Huuccatto Kaaꞌlitannohehu Hiittoonniiti?

Pameela yinanni mancho buuto dhiwante akimete minira hadhino. Qoleno, ise iillinose qarra dandiite saꞌanno jawaante afiꞌrate Magano huuccidhino. Huuccatto kaaꞌlitinoseyya?

Pameela togo yitino: “Kaanserete dhibbi amadeennae xagisiꞌranni noomma yannara lowo geeshsha yaadoomma. Ikkirono, Yihowa huucciꞌre jawaante afiꞌroomma; hattono qarraꞌya dandee noomma. Xaano buuto dhiwannoeha ikkirono, huuccatto xissoꞌya calla hedeemmakki gede kaaꞌlitinoe. Mannu ‘Hiittooti woyye noohe?’ yee xaꞌmanoe woyite, ‘Dhiwannilla nooe; kayinni hagiirraamete’ yeemma.”

Huuccatto assiꞌra hasiissannonkehu buutote dhibbi waadannonke woyite woy qarru iillannonke woyite calla diꞌꞌikkino. Ninke baalunkura ajono batiꞌrono qarru iillannonke; hakko daafira, duucha woyