“Qullaawa Borro Tiro” Leeltannohe?
“Qullaawa Borro tiro huwattanno gede surrensa seekke faninsa.” —LUQ. 24:45.
1, 2. Yesuusi reyotenni kai barra rosaanosi jawaachishinohu hiittoonniiti?
BARRU Yesuusi reyotenni kainoho. Rosaanosi giddo lamu Yerusaalametenni mite 11 kiilomeetire fafe noo qacha hadhanni no. Insa Yesuusi reyotenni kainota affinokki daafira, isi reyora lowo geeshsha xissiisidhanni no. Hedeweelcho Yesuusi daye ledonsa haꞌra jammari. Hakkiinnino sheshifachishinsa. Hiitto asse? “Musenna Masaalaano baalantenni kayise, Qullaawa Borro giddo isi daafira borreessaminore baalankare tittire kulinsa.” (Luq. 24:13-15, 27) Yesuusi Qullaawa Borro yitannore “xawise kulanni” noonsa daafira wodaninsa giirate gede ikke buwa jammari.—Luq. 24:32.
2 Tini lamenti rosaano hakko hashshanni agurte Yerusaalame higgu. Insa hawaariyaatete ledo xaadduti doogote tuncu yiinonsare kultunsa. Tenne kultanni heedheenna, Yesuusi mereeronsa daye leelli. Ikkollana, hawaariyaatesi waajjitino. Huluullamano jammartu. Yesuusi insa jawaachishinohu hiittoonniiti? Maganu Qaali togo yaanno: “Qullaawa Borro tiro huwattanno gede surrensa seekke faninsa.”—Luq. 24:45.
3. Fatana ikkannohu hiittoo coyi tuncu yaankera dandaanno? Soqqanshonkera gara ikkitino lao heedhannonke gede kaaꞌlannonkeri maati?
3 Tenne rosaano gede ninkeno lowo geeshsha dadillineemmo woti heeꞌrara dandaanno. Miteekkine Mootichu loosira diinaggaambeemmore ikkinummorono, loosinke gumi leella hooginonke daafira hexxo mudhinoommoha ikkara dandaanno. (1 Qor. 15:58) Woy xiinxallinseemmo manni ayyaanaamittetenni lophanni nookkiha lawankera dandaanno. Kaaꞌlinanni heeꞌnoommori mitootu isinni Yihowa facci assite agurtinoha ikkara dandaanno. Ikkina soqqanshonkera gara ikkitino lao heedhannonke gede kaaꞌlannonkeri maati? Kaaꞌlannonke coyi giddo mittu, Qullaawa Borro giddo Yesuusi coyiꞌrino lawishshuwa tiro seekke huwatate. Hanni kuri giddo sase lawishshanna insanni ronseemmo roso laꞌno.
WIXA WIXE KAE GOXANNO MANCHO
4. Yesuusi coyiꞌrinohu wixa wixe kae goxanno manchire kulanno lawishshi tiro maati?
4 Marqoosi 4:26-29 nabbawi.a Yesuusi wixa wixe kae goxanno manchi daafira coyiꞌrino lawishshi tiro maati? Konni lawishshira kulli manchi, Maganu Mangistere sabbakannoha mitto mittonka mancho riqiwanno. Wixu kayinni danchu wodani noonsa mannira sabbankannita Maganu Mangiste sokka riqiwanno. Heeshshonke giddo rosaminore ikkinonte gede, wixa wixi manchi “hashsha goxanno, barra kayinni kaꞌꞌanno.” Wixamino gumi muꞌre mindanni deerra mara geeshsha lophate yanna hasiissannosi. Hatte yanna giddo wixu “muꞌre lophanno.” Tini lopho leeltannohu “umisenni,” sunu sununniitinna dirimu dirimunniiti. Hatteente gede, mittu manchi ayyaanaamittetenni lophannohu sunu sununniitinna dirimu dirimunniiti. Kuni manchi lophe Maganoho soqqamate wossaꞌnanno deerra maranno wote, heeshshosi Yihowara sayise oye cuuame guma laalanno.
