Cimeeyye Roduuwa Ikkadda Ikkitanno Gede Qajeelsitanno Gara
“Ani coyiꞌranna macciishshoottore . . . ammanantino mannootira hadara wori.”—2 XIM. 2:2.
1. (a) Maganu soqqamaano hundinni jammarte qajeelshu daafira maa huwattino? Tini yannanke ledo mayi xaado afidhino? (b) Konni birxichira maa ronseemmo?
MAGANU soqqamaano hundinni jammarte, qajeelshu hendoonnire qineessate kaaꞌlannota huwattino. Lawishshaho, Abirahaami Looxi gatisate “qajeeltino mannootasi haare haꞌrino”; kuri mannooti uyinoonninsa looso qineessitino. (Kal. 14:14-16) Nugusu Daawiti waro, Maganu mine faarsitanno faarsaano “Yihowara faarsate qajeeltinoreeti”; konnira insa Magano guwisa dandiitino. (1 Zee. 25:7) Ninkeno yannankera Sheexaanunna harunsaanosi ledo ayyaanaamittete ola olammanni heeꞌnoommo. (Efe. 6:11-13) Qoleno, Yihowara guweenya aate sharrammanni heeꞌnoommo. (Ibi. 13:15, 16) Konni daafira, hundiri Maganu soqqamaanonte gede ninkerano hedonke qinaabbanno gede qajeelshu hasiisannonke. Yihowa songote giddo, cimeeyyete roduuwa qajeelsitanno gede halaafinate uyinonsa. (2 Xim. 2:2) Temokkiro noonsa cimeeyye roduuwa hoshsha towaatate ikkadda ikkitanno gede qajeelsitanni noohu hiittee doogganniiti?
ROSAANCHO AYYAANAAMITTETENNI JAWAACHISHI
2. Mittu cimeessi mittu rosaanchira qajeelsha aate kaꞌꞌara albaanni, maa assa hasiissannosiha ikkara dandaanno? Mayira?
2 Mitto cimeessa, gawartichu ledo heewisiisa dandiinanni. Mittu gawartichi wixa wixara albaanni, baatto roore guma uyitanno gede haꞌrishsha tugara dandaanno. Hatteente gede, gari temokkiro nookkihura mittu rodiira qajeelsha aate kaꞌꞌakkira albaanni, rosaanchu wodani qajeelsha adhate roore qixxaawanno gede mite Qullaawu Maxaafi assaawe kula hasiissahera dandiitanno.—1 Xim. 4:6.
3. (a) Yesuusi Marqoosi 12:29, 30 aana coyiꞌrinore rosaanchu ledo hasaawate horoonsiꞌra dandiinannihu hiittoonniiti? (b) Cimeessu rosaanchu daafira assanno huuccatto rosaancho kaaꞌlitannohu ma garinniiti?
3 Rosaanchu macciishshino halaali hedosinna assootesi mageeshshi geeshsha soorre woyyeessinoro afate, togo yite xaꞌma dandaatto: ‘Ateneeto Yihowara sayisse aakki heeshshokki soorritinohu ma garinniiti?’ Tini xaꞌmo, Yihowara woꞌma lubbonni soqqamate yaa mayyaatero hasaabbinanni gede faro fantara dandiitanno. (Marqoosi 12:29, 30 nabbawi.a) Konni hasaawiꞌne gedensaanni, Yihowa rosaanchoho qajeelsha gumulate kaaꞌlannosiha qullaawa ayyaana aannosi gede huuccatto assattora dandaatto. Roduu isira yite assatto huuccatto macciishshasi lowo geeshsha jawaachishshannosi!
4. (a) Rosaanchu ayyaanaamittetenni lophanno gede kaaꞌlitara dandiitannota mite Qullaawu Maxaafi xagge kuli. (b) Cimeeyye roduuwa qajeelsitanno wote, mixonsa maati?
4 Qajeelsha aa hanafatto wote umi qara, rosaanchu maahoyye yaa, ammanamanna shooshaqa ikka hasiissinota ikkitinota huwatanno gede kaaꞌlitannosita mite Qullaawu Maxaafi xagge kulattosira dandaatto. (1 Neg. 19:19-21; Neh. 7:2; 13:13; Looso 18:24-26) Baattote haꞌrishsha hasiissannonte gede, tini akattano rosaanchoho hasiissannote. Ayyaanaamittetenni rahe lophanno gede kaaꞌlitannosi. Faransayete heeꞌrannohu Zhani-Kilodi yinanni cimeessi togo yiino: “Qajeelsha eemmo wote qara mixoꞌya, rosaanchu ayyaanaamittete hedo noosiha ikkanno gede kaaꞌlate. Rosaanchu Maganu Qaali giddo noota ‘dhaggete coyibba’ laꞌꞌate ‘illesi faꞌnitanno’ gede kaaꞌlitanno xiqise mitteenni nabbambeemmo faro hasiꞌreemmo.” (Far. 119:18) Rosaancho ayyaanaamittetenni jawaachisha dandiinanniti wole doogga hiikkuriiti?
