Sheexaanu Woshshaadonni Gata Dandaatto!

1. Sheexaanu ugaaxaanchu gedeeti yineemmohu mayiraati?

MITTU ugaaxaanchi ugaaxannohu woshshaade amadateeti woy shaateeti. Ugaaxannohu addi addi woshshaado horoonsiꞌrara dandaanno; Qullaawu Maxaafino tenne kulanno. (Far. 140:5) Ugaaxaanchu gaxigalu woshshaadote giddora eanno gede assannohu hiittoonniiti? Isi gaxigalu akata seekke hedanno. Gaxigalu mama heeꞌrannoro, maa baxannoro, hattono gaxigala hiisse amadannoro hedanno. Sheexaanuno togoo ugaaxaanchi gedeeti. Isi ninke seekke laꞌꞌanno. Mamira haꞌneemmoronna maa banxeemmoro laꞌꞌanno. Hakkiinni hendummokki amaddankera dandiitanno woshshaado qixxeessanno. Ikkirono Qullaawu Maxaafi, woshshaado amaddunkero nafa gante fula dandiineemmota kulanno. Hattono woshshaado amaddannonkekki gede hooꞌla dandiineemmo gara rosiisannonke.

2. Sheexaanu manna woshshaadate horoonsiꞌrannoti lame qara woshshaado hiikkuriiti?

² Sheexaanu manna woshshaadate horoonsiꞌrannoti lame qara woshshaado naaxxatenna hafuurrete.b Isi lowo kume diro, kuri busha akatta horoonsiꞌre lowo manna woshshaadino. Sheexaanu ittannore wore woy woshshaado wore cea amadanno ugaaxaanchi gedeeti. (Erm. 5:26) Ninke kayi Sheexaanu woshshaadankera diwodhineemmo. Mayira yiniro, Yihowa isi ninke woshshaadate horoonsiꞌranno xagarro kulinonke.—2 Qor. 2:11.

3. Yihowa mite lawishshuwa Qullaawu Maxaafi giddo borreessiisinohu mayiraati?

³ Yihowa naaxxanna hafuurre qorophineemmo gede jawaachishannonke doogga giddo mitte, wolootu lawishsha laꞌne ronseemmo gede asseeti. Konni birxichira kulloonni lawishshuwanni laꞌneemmonte gede, Sheexaanu Yihowara lowo diro soqqantinore nafa woshshaada dandiino. Hatto yaa Sheexaanu woshshaado gargadha didandiineemmo yaateni? Hatto yaa diꞌꞌikkino. Yihowa kuri lawishshuwa Qullaawu Maxaafi giddo borreessiisinohu “ninke jiilleemmo gedeeti.” (1 Qor. 10:11) Yihowa kuri lawishshuwanni ronse, Daawuloosi woshshaado qoropha woy woshshaadosi giddonni gante fula dandiineemmota afino.

NAAXXA WOSHSHAADOTE

4. Naaxxinummoro mayi iillannonke?

⁴ Sheexaanu naaxxaleeyye ikkinammora hasiꞌranno. Isi naaxxaleeyye ikkinummoro isi gedeere ikkineemmotanna hegere heeshsho hoongeemmota afino. (Law. 16:18) Konnira soqqamaasinchu Phaawuloosi mittu manchi “booꞌnatenni bedeedameenna Sheexaaneho iillitu yoo” yinasira dandiinannita kule qorowisiisino. (1 Xim. 3:6, 7) Halaale macciishshinoommohu muleno ikkiro woy Yihowara lowo diro soqqammoommoha ikkirono togoo coyi ninke giddo aye manchirano iillara dandaanno.

5. Rosiisaancho 7:16, 20 kultanno garinni mittu manchi naaxxara dandaannohu hiittoonniiti?

⁵ Naaxxanno manni umonsa calla baxanno. Sheexaanu hakko iso qarru iillannonke woyite Yihowanni roorsine uminke daafira hendeemmo gede asse umonke calla baxeemmo gede assate woꞌnaalanno. Lawishshaho kaphunni suꞌmakki hunne egenninoonnihe? Woy miince egenninoonnihe? Sheexaanu Yihowa woy roduuwakki bushiishattora hasiꞌranno. Qoleno Daawuloosi, iillinonke qarra Yihowa Qaalisi giddo kulino biddishshi garinni ikkikkinni uminkenni tira woyyitanno yine hendammora hasiꞌranno.—Rosiisaancho 7:16, 20 nabbawi.

