Yihowa Eino Qaale Ammantinannita Loosunni Leellishshe

1. Kiristaanu Maganu uyinonsa ammana ma garinni laꞌꞌa hasiissannonsa?

ADDU ammana muxxe akataati. Ikkollana, ammana baalunku mannira heeꞌranno akata diꞌꞌikkino. (2 Tes. 3:2) Yihowa kayinni baalante soqqamaanosira ammana aannonsa. (Rom. 12:3; Gal. 5:22) Hakko daafira tennera insa Iso galata hasiissannonsa.

2, 3. (a) Ammana noonsari mayi atoote afidhanno? (b) Konninni aanchine hiikkuri xaꞌmuwa laꞌneemmo?

² Yihowa Beettisi widoonni mannu Isiwa daanno gede assanno. (Yoh. 6:44, 65) Cubbinkenni maaro afiꞌneemmohu Yesuusa ammanneemmoha ikkirooti. Tini qolte hegere geeshsha Yihowa jaala ikkineemmo gede faro fantinonke. (Rom. 6:23) Ninke konne atoote afiꞌneemmo gede assannonkere assinoommori nooni? Cubbaataamma ikkinoommohura woleteemmero ninke reyo hasiissannonkereeti. (Far. 103:10) Ikkollana, Yihowa giddonke noota dancha coye assate hasatto laino. Isi shaqqillunni kakkae dancha duduwo macciishshineemmo gede assinonke. Hakko daafira hegere heeshsho afiꞌneemmota hende, Yesuusa ammannoommo.—1 Yohaannisi 4:9, 10 nabbawi.

³ Ikkina ammana maati? Ammanate yaa Yihowa haaro alamera qixxeesse noonke atoote afa callateni? Ammana noonketa leellisha dandiineemmohu hiittoonniiti?

‘WODANIꞌNENNI AMMANNE’

4. Ammana egennotenni sainoreeti yineemmohu mayiraatiro xawisi.

⁴ Mittu manchi Maganu assate hedinore afino daafira calla ammana noosi yaa didandiinanni. Ammana mittu manchi Maganu fajjo ledo sumuu yee heeꞌranno gede wolqa ikkannosi akataati. Hakku manchi Maganu mannu ooso gatisate qixxeessino qixxaawo ammanannoha ikkiro, mannaho dancha duduwo kulate kakkaꞌꞌanno. Soqqamaasinchu Phaawuloosi togo yiino: “Yesuusi Mooticha ikkinota afiikkinni farciꞌritoronna Maganu reyotenni kayisinosita wodanikkinni ammanittoro gatatto. Mannu wodanisinni ammane keeraaꞌmanno; afiisinni farciꞌre gatanno.”—Rom. 10:9, 10; 2 Qor. 4:13.

5. Ammana lowo geeshsha hasiissannote yineemmohu mayiraati? Ammananke kaajjite heedhanno gede assiꞌra dandiineemmohu hiittoonniiti? Lawishshunni kuli.

⁵ Maganu abbannote haaro alame giddo hegerera heeꞌrate, ammana afiꞌranna ammananke kaajjite heedhanno gede assiꞌra hasiissannonketi egennantinote. Ammananke kaajjite heedhanno gede assiꞌra muꞌrote waa hayikkisate gedeeti. Lubbote noo muꞌro mannu loosino muro gede ikkitukkinni, duuchanka wote soorrantannote. Lubbote noo muꞌro waa afiꞌra hoogguro qoortanno; duucha wote quficho afidhuro kayinni lattanni hadhanno. Lattino muꞌro nafa, waa afiꞌra hoogguro sunu sununni moolte baꞌara dandiitanno. Ammanankeno lashshi assine agurrummoro qoortaranna moolte baꞌara dandiitanno. (Luq. 22:32; Ibi. 3:12) Kayinni ammananke towaaxxineemmoha ikkiro, baꞌukkinni “lophitanni” hadhanno; hattono ‘ammanatenni fayyaaleeyye’ ikkine heeꞌneemmo.—2 Tes. 1:3; Tit. 2:2.

