagiidhate yee asseemmo yee hedinokkire assino mancho lawishsha assine laꞌno. (Rom. 7:15) Hakko deerra maranno gede assinosiri maati? Kuni manchi gale hosanni Yihowa huuro macciishsha agurinoha ikkara dandaanno. Isi wodanisi bushawa hige dooanni noota leellishshanno malaatta huwata hooginoha woy tenne malaatta afanni heeꞌrenni lashshi assinoha ikkanno. Lawishshaho, huuccatto assiꞌra agurinoha, soqqansho fula shaashshinoha, woy gambooshshe hosa jammarinoha ikkara dandaanno. Jeefoteno yortosi qeelteennasi soꞌro ikkinota afino coye assate deerra marino. Ninke kayinni wodaninke bunshete widira hige dooanni noota leellishshanno malaatta huwante hakkawontenni biddi assiꞌneemmoha ikkiro, togoote kabbaade soꞌro giddora dieꞌneemmo. Qoleno, Yihowa huuro macciishshineemmoha ikkiro kaadaasinete assaawera maccanke diworreemmo.—Law. 11:9.

9. Busha dooꞌꞌo umonni bade afa lowo geeshsha kaaꞌlitannohu mayiraati?

⁹ Mittu manchi amadinosi dhibba umonni afiro, reyotenni gatara dandaanno. Hattonni, fatanu giddora eessitankera dandiitanno dooꞌꞌo woy yorto umonni bande anfummoro, buutote qarrinni gantammora dandiineemmo. Togoo dooꞌꞌo noonketa huwantummoro, Sheexaanu ‘lubbote heeꞌneenna woshshaade amadannonkekki’ gede hakkawontenni biddi assiꞌra hayyote. (2 Xim. 2:26) Hedonkenna yortonke Yihowa seeriwiinni fongogginota anfummoro ma assa hasiissannonke? Ranke Yihowawa higa, maccanke isi amaalewa qolanna isi yaannonkere woꞌmu wodaninkenni macciishsha hasiissannonke. (Isa. 44:22) Gara ikkinokki coye wossaꞌnanke kalaqqanno bassi Yihowawa hinge kaꞌneennano baꞌꞌa hoogara dandaannota yaano buutote qarra mixxinammora dandiineemmota huwata hasiissannonke. Kaimanka togoo soꞌro giddora eꞌneemmokki gede ranke doogonke seekkiꞌra woyyitanno!

NAAXXANNA HAFUURRE QEELA

10, 11. (a) Naaxxaleessu manchira hiittoo akati noosi? (b) Qore, Daataaninna Aberooni hadhinote busha doogonni maa ronseemmo?

¹⁰ Wodaninke gariweelo doogo haꞌneemmo gede assankera dandaannota huwata hasiissannonke. Cubbu dooꞌꞌo afidhino wolqa shaaꞌꞌa diꞌꞌikkitino! Lawishshaho, naaxxanna hafuurre heedhankera dandiitanno. Hanni kuni lamunku akati Yihowa huuro macciishshineemmokki gedenna huntanno doogo haꞌneemmo gede assankera dandaanno gara laꞌno. Naaxxaleessu manchi isonooto quwa sae kaffi asse laꞌꞌanno. Togoo manchi baxisisire assate qoosso noosihu gedenna ayino konne assi yaasira hasiisannokkihu gede asse hedara dandaanno. Hakko daafira ammanate roduuwisi, songote cimeeyye, woy Maganu dirijjite nafa uyitannosi biddishshinna amaale hasiissannosiha lawa hoogasira dandaanno. Togoo manchira Yihowa huuro gari geeshsha dimacciishshantannosi.

¹¹ Isiraeele halalli gobbara noo yannara, Qore, Daataaninna Aberooni Musenna Aarooni silxaanera finqiltino. Tini finqilaasine naaxxaleeyye ikkitino daafira, Yihowa uminsa doogonni magansiꞌrate kaꞌino. Yihowa tennera ma assiyya? Insara bao abbino. (Zeh. 26:8-10) Tini xagge lowo geeshsha hasiisanno roso rosiissannonke! Yihowara finqila bao abbitanno. Qoleno, “naaxxatenni aante uwa daggannota” deꞌnoonke.—Law. 16:18; Isa. 13:11.

