Maganu Yaannohere Assatto?

“Hasiꞌratto coyi heeꞌriro, kulie asseemmohena.” Horonta afoottokki manchira woy gari geeshsha egennoottokki manchira hatto yaa rakkannohekkiti egennantinote. Ikkollana, muli jaalikkira hatto yaa diqarrissannohe. Lubbora baxantanno jaalla kuꞌu kuꞌuyira danchare assansa nooreeti.

Qullaawu Maxaafi Yihowa duuchanka wote soqqamaanosi hagiirsiisannore assannota kulannonke. Lawishshaho, hunda Maganu ledo muli jaalooma kalaqiꞌrinohu Nugusu Daawiti togo yiino: “Maganoꞌya Yihowa, ati ninkera assoottori hattono dhaggete loosikkinna ninkera hedattori lowo geeshsha batiꞌrinoho. . . . Kiiratenna tittire kulate woꞌnaalummoro, lowo geeshsha batiꞌranno!” (Faarso 40:5) Hakkiinni saeno, Yihowa egentinosikkirira nafa danchare assanno; ‘falakkino sagale aannonsa hattono wodaninsara hagiirru woꞌmanno gede assanno.’—Hawaariyaatete Looso 14:17.

Maganu Yihowa manna hagiirsiisannore assa baxannoha ikkino daafira, isi jaalla ikka hasidhannorino ‘wodanasi tashshi assannore’ assitanno yine heda garankolla. (Lawishsha 27:11) Ikkina Magano hagiirsiisate maa assa dandaatto? Qullaawu Maxaafi togo yaanno: “Danchare assanna nooꞌnere woleho beeha deꞌinoonte; korkaatuno togoo kakkalo Magano lowo geeshsha hagiirsiissanno.” (Ibiraawuyaani 13:16) Ikkina Magano hagiirsiisate hasiisannori danchare assatenna noonkere woleho beeha callate?

Qullaawu Maxaafi, “Ammana nookkiha Magano seekkine hagiirsiisa didandiinanni” yaanno. (Ibiraawuyaani 11:6) ‘Abirahaami Yihowa jaala yaamaminohu iso ammani’ gedensaanni ikkinota huwata hasiissanno. (Yaaqoobi 2:23) Yesuusi Kiristoosino, Maganu atoote afiꞌrate ‘Magano ammanneemmota loosunni leellisha’ hasiissannonketa xawise coyiꞌrino. (Yohaannisi 14:1) Ikkina Maganu jaalla ikkitannorira hasiissanno gedee ammana heedhannohe gede maa assa dandaatto? Umihunni, Maganu Qaale ikkinoha Qullaawa Maxaafa ganyite xiinxalla hasiissannohe. Hatto assakki, ‘Maganu fajjota gara ikkitino egenno’ afiꞌratto gedenna ‘iso woꞌmunni woꞌma hagiirsiisatto’ gara afatto gede kaaꞌlitannohe. Hakkiinnino, Yihowa daafira gara ikkitino egenno lexxitanninna xalalu seerisi daafira rosattore loosu aana hosiissanni haꞌrattoha ikkiro, ammanakki lophitanno hattono isi albinni roore atewa shiqanno.—Qolasiyaasi 1:9, 10.