AANIIDI QOOLIHA COYI UMO | HUUCCATTO KAAꞌLITANNORI NO?
Huuccatto Macciishshannohu No?
Mitu manni macciishshannohu nookki daafira, huuccatto assiꞌra mulla yanna huꞌnate yee hedanno. Wolootu kayinni huuccidhannoha ikkirono, huuccattonsara dawaro afidhinokkiha lawannonsa. Maganu dino yee ammanannohu mittu manchi wodanisinni Maganu togooho yee hedi gedensaanni, “Hashaashshenokka shiima geeshsha coyishiishie” yee huucciꞌrino. Hakkiinni, Maganu “tuulate cuqqo giwinoe” yiino.
Qullaawu Maxaafi kayinni, Maganu nootanna isi huuccatto macciishshannota buuxisannonke. Qullaawu Maxaafi lowo diri albaanni heeꞌrino mannira togo yine coyiꞌnoonnita kulanno: “Kaaꞌlo hasidhine raartinanni wote [Maganu] gaacheena aannoꞌne; raareꞌne macciishshanni heeꞌrenni dawaro qolannoꞌne.” (Isayyaasi 30:19) Wolu qummeeshshino togo yaanno: “Suwaddu manni huuccatto iso hagiirsiissanno.”—Lawishsha 15:8.
Yesuusi Annisiwa huuccatto assiꞌrita, “huuccattosi macciishshantino.”—Ibiraawuyaani 5:7
Qullaawu Maxaafi huuccattonsa macciishshantino manni nootano kulanno. Mittu qummeeshshi Yesuusi “gatisasira . . . dandaannohuwa eeggifatinotanna” “huuccattosino macciishshantinota” kulannonke. (Ibiraawuyaani 5:7) Wole lawishsha Daanieeli 9:21 nna 2 Zeena 7:1 aana laꞌꞌa dandaatto.
Ikkina, mitu mannira huuccattonsa macciishshantinokkiha lawannonsahu mayiraati? Huuccattonke macciishshantanno gede, wole magannawa woy albi annuwawa ikkikkinni Qullaawu Maxaafi giddo kulloonni Maganiwa Yihowawaa calla huucciꞌra hasiissannonke. Qoleno Maganu “fajjosi ledo sumuu yaannore” yaano iso hagiirsiisanno coyi daafira huucciꞌnammora hasiꞌranno. Konni garinni huucciꞌneemmoha ikkiro, Maganu “macciishshannonke.” (1 Yohaannisi 5:14) Konni daafira, huuccattonke macciishshantara hasiꞌnummoro, Qullaawu Maxaafi giddo kulloonni Magano afanna isi fajjo maatiro rosa hasiissannonke.
Batinyu manni huuccatto assiꞌra, mulla roso ikkitinohura calla harunsinannita ammaꞌnote woga ikkitinokkita ammananno; kuni manni Maganu huuccatto macciishshannotanna dawarono qolannota dihuluullamanno. Keeniyaho heeꞌrannohu Ayisaaki togo yiino: “Qullaawu Maxaafi yaannore huwateemmo gede kaaꞌlaera huuccatto assiꞌrummo. Shiima yanna gedensaanni, mittu manchi daye kaaꞌlie.” Filippiinsi gobbara heedhannoti Hildaa sijaara aga agura hasidhino. Duucha higge sharrante agura hoogguta minaannise, “Kaaꞌlannohe gede mayira Magano dihuucciꞌratta?” yiise. Iseno uyinose amaale harunsitu gedensaanni togo yitino: “[Maganu] kaaꞌlinoe gari lowo geeshsha dhagge ikkinoe. Sijaara agate hasattoꞌya baꞌanni hadhinoti leeltue. Ee, sijaara aga agura dandoomma.”
Maganu atino fajjosi ledo sumuu yaannore huucciꞌrittoro xaꞌmiꞌroottore assannoheha dilawannohe?
a Qullaawu Maxaafi Maganu suꞌmi Yihowa ikkinota kulanno.