MIXO FUSHSHIDHANNO GEDE KAAꞌLENSA, KORKAATANO KULLENSA
5. (a) Mittu rosaanchi ledo ayyaanaamittete mixo daafira hasaawa mageeshshi geeshsha hasiissinote? (b) Cimeeyye shiimaadda ooso qajeelsa hasiissannonsahu mayiraati? (Lekkaalliidi qaagiishsha lai.)
5 Rosaancho, ‘Ayyaanaamitte mixokki maati?’ yite xaꞌmisi. Mixo noosikkiha ikkiro, wonshiꞌrara dandaanno mixo fushshiꞌranno gede kaaꞌlisi. Alba ati umikki fushshiꞌrootto mixo kulattosira dandaatto; qolteno hatti mixokki woꞌmiteenna mageeshshi geeshsha hagiidhoottoro iibbado simmeetenni kulisi. Tini doogo shota labbara dandiitanno; kayinni dancha guma abbitannote. Afirikaho heeꞌrannohu Vikitoori yinanni cimeessinna suwisaanchi umisi xagge togo yee coyiꞌrino: “Wedellichu noommo waro, mittu cimeessi mixoꞌya daafira dancha gede doorantino xaꞌmuwa xaꞌminoe. Hatti xaꞌmuwa soqqanshoꞌya daafira seekke heda jammareemmo gede assitinoe.” Temokkiro noonsa cimeeyye, labballo roduuwa dirinsa garinni songote giddo mito looso uyine shiimaaddu heedheenna qajeelsa jammara hasiissannotano xawissino. Konni garinni anjenni qajeelsa, wedellootu hedonsa bebbeehantanno gede assannori batiꞌrannote qeedhimmate yannarano ikkiro ayyaanaamittete mixo harunsitanno gede kaaꞌlitannonsa.b—Faarso 71:5, 17 nabbawi.c
Rodooho oottosi loosi loosama hasiissinosihu mayiraatiro kulisi, qoleno hakkoye looso loosate assinorira galatisi (Gufo 5-8 lai)
6. Yesuusi woloota qajeelsate horoonsiꞌrinoti kaajja doogo hiitteeti?
6 Mittu rosaanchi songote giddo soqqamate kaꞌꞌanno gede assate, loosannore calla ikkikkinni hakku loosi mayira hasiisinorono kulisi. Loosu loosamanno korkaata kulte Bayiru Rosiisaanchiha Yesuusi lawishsha harunsa dandaatto. Lawishshaho, Yesuusi hawaariyaatesi manna rosaano assitanno gede hajajara albaanni, hattee hajajo wonsha hasiissannonsahu mayiraatiro kulinonsa. Togo yiinonsa: “Silxaane baalanta iimanna uulla uyinoonnie.” Hakkiinni aanche togo yiino: “Konni daafira, hadhine duuchante daga manna . . . rosaano asse.” (Maatewoosi 28:18, 19) Roduuwa qajeelsate Yesuusi lawishsha harunsa dandaattohu hiittoonniiti?
7, 8. (a) Cimeeyye roduuwa qajeelsate Yesuusi lawishsha harunsa dandiitannohu hiittoonniiti? (b) Rosaancho galata mageeshshi geeshsha hasiissinote? (c) Cimeeyye roduuwa qajeelsitanno gede kaaꞌlitanno assaawe hiitteeti? (“Woloota Qajeelsa Dandiinanni Gara” yitanno saaxine lai.)
7 Rosaanchoho ootto loosira xinta ikkitannota Qullaawa Borro assaawe kulisi. Hatto assakki rosaanchu Qullaawu Maxaafihu xintu seeri garinni assaawanno gede rosiissannosi. Lawishshaho, mittu rodiira Mangistete Addaraashe nafara feyannonna kaxxine saꞌꞌate injaanno gede assara kuloottosi yine hendo. Tito 2:10 horoonsidhe, Addaraashe feyasinna eꞌnanniwa seekkasi “Gatisaanchonke ikkino Magani roso gaamaarsate” kaaꞌlitanno gara kulisi. Qoleno, songote giddo noo geerri daafira assaawanno gedenna loosisi insa kaaꞌlanno gara hedanno gede kulisi. Togoo hasaawi rosaanchu hajajo calla heda agure roorenka mannu daafira assaawanno gede qajeelsannosi. Isi loosino loosi songote giddo noo roduuwa kaaꞌlanni noo gara laꞌꞌasi hagiidhanno gede assitannosi.
