Annuwanna Amuuwa Oosoꞌne Allaalaanchu Gede Ikkitine Towaatte

1, 2. (a) Hunda Isiraeelete waro allaalaasinete mayi halaafinati noonsa? (b) Annuwunna amuuwu allaalaasinete gedeeti yineemmohu mayiraati?

HUNDI Isiraeele waro allaalaasinete heeshsho kabbaadete. Insa arrishshonna qiida dandaa hasiissannonsaha calla ikkikkinni hoshshansa moyichuno mooraanchuno adhannokki gede agara hasiissannonsa. Allaalaasine geꞌreewonsa yanna yannante hixamanyite laꞌe, xiwaminohu woy goddaꞌꞌaminohu heeꞌriro xagissanno. Hakko iso wiliiꞌleho dhukinsa gariha ikkinokki daafira allaalaasine insa ille worte towaaxxitanno.—Kal. 33:13.

² Kiristaanu annuwanna amuuwi allaalaasinete gedeeti yaa dandiinanni; insarano geꞌreewu allaalaasine leellishshanno akatta hasiissannonsa. Insa oosonsa “Yihowa seejjonninna biddishshi garinni” lossidhanno gede halaafinate uyinoonninsa. (Efe. 6:4) Tenne assa shotateni? Deeꞌni! Oosote Sheexaanu tareessannohu bushu totai tuncu yaannonsa; qoleno uminsati guuntete xeꞌne noonsa. (2 Xim. 2:22; 1 Yoh. 2:16) Ooso nooꞌneha ikkiro, kaaꞌlitinansara dandiitinannihu hiittoonniiti? Hanni oosoꞌne allaalaanchu gede ikkitine towaatate assa dandiitinanniha sase coye laꞌno; hakkurino: oosoꞌne egennate, itisatenna hadhanno doogo leellishate.

OOSOꞌNE EGENNE

3. Annuwunna amuuwu oosonsa seekkite egenna dandiitannohu hiittoonniiti?

³ Danchu allaalaanchi mitte mittenti geꞌrecho noo gara seekke lae fayyimmase buuxanno. Kiꞌneno oosoꞌnera hattoore assa dandiitinanni. Qullaawu Maxaafi togo yaanno: “Hoshshakki noo gara seekkite afi.” (Law. 27:23) Konne assate oosoꞌne assitannore laꞌꞌa, hattono hedonsanna simmeetensa huwata hasiissannoꞌne. Konne assa dandiitinannihu ma garinniiti? Tennera kaaꞌlitannote qara doogga giddo mitte oosoꞌne ledo ganyitine hasaawate.

4, 5. (a) Ooso hedonsa fushshite hasaabbanno gede mayi kaaꞌlansara dandaanno? (Umi misile lai.) (b) Oosoꞌne kiꞌne ledo huxuxxi yitukki hasaabbanno gede maa assitinoonni?

⁴ Mite annuwanna amuuwi oosonsara tonaa sase diro saꞌꞌanno wote insa ledo hasaawa roore qarra ikkitannota coyidhanno; hakko deerrira noo ooso gambo gibbara woy hedonsa fushshite kuꞌla qarrissansara dandiitanno. Kiꞌne oosono hatto ikkitinoha ikkiro, maa assa dandiitinanni? Diinagge kayissine oosoꞌne ledo seeda yanna hasaawate woꞌnaalantenni, deseꞌe yite noo yannara faꞌnantanno faro horoonsiꞌrate woꞌnaalle. (Marro 6:6, 7) Mitore oosoꞌne ledo mitteenni loosate yanna gaaꞌma hasiissannoꞌneha ikkanno. Insa ledo lekkatenni woy makeenunni mitowa haꞌra, mite godoꞌle godoꞌla woy mini giddo mitore assa dandiitinanni. Togoo faro oosoꞌne huxuxxi yitukki giddonsa hedo fushshite hasaawate kaaꞌlitansara dandiitanno.