QULLAAWU MAXAAFI AMMANA XAWISANNO GARA

6. Ibiraawoota 11:1 giddo ammana hiittenne lame doogonni xawinsoonni?

⁶ Qullaawu Maxaafi Ibiraawoota 11:1 (Qummeeshsha nabbawi) giddo ammana maatiro xawisanno. Ammana illetenni laꞌꞌa dandiinannikkihu lamu coyi aana illachishanno akataati; insano: (1) ‘Hexxotenni agadhinoonni coyeeti’; kunni coyi giddo mittu Maganu qaale einore kayinni xaa geeshsha woꞌminokkireeti; lawishshaho Maganu tenne busha alame hunatenna haaro alame abbate qaale eino. (2) ‘Illete leellinokki coyeetiꞌwoy konne coye leellishshanno tajeeti. Tenne basera taje yine tirroonnihu Giriikete qaali illete leellannokkire addinta nooha ikkinota ammansiisanno coye yitanno tiro afiꞌrino; lawishshaho, Maganu Yihowa, Yesuusi Kiristoosi, sokkaanonna Maganu Mangiste illete anfoommokkiha ikkirono addanka noota kayinni ammanneemmo. (Ibi. 11:3) Ikkina Maganu uyinonke hexxo huluullammeemmokkitanna Maganu Qaali giddo kulloonnihu illete leellannokki coyi addanka nooha ikkinota ammanneemmota leellisha dandiineemmohu hiittoonniiti? Coyiꞌneemmo coyinninna assineemmo assootinniiti; tenne assa hoongummoro ammananke guuta diꞌꞌikkitanno.

7. Nohi lawishshi ammana maatiro huwanteemmo gede kaaꞌlannonkehu hiittoonniiti? (Hanafote noo misile lai.)

⁷ Ibiraawoota 11:7 Nohi ammana daafira kultannonke; Isi “Illetenni leellannokki coyiꞌre Maganu balaxe qorophisiise kulisi yannara Magano waajjatenni minisi manna gatisara markaawe seekkino.” Nohi jigeette markaawe seekke ammana noosita leellishino. Qooxeessisira heeꞌranno manni isi tenne jawa markaawe seekkanni noohu mayiraatiro xaꞌminositi dihuluullissannote. Nohi tennera cuqqo curuqqo giwinoni? Woy essannoꞌneri dino yiinonsani? Hatto diassino! Nohira noosi ammana, waajjikkinni farciꞌranno gedenna Maganu abbanno bao daafira kule hatte yannara noo manna qorowisiisanno gede kakkayissinosi. Nohi hakkonni mannira Yihowa kulinosire kulinonsaha ikkara dandaanno; Yihowa togo yiinosi: “Mannu sircho baattote aaninni hunammora murciꞌroommo; insanni kainohunni baattote barshu woꞌminona, . . . baattote aana heeꞌrannoha lubbo afiꞌrino kalaqama duuchanka hunate baattote aanira baote waa dirriseemmo. Baattote aana noohu baalunku baꞌꞌanno.” Hattono Nohi Maganu kulinosita baote wayinni gata dandiinanni doogo kulinonsati egennantinote; Yihowa “Markaawete giddora eꞌe” yiinonsa. Nohi ‘keeraanchimmannire kulasino’ ammana noosita leellishshanno.—Kal. 6:13, 17, 18; 2 Phe. 2:5.

8. Rosaanchu Yaiqoobi ammanate daafira mayino?

⁸ Yaaiqoobi maxaafi giddo noo sokka borreessantinohu soqqamaasinchu Phaawuloosi Ibiraawootu maxaafi giddo ayyaanunni ammanate daafira borreessihunni shiima yanna gedensaanni ikkikki digatino. Phaawuloosinte gede, Yaiqoobino addu ammana mitto coye ammana calla ikkitukkinni hakkonne coye ammannannita loosunni leellisha ikkitinota xawisino. Isi togo yee borreessino: “Ammanakki loosikkiwiinni badde leellishie; anino ammanaꞌya loosiꞌyanni leellisheemmohena.” (Yai. 2:18) Yaiqoobi hakkiinni aanche mitto coye ammanatenna hakkonne coye ammannannita leellishate mereero noo badooshshe xawisino. Agaaninte nafa Maganu noota ammantanno; kayinni insara addu ammana dinonsa. Konnira, insa Maganu fajjo ledo sumuu yaannokkire assitanno. (Yai. 2:19, 20) Yaiqoobi hunda ammana noosita leellishino mancho qummi asse togo yee xaꞌmino: “Anninke Abirihaami beettosi Yisihaaqi kakkalote shiqishi yannara, keeraaꞌminohu diloosunniiti? Kunnira, ammanasi loosu ledo nootanna loosu ammana guuta assannota afitto?” Hakkiinni ammana loosunni leellisha hasiissannota kulanni Yaiqoobi lede togo yiino: “Mannimma lubbo [“foolu”, NW] nookkiha reyitinote. Loosu ledo nookki ammanano reyitinote.”—Yai. 2:21-23, 26.

