Maganu Suꞌma Egennootto? Suꞌmasina Woshshatto?

Suꞌmasi egennoottokkihu muli jaali noohe? Heeꞌra hoogahera dandaanno. Ereena yinanniti Bulgaariyaho heedhanno mancho togo yitino: “Maganu suꞌma afa hoongummoro isi ledo jaalooꞌma didandiineemmo.” Sai birxichira laꞌnummonte gede, Maganu isi ledo jaalooꞌmattora hasiꞌranno; tini hagiirsiissannote. Konni daafira, Maganu Qullaawu Maxaafi giddo isonooto togo yee egensiisinohe: “Ani Yihowaati. Suꞌmiꞌyano konneeti.”—Isayyaasi 42:8.

Yihowa addinta suꞌmasi afattoranna woshshattora hasiꞌranno? Hanni konne coye hedi: Tetragramateni yinannite shoole Ibirayisxete fidalenni borreessaminohu Maganu suꞌmi, hunda Ibirayisxete Afiite Qullaawa Borro giddo 7,000 meddi yitanno basera borreessamino. Qullaawu Maxaafi giddo konni suꞌmi geeshsha kulloonnihu wolu suꞌmi horo dino. Tini Yihowa suꞌmasi anfammoranna woshshinammora hasiꞌrannota leellishshanno tajeeti.a

Ikkirono mitu manni, Maganu qullaawanna duuchanka dandaannoha ikkino daafira suꞌmasi gana dihasiissanno yaanno. Jaalikki suꞌma gariweelo woshshattokkinte gede, Maganu suꞌmano hasiisannokki garinni woshsha soꞌro ikkitinoti egennantinote. Ikkollana, Yihowa iso baxxannori suꞌmasi ayirrissaranna mannaho egensiissara hasiꞌranno. (Faarso 69:30, 31; 96:2, 8) Yesuusi rosaanosi togo yite huuccidhara rosiisinota qaagi: “Iima heeꞌratto Annanke, suꞌmikki qullaawo.” Maganu suꞌmi qullaawa ikkanno gede kaaꞌlitannoti mitte doogo konne suꞌma mannaho egensiisate. Tenne assanke Maganunniwa albinni roore shinqeemmo gede kaaꞌlitannonke.—Maatewoosi 6:9.

Qullaawu Maxaafi Maganu “suꞌmisi daafira hiincitannore [woy kaffi assite laꞌannore]” ille wore laꞌꞌannota kulannonke. (Milkiyaasi 3:16) Yihowa togoo manni daafira togo yee qaale eino: “Suꞌmaꞌya afino daafira agareemmosi. Isi woshshannoe, anino qoleemmosi. Qarrisi yannara ledosi ikkeemmo.” (Faarso 91:14, 15) Ee, Yihowa ledo muli jaalooma kalaqiꞌne hagiidhate suꞌmasi afanna woshsha hasiissannonke.