⁵ Qaaqqiꞌne togoore woꞌnaaltineennano hedosi fushshe coyiꞌra giwannohalla ikki? Hatto ikkiro tenne wolu garinni woꞌnaalle. Lawishshaho, qaaqqoꞌne hoshshase gara kultara xaꞌmantenni kiꞌne hoshsha daafira kultinasera dandiitinanni. Hatto assitiniro, umise hoshsha daafira kulate kaꞌara dandiitanno. Woy qaaqqoꞌnera mittu coyira lawishshaho mooru daafira mayi hedo noosero afa hasidhiniro, xaꞌmo isewiinni shawwu assitine xaꞌme. Yaano jaallase hatte hajo daafira ma garinni heddannoro xaꞌmitinasera dandiitinanni. Hakkiinni ise jaallase mayite amaaltara dandiitannoro xaꞌmitine laꞌe.

6. Oosoꞌne insara yanna hoogginannikkitanna ruxxi yinikki shinqannire ikkitinoonnita huwattannohu ma assitinirooti?

⁶ Oosoꞌne hedonsa fushshite hasaabbanno gede, insara yanna aanna ruxxi yinikki shinqannire ikkitinoonnita leellisha hasiissannoꞌne. Annuwanna amuuwu duuchanka wote loosu batiꞌrinonsare lawe leellannoha ikkiro, roore anga ooso qarrisinonsare maaxidhe sammi yitanno. Ruxxi yinikki shinqe coyishiinshanni mancho ikkate hasiisannori maatiyya? “Baxitto yannara shiqqe coyishiishattoera dandaatto” yaa calla diguddanno. Qaaqquulliꞌne mitiimmansa ajishshine laꞌinannikkitanna mitore kultuꞌnero quwa saꞌinannikkita huwattanno gede asse. Batinye annuwanna amuuwi tennera dancha lawishsha ikkitino. Keyila yinanniti 19 diri beetto togo yitino: “Anniꞌya ledo aye coyeno kayise hasaawa dandeemma. Isi coyiꞌre gudummakki mereero dieanno; qoleno soꞌro loosoomma yee yaadeemma gede diassannoe. Sammi yee macciishshanno. Ayewoteno woyyinore kule amaalannoe.”

7. (a) Adhamate hende mitu ledo yanna sayisa lawino coyi daafira quwa saꞌnikki hasaawa dandiinannihu ma garinniiti? (b) Annunna ama heddukki oosonsa caacceessitara dandiitannohu hiittoonniiti?

⁷ Hasaawate qarrisara dandaannore lawishshaho adhamate hende mittu beetti ledo yanna sayisate daafira hasaabbinanni wote nafa, qorowishsha batisantenni oosoꞌne konne coye garunni amada dandiitanno gara rosiissensa. Lawishshaho, sagalete minira eꞌineenna sagale hajaccate kaaꞌlanno woraqati daafantino sagale qorophitinanni gede calla kulannoha ikkiro ma assitinanni? Agurtine wolu minira hadhinanniti egennantinote. Hatteente gede, oosoꞌne amaale hasidhe kiꞌnewa shiqqanno wote qorophitanno gede calla kultinanninsaha ikkiro caaccaabbe kiꞌnewa shiqa agurtara dandiitanno. (Qolasiyaasi 3:21 nabbawi.a) Hatteentenni, quwa saꞌinikki hasaawissensa. Emili yinanniti wedellitte rodoo togo yitino: “Anniꞌyanna amaꞌya adhamate hende mittu beetti ledo yanna sayisate daafira hasaawissannoe wote, togoo ikkito cubbo ikkitinohu gede assite dicoyidhanno. Insa mitto beetto seekke egennanna galte afiꞌra uyitanno hagiirre roorse coyiꞌranno. Togo assansa tenne hajo daafira huxuxxi yuummakki hasaaweemma gede assitinoe. Isinni albillitte mittu beetti ledo jaalooma jammarummaro maaxira agure insa affanno gede assa hasiꞌreemma.”

8, 9. (a) Mereero eꞌnikki macciishsha maaho kaaꞌlitanno? (b) Oosoꞌne coyidhannore macciishshaꞌnenni afidhinoonni gumi maati?

