Maganu Suꞌmi Ayeti?

Mittu manchi ledo egennamatto woyite balaxxe, “Suꞌmikki ayeti?” yite xaꞌmakki digattanno. Tenne xaꞌmo Magano xaꞌmittoro, isi mayyee qolannoha lawannohe?

“Ani Yihowaati. Suꞌmiꞌya konneeti.”—Isayaasi 42:8, NW.

Atera kuni suꞌmi wosinchoho? Konne suꞌma macciishshite egennoottokkiha ikkara dandaanno; korkaatuno Qullaawa Maxaafa tirtannori giddo batinyu Maganu suꞌma dihoroonsidhanno; mitootu kayinni boode basera calla horoonsidhanno. Insa suꞌmasi “MOOTICHA” woy “KAALIIQA” yitannote maaragete suꞌmuwanni riqibbino. Umo Qullaawa Maxaafa borreessinoonni afiira kayinni shoole Ibiraawootu Afii fidallanni (YHWH woy JHVH) woshshinannihu Maganu suꞌmi 7,000 meddi yitanno basera no. Konne suꞌma Sidaamu Afiinni “Yahiwe” woy “Yihowa” yine woshshinanni.a

Maganu suꞌma Ibiraawootu Afiinni borreessinoonnita Reyote Baari Xaaxo — Reyote Baarita Faarsote Xaaxo Umi xibbi diro M.D., IBIRAAWOOTU AFOO

Maganu suꞌma Ingilizete Afiinni borreessinoonnita Tindelita Qullaawu Maxaafi tiro — Tindeli tiro 1530, INGILIZETE AFOO

Maganu suꞌma Ispeenete Afiinni borreessinoonnita Reena-Vaaleera Vershiini yinannita Qullaawu Maxaafi tiro — Reena-Vaaleera Vershiini 1602, ISPEENETE AFOO

Maganu suꞌma Chayinu Afiinni borreessinoonnita Yuniyeeni Vershiini yinannita Qullaawu Maxaafi tiro — Yuniyeeni Vershiini 1919, CHAYINU AFOO

a Sidaamu Afiinni qixxeessinoonnihu Qullaawu Maxaafira, Fulo 6:3te nooha lekkaalliidi qaagiishsha lai.

MAGANU SUꞌMA AFA MAYIRA HASIISSU?

Maganu suꞌmasi lowori gede asse laꞌꞌanno. Maganoho suꞌma fushshinohu wole ikkikkinni iso umosiiti. Yihowa togo yiino: “Hegere geeshsha suꞌmiꞌya konneeti; dagganno ilama baala kunni suꞌminni woshshitannoe.” (Fulo 3:15) Qullaawu Maxaafi giddo Maganu suꞌma Woꞌmanka Dandaannoha, Anna, Mooticha, woy Magano yitannote maaragete suꞌmuwanni roore duucha basera qummi assinoonni. Hattono Abirihaami, Muse, Daawiti, woy Yesuusi yitannote gillete suꞌmuwanni roore batinye basera no. Qoleno Yihowa suꞌmasi anfara hasiꞌranno. Qullaawu Maxaafi togo yaanno: “Suꞌmakki Yihowa yinannihu ati callu uulla woꞌmate aana Woꞌmunkura Aliidiha ikkoottota mannu afona.”—Faarso 83:18, NW.

Yesuusi Maganu suꞌma ayirrisanno. Mootichu Huuccatto yinanni huuccattora Yesuusi harunsaanosi Magano “Suꞌmikki qullaawo” yite huuccidhanno gede rosiisinonsa. (Maatewoosi 6:9) Yesuusi umisi “Annaꞌya, suꞌmakki ayirrisi!” yee huucciꞌrino. (Yohaannisi 12:28) Yesuusi heeshshosi giddo Maganu suꞌmi ayirranno gede assate aana illachishino; isi togo yiino: ‘Insa ate suꞌma egentanno gede assoommo. Egentanno gede assano diagureemmo.’—Yohaannisi 17:26.

Magano afino manni suꞌmasi ayirrisanno. Hunda heeꞌrinohu Maganu manni, Maganu suꞌmi gatonna agarooshshe ikkannonsata huwatino. “Kaaliiqi [“Yihowa,” NW] suꞌmi kinchu huxxaati; keeraanchu manchi hakkiira xooqe keere heeꞌranno.” (Lawishsha 18:10) “Kaaliiqi [Yihowa] suꞌma woshshannohu baalu gatanno.” (Iyueeli 2:32) Qullaawu Maxaafi, Maganu suꞌmi isi soqqamaasine bande anfanni gede assannota leellishanno. “Daga woꞌmanti uminsa maganna magansidhanno. Ninke kayinni hegere geeshsha Kaaliiqa [Yihowa] Maganonke magansiꞌneemmo.”—Mikiyaasi 4:5; Soqqamaasinete Looso 15:14.