6. Neezerilaandete heedhanno rodoo woꞌnaalshinni maa rosootto?

⁶ Hanni Neezerilaandete heedhannote mitte rodoo woꞌnaalsha laꞌno; ise roduuwu hanqisseennase caaccaabbino. Konnira hakkuri roduuwiwa gambo gibbino. Ise togo yitino: “Kuri roduuwa gatona yaa qarra ikkitinoe hattono callimma macciishshantinoe; kunnira minaannaꞌya wole songo haꞌra hasiissannonke yoomma.” Hakkiinni ise 2016nnita Badheessu agani Biroodikaaste laꞌu. Hatte pirogiraamera wolootunnita guuntete xeꞌne ma garinni laꞌꞌa hasiissannonkero kulloonni. Rodoo togo yitino: “Songote giddo noo roduuwi akata soorrate woꞌnaalantenni, aneneeto heeshshi assanna umiꞌya soꞌro layiꞌra hasiissannoeta wodanchoomma. Tini pirogiraame Yihowanna aliidimmasi illachisheemma gede kaaꞌlitinoe.” Ninke maa ronseemmo? Fonqolu iillannohe woyite, Yihowa illachishi. Woloota Yihowa laꞌꞌanno garinni laꞌꞌatto gede kaaꞌlahera iso huucciꞌri. Iimi Annikki insa soꞌro laꞌꞌanno; ikkirono isi gatona yaannonsa. Atino gatona yaattonsara hasiꞌranno.—1 Yoh. 4:20.

7. Moote Ooziyara mayi iillinosi?

⁷ Naaxxa, Yihudu Moote Ooziya amaale macciishshannokki gedenna fajjinoonnikkire assanno gede assitinosi. Ooziya lowoha dancha coye assino. Isi lowo ola qeelino, lowo katamma minino hattono lowo baatto loosiꞌrino. “Maganuno maassiꞌrinosi.” (2 Dud. 26:3-7, 10) Ikkirono Qullaawu Maxaafi, “Ooziya jawaante afiꞌrihu gedensaanni hajajamannokkiha ikkino. Hajajama giwasino uwanno gede assitinosi” yaanno. Yihowa qullaawu mini giddo hixaana wiliishshitannori kakkalaasine calla ikkitinota balaxe kulino. Moote Ooziya kayinni qullaawa mine eꞌꞌe isira fajjinoonnikki hixaana wiliishshino. Yihowa dadillino daafira, kuni naaxxaleessu manchi dhiigu dhibbinni amadamanno gede assino. Ooziya reya geeshsha dhiigunni amadame heeꞌrino.—2 Dud. 26:16-21.

8. Umi Qorontoosi 4:6, 7 naaxxa qorophineemmo gede kaaꞌlitannonkehu hiittoonniiti?

⁸ Ooziya gede ninkeno naaxxine cubbo loonsammora dandiineemmo? Hanni Joose yinanni rodii woꞌnaalsha laꞌno. Isi qiniinosi daddalaanchootinna ayirrinsanniho songote cimeessaati. Isi woradunna qoqqowu gambooshshiwa lallawo shiqishanno hattono woradu aliidi laꞌꞌaano amaaꞌlitannosi. Isi togo yiino: “Kayinni umiꞌya dandoonna woꞌnaalsha addaxxoommo. Yihowa diaddaxxoommo. Jawaata ikkoommohu gede asse hedoommo daafira Yihowa qorowishshanna amaale dimacciishshoommo.” Joose jawa cubbo loosino hattono songotenni bohamino. Isi galagale Yihowa minira higinku xa lowo diro ikkino. Isi togo yiino: “Yihowa, roore hasiisanno coyi afiꞌneemmo ayirrinye ikkikkinni isi asse yaannonkere assa ikkitinota rosiisinoe.” Noonke dandoo baalanna songote giddo afiꞌnoommo qoosso Yihowa uyinonketa ikkitinota deꞌnoonke. (1 Qorontoosi 4:6, 7 nabbawi.) Naaxxineemmoha ikkiro Yihowa dihoroonsiꞌrannonke.

HAFUURRE WOSHSHAADOTE

9. Hafuurre Sheexaanunna Heewani ma assanno gede assitinonsa?

⁹ Hafuurrete daafira hendeemmo woyite Sheexaane Daawuloosi qaangeemmoha ikkara dandaanno. Sheexaanu alba Yihowa sokkaasincho ikkino daafira, lowoti dancha qoosso noosiha ikkikki digatino. Ikkirono isi tennenni kassi diyiino. Isi Yihowara calla hasiissanno magansiꞌra yorino. Sheexaanu isi gedeere ikkinammora hasiꞌranno daafira, noonkerinni kassi yineemmokki gede assate woꞌnaalanno. Isi tenne assa hanafinohu Heewani hasaawisi woyiteeti. Yihowa Heewaniranna minaannisera baxillunni, falakkinotanna kassi assitanno sagale uyinonsa; insa mitte haqqicho agurranna “Edeni Gennetete noo haqqe baalate laalo ita” dandiitanno. (Kal. 2:16) Ikkirono Sheexaanu, Heewani hoolloonni haqqicho laalo ita hasiissannosehu gede assite heddanno gede asse soꞌrisiisinose. Heewani nooserinni kassi yitinokki daafira wolere halchitino. Tini maa abbitinoro anfoommo. Ise cubbo loossino hattono gedensoonni reyitino.—Kal. 3:6, 19.