⁸ Keyila yitunte gede, oosoꞌne yitannore cincitine macciishshitiniro ruxxi yinikki shinqannire ikkitinoonnita leellishshinanni. (Yaaqoobi 1:19 nabbawi.b) Callase qaaqqo lossidhannoti Kaatiya yinanni mancho togo yite noore coyidhino: “Bashsho ikkiro, qaaqqoꞌya cinca qarra ikkitannoe. Coyidhanni noore gudda geeshsha diagareemma. Mito wote lowo geeshsha daafursannoe woy ceeꞌmishannoe daafira yitannore dimacciishsheemma. Xa kayinni amaleꞌya woyyeessiꞌroomma daafira, qaaqqoꞌyano amalese biddi assidhino. Ise xa roorenka hedose fushshite kultannoe.”

⁹ Ronaaldo yinanni manchino wedellitte beettosi lainohunni hattoori tuncu yiinosi. Isi togo yiino: “Qaaqqoꞌya rosu mine mitto beetto baxxinota kultue wote umi qara lowo geeshsha hanqoommo. Yihowa soqqamaanosi cincatenninna quwa saikki amadannota hedummo wote kayinni, qaaqqoꞌya seejjammora albaanni hedose fushshite kultannoe gede assa woyyitannota huwatummo. Hatto assaꞌya qolte gedenaanni hagiirsiissinoe! Qaaqqoꞌya simmeete leeltinoehu hakkawoteeti. Hedose coyidhe kaꞌu gedensaanni, ise baxillunni hasaawisa shota ikkitinoe. Iseno amaaleꞌya hagiirrunni adhitino. Qolteno akatase biddi assiꞌra hasidhannota kultinoe.” Oosoꞌne ledo ganyitine hasaawa hedonsanna simmeetensa affinanni gede kaaꞌlitannoꞌne. Tini qolte heeshshonsa giddo gara ikkinore wossaꞌnitanno gede roore kaaꞌlate faro fantannoꞌne.c

OOSOꞌNE ITISSE

10, 11. Oosoꞌne sunu sununni gara ikkitino doogonni fultannokki gede kaaꞌla dandiitinannihu hiittoonniiti?

¹⁰ Danchu allaalaanchi geꞌreewisi giddonni mitu baxxe baꞌꞌara dandaannota dideanno. Mitte geꞌrecho qooxote noo hayisso ittanni sunu sununni ikkitanni hoshshatewiinni baxxite baꞌara dandiitanno. Hatteente gede mittu beettino busha jaallanninna bushu boohaarshinni qeelame sunu sununni ayyaanaamittesi gawajjitanno doogo haꞌra jammarara dandaanno. (Law. 13:20) Ikkina, togoori kalaqamannota hoola dandiitinannihu hiittoonniiti?

¹¹ Oosoꞌne rosiissinanni wote, biddi assiꞌra hasiissannonsari noota affiniro bayichonko kaaꞌlensa. Qoleno noonsati dancha akatta roore lophitanni hadhanno gede irkissensa. (2 Phe. 1:5-8) Yannate kiiro maatete magansiꞌra assidhinanniha ikkiro tennera lowo geeshsha kaaꞌlitannoꞌne. Birra 2008⁠nniti Maganu Mangiste Soqqanshonke tenne qixxaawore kultanni togo yitanno: “Maatete annuwa, maate Qullaawa Maxaafa kaaꞌlo aanno garinni ganyite xiinxallitanno gede assite Yihowa albaanni noonsa halaafinate wonsha hasiissannonsa.” Tenne kaajja qixxaawo horoonsidhine oosoꞌne allaalaanchu gede ikkitine towaattinanni heedhinoonni? Oosoꞌne, roorenka ayyaanaamittete hasattonsa wonshate sharrantinanni sharro lowo geeshsha naaddannota huluullantinoonte.—Mat. 5:3; Fil. 1:10.

12. (a) Yannate kiiro assiꞌnanniti maatete magansiꞌra wedella kaaꞌlitinohu hiittoonniiti? (“Insa Baasa Baxxino” yitanno saaxineno ledde qoli.) (b) Ati maatete magansiꞌranni mayi horo afiꞌrootto?