5. Yesuusi wixa wixe kae goxanno manchire kulanno lawishsha coyiꞌrinohu mayiraati?
5 Yesuusi konne lawishsha coyiꞌrinohu mayiraati? “Gara ikkitinoti wodanu dooꞌꞌo noonsa” manni giddo halaalu lophanno gede assannohu Yihowa ikkinota huwachishateeti. (Looso 13:48; 1 Qor. 3:7) Wixa wixanna waa hayikkisa dandiineemmoha ikkirono, lophosi kayinni illaallisa didandiineemmo. Lophanno gede giddeessine woy rahe lophanno gede assine dianfeemmo. Lawishshu aana kulli manchinte gede, ninkeno mittu manchi ayyaanaamittetenni lophanno gara dianfoommo. Heeshshonke giddo uminke dilgo assiꞌneemmo wote, tenne lopho wodancha hoongammora dandiineemmo. Maganu Mangiste wixi kayinni gale hosanni guma laalara dandaanno. Hakkiinnino kuni haaru rosaanchi umisi midote looso kaaꞌlannonkeha ikkanno.—Yoh. 4:36-38.
6. Ayyaanaamittete lopho lainohunni maa ammana hasiissannonke?
6 Konni lawishshinni maa ronseemmo? Umihunni, Qullaawu Maxaafi rosaanchinke lopho illaallisa dandiineemmokkita huwata hasiissannonke. Shooshaqoota ikkanke xiinxallinseemmo manchi cuuamanno gede xixxiiwate woy giddeessate kaꞌneemmokki gede kaaꞌlitannonke. Iso kaaꞌlatenna irkisate dandaaminkere baala assineemmoha ikkirono, heeshshosi Maganoho sayise aate wossaꞌna hasiissannosihu iso umosi ikkinota ammana hasiissannonke. Heeshshosi Maganoho sayise aa hasiissannosihu Yihowara noosi baxilli wodanasi kakkayiseennaati. Hakkuyi kaꞌa Yihowa dihagiidhanno.—Far. 51:12; 54:6; 110:3.
7, 8. (a) Wixa wixe kae goxanno manchire kulanno lawishshinni wolere maa ronseemmo? Lawishsha kuli. (b) Kuni lawishshi Yihowanna Yesuusi daafira maa rosiisannonke?
7 Layinkihunni, konni lawishshinni ronseemmo roso huwatanke rosiisate loosinke umonni guma laala hoogiro hexxo mudhineemmokki gede kaaꞌlitannonke. Cincaaleeyye ikka hasiissannonke. (Yaq. 5:7, 8) Rosaancho kaaꞌlate dandiinummore baala assinoommoha ikki geeshsha, wixu guma laala hoogiro nafa, ninke kaajja rosiisaano ikka hoongeennaati yine heda dihasiissannonke. Yihowa halaalu wixi lophanno gede assannohu, biddi yaate maahoyye yaannohu danchu wodani noonsa manni giddo callaati. (Mat. 13:23) Konni daafira soqqanshonke qinaabbinotanna teꞌee keenate, afiꞌnoommo guma calla laꞌꞌa dihasiissannonke. Yihowa soqqanshonke guma laaltino yaannohu rosiinseemmo manni tumo lae diꞌꞌikkino. Hatteentenni, isi kaffi asse laꞌꞌannohu diinaggaambe soqqamate sharrammeemmo sharrooti.—Luq. 10:17-19; Luqaasi 10:20 nabbawi;b 1 Qor. 3:8.
8 Sayikkihunni, halaalu mittu manchi wodana soorranni noo gara huwata hoongammora dandiineemmo. Lawishshaho, misiyoone ikke soqqamannohu mittu rodii xiinxallisanna keeshshino minaanninna minaama cuuaminokki halashshaano ikka hasiꞌrannota kulisi. Isi qole tennera ikkadda ikkate, sijaara aga agura hasiissannonsata kulinsa. Insa sijaara aga agurinku haammata agana ikkinota kultusita dhagge ikkisi. Insa sijaara aga agurtinohu mayiraati? Sijaara agganno wote Yihowa laꞌꞌannonsatanna isi qole doga giwannota huwattino. Hakko daafira, ‘Sijaara angeemmoro woy faajjete ango, woy horonta agurro’ yite lamente giddo mitte doodhate kaꞌu. Yihowara noonsa baxilli gara ikkinore wossaꞌnitanno gede kaaꞌlinonsa. Xiinxallisannonsa rodii huwatinokkiha ikkirono, insa ada ayyaanaamittetenni lophanni keeshshino.
