Huuccatto​—Kaaꞌlitannohe Gara

Hirretenni loonsanniha aye loosono hanafattora albaanni, ‘Kuni loosi maaho kaaꞌlannoe?’ yite xaꞌmakki nooreentilla. Ikkina huuccatto assiꞌrate daafirano hatto yee xaꞌma meessira roorsiꞌra ikkitinoni? Ikka hooggara dandiitanno. Huuccatto kaaꞌlitannonkeri nooronna teꞌee xaꞌmanke garankolla. Danchu manchi Iyyoobi nafa mitte hige, “Isi woshshummoro macciishshannoe?” yee xaꞌmino.—Iyyoobi 9:16.

Saꞌu birxichuwara, huuccatto assiꞌra mulla hinge hinge assinanniha ammaꞌnote bude woy surrete xaginaatira kaaꞌlitannota calla ikkitinokkita leellishshanno taje laꞌnoommo. Halaalaanchu Magani huuccattonke addinta macciishshanno. Gara ikkitino doogonni hattono addanka hasiissanno hajora huucciꞌnummoro Maganu seekke macciishshannonke. Isinni, ninke isiwa shinqeemmo gede koyisinonke. (Yaaqoobi 4:8) Ikkina, barru baala huucciꞌnummoro afiꞌnammora dandiineemmo horo maati? Hanni afiꞌneemmo horo giddo mite laꞌno.

Surrete salaame afiꞌrate.

Qarrunna mitiimma tuncu yitannohe wote, yaaddo wolqakkira aleenni ikkitinohu gede ikke macciishshamannohe? Qullaawu Maxaafi, hattoori tuncu yaannonke yannara ‘agurrummokki huucciꞌneemmo’ gedenna ‘dhiwinonke coye Maganoho kuꞌlinammora’ jawaachishannonke. (1 Teselonqe 5:17; Filiphisiyusi 4:6) Qullaawu Maxaafi huuccattotenni Maganunniwa shinqummoro ‘wodancha baalanta roortannoti Maganu salaame, wodanankenna surrenke agartannota’ kulannonke. (Filiphisiyusi 4:7) Yaachishannonke coye iimi Anninkera gudinse kuꞌlinummoro lowota giddiidi salaame afiꞌnammora dandiineemmo. Isinni Yihowa konne assinammora koyisinonke. Faarso 55:22 togo yitanno: “Duha ikkinohere Yihowa aana tuqqi, isi irkise amadannohe.”

Alame woꞌmate aana heeꞌrannohu lowo manni tenne salaame afiꞌrino. Wodiidi Kooriyira heedhannoti Hii Raani togo yitino: “Buutote qarri nooeha ikkirono, konne qarraꞌya kule huuccatto assiꞌreemma wote duhu aaniꞌyanni hoꞌlinoehu gedenna konne qarra dandee heeꞌrate wolqa nooehu gede ikke macciishshamannoe.” Filippiinsi gobbara heedhannoti Seesiliya togo yitino: “Oosichaama ikkoommahura, oosoꞌyarinna amaꞌyari lowo geeshsha yaachishshannoe; ise xa ane nafa badde afa hooggino. Ikkollana huuccatto assiꞌraꞌya, quwa sae yaadummakki barru baala tuncu yaannoere dandee heeꞌreemma gede wolqa ikkitinoe. Yihowa maateꞌya towaaxxa dandeemma gede kaaꞌlannoeta afoomma.”

Qarru yannara sheshonna jawaante afiꞌrate.

Quwa sae yaachishannori, woy quuxxi assannohu buutote qarri iillinoheni? ‘Shesho baalante Maganiwa’ huuccatto assiꞌrakki lowo harshammo uyitahera dandiitanno. Qullaawu Maxaafi Maganu “iillannonke qarri baalunku yannara sheshifachishannonke” yaanno. (2 Qorontoosi 1:3, 4) Lawishshaho, Yesuusi lowo geeshsha yaadi yannara, “guluphe huucciꞌra hanafino.” Tini ma kaaꞌlitusiyya? “Mittu sokkaanchi iiminni daye jawaachishinosi.” (Luqaasi 22:41, 43) Wole ammanamino mancho Nehimiya, bushu mannooti Maganu looso loosannota hoolate waajjishiishshinosi. Isi togo yee huucciꞌrino: “Angaꞌya jawaachishie yee huucciꞌrummo.” Hakkuyi gedensaanni ikkinori, Nehimiya waajjasi qeeꞌlanno gedenna loososi jeefo gananno gede Maganu kaaꞌlinosita leellishanno. (Nehimiya 6:9-16) Gaanu gobbara heeꞌrannohu Rejinaaldi huuccatto assiꞌrasi kaaꞌlitinosi gara coyiꞌranni togo yiino: “Hakko iso wolqaꞌyara aleenni ikkino qarri tuncu yeennae huuccatto assiꞌreemmo wote, qarriꞌyara kaaꞌlaera dandaannohuranna horonta waajjitooti yee jawaachishannoehura hasaaphe kaoommohu gede ikke macciishshamannoe.” Ee, Maganu isiwa huucciꞌneemmo wote sheshifachishankera dandaanno.

