AANIIDI QOOLIHA COYI UMO | MAGANU LEDO JAALOOꞌMA DANDAATTO
Maganu Ledo Jaalooꞌmoottoha Lawannohe?
“Maganu ledo jaalooma kalaqiꞌra, yaaddonna masillu nookkiha teense heeꞌrate kaaꞌlitanno. Qoleno, Maganu ayewoteno ninkera danchare halchannota hendeemmo gede assitannonke.”—KIRISTOOFERI, GAANAHO HEEꞌRANNOHU AJU BEETTI.
“Dadillineemmo wote Maganu laꞌꞌannonke; qoleno hendoommohura aleenni ikkino baxille leellishannonke, hattono towaatannonke.” —HAANNA YINANNITI 13 DIRI QAAQQO, ALASKA, YUNAYITIDI ISTEETE.
“Maganu ledo muli jaaloomi nooheta afakki lowo geeshsha baxissannotenna harshammi assitannote!”—JIINA, 40 DIRO SAINOSETI JAMAYIKU MANCHO.
Togoo hedo noonsari Kiristooferi, Haannanna Jiina calla diꞌꞌikkino. Alamete aana batinyu manni Maganu ledo danchu jaaloomi noonsata ammananno. Atina hiittooti? Maganu ledo jaalooꞌmoottoha lawannohenso, isi ledo jaalooma kalaqiꞌra woy roore jaalooꞌma hasiissannoheha lawannohe? Miteekkite togo yite hedattoha ikkara dandaanno: ‘Mannu Duuchanka Dandaanno Magani ledo jaalooꞌma dandaannoni? Dandaannoha ikkiro, ma garinni jaalooꞌmanno?’
MAGANU LEDO JAALOOꞌMA DANDIINANNI
Qullaawu Maxaafi, Maganu ledo muli jaalooma kalaqiꞌra dandiinannita kulanno. Maganu hunda Ibiraawete mancho Abirahaami “jaalaꞌya” yee woshshinota Qullaawu Maxaafi kulanno. (Isayyaasi 41:8) Qoleno, Yaaqoobi 4:8 aana nooha hagiirsiisanno koyishsha wodanchi: “Maganunniwa shiqqe, isino kiꞌnewa shiqannona.” Konni daafira, Maganu ledo muli fiixooma woy jaalooma kalaqiꞌra gooddo diꞌꞌikkitino. Kayinni Maganu illete leellannokki daafira, isiwa ‘shiqanna’ isi ledo dancha jaalooma kalaqidhe hagiidha dandaattohu ma garinniiti?
Tenne xaꞌmora dawaro afiꞌrate, hanni mannu mimmitu ledo jaalooma kalaqiꞌranno wote assannore laꞌno. Jaalooma kalaqiꞌrannohu lamu manni balaxe mimmitoho suꞌmansa kulanno. Hakkiinni, ganye hasaawanno wotenna hedonsanna simmeetensa mimmitoho kulanno wote jaaloominsa lexxanni haꞌranno. Qoleno lamunku mimmitoho mitore assansa, jaaloominsa albinni roore jawaata ikkanno gede assitanno. Maganu ledo muli jaalooma kalaqiꞌnannihuno konni garinniiti yaa dandiinanni. Togo yineemmohu mayiraatiro hanni laꞌno.