¹² Hanni Kaarisa yinanni wedellitte Maatete Magansiꞌra maatensa kaaꞌlitino gara kultanni yitinore laꞌno. “Baalunku mitteenni ofolline hasaambeemmota baxisannoe. Tini, mimmitunniwa gamba yineemmo gedenna hambannikkita dancha yanna mitteenni sayinseemmo gede assitinonke. Anniꞌya Maatete Magansiꞌra pirogiraamenke ayewoteno saꞌe baꞌannonkekki gede assanno. Isi tenne pirogiraame mulluri gede asse laꞌꞌannokkita afa jawaachishshannote; hattono anino tenne qixxaawo kaffi asse laeemma gede assitinoe. Qoleno, iso annimmasinninna ayyaanaamittete coyira mini giddo biddishsha aannoha ikkasinni roore ayirriseemmasi gede assitinoe.” Biritinii yinanniti wedellitte rodoo togo yitino: “Maatete magansiꞌra anniꞌyanna amaꞌyawa albinni roore shiqeemma gede assitinoe. Insa qarrisannoe coye afa hasidhannotanna ane daafira addinta assaabbannota huwateemma gede assitinoe. Qoleno, jawaatanna mittimma noo maate heedhannonke gede kaaꞌlitinonke.” Addaho, roorenkanni maatete magansiꞌra horoonsidhine oosoꞌne ayyaanaamittetenni itisaꞌne, dancha allaalaasine ikkaꞌne leellishshinannite qara doogooti.d

OOSOꞌNERA HADHANNO DOOGO LEELLISHSHENSA

13. Oosichu Yihowara soqqamanno gede kakkayisa dandiinannihu hiittoonniiti?

¹³ Danchu allaalaanchi geꞌreewosi raga qolatenna insa gawajjotenni agarate siqqo horoonsiꞌranno. Isi geꞌreewosi “danchu qanchi” noowa massa hasiꞌranno. (Hiz. 34:13, 14) Kiꞌneno oosoꞌne ayyaanaamittetenni hattoowa massa dihasidhinanni? Oosoꞌne Yihowara soqqantanno gede doogo leellisha hasidhinanniti egennantinote. Oosoꞌneno faarsaanchu gede togo yitara hasidhinanni: “Maganoꞌya, fajjokki assa tashshi assitannoe; higgekkino giddoꞌya no.” (Far. 40:8) Togoo diniqo heedhannonsa gede kaaꞌlinanni wedelli heeshshonsa Yihowara sayise oye cuuamanno. Kayinni konne assannohu dirinsa tenne wossaꞌnitanno deerra mari gedensaanniitinna Yihowara soqqamate wodanu hasatto heedhannonsa woteeti.

14, 15. (a) Kiristaana ikkino anninna ama maa assate mixiꞌra hasiissannonsa? (b) Qeedho ooso ammanansa huluullantannohu mayira ikkara dandaanno?

¹⁴ Ikkina, oosoꞌne miteekkite ayyanaamittetenni giccella gibbu? Woy isinni ammanansa huluullamalla jammartu? Hatto ikkiro Yihowara baxillu heeꞌrannonsa gedenna isi assinonsarira baalaho diniqo heedhannonsa gede ceeꞌmitinikki kaaꞌlensa. (Aju. 4:11) Hakkiinni Yihowara soqqamate qixxaabbanno wote tenne assate insa uminsa kaꞌara dandiitanno.

¹⁵ Hakka geeshsha kayinni oosoꞌne huluullo noonsata kultannoha ikkirona? Allaalaanchu gede ikkitine insa towaata, hattono Yihowara soqqama woyyitannotanna geedanno hagiirre afiꞌrate kaaꞌlitannota huwattanno gede kaaꞌla dandiitinannihu hiittoonniiti? Huluullonsara kaimu maatiro buuxate woꞌnaalle. Lawishshaho, beettiꞌne addanka Qullaawu Maxaafi roso adha giwinonso, darawosi albaanni ammanasi daafira coyiꞌra waajjino? Beettoꞌne Maganu seeri hayyo nooha ikkinota ammana hoogginonso, callimma amaddeennasenna wolootu insa ledo karsantannota gibbeennaseeti?