8 Hakkiinni saeno, rosaanchu yoottosire assate sharramanno sharrora galatano deꞌooti. Tini mageeshshi geeshsha hasiissinote? Wayi muꞌro seekke lophitanno gede assannonte gede, galatuno rosaanchu ayyaanaamittetenni roore lophanno gede kaaꞌlanno.—Maatewoosi 3:17 ledo heewisiisi.
QARRA IKKANNOHA WOLE COYE
9. (a) Qajeelsha lainohunni dureette gobbuwara heedhannote mite cimeeyyera qarra ikkannori maati? (b) Mitu wedellooti heeshshonsa giddo Maganu looso balaxisiisse egentinokkihu mayiraati?
9 Dureette gobbuwara heedhanno cimeeyyera qarra ikkara dandaannohu wolu coyi, wedella roduuwa songote looso loosate hasatto heedhannonsa gede kakkayisate. Mitu wedellu roduuwi songote halaafinate duqqa xooqqannohu mayiraatiro 20 meddi yitannote Galchimi ragi gobbuwara heedhannore temokkiro afidhino cimeeyye xaꞌminoommo. Insa qoltino dawaro giddo qara tenneeti: Mito wedelloota ayyaanaamittete mixo harunsitanno gede anninsanna amansa anje dijawaachishinonsa. Togoo mixo harunsate widira dooꞌinore mito wedelloota isinni annuwansanna amuuwinsa maalaamittete coyibba harunsitanno gede amaaltinonsa! Konni daafira kuri wedellooti heeshshonsa giddo Maganu looso balaxisiisse diegentino.—Mat. 10:24.
10, 11. (a) Cimeeyye songote giddo soqqamate hasatto noonsakkire labbanno roduuwa dirimu dirimunni kaaꞌla dandiitannohu hiittoonniiti? (b) Mittu cimeessi togoo rodii ledo hasaawate hiittee xiqisubba horoonsiꞌra dandaanno? Mayira? (Lekkaalliidi qaagiishsha lai.)
10 Mittu rodii songote giddo soqqamate hasatto noosikkiha lawannoha ikkiro, hedanno gara soorrine biddi assate lowo sharronna cinca hasiissannoha ikkirono, kuni dandaamannoreeti. Mittu gawartichi mite haqqe subbe lophitanno gede damatte sunu sununni suwisannonte gede, atino mito roduuwa songote giddo soqqamate noonsa lao biddi assidhanno gede sunu sununni kaaꞌla dandaatto. Hiittoonni?
11 Togoo rodii ledo jaalooma kalaqiꞌrate yanna gaaꞌmi. Isi songote hasiisannoha ikkinota huwatanno gede kaaꞌlisi. Hakkiinni, yanna saꞌanni hadhanno wote ledosi ofolte mite Qullaawu Maxaafi xiqisubba horoonsidhe Yihowara isonooto sayise uyi wote eino qaale hedanno gede kaaꞌlisi. (Mek. 5:4; Isa. 6:8; Mat. 6:24, 33; Luq. 9:57-62; 1 Qor. 15:58; 2 Qor. 5:15; 13:5) Togo yite xaꞌmattosira dandaatto: ‘Ateneeto Yihowara sayisse uyitto wote mayite qaale eootto?’ Wodanasi kakkayisate togo yite ledde xaꞌmisi: ‘Cuuamitto wote Yihowara mayi macciishshaminosiha lawannohe?’ (Law. 27:11) ‘Sheexaanehona?’ (1 Phe. 5:8) Dancha gede doorantino xiqisubba nabbawa mittu rodii wodana lowo geeshsha kakkayissara dandiitannota deꞌooti.d—Ibiraawuyaani 4:12 nabbawi.e
ROSAANO, AMMANANTINOONNIRE IKKAꞌNE LEELLISHSHE
12, 13. (a) Elsai rosaancho ikke noo wote hiittoo akata leellishino? (b) Elsai ammanaminoha ikkinotera Yihowa kiisinosihu hiittoonniiti?
12 Wedella roduuwa, kiꞌne kaaꞌlo songote hasiissanno! Ikkina, soqqanshoꞌne qinaabbinota ikkitanno gede kaaꞌlannoꞌne akati hiikkoyeti? Tenne xaꞌmora dawaro qolate, hanni hunda qajeelsha adhinohu mittu manchi heeshsho giddo ikkinore laꞌno.