MAGANU SUꞌMI MAA LEELLISHANNO?

Maganu suꞌmi isi ayimma xawisanno. Batinyu egennaammi Maganu suꞌmi “Ikkanno Gede Assanno” yitanno tiro afiꞌrino yitanno. Maganu Yihowa “Ikka Hasiꞌreemmore Ikkeemmo” yee Musera coyiꞌrino hedo, suꞌmisi tiro huwatate kaaꞌlitannonke. (Fulo 3:14, NW) Konni daafira, Maganu suꞌmi tiro isi woꞌmunkuri Kalaqaancho ikkinota leellishshannota calla diꞌꞌikkitino. Hatteentenni Yihowa suꞌmi, isi umisino ikko kalaqamisi isi hedinore wonshate hasiꞌrinore ikkitanno gede assa dandaannota leellishanno. Maganunniti maaragete suꞌmuwa roorresi, ayirrinyesinna wolqasi xawissannota ikkiturono, ayimmasinna hasiꞌrinore ikka dandaannota leellishannohu kayinni Yihowa yaanno suꞌmasi callaho.

Maganu suꞌmi isi ninkera hedannota leellishanno. Maganu suꞌmi isi ninkerano ikko kalaqamisira baalaho hedannota leellishanno. Qoleno Maganu ninkera suꞌmasi kulasi, isi daafira anfammora hasiꞌrannota leellishshanno. Qoleno suꞌmasi kulinonkehu ninke xaꞌmineenna ikkikkinni umisinni kaeeti. Konni daafira, Maganu ninkewiinni xeertiꞌrinohunna ayimmasi anfara hasiꞌrannokkihu gede assine ikkikkinni addanka noohunna isiwa shiqqi yaa dandiineemmohu gede assine laꞌnammosira hasiꞌranno.—Faarso 73:28.

Maganu suꞌma horoonsiꞌranke isiwa shiqqi yaa hasiꞌneemmota leellishshanno. Lawishshaho, hanni jaalooma kalaqiꞌra hasiꞌrootto manchira suꞌmakki higge higge kulootto yine hendo. Ikkollana hakku manchi suꞌmakki woshsha hasiꞌrannokkiha ikkiro, isi ate ledo jaalooma kalaqiꞌra hasiꞌrannoha lawannohe? Dilawannohe! Yihowano mannu oosora suꞌmasi kulinonsa; qoleno insa suꞌmasi woshshitara hasiꞌranno. Yihowa suꞌmisinni woshshanke, isiwa shiqqi yaa hasiꞌneemmota leellishshanno. Maganu suꞌmasi ‘ayirrissannore’ laꞌꞌanno.—Milkiyaasi 3:16.

Magano afate, balanxe suꞌmasi egenna hasiissannonke. Ikkollana suꞌmasi calla anfe agura dihasiissannonke. Hatteentenni Yihowara hiittoo akatta noosiro rosa hasiissannonke.

Maganu suꞌmi Ibiraawootu Afiitenna wole batinye Qullaawa Borro tiro giddo no

MAGANU SUꞌMI AYETI? Maganu suꞌmi Yihowaati. Kuni suꞌmi Maganu hedinore umo fushshate dandoo noosita leellishanno

MAGANO AYI KALAQINO?

Batinyu manni tenne xaꞌmo xaꞌmanni keeshshino. Atino hatto yite hedde egennoottoha ikkara dandaanno. ‘Kalqete alamenna giddose noore baala kalaqinohu Magano ikkina, iso kalaqinohu ayeti?’ yite hedattoha ikkara dandaanno.

Sayinsete egennaammi xaphoomunni, illete leeltannote kalqete alamera hanafo noota ammantanno. “Umo Maganu iimanna uulla kalaqi” yitannoti Qullaawu Maxaafi giddo nooti hanafote coyi fooliishsho tenne ledo sumuu yitanno.—Kalaqama 1:1.

Beeddahenna pilaaneetta iimi uullanni kaꞌe daa didandiitanno. Mitturichi kalaqinohu nookkiha heeꞌrara didandaanno. Kalaqaanchu hoogoommero mannu oosono ikko wolu coyi baalu kalaqamara didandaanno. Kalaqaminorichi heeꞌrannohu kalaqaanchu heeꞌrirooti. Kuni Kalaqaanchi taalle nookki wolqanna hayyo noosiho, hattono ayyaana ikkinoho Magano Yihowaati.—Yohaannisi 4:24.

Qullaawu Maxaafi Maganu daafira kulanni togo yaanno: “Ilaalla kalaqantara albaanni, baattono safantara albaanni hegere hegerera ati Maganoho.” (Faarso 90:2) Konni daafira, Maganu woꞌmanka woyite nooho. Hakkiinni isi “umo” illete leeltannota kalqete alame kalaqino.—Yohaannisi Ajuuja 4:11.