9, 10. Soqqamaasinchu Yohaannisi coyiꞌrinori ammana lowo geeshsha hasiissannota huwanteemmo gede kaaꞌlannonkehu hiittoonniiti?

⁹ Soqqamaasinchu Yohaannisi 30 saꞌꞌanno diri gedensaanni, Yohaannisi Wongeelanna wole sase sokka borreessino. Isino wole Qullaawu Maxaafi borreessaano gede, ammana maatiro huwatinota leellishino. Wole Qullaawu Maxaafi borreessaanonni roore, Yohaannisi ammana yaanno qaali ledo sumuu yaannoha Giriikete handaara horoonsiꞌrino.

¹⁰ Yohaannisi togo yee coyiꞌrino: “Beettosi ammaꞌninohura hegere heeshsho noosi. Beettosi ammaꞌninokkihura [“hajajamannokkihura”, NW] kayinni, Maganu hanqi aanasi heeꞌranno.” (Yoh. 3:36) Ammana noosi Kiristaanchi Yesuusi hajajinore assanno. Yohaannisi duucha basera ammana mitte hinge assine agurrannire ikkinokkita leellishannore Yesuusi coyiꞌrinore qummi assino.—Yoh. 3:16; 6:29, 40; 11:25, 26; 14:1, 12.

11. Halaale macciishshineemmo gede assinonkehura Magano galanteemmota leellisha dandiineemmohu hiittoonniiti?

¹¹ Yihowa halaale macciishshineemmo gedenna dancha duduwo ammanneemmota loosunni leellinsheemmo gede ayyaanisinni kaaꞌlinonkehura Iso galata hasiissannonke. (Luqaasi 10:21 nabbawi.) “Ammananke umonna gawalo” ikkinohu Beettisi Yesuusi widoonni umisiwa woshshinonkehura Yihowa duuchanka wote galata hasiissannonke. (Ibi. 12:2) Tenne eltora Magano galanteemmota leellishate, ammananke kaajjishiꞌrate ganyine huuccatto assiꞌranna Qullaawa Maxaafa xiinxalla hasiissannonke.—Efe. 6:18; 1 Phe. 2:2.

12. Ammana noonketa leellishate maa maa assa hasiissannonke?

¹² Yihowa eino qaale wonshannota ammanneemmota agurrummokkinni leellisha hasiissannonke. Tini wolu mannira xabbe leella hasiissannose. Lawishshaho, agurrummokkinni Maganu Mangiste daafira sabbakanna mannu Yesuusi rosaano ikkanno gede kaaꞌla hasiissannonke. Qoleno duuchanka wote “manna baalaho, roorsine ammaꞌnino mannira (woy, roduuwinkera) dancha coye” assa hasiissannonke. (Gal. 6:10) Hattono ayyaanaamittenke gawajjantannokki gede, ‘akkala mannimma loosise ledo mulqine’ hunate sharrama hasiissannonke.—Qol. 3:5, 8-10.

KIRISTAANU AMMAꞌNORA XINTA IKKINORI GIDDO MITTU MAGANU NOOTA AMMANATE

13. Maganu noota ammana mageeshshi geeshsha hasiissannote? Mayira?

¹³ Qullaawu Maxaafi togo yaanno: “[Ammana] nookkiha Magano hagiirsiisa didandiinanni; mayira yiniro, Maganunniwa shiqqi yaanno manchi Maganu nootanna iso hasiꞌranno mannirano baꞌraaꞌra aannota ammana hasiissannosi.” (Ibi. 11:6) Maganu Qaali addu Kiristaani miila ikke heeꞌra hasiꞌranno manchi assa hasiissannosi coyi giddo mittu ‘Maganu noota ammana’ ikkinota kulanno. (Ibi. 6:1) Kiristaanu ‘Maganu baxilli giddonni’ fulikkinni heeꞌranno gede, “ammana” calla ikkikkinni wole akattano heedhannonsa gede assiꞌra hasiissannonsa.—2 Pheexiroosi 1:5-7 nabbawi; Yih. 20, 21.

14, 15. Baxillu ledo heewisiinsiro ammana mageeshshi geeshsha hasiissanno?

¹⁴ Giriikete Afiita Qullaawa Borro borreessituri ammana hasiissannota ikkitinota batinye basera qummi assitino. Tenne borro giddo ammanate geeshsha batinye basera qummi assinoonnihu wolu Kiristaanu akati dino. Togo yaa, ammana Kiristaanu akatta baala roortannote yaateni?