Maganuwiinni afiꞌnanni hayyo afiꞌrate.

Doodhineemmohu mitu coyi ninkeno banxeemmo mannano baasa kaaꞌlara woy gawajjara dandaanno. Danchare doodha dandiineemmohu hiittoonniitiyya? Qullaawu Maxaafi togo yaanno: “Kiꞌne mereero [hakko iso qarru iilleennasi] hayyo ajjinosihu heeꞌriro, Magano marro marro hige huucciꞌro; korkaatuno Maganu mishikkinni baalunkura shaqqillunni aanno, isirano uyinannisi.” (Yaaqoobi 1:5) Maganu hayyo aankera huucciꞌneemmoha ikkiro, dancha doorsha doodhineemmo gede isi ayyaanisinni massagankera dandaanno. Isinni huucciꞌneemmo wote Maganu qullaawa ayyaana aankera bande kulle huucciꞌra dandiineemmo; korkaatuno Yesuusi togo yiino: “Iimi Anni huuccidhannorira qullaawa ayyaana roorse hiitto diaanno!”—Luqaasi 11:13.

Wole agurina Yesuusi nafa, dancha muro murate Annisi kaaꞌlo xaꞌmiꞌra hasiissannosita afino. Isi hawaariyaatesi ikkitannore 12 labballo doorara hasiꞌri wote, “hashsha woꞌma Maganunniwa huucciꞌranni galino” yee Qullaawu Maxaafi kulannonke.—Luqaasi 6:12.

Yesuusinte gede yannankera noohu batinyu mannino, gara ikkinore doodhate kaaꞌlansara huuccidhino huuccattora Maganu dawaro qolinonsa gara lae sheshifatino. Filippiinsi gobbara heedhannoti Rajiina babbaxxino qarri tuncu yiinoseta coyidhino; lawishshaho minaannase shiidhu gedensaanni iseneetonna maatese towaaxxa, noose looso hooganna konni qarri giddo heedhe ooso lossa qarra ikkitinose. Gara ikkinore doodhitanno gede kaaꞌlinoseri maati? Ise togo yitino: “Huuccattotenni Yihowa kaaꞌlaera kuꞌleemma.” Gaanu gobbara heeꞌrannohu Kiwabeena Maganu kaaꞌlasira huucciꞌrinohu mayiraatiro kulanni togo yiino: “Lowo woxe afiꞌreemmoha gimbaatu loosoꞌya hoogummo.” Isi hakka wote assinore kulanni togo yiino: “Danchare doodhammora biddishsha aannoe gede Yihowawa ganye huucciꞌroommo.” Isi lede togo yiino: “Ayyaanaamitteteno ikko maalaamittete hasiisannoere afiꞌrate kaaꞌlannoeha dancha looso doodheemmo gede Yihowa lowo geeshsha kaaꞌlinoehu gede ikke macciishshamannoe.” Atino Maganu ledo noohe jaalooma hunara dandaanno coyi tuncu yaannohe wote huucciꞌrittoro biddishshasi afiꞌra dandaatto.

Kageeshshi geeshsha huuccatto kaaꞌlitannohe doogga giddo boodella laꞌnoommo. (Wole lawishsha afate, “Huuccattotenni Afiꞌnanni Horo” yitanno saaxine lai.) Ikkollana tenne kaaꞌlo afiꞌrate, balaxxe Maganonna fajjosi afa hasiissannohe. Tenne assa hasiꞌrattoha ikkiro, Qullaawa Maxaafa xiinxallate kaaꞌlitannohe gede Yihowa Farciꞌraasine coyishiishattora koyinsoommohe.a ‘Huuccatto macciishshanno Maganiwa’ shiqate umo assatto coyi konne ikkara dandaanno.—Faarso 65:2.