13 Mitu 3,000 diri albaanni, masaalaanchu Eeliyaasi aja beetto Elsai soqqamaanchosi ikkara koyisino. Elsai konne koyishsha bayichonko adhe konni jawu manchira mannu mishanno looso ammaname loosino. (2 Neg. 3:11) Hakkiinni Elsai mitu lewu diri geeshsha qajeelsha adhi gedensaanni, Eeliyaasi Isiraeelete gobbara loosanno loosi gumulamara kainota huwati. Hatte yannara Eeliyaasi dancha gede qajeelinohu Elsai iso harunsa aguranno gede kulisi; Elsai kayinni sase hige togo yee qolino: “Atewiinni dibaxxeemmo.” Isi dandaami geeshsha rosiisaanchisi ledo keeshshate murciꞌrino. Yihowano Elsai ammanaminoha ikkino daafira, Eeliyaasi maalaletenni wolewa haꞌranna laꞌꞌanno gede asse kiisinosi.—2 Neg. 2:1-12.
14. (a) Yannankera noo rosaano Elsai lawishsha harunsa dandiitannohu hiittoonniiti? (b) Mittu rosaanchi ammanaminoha ikkasi hasiissinota ikkitinohu mayiraati?
14 Kiꞌne Elsai lawishsha harunsa dandiitinannihu hiittoonniiti? Mannu mishannohano ikkiro uyinanniꞌne looso baalanka xiixantinikki loosse. Rosiisaanchoꞌne jaaliꞌne gede assitine laꞌe; hattono, kiꞌne qajeelsate yee assannore mageeshshi geeshsha naaddinanniro afanno gede asse. Togoo tumo qolaꞌne, “Atewiinni dibaxxeemmo” yitinoonnisihu gedeeti. Roorenkanni kayinni, uyinanniꞌne looso ammanantine loosse. Tini hasiissannota ikkitinohu mayiraati? Yihowa songote giddo kiꞌnera lexxino halaafinate aaꞌnera hasiꞌrinota cimeeyye buuxa dandiitannohu ammanantinoonnire ikkitinoonnita leellishshinihu gedensaanniiti.—Far. 101:6; 2 Ximootewosi 2:2 nabbawi.f
ROSIISAANOꞌNE AYIRRISSE
15, 16. (a) Elsai rosiisaanchosi ayirrisannota leellishinohu hiitte doogganniiti? (Umi misile lai.) (b) Wole masaalaano Elsai addaxxitanno gede assinori maati?
15 Eeliyaasi soqqamaanchi Elsai daafira kultanno xagge, labballu roduuwi temokkiro noonsa cimeeyye ayirrissannota leellishshanno garano xawissanno. Eeliyaasinna Elsai Iyyaarkote noo masaalaano marte towaattu gedensaanni, lamunku Yordaanoosi Laga martino. Hakkiicho, “Eeliyaasi uddiꞌrino kaabba fushshe ere waa gani; hakkiinni wayi lamewa badami.” Lamunku moolino laga tayisse saꞌu gedensaanni, “doogo hasaabbanni hadhu.” Hatte yannara, Elsai duuchankare afoommo yee dihedino. Rosiisaanchisi Eeliyaasiwiinni baxxi yanna geeshsha, isi coyiꞌrannoha mitto mittonka qaale hixamanye macciishshino. Hakkiinni, Eeliyaasi hambabalattetenni iimira haꞌrino. Elsai agure Yordaanosi Lagiwa hige Eeliyaasi uddanonni waa gane, “Eeliyaasi Magani Yihowa hiikko no?” yii. Xaano wayi lamewa badami.—2 Neg. 2:8-14.
16 Elsai loosinoti umi maalale Eeliyaasi jeefote loosi maalale gedeeta ikkitinota huwattinoonni? Tini maa rosiissannonke? Elsai xaate silxaane noosihu iso ikkino daafira, bayichonko assannore wole doogonni assa hasiissannosita dihedino. Hatteentenni, isi Eeliyaasi soqqanshosi soqqamino gara harunse rosiisaanchosi ayirrisannota leellishino; tini qolte wole masaalaano addaxxitannosi gede assitino. (2 Neg. 2:15) Gedensaanni kayinni, Elsai 60 diro masaalaancho ikke soqqami yannara Eeliyaasi loosino maalalenni roortinota batinye maalale loosanno gede Yihowa kaaꞌlinosi. Kiꞌne rosaano tenne xaggenni maa rossinanni?