MARAWE
9. Marawete daafira kulanno lawishshi tiro maati?
9 Maatewoosi 13:47-49a nabbawi.c (Mat. 13:50) Yesuusi marawete daafira coyiꞌrino lawishshi tiro maati? Yesuusi Maganu Mangiste sokka mannu baalunkura sabbaka, lowo marawe baaru giddora tugate gede ikkitinota coyiꞌrino. Togoo marawe lowota “duuchunku gari qulxuꞌme” amaddannonte gede, sabbakate loosinkeno lowo miliyoone ikkannoha duuchunku gari manna gamba assanno. (Isa. 60:5) Diru dirunku qoqqowu gambooshshenkenna Qaagooshshu Ayyaana daannohu lowo manni tennera lawishsha ikkanno. Kuri giddo mitu “dancha” qulxuꞌme gede ikkino daafira Kiristaanu songo ledo karsamanno. Wolootu kayinni “busha” qulxuꞌme gede ikkitara dandiitanno; gamba yiihu baalunku Yihowa soqqamaancho ikkanno yaa diꞌꞌikkino.
Maatewoosi 13:47-50 nabbawitto gedensaanni . . .
10. Yesuusi marawete daafira kulanno lawishsha coyiꞌrinohu mayiraati?
10 Yesuusi konne lawishsha coyiꞌrinohu mayiraati? Konni lawishshira kulliti qulxuꞌme babbada, bayiru qarri yannara heedhannota jeefote firde riqibbannota diꞌꞌikkitino. Hatteentenni, tenne busha alamete goofimarchu barruwara ikkannore kultannote. Yesuusi Maganu Mangiste sokka baxihu baalunku Yihowa soqqamaancho ikkanno yaa ikkinokkita xawisino. Batinyu manni gambooshshenke daanno. Mitootu qolte ledonke Qullaawa Maxaafa xiinxallate maahoyye yiturono, heeshshonsa Yihowara sayisse aa dihasidhanno. (1 Neg. 18:21) Wolootu isinni Kiristaanu songo ledo gamba yaa agurtino. Mitu wedellooti Kiristaana ikkino anninna ama lossitinore ikkiturono, Yihowa seera baxa dijammartino. Mittu mittunku manchi Yihowara soqqamate umisi wossaꞌna hasiissannosita Yesuusi xawise kulino. Tenne wossaꞌnitannore isi dagate giddonni ‘doorantinore’ woy muxxe ikkitino gede asse laꞌꞌannonsa.—Hag. 2:7.
11, 12. (a) Marawete daafira kulanno lawishshi kaaꞌlannonkehu hiittoonniiti? (b) Kuni lawishshi Yihowanna Yesuusi daafira maa rosiisannonke?
11 Marawete daafira kulanno lawishshi kaaꞌlannonkehu hiittoonniiti? Konni lawishshinni ronseemmo roso huwatanke, Qullaawu Maxaafi rosaanchinke woy oosonke halaale uminsaha assiꞌra hoogganno wote hexxo mudhineemmokki gede woy quwa saꞌne dadillineemmokki gede kaaꞌlitannonke. Iso qajeelsate dandiinummore baala assinoommoha ikkara dandaanno. Mittu manchi Qullaawa Maxaafa xiinxallate maahoyye yiino daafira woy halaalu giddo lophinohura calla Yihowa ledo muli jaalooma kalaqiꞌranno yaa diꞌꞌikkino. Yihowa silxaanera maahoyye yite galtannokkiri gumulote mannisiwiinni badantanno.
