AANIIDI QOOLIHA COYI UMO | YIHOWA FARCIꞌRAASINE HIITTOO MANNAATI?
Yihowa Farciꞌraasine Mayite Ammantanno?
Yihowa Farciꞌraasine ‘Qullaawa Borro baalanti Maganu ayyaani massagino manni borreessinotanna kaaꞌlitannota ikkitinota’ ammantanno. (2 Ximootewosi 3:16) Kalaqaanchu daafira rosatenna hagiirraame heeshsho heeꞌrate Qullaawa Maxaafa biddishsha assine horoonsiꞌneemmo.
Qullaawu Maxaafi togo yaanno: “Suꞌmikki Yihowa ikkinohu ati callu uulla woꞌmate aana Aliidiha ikkoottota mannu afona.” (Faarso 83:18) Konni daafira, ninke Magano Yihowa calla magansiꞌneemmo; qoleno Farciꞌraasinesi ikkinoommo daafira gillete suꞌmasi mannaho egensiinseemmo.—Isayyaasi 43:10-12.
Qoleno Kiristaana ikkinoommo daafira, “Maganu Beetti”a Yesuusi uullara dayinotanna Mesihicha woy Buuraminoha ikkinota ammanneemmo. (Yohaannisi 1:34, 41; 4:25, 26) Yesuusi reyihu gedensaanni, reyotenni kae iimira haꞌrino. (1 Qorontoosi 15:3, 4) Hakkunni gedensaanni isi Maganu Mangiste Nugusa ikkino. (Ajuuja 11:15) Tini Mangiste umosi dandiinoho addu gashshooteeti; kuni gashshooti uulla gannate assanno. (Daanieeli 2:44) Qullaawu Maxaafi togo yaanno: “Jooguullu . . . uulla ragidhanno; keeru woꞌmanno daafira lowo geeshsha tashshi yaannonsa.”—Faarso 37:11, 29.
“Insa Qullaawa Maxaafa nabbabbanno wote Maganu coyishiishanni noonsahu gede assite heddanno. Heeshshonsa giddo qarru tuncu yaannonsa yannara mala afiꞌrate Maganu Qaale xiinxallitanno. . . . Insa Maganu Qaale heeshsho noohu gede assite laꞌanno.”—Kaatolikete Qeesichi Benjaamini Cherayaazi, Muunisterlaandische Folkistuni gaazeexa, Jarmane
Yihowa Farciꞌraasine Qullaawu Maxaafi seeri yannankera heeꞌranno mannirano kaaꞌlannota ammantanno. (Isayyaasi 48:17, 18) Konni daafira konne seera seekkine harunsineemmo. Lawishshaho, Qullaawu Maxaafi surrenkenna bisonke batteessanno coyiwiinni xeertiꞌneemmo gede qorowisiisannonke daafira sijaara diangeemmo woy jingilli assitanno xagga diadhineemmo. (2 Qorontoosi 7:1) Qoleno Qullaawu Maxaafi giddo assitinoonte yine bande kulloonni coyibba lawishshaho dimba, foorrenna moora gimbeemmo.—1 Qorontoosi 6:9-11.
a Yihowa xaaddote kalaqinohunna umihu Maganu kalaqo Yesuusa ikkino daafira Qullaawu Maxaafi iso “Maganunnihu mittu Beetti” yaanno.—Yohaannisi 3:18; Qolasiyaasi 1:13-15.