10. Hafuurre Moote Daawitira woshshaado ikkitinosihu hiittoonniiti?

¹⁰ Hafuurre Moote Daawiti Yihowa uyinosire deanno gede assitinosi; Yihowa isira jiro, ayirrinyenna lowo qeelle uyinosi. Daawiti Yihowa uyinosire “Hasaawenna coyiꞌre gude diafeemmo!” yiino. (Far. 40:5) Ikkirono mitte yannara Daawiti Yihowa uyinosire deino. Isi noosirinni kassi yiinokki daafira wolere yorino. Daawiti lowo minaamuwi noosiha ikkirono, gara ikkitinokki yorto wolu manchi minaama yoranno gede assitasira wodhino. Tini mancho Bersaabehiiti; minaannise Hitichu Ooriyooti. Daawiti umosi calla baxe Bersaabehi ledo foorino; iseno godobbino. Daawiti ise ledo soorrinotano agurranna minaannase Ooriyo shiishiishe bunshete aana bunshe assino! (2 Sam. 11:2-15) Daawiti tenne assinohu maa hedeeti? Yihowa tenne dilaꞌꞌanno yee hedeeti ikka? Daawiti Yihowara lowo diro ammaname soqqaminoha ikkirono hafuurino; tini qolte lowo qarra abbitinosi. Ikkirono Daawiti soꞌrosi ammane gedensoonni maaro eino. Isi Yihowa maarinositera hagiidhinoti dihuluullissannote!—2 Sam. 12:7-13.

11. Efesooni Sokka 5:3, 4 kultanno garinni hafuurre hooꞌlineemmo gede kaaꞌlankera dandaannori maati?

¹¹ Daawiti lawishshinni maa ronseemmo? Yihowa uyinonkerira baalaho galanteemmore ikkinummoro hafuurre hooꞌla dandiineemmota ronseemmo. (Efesooni Sokka 5:3, 4 nabbawi) Noonkerinni kassi yaa hasiissannonke. Manna Qullaawa Maxaafa xiinxallisa hananfeemmo woyite, Yihowa uyinonsaha mitto dancha coye hedde galattanno gede jawaachinsheemmonsaha ikkara dandaanno. Konni garinni mittu manchi barrunni mittu coyira Yihowa galaxxannoha ikkiro mitte lamala giddo lamalu coyira galaxxanno yaate. (1 Tes. 5:18) Atino hatto assatto? Yihowa uyinohere baala hiincattoha ikkiro, tini galatattoha ikkatto gede kaaꞌlitannohe. Galatattoha ikkittoro nooherinni kassi yaatto. Nooherinni kassi yaa hafuurre gargadhatto gede kaaꞌlitannohe.

12. Hafuurre Yihuda maa assanno gede assitinosi?

¹² Asqorootu Yihuda hafuuraamo ikkino daafira, gara ikkinokkire assino hattono Yesuusa sayise hirino. Isi umo kayi hattooha diꞌꞌikkino. (Luq. 6:13, 16) Yesuusi iso soqqamaasinchosi ikkanno gede doorino. Yihuda woxe amadara worroonnihu, dandoo noosihanna addaxxinanniha ikkinohura ikkikki digatino. Yesuusinna soqqamaasinesi sabbakate looso loossanno woyite konne woxe horoonsidhanno. Togo yaa, xaa yannara alamete doyichohu sabbakate loosira fushshinanni woxi gede yaate. Yesuusi duucha hige hafuurrete daafira qorowisiisinota macciishshinoha ikkirono, Yihuda konne woxe moora hanafino. (Maq. 7:22, 23; Luq. 11:39; 12:15) Yihuda konne qorowishsha lashshi assino.

13. Yihuda hafuuraamo ikkasi leeltinohu mamooteeti?

¹³ Yihuda hafuuraamo ikkasi leeltinohu Yesuusa shinara boode yanna gatte heedheennaati. Yesuusi soqqamaasinesi ledo hattono Maariyaminna rodoose Maarta ledo dhiigu dhibbi noosihu Simiooni mine wosinsineennansa no. Sagale ittanni heedheenna Maariyaami kaꞌe, lowo woxinni hirroonni shitto Yesuusi umira duntu. Hakkiinni Yihudanna wolootu soqqamaasine lowo geeshsha hanqitu. Wolootu soqqamaasine hanqitinohu, konne woxe soqqanshote horoonsiꞌra woyyitanno yite hedde ikkara dandaanno. Yihuda hanqinohu kayinni wolere hedeeti. Isi “mooraancho ikkinohura” woxe moora hasiꞌreeti. Gedensoonni hafuurre, Yihuda Yesuusa woxeho sayise hiranno gede assitinosi.—Yoh. 12:2-6; Mat. 26:6-16; Luq. 22:3-6.