Halaale baxannohu mitu manni Yihowa soqqamaano ikkanno (Gufo 9-12 lai)
12 Hatto yaa kayinni halaale agurte fultinori songo higgara horonta difajjinanni yaateni? Woy mittu manchi heeshshosi Yihowara sayise aa hoogiro, hegerera “busha” qulxuꞌme gedeeti yaate? Deeꞌni. Bayiru qarri jammara geeshsha togoo mannira faro faꞌnante agartanno. Yihowa insa togo yaanni noohu gedeeti: “Anewa higge, anino kiꞌnewa higeemmona.” (Mil. 3:7) Yesuusi coyiꞌrinohu wolu lawishshi tenne assaawe lede buuxisannonke; hakkuno qaetenni baino beetti lawishshaati.—Luqaasi 15:11-14, 17, 20 nabbawi;d Luq. 15:15, 16, 18, 19, 21-32.
QAETENNI BAINO BEETTO
13. Qaetenni baino beettire kulanno lawishshi tiro maati?
13 Qaetenni baino beettire kulanno lawishshi tiro maati? Konni lawishshira kullihu shaqqadu anni, iimi Annanke Yihowa riqiwanno. Dirshasi adhe finci beetti songotenni fulte ballekkinore riqiwanno. Insa Yihowawiinni xeertidhinote Sheexaanu alamewa higgino daafira, “xeerto gobba” hadhinohu gedeeti. (Efe. 4:18; Qol. 1:21) Ikkollana, mitootu gedenaanni wodaninsa raga higeenna kabbaade doogo hadhe Yihowa dirijjitewa higganno. Maaro eꞌe higgannore kore shooshaqoota manna maarote Maganinke anga fane haarannonsa.—Isa. 44:22; 1 Phe. 2:25.
14. Yesuusi qaetenni baino beettire kulanno lawishsha coyiꞌrinohu mayiraati?
14 Yesuusi konne lawishsha coyiꞌrinohu mayiraati? Yesuusi, Yihowa songotenni fulte ballekkinori Isiwa higgara addinta hasiꞌrannota kaajja gede xawisino. Lawishshu aana kulli anni, beettisi higanno yee hexxa horonta diagurino. Beettisi higanna laiti, beettu ‘gana fafe heeꞌreenna’ shiqe haarate dodanni haꞌrino. Tini halaale agurte fultinori Yihowawa rakke higganno gede jawaachishshanno assaaweeti. Insa ayyaanaamittetenni wolqa hoogginoha ikkara, hattono wirri yite dagganno doogo saalfachishshansaranna kabbaade labbe leeltansara dandiitanno. Ikkirono, tennera sharrama digaabbissannote; korkaatuno insa higganno wote iimi nafa hagiidhanno.—Luq. 15:7.
15, 16. (a) Yesuusi qaetenni baino beetti daafira coyiꞌrino lawishshinni maa ronseemmo? Mito lawishsha kuli. (b) Kuni lawishshi Yihowanna Yesuusi daafira maa rosiisannonke?
15 Qaetenni baino beettire kulanno lawishshi kaaꞌlannonkehu hiittoonniiti? Yihowa lawishsha harunsa hasiissannonke. ‘Quwa saꞌne keeraano ikkine’ cubbo loossinori maaro eꞌe higganno wote gambo giwa horonta dihasiissannonke. Togo assa ninke umonke ayyaanaamittetenni ‘gawajja’ agurranna kaaꞌlitannori dino. (Mek. 7:16) Konni lawishshinni ronseemmohu wolu rosino no. Songo agure fulino mancho wirri yee higara dandaannoha “baino geꞌrecho” ikkino gede assine laꞌꞌa hasiissannonke. (Far. 119:176) Songotenni fule ballehino mancho anfummoro, galagale higanno gede baxillunni kaaꞌlineemmosi? Bohaminoha ikkirono, togoo mancho kaaꞌlitanno gede cimeeyyete ranke kulleemmo? Yesuusi coyiꞌrino lawishsha huwatanke konne assate kaaꞌlitannonke.
