Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine Qullaawa Maxaafa dancha gede assite rosiissanno qixxaawo noonsa. Tini Qullaawu Maxaafi xiinxallo pirogiraame:
Hagiirru noo heeshsho heeꞌratto gede
Maganu jaala ikkatto gedenna
Qullaawu Maxaafi albillittete yanna daafira kulanno hexxo afatto gede kaaꞌlitannohe
Konni qoolira:
Xiinxallate sumuu yaammora albaanni balaxe woꞌnaale laꞌꞌa dandeemmo?
Xiinxallate sumuu yuummoro, Yihowa Farciꞌraasincho ikkeemmo gede xixxiimbannie?
Qullaawa Maxaafa umiꞌya xiinxalleemmo gede kaaꞌlitanno qixxaawo nooꞌne?
Qullaawa Maxaafa xiinxallinseemmohu ma garinniiti?
Mitto xiinxallisannohe mancho worreenna, isi Qullaawa Maxaafa gafu gafunni rosiisannohe. Qullaawa Maxaafa kaajja gede xiinxallate kaaꞌlitannota Hegerera Hagiidhitanni Heeꞌra Dandaatto! yitanno borro horoonsidhe, Qullaawu Maxaafi mayyaannoronna atera kaaꞌlannohehu hiittoonniitiro aante aantete rosatto. Ledde afate, tenne viidiyo lai.
Xiinxallote woxe baaxxa hasiissannoe?
Dihasiissannohe. Yihowa Farciꞌraasine Yesuusi rosaanosira “Calla adhitinoonnire calla uuyye” yee uyino biddishsha ayirrissanno. (Maatewoosi 10:8) Qoleno, xiinxallote borrora lawishshaho Qullaawu Maxaafiranna Hegerera Hagiidhitanni Heeꞌra Dandaatto! yinanni borronkera woxe diadhineemmo.
Xiinxallo mageeshshi yanna keeshshitannote?
Woꞌma korse 60 roso (fooliishsho) amaddinote. Rosu keeshshanno yanna mannu mannu ranke garinni babbaxxitanno; ikkirono batinye rosaano lamalate giddo mitto woy hakkii saino roso xiinxallitanno.
Xiinxallo hanafeemmohu hiittoonniiti?
1. Interneetete aana noo forme wonshi. Tenne forme wonshatto woyite borreessatto mashalaqqe horoonsiꞌneemmohu, kuꞌlootto garinni mittu Yihowa Farciꞌraasinchi hasaawisannohe gede assate callaati.
2. Mittu rosiisaanchi hasaawisannohe. Rosiisaanchikki Qullaawu Maxaafi xiinxallo yannara maa assinanniro kulannohe, hattono xaꞌmo heedhuhero qolannohe.
3. Atinna rosiisaanchikki xiinxallote dinye amaddinanni. Rosiisaanchikki ledo mittowa xaaddine, silketenni, viidiyotenni, woy borrote sokkanni xiinxalla dandiitinanni. Mitte hinge mitte saate geeshsha xiinxalla dandiinanni; kayi noohe yanna garinni hakkuyi woro woy hakkuyi ale xiinxalla dandiitinanni.
Xiinxallate sumuu yaammora albaanni balaxe woꞌnaale laꞌꞌa dandeemmo?
Ee dandaatto. Balaxxe interneetete aana noo forme wonshi. Rosiisannohe manchi teessokkinni xaade hasaawisannohe woyite, balaxxe woꞌnaalte laꞌꞌa hasiꞌrattota kulisi. Hakkiinni, sase fooliishsho calla amaddinote Hegerera Hagiidhitanni Heeꞌra Dandaatto! yitanno birosherenni xiinxallo hanaffinanni; hakko garinni tenne korse baxattoronna teꞌee afa dandaatto.
Xiinxallate sumuu yuummoro, Yihowa Farciꞌraasincho ikkeemmo gede xixxiimbannie?
Dixixxiimbannihe. Yihowa Farciꞌraasine mannaho Qullaawa Maxaafa rosiisa baxxanno; ikkirono, mitto manchono ammaꞌnonke widira higi yite dixixxiibbanno. Hatteentenni, mittu mittunku manchi mayyee ammanannoro doodhate qoosso noosita anfoommo daafira, Qullaawu Maxaafi yaannore calla ayirrinyunni rosiinseemmo.—1 Pheexiroosi 3:15.
Qullaawa Maxaafa umiꞌyaha horoonsiꞌra dandeemmo?
Ee, Qullaawa Maxaafa baxoottoha horoonsiꞌra dandaatto. Ninke taalo sokka amaddinotanna huwatate qarrissannokkita Haaro Alame Tiro yinannita Qullaawu Maxaafi tiro horoonsiꞌra banxeemmoha ikkirono, duuchu manni kayi egenninota Qullaawu Maxaafi tiro horoonsiꞌra doodhannota anfoommo.
Wolu mannino ledoꞌya xiinxallanno gede koyisa dandeemmo?
Ee dandaatto. Maatekki gudisse woy jaallakki koyisa dandaatto.
Qullaawa Maxaafa Yihowa Farciꞌraasine ledo alba xiinxalle egennoommoha ikkirona? Xiinxallo wirro hanafa dandeemmo?
Ee. Isinni xaa korsenke albitenni roore baxattota dihuluullammeemmo; mayira yiniro, xaati yannankera mannaho hasiisannore hende qixxeessinoonnite. Qoleno albitenni roore lowo viidiyo nootenna ateno beeqqaasincho assitannote.
Qullaawa Maxaafa umiꞌya xiinxalleemmo gede kaaꞌlitanno qixxaawo nooꞌne?
Ee. Hige rooriidi rosaano roore horo afidhannohu rosiisaanchu ledo xiinxalliturooti; ikkirono mitootu umi qara uminsanni xiinxalla doodhitanno. Qullaawa Maxaafa Xiinxallate Kaaꞌlanno Uduunne yaanno qoolira, woxe baaxxittokkinni horoonsiꞌra dandaattoha Qullaawu Maxaafi xiinxallora kaaꞌlannoha addi addi uduunne kulloonni. Lawishshaho, konni woroonni kulloonni uduunni kaaꞌlahera dandaanno:
Qullaawu Maxaafi Viidiyubba. Tini harammadda viidiyubba qara qara ikkinoha Qullaawu Maxaafi roso xawissanno.
Qullaawu Maxaafi Xaꞌmonna Dawaro. Tini birxichuwa addi addite Qullaawu Maxaafi xaꞌmuwara dawaro qoltanno.