AANIIDI QOOLIHA COYI UMO | QULLAAWA MAXAAFA XIINXALLA HASIꞌRATTO?

Duuchunkura Qixxaabbinota Qullaawu Maxaafi Xiinxallo Pirogiraame

Yihowa Farciꞌraasine mannu noowa fulte sabbakate egennantinoreeti. Ikkina alamete deerrinni manna Qullaawa Maxaafa xiinxallinseemmota afootto?

Manchu loosanno bayicho Qullaawa Maxaafa xiinxallanni no

Niro 2014nni, 240 gobbara heedhannori 8,000,000 saꞌannori Yihowa Farciꞌraasine aganu aganunku 9,500,000 manna Qullaawa Maxaafa xiinxallissino.a Ee, ninke ledo Qullaawa Maxaafa xiinxallanni noo manni kiiro 140 gobbata dagate kiiro roortanno!

Yihowa Farciꞌraasine konni loosira diru dirunku mittenna darate biliyoone Qullaawa Maxaaffa, maxaaffa, metseettanna wole xiinxallote kaaꞌlitanno borro 700 meddi yaanno afiinni qixxeessitanno! Taalle nookkihu kuni attamate loosi, mannu Qullaawa Maxaafa doodhi afiinni xiinxallanno gede assino.

“Rosu mine noommo waro xiinxalla dibaxisannoe; Qullaawa Maxaafa xiinxalla kayinni hagiirsiissinoe. Qoleno rosoommo coyi lowo geeshsha sheshifachishinoe!”—Katileego, Wodiidi Afirika.

“Xiinxallo baalante xaꞌmoꞌyara dawaro afiꞌreemma gede kaaꞌlitinoe; hakkiinni saeno duuchare rosoomma.” —Berta, Meksiko.

“Qullaawa Maxaafa xiinxallissinoehu anera injiitannoe yannaraatinna mineꞌyaati. Kawiinni sae ma hasiꞌreemmo!” —Ezikeeli, Biraazile.

“Xiinxallote yanna mito wote 15nni 30 daqiiqi geeshsha ikkitara woy anera injaannoe garinni hakkiinni saꞌara dandiitanno.”—Viniyana, Awustiraaliya.

“Xiinxallote woxe dikaffallanni; qoleno xiinxallo hagiirsiissannote!”—Eemi, Beniini.

“Qullaawu Maxaafi rosiisaanchoꞌya cincatenna shaqqadote. Lamenti lubbora jaalooꞌminoommo.”—Kaareni, Aliyye Ayerilaande.

“Batinyu manni [Yihowa] Farciꞌraasine ikka hoogirono insa ledo Qullaawa Maxaafa xiinxallanno.” —Denteni, Ingilaande.

QULLAAWU MAXAAFI XIINXALLO PIROGIRAAMENKE DAAFIRA DUUCHU MANNI XAꞌMANNO XAꞌMONNA DAWARO

Xiinxallissinannihu ma garinniiti?

Addi addiha Qullaawu Maxaafiha coyi umo kayinse hatte hajo ledo xaado afidhinota Qullaawu Maxaafi xiqisubba xiinxallineemmo. Lawishshaho, Qullaawu Maxaafi aante noo xaꞌmuwara dawaro qolanno: Maganu ayeti? Maganu isi hiittooho? Isira suꞌmu noosi? Isi heeꞌrannohu hiikkooti? Ninke isiwa shiqa dandiineemmo? Tenne xaꞌmuwa dawaro Qullaawu Maxaafi giddo hiikko nooro afa shota diꞌꞌikkitino.

Mannu togoo xaꞌmuwara dawaro afiꞌranno gede kaaꞌlate, roore wote Qullaawu Maxaafi Addinta Mayyee Rosiisanno? yaanno maxaafa horoonsiꞌneemmo.b Kuni maxaafi qixxaawinohu mannu xinta ikkinoha Qullaawu Maxaafi roso huwatanno gede kaaꞌlateeti. Kuni maxaafi Maganu daafira, Yesuusi Kiristoosi daafira, mannu ooso qarri daafira, kaotenna huuccattote daafira hattono wole togoo hajore kulanno.

Xiinxallissinannihu mamooteetinna hiikkooti?