16 Yannankera ballekke kaꞌe higginori Yihowa maaroranna songote kaaꞌlora noonsa diniqo xawissino gara huwati. Mittu 25 diro bohame keeshshino rodii togo yiino: “Yihowawiinni ‘haarooꞌmate diri’ dayinoe daafira, songo higummonku jammare hagiirriꞌya lexxanni haꞌrino. (Looso 3:19) Mittu mittunku rodii irkisannohonna baxannoho! Xa kaajja ayyaanaamittete maate nooe.” Yihowawiinni xeertidhe onte diro keeshshitinoti mitte wedellitte rodoo songo higge togo yitino: “[Roduuwu] Yesuusi yii baxille leellishshueta macciishshaminoere kule diafeemma. Yihowa dirijjite gaamo ikka lowo geeshsha muxxete!”
17, 18. (a) Kageeshsha laꞌnummohu sasunku lawishshinni maa ronsoommo? (b) Maa assate murciꞌne kaꞌꞌa hasiissannonke?
17 Yesuusi coyiꞌrinohu konni sasunku lawishshinni maa ronsoommo? Umihunni, ayyaanaamittete lopho illaallinse anfeemmokkita ammana hasiissannonke. Konne assannohu Yihowaati. Layinkihunni, ledonke gamba yitannorinna xiinxallitannori baalunku Yihowa soqqamaano ikkitanno yaa diꞌꞌikkino. Jeefoteno, mitootu halaale agurte fultinohanna Yihowawiinni xeertidhinoha ikkirono, dihigganno yine hexxo mudhinoonke. Qoleno, higganno wote Yihowa lao ledo sumuu yaanno garinni anganke fanne haaꞌneemmonsa.
18 Ninke baalunku egenno, wodanchanna hayyo hasiꞌranke agurroonke. Yesuusi coyiꞌrino lawishsha nabbambeemmo wote, tirosi maatiro, Qullaawu Maxaafi giddo borreessaminohu mayiraatiro, ronsoommore loosu aana hosiisa dandiineemmohu hiittoonniitironna Yihowanna Yesuusi daafira maa rosiisannonkero hiincino. Konni garinni, Yesuusi coyiꞌrinore huwantanni heeꞌnoommota leellinsheemmo.
a Marqoosi 4:26-29: “Maganu Mangiste baattote aana wixa wixiꞌranno mancho labbanno. Kuni manchi hashsha goxanno, barra kayinni kaꞌꞌanno; wixino wixi hiitto ikkiro afikkinni muꞌre lophanno. Baatto umisenni sunu sununni guma laaltanno; umo muꞌra, tenne agashsho, hakkiinni agashshote aana iillino guma uyitanno. Gumu iillanni heeꞌreenna kayinni, midote yanna ikkitino daafira manchu haanto haare midanno.”
b Luqaasi 10:20: “Ayyaanna maahoyye yite hajajantinoꞌne daafira hagiidhitinoonte; hatteentenni, suꞌmiꞌne iima borreessamino daafira hagiidhe.”
c Maatewoosi 13:47-49a: “Qoleno iimi Mangiste baaru giddora tungeenna duuchunku gari qulxuꞌme amaddanno marawe gedeeti. Marawe woꞌmituta, goshooshshe qaccera fushshitu; hakkiinnino ofolte, dancha dancha gamba assite uduunneho wortu; busha kayinni huntu. Alamete goofimarchi yannarano hatto ikkanno.”
d Luqaasi 15:11-14, 17, 20: “Mittu manchira lame ooso noosi. Maaꞌniidihu annasi, ‘Anna, jajjikki giddo anera iillannoeha uue’ yii. Konnira annu noosi miinja beehinsa. Shiimu barri gedensaanni, maaꞌniidi beetti noosire baala gamba assiꞌre xeerto gobba haꞌri; hakkiichono maafude baꞌino heeshsho heeꞌranni woxesi fince gudi. Noosire baalanka guxxi yannara, hatte gobbara buutote hude eꞌu; isino qarrami. Wodanisi raga higita togo yii: ‘Anniꞌyara qaxarame loosannohu meu manni sagale duuwe itanni heeꞌreenna, ani kowiicho hudetenni reyemmo!’ Hakkiinni kae annisiwa haꞌri. Isi gana fafe heeꞌreenna, annisi iso lae lowo geeshsha mararisi; hakkiinni dodanni mare hanqafe sunqisi.”