12, 13. (a) Hafuurre bao abbitara dandiitannota leellishanno lawishsha kuli. (b) Hafuurrete akati eemadha hoongiro rahe lophanni haꞌranno gara xawisi.

¹² Hanni tenne hafuurrete daafira laꞌno. Hafuuraamu manchi Yihowa wodho ayirrisa hasiissannosikkihu gedenna manni jajja adha dandaannohu gede asse hedanno. Sooriyu saraawite sooreessi Niꞌꞌimaani dhiigu dhibbinni huri gedensaanni Elsaira addi addi uduunne oyenna Elsai adha giwino. Elsai soqqamaanchi Giyaazi kayinni konne uduunne yogorino. Giyaazi isonooto togo yii: “Heeshshote Magani Yihowa halaaleeti, [Niꞌꞌimaanira] hoode haꞌre mitore adheemmo.” Isi Elsai maaxame Niꞌꞌimaani hordofe iilli gedensaanni “mitte taalaante birranna lame woꞌma uduunne” aanno gede nookkire kalaqe coyiꞌri. Giyaazi konne assino daafiranna Yihowa masaalaanchira kapho coyiꞌrinohura mayi iillisi? Niꞌꞌimaani dhiigi isira saino!—2 Neg. 5:20-27.

¹³ Hafuurre jammartannohu shiimaaddu coyinniiti; meessaneeto eemadha hoongiro kayinni kuni akati lophanni haꞌre bao abbanno deerra iillara dandaanno. Akaani xagge hafuurre mageeshshi wolqa afidhinoro leellishshanno. Akaani hafuurre rakke lowo deerra martino gara wodanchi. Isi togo yiino: “Horrine abbinoonni uduunni giddo Senaoori gobbanni dayinoha mitto biifado kaabbanna 200 seqile ikkanno birranna 50 seqile ikkitanno worqe lae yorummo, hakkiinnino adhummo.” Akaani busha yortowiinni xeertiꞌra agure, hafuurretenni uduunne adhe dunkaanisi giddo maaxiꞌri. Iyyaasu, Akaani assooti xawo fuli yannara Yihowa qarra abbannosita kulinosi. Hakko barranni Akaaninna minisi manna kinnatenni ganne shinoonni. (Iya. 7:11, 21, 24, 25) Hafuurre ninke giddono kalaqantara dandiitanno. Hakko daafira “duuchunku gari hafuurrenni umonke agadha” hasiissannonke. (Luq. 12:15) Saꞌne saꞌne gara ikkinokkirenna amanyoote afiꞌrinokkire hendammora dandiineemmoha ikkirono, hedonke eemadhanna yortonke lophitanni hadhe cubbo loosate deerra massitannonkekki gede qoropha hasiissannonke.—Yaaqoobi 1:14, 15 nabbawi.b

14. Giddonke naaxxatenna hafuurrete dooꞌꞌo noota anfummoro maa assa hasiissannonke?

¹⁴ Addaho, naaxxanna hafuurre baote widira massitankera dandiitanno. Gariweelo doogo haꞌra abbitanno guma hiincanke, togoo dooꞌꞌo Yihowa huuro macciishshineemmota hooltankera wodhineemmokki gede kaaꞌlitannonke. (Marro 32:29) Halaalaanchu Magani Qullaawu Maxaafi widoonni, gara ikkitino doogo hiitteetiro kulannonkeha calla ikkikkinni hattee doogo haꞌra uyitannonke horonna gara ikkitinokki doogo haꞌra abbitanno gawajjono kulannonke. Naaxxatenni woy hafuurretenni gara ikkinokkire assate hedo daggannonke wote, hatti ikkito mageeshshi coye daaffara dandiitannoro heda hayyote! Bushare assa ninke umonkenna baxannonke manna gawajjitanno gara, roorenkanni kayinni Yihowa ledo noonke fiixooma huntannota heda hasiissannonke.

AYEWOTENO YIHOWA YAANNORE MACCIISHSHE, HATTONO ISO COYISHIISHSHE

15. Yesuusi lawishshinni maa ronseemmo?

¹⁵ Yihowa ninkera woyyannore hedanno Maganooti. (Far. 1:1-3) Isi hasiisannonkeha baqete biddishsha hasiisannonke yannara aannonke. (Ibi. 4:16) Yesuusi guuta ikkirono, ayewoteno Yihowa yaannore macciishshanno, hattono ganye huucciꞌranno. Yihowa Yesuusa dhagge ikkanno garinni kaaꞌlinosi qoleno marrainosi. Kaaꞌlitannosi gede sokkaano soyinosi, qullaawa ayyaanasi oye irkisinosi, hattono 12 hawaariyaate doori yannara marrainosi. Yihowa Yesuusa kaaꞌlannositanna baxannosita leellishate iima heeꞌre nafa coyishiishinosi. (Mat. 3:17; 17:5; Marq. 1:12, 13; Luq. 6:12, 13; Yoh. 12:28) Ninkeno Yesuusi gede wodaninke hedo huuccattotenni Maganoho hasaapha hasiissannonke. (Far. 62:7, 8; Ibi. 5:7) Ayewoteno huuccattotenni Yihowa coyishiishanna isira ayirrinye abbitanno doogonni fullummokki heeꞌra dandiineemmo.

16. Yihowa huurosi macciishshineemmo gede kaaꞌlannonkehu hiittoonniiti?

¹⁶ Yihowa amaalesi qarrammummokki afiꞌneemmo gede assannoha ikkirono, ise harunsineemmo gede digiddeessannonke. Qullaawa ayyaanasi aannonke gede huucciꞌra hasiissannonke; isino shaqqillunni aannonke. (Luq. 11:10-12; Luqaasi 11:13 nabbawi.c) Kayinni ‘hiittoonni macciishshineemmoro seekkine heda’ hasiissannonke. (Luq. 8:18) Lawishshaho, teeda baꞌino misilla woy amanyoote bainore leellishshanno filmuwa laꞌꞌa agurrummokki, Yihowa foorrete widira hinge dooꞌneemmokki gede kaaꞌlankera huucciꞌra dogate. Yihowa kaaꞌlo afiꞌrate ayyaanisi heeꞌranno gedee bayicho haꞌra hasiissannonke. Ayyaanisi songote gambooshshiwa heeꞌrannoti egennantinote. Batinye Yihowa soqqamaano songote gambooshshiwa Yihowa yaannore macciishshite qarrunni gattino. Konni garinni wodaninsa giddo busha yorto lophitanni noota huwatte doogonsa biddi assiꞌra dandiitino.—Far. 73:12-17; 143:10.

YIHOWA HUURO MACCIISHSHAꞌNE AGURTINOONTE

17. Meessaneeto addaxxa baasa gawajjitanno yineemmohu mayiraati?

¹⁷ Hunda Isiraeelete nugusa ikkinohu Daawiti xaggenni ronseemmori no. Isi wedellichu noo waro, Filisxeemete jigeessa Goliyaadi shiino. Daawiti Isiraeelete dagara wottaaddarcho, nugusa, agaraanchonna yoo yaannoha ikkino. Isi isonooto addaxxi yannara kayinni, wodanisi dogeennasi Bersaabe ledo kabbaade cubbo loosatenna minaannase Ooriyo shiishiishate geeshsha nafa iillino. Daawiti seejjo uyinisita soꞌrosi ammanino, hattono Yihowa ledo noosi fiixooma haaroonsiꞌrino.—Far. 51:4, 6, 10, 11.

18. Ayewoteno Yihowa huuro macciishshineemmo gede kaaꞌlannonkeri maati?

¹⁸ Umi Qorontoosi 10:12 noo amaale harunsa hasiissannonke ikkinnina ikkeemmori dino yine heda dihasiissannonke. ‘Qaafonke uminkenni biddi assiꞌne’ anfeemmokki daafira, Yihowa huuronna Baarigaarisi huuro giddo mitte macciishshanke digattanno. (Erm. 10:23) Ganyine huucciꞌno, qullaawu ayyaani biddishsha harunsino, hattono ayewoteno Yihowa huuro macca worre macciishshino.