Xiinxallinseemmohu atera injiitannohe yannaranna baseraati.

Mageeshshi saate xiinxallinanni?

Batinyu manni Qullaawa Maxaafa xiinxallate lamalate kiiro mitte saate geeshsha gaaꞌmanno. Kayinni mannu mannu garinni yanna hakkiinni ajjara woy roortara dandiitanno. Xiinxallote saate ate pirogiraame garinni biddi assa dandiineemmo. Mitu manni lamalate kiiro 10 woy 15 daqiiqa xiinxallanno.

Xiinxallote mageeshshi woxe kaffallanni?

Xiinxalloteno borroteno woxe dikaffalatto. Tini hedo Yesuusi rosaanosira uyino biddishshi ledo sumuu yitannote: “Mulla adhitinoonninte gede, mulla uuyye.”—Maatewoosi 10:8.

Xiinxallo mageeshshi yanna giddo gooffanno?

Xiinxallo gooffanno yanna mannu mannu garinni babbaxxitanno. Qullaawu Maxaafi Addinta Mayyee Rosiisanno? yaanno maxaafi 19 fooliishsho afiꞌrino. Hasiꞌrittota woy baalanta fooliishsho ate ranke garinni xiinxallite guda dandaatto.

Xiinxallummoro Yihowa Farciꞌraasincho ikka hasiissannoe?

Deeꞌni. Mittu mittunku manchira ammananno coye doodhate qoosso noosita anfoommo daafira tenne qoossosi ayirrinseemmo. Ikkirono, xinta ikkitinota Qullaawu Maxaafi egenno afiꞌrino manchi, woyyannosire egennotenni doodha dandaanno.

Lede afa hasiꞌrummoro maa assa dandeemmo?

jw.org yinanni webisayite Yihowa Farciꞌraasine ammananna loosi daafira gara ikkitino mashalaqqe kultannohe.

Qullaawa Maxaafa xiinxalla hasiꞌrummoro ma asseemmo?

Mannu Qullaawa Maxaafa xiinxallinsansara interneetete widoonni, sokka borreesse, hattono gobbansara noota silkete kiiro horoonsiˈre xaˈmiˈranni no

Interneetete www.jw.org/sid aana noo forme wonshite soyi.
Tenne metseetera qoola lameho noo teesso giddo injaannohewa sokka soyi.
Qooxeessikkira noore Yihowa Farciꞌraasine shiqqe coyishiishi.

a Manna Qullaawa Maxaafa xiinxallinseemmohu, addi addinni woy shiima gaamora beenkeeti.

b Yihowa Farciꞌraasine qixxeessitinoho. Konne maxaafa 260 saꞌꞌanno afiinni 230 miliyoone saꞌanno koppe attammoonni.

MAATE AFIDHANNO KAAꞌLO

“Minaamaꞌya Qullaawa Maxaafa xiinxalla jammartuti, lowore woyyaabbinota huwatummo. Maatenke heeshshono woyyaabbu. Minaamaꞌya rossanni noo coyi maatiro afa hasiꞌroommo daafira anino xiinxalla jammarummo. Rosoommo coyi dancha mancho ikkeemmo gede kaaꞌlinoe. Qullaawa Maxaafa xiinxallanke maatenke mittimma noota ikkitanno gede assitino.”—Ezikeeli.

“Qullaawa Maxaafa xiinxalla jammarumma gedensaanni, jingilli assitanno xagga adhanna ago quwa sae aga agurumma; qoleno hanqoꞌya qeeꞌla rosumma. Miniꞌya xa ishinu nookkihonna kawareetaamoho. Xa maateꞌya albinni roore baxeemma; qoleno insa hagiirsiisannore assa baxissannoe. Xa lowo geeshsha hagiirraame ikkoomma.”—Kareni.

“Qullaawa Maxaafa xiinxalla jammarummata, mitu manni mishinoe. Minaanniꞌya kayinni ane ledo sumuu yee togo yii: ‘Mannu baxireno yiiro qarru dino. Anera waannu coyi ati soorrante dancha ikkitanna laꞌꞌate. Hakko daafira xiinxallokki agurtooti.’ Maatenke heeshsho togo ikkite seekke diegentino!”—Viniyana.