17. (a) Yannankera noo rosaano Elsai lawishsha harunsa dandiitannohu hiittoonniiti? (b) Yanna saꞌanni hadhanno wote, Yihowa ammanantino rosaano ma garinni horoonsiꞌrara dandaanno?
17 Songote giddo halaafinate uyinanniꞌne wote, hakkoye looso loonsanni gara bayichonko soorritine albiwiinni horo baxxino garinni loosa hasiissannoꞌnehu gede assitine heddinoonte. Loonsanni gara soorra hasiissannoronna teꞌee wossanate kiꞌne hasatto ikkikkinni, songote hasiisannorenna Yihowa dirijjite uyitannonke biddishsha heda hasiissanno. Elsai Eeliyaasi horoonsiꞌrino doogo soorrikki horoonsiꞌre wole masaalaano addaxxitannosi gede assino, hattono rosiisaanchosi ayirrisannota leellishino. Hatteente gede, kiꞌneno temokkiro noonsa cimeeyye horoonsidhanni keeshshitinota Qullaawu Maxaafi aana xintantino doogga horoonsidhine insa ayirrissinannita leellishanna ammanate roduuwiꞌne addaxxitannoꞌne gede assa dandiitinanni. (1 Qorontoosi 4:17 nabbawi.g) Ikkollana, temokkiro afidhinanni hadhinanni wote, songo albaagge hadhanni noote Yihowa dirijjite ledo taalo qaaffanno gede hasiissanno taashsho taashshitinanniti dihuluullissannote. Isinni Yihowa Elsai kaaꞌlinte gede, kiꞌneno albillitte rosiisaanoꞌne loossinohunni roorino looso loossinanni gede assaꞌnera dandaanno.—Yoh. 14:12.
18 Konniranna sai birxichira shiqqino assaawe batinye cimeeyye roduuwa qajeelsate yanna gaaꞌmitanno gede kakkayissanno yine hendeemmo. Ikkaddu roduuwi konne qajeelsha hagiirrunni adhite Yihowa hoshsha towaatate hayyotenni horoonsidhara halchineemmo. Konne assa alame woꞌmate noo songuwa jawaata ikkitanno gedenna ninke mittu mittunku albillitte daggannote qarru yannara ammanammoommore ikkineemmo gede kaaꞌlitannonke.
a Marqoosi 12:29, 30: “Yesuusi togo yee qoli: ‘Umiti tenneeti: “Isiraeeli macciishshi, Maganinke Yihowa mitto Yihowaati; atino Maganokki Yihowa woꞌmu wodanikkinni, woꞌma lubbokkinni, woꞌma hedokkinninna woꞌma wolqakkinni baxi.”’”
b Mittu wedellichi, ayyaanaamittetenni gikki yiinoha, shooshaqanna wole Qullaawa Borro guunte wonshannoha ikkiro, dirisi 20 woꞌma hoogirono cimeeyye songote soqqamaancho ikkanno gede shiqishshara dandiitanno.—1 Xim. 3:8-10, 12; Maaja 1, 1989 Agarooshshu Shae (Ingilizete Afoo) qoola 29 lai.
c Faarso 71:5, 17: “Aliidi Mooticha Yihowa, hexxoꞌya ateeti; anjeꞌyanni jammare ate addaxxoommo. Magano, anjeꞌyanni jammarte rosiisoottoe; anino xaa geeshsha dhaggete loosokki duduwanni noommo.”
d Hasaawu yannara Dotteessa 15, 2012 Agarooshshu Shaera qoola 14-16, gufo 8-13 nna “Maganu Baxillinni Fultinikki Heedhe,” fooliishsho 16, gufo 1-3 noo assaawe horoonsiꞌra dandaatto.
e Ibiraawuyaani 4:12: “Maganu qaali heeshsho noohonna wolqa afiꞌrinoho; lame widoonni qara afidhino bise baalantenni roore iibbinoho; lubbonna ayyaana hattono diimmichonna qoe bada geeshsha qase eanno; qoleno wodanu hedonna alaami maatiro bade afa dandaanno.”
f 2 Ximootewosi 2:2: “Ani coyiꞌranna macciishshoottorenna batinye farciꞌraasine farcidhino coyibba, woloota rosiisate ikkadda ikkitinorira ammanantino mannootira hadara wori.”
g 1 Qorontoosi 4:17: “Ximootewosi kiꞌnewa soyanni noommohu iseraati; korkaatuno isi baxeemmohonna Mootichunni ammanamino beettoꞌyaati. Isi Kiristoosi Yesuusi lainohunni horoonsiꞌreemmota duuchante basera noo songo baalante giddo rosiiseemmo doogga qaagiissannoꞌne.”