16, 17. Annuwanna amuuwu oosonsa halaale uminsaha assidhanno gede kaaꞌla dandiitannohu hiitte doogganniiti?

¹⁶ Oosoꞌne ammanansa huluullantanno gede assinonsari baxireno ikkiro, huluullonsa baꞌanno gede kaaꞌlitinansara dandiitinanni. Hiittoonni? Batinye annuwanna amuuwa kaaꞌlitinoti mitte kaajja doogo, beettu woy beettote wodanira noo hedo bade afate; tennera togo yine xaꞌma dandiinanni: “Kiristaana ikka qarrissannotenso shotate? Kiristaana ikka mayi kaaꞌlo uyitannoha lawannohe? Kiristaana ikkate yine agurranni coyibba hiikkuriiti? Xa afiꞌnoommohano ikko albillitte Maganu oyeemmoꞌne yee coyiꞌrino atoote hendiro, Kiristaana ikkankenni afiꞌneemmo atooti agurroommo coyinni addinta roorannoha lawannohe? Hiitto?” Kayinni tenne xaꞌmuwa xaꞌmitinanni wote qortinanni heedhinoonniha lawisantenni, umiꞌne yaattonni shaqqillunni xaꞌma hasiissannoꞌne. Hasaawu yannara Marqoosi 10:29, 30 yitannore kayissine hasaawa dandiitinanni. Mitu wedellooti hedonsa woraqatu aana borreessite keena hasidhannoha ikkanno; konnira woraqataho guraanni Kiristaana ikkate yite agurtanno coyibba, qiniiteenni kayinni afidhanno atoote borreessitara dandiitanno. Konni garinni heeshshi gotti assite hedansa qarransa bade afatenna tirate kaaꞌlitannonsa. Hasatto noonsa manna Qullaawu Maxaafi Rosonna ‘Maganu Baxille’ yinanni maxaaffa xiinxallinseemmoha ikkiro, uminke oosorano tenne maxaaffa xiinxallisa hasiissannonketi egennantinote! Kiꞌne konne assitinanni heedhinoonni?

¹⁷ Oosoꞌne lophitanni hadhanno wote, ayera soqqantannoro uminsa wossaꞌna hasiissannonsa. Kiꞌne ammana iimi uullanni kaꞌe insara saꞌanno yitine heddinoonte. Halaale uminsaha assiꞌra hasiissannonsa. (Law. 3:1, 2) Beettiꞌnera konne assa qarra ikkitusiro, xinta ikkino rosinni jammarre. Aante noo xaꞌmuwa assaawanno gede kaaꞌlesi: “Maganu noota ammaneemmo gede assinoeri maati? Maganu Yihowa ane addinta waagaho kiirannoeta mayinni afeemmo? Yihowa seerasi uyinohu umiꞌya xiqimera yee ikkinota ammansiisinoeri maati?” Qaaqqiꞌne woy oosoꞌne Yihowa doogo harunsa woyyitino heeshsho heeꞌrate kaaꞌlitannota buuxxanno gede cincitine kaaꞌlitine dancha allaalaasine ikkaꞌne leellishshe.e—Rom. 12:2.

18. Annuwanna amuuwu Bayiru Allaalaanchiha Yihowa lawishsha harunsa dandiitannohu hiittoonniiti?

¹⁸ Addu Kiristaani baalunku Bayiru Allaalaanchi lawishsha harunsa hasiꞌranno. (Efe. 5:1; 1 Phe. 2:25) Hakko iso annuwanna amuuwu hoshshansa yaano muxxe oosonsa noo gara afanna Yihowa qixxeessinonsa atooti widira qolte marraꞌꞌate dandiiture baala assa hasiissannonsa. Konnira, oosoꞌne allaalaanchu gede ikkitine towaatte hattono insa halaalu doogo aana lossaꞌne agurtinoonte!