¹⁵ Phaawuloosi ammana baxillu ledo heewisiise togo yee borreessino: “Ilaalla kayissanno geeshshi ammana heedhuerono, baxillu hoogiero kayinni haafaho.” (1 Qor. 13:2) Yesuusi mittu manchi “Baalanta roortino hajajo hiittenneeti?” yee xaꞌmisi yannara, Magano baxa ikkitinota kulasi baxillu baalanka rooranno akata ikkinota leellishshanno. (Mat. 22:35-40) Baxillu batinye Kiristaanu akatta giddosi amadino; kuri akatta giddo mitte ammanate. Qullaawu Maxaafi baxillu “baalankare addaxxanno” woy ammananno yaanno. Baxillu Maganu Qaalisi giddo kulinori halaale ikkinota ammananno.—1 Qor. 13:4, 7.

16, 17. Qullaawu Maxaafi giddo ammananna baxille mitteenni qummi assinoonnihu hiittoonniiti? Baalanka rooranno akati hiikkonneeti? Mayira?

¹⁶ Ammanano baxilluno lowo geeshsha hasiisannoha ikkinohura, Giriikete Afiita Qullaawa Borro borreessituri batinye basera lamenka akata mitte coyi fooliishsho woy handaari giddo mitteenni qummi assitino. Phaawuloosi roduuwisira “ammanannitanna baxillunnita siwiilu uddano” uddidhanno gede kulinonsa. (1 Tes. 5:8) Pheexiroosino togo yee borreessino: “Yesuusa Kiristoosa laꞌinoonnikkiha ikkirono baxxinannisi. Xa laꞌinoonnisikkiha ikkirono, ammantinannisi.” (1 Phe. 1:8) Yaiqoobi buuramino Kiristaana togo yee xaꞌmino: “Maganu ammanatenni dureeyye ikkitanno gedenna iso baxxannorira uyinonsa hexxo garinni gashshoote ragidhanno gede, tenne gobba buxane didoorino?” (Yai. 2:5) Yohaannisi togo yee borreessino: “Maganu hajajo Beettisi Yesuusi suꞌminni ammanneemmonna hajajosi garinni mimmitinke ledo baxammeemmo gedeeti.”—1 Yoh. 3:23.

¹⁷ Ammana lowo geeshsha hasiissannota ikkiturono, Maganu eino qaale wonshinna Kiristaanu hexxo woꞌmitu gedensaanni hakkonni coyira noonke ammana gattanno. Ikkollana Maganohonna mannaho baxille leellisha horo gatannokki coyeeti. Hakko daafira Phaawuloosi togo yee borreessino: “Ammana, hexxonna baxillu sasunku darginni milli yitukkinni heedhanno. Ikkollana, kuri sasunku giddo rooru baxilleho.”—1 Qor. 13:13.

AMMANANKE LEELLISHANNOHA DHAGGE IKKANNO COYE

18, 19. Yannankera Maganu mannira ammana noonsata leellishannori maati? Tennera aye galata hasiissannonke?

¹⁸ Xaa yannara Yihowa manni, Maganu Mangistera ammana noonsata loosunni leellishanni no. Tini qolte alamete doyichora nooti ayyaanaamittete gannate harditanni hadhanno gede assitino; xaa yannara tenne gannate giddo sette miliyoone saꞌꞌanno manni no. Ayyaanaamittete gannate giddo Maganunnihu qullaawu ayyaani gumi woꞌmino. (Gal. 5:22, 23) Ee, tini addu Kiristaanira noonsa ammananna baxille leellishshannote!

¹⁹ Tennera galatu hasiisannohu mannaho ikkikkinni Maganohooti. Korkaatuno tenne assinohu Isooti. Kuni dhagge ikkanno loosi Yihowa suꞌmi ayirranno gede assanni no; qoleno “hegerera hambannikkiha qaaggote malaate ikkanno.” (Isa. 55:13) Ee, ninke ‘gantoommohu ammanate widoonni’ Maganu eltonniiti. (Efe. 2:8) Uulla woꞌmate aana guutu, keeraanchunna hagiirraamu manni woꞌma geeshshanna mannu baalu hegerera Yihowa suꞌma guwisiꞌrannoha ikka geeshsha ayyaanaamitte gannatenke halaꞌlitanni hadhanno. Konnira, Yihowa eino qaalira noonke ammana loosunni leellishanke agurroonke!