14. Mittu minaanninna minaama Luqaasi 16:13 noo amaale harunsinohu hiittoonniiti?

¹⁴ Yesuusi harunsaanosira “Maganohonna woxeho soqqama didandiitinanni” yee xinta ikkino halaale qaagiissinonsa. (Luqaasi 16:13 nabbawi.) Tini xaa yannarano halaaleho. Hanni Romaaniyaho heedhannori mittu minaanninna minaama Yesuusi amaale harunsino gara laꞌno. Insa mitte dureette gobbara, haꞌne mite yanna geeshsha loonsanni looso afidhino. Insa togo yitino: “Lowohu baankete asali noonke daafira, umi qara kuni loosi Yihowa uyinonke atooteeti yine hendoommo.” Ikkollana kuni loosi woshshaado ikkansara dandaanno. Insa Yihowara woꞌmunni woꞌma soqqantannokki gede assannonsaho. Insa Woxawaajje 15, 2008nnite Agarooshshu Shaera (Amaaru Afoo) fulinoha “Bebbeehaminokki Wodaninni Ammanantine Heedhe” yaanno birxicho nabbabbu gedensaanni mitto coye doodhitino. Insa togo yitino: “Lowo woxe afiꞌrate wole gobba haꞌneenna Yihowara soqqama qarra ikkitunkero, tini woxe Yihowa ledo noonke jaaloominni roorsiꞌrate gedeeti. Ayyaanaamittenke shoshshoggitara dandiitannota anfoommo.” Hakko daafira insa konne looso agurtino. Hakkiinni mayi ikkiyya? Minaanni hatte gobbankura, hasiisannonsa woxe afiꞌrate kaaꞌlannonsa looso afiꞌrino. Minaamasi “Yihowa anga harancho diꞌꞌikkitino” yitino. Kuri minaanninna minaama Mootichansa assidhinohu woxe ikkikkinni Yihowa ikkino daafira hagiirraammaho.

SHEEXAANU WOSHSHAADO QOROPHE

15. Sheexaanu woshshaadonni gante fula dandiineemmo yineemmohu mayiraati?

¹⁵ Naaxxaleeyye woy hafuuraamma ikkinoommota wodanchinummoro maa assineemmo? Konne akata hooꞌla dandiineemmo. Phaawuloosi, mannu Daawuloosi ‘woshshaadinonsawiinni gate fula’ dandaannota coyiꞌrino. (2 Xim. 2:26) Daawiti Naataani seejjo macciishshe, hafuurinotera maaro eino hattono galagale Yihowa jaala ikkino. Yihowa Sheexaanunni roore wolqaataamo ikkinota deꞌinoonte. Hakko daafira Yihowa kaaꞌlo maahoyye yine adhineemmoha ikkiro, Daawuloosi qixxeessino woshshaado baalantenni gante fula dandiineemmo.

16. Sheexaanu woshshaadonni ganteemmo gede kaaꞌlannonkeri maati?

¹⁶ Sheexaanu woshshaadeennanke gante fulantenni roore, isi horontanni woshshaadannonkekki gede assiꞌra hasiissannonke. Tenne assa dandiineemmohu Maganu kaaꞌlonni callaati. Kayinni ikkineemmori dino yine heda dihasiissannonke. Yihowara lowo diro soqqantinori nafa naaxxaleeyye woy hafuurtannore ikkitino. Hakko daafira heddinannirinna assitinanniri, tini busha akatta nooꞌneta leellishannoronna teꞌee affinanni gede kaaꞌlaꞌnera Yihowa barru baala huuccidhe. (Far. 139:23, 24) Naaxxitinannikki woy hafuurtinannikki gede dandiitinire baala asse!

17. Muli yanna giddo diininke Daawuloosi ma ikkanno?

¹⁷ Sheexaanu lowo kume diro manna woshshaadanni keeshshino. Kayinni isi muli yanna giddo usuramanno hattono gedensoonni woꞌmunni woꞌma baꞌꞌanno. (Aju. 20:1-3, 10) Hatte yanna quqquxamme agadhineemmo. Hakka geeshsha kayinni Sheexaanu woshshaado qorophitine heedhe. Naaxxate woy hafuurrete akata gargadhate sharramme. Daawuloosi giwate murcidhe; “isino kiꞌnewiinni fafanno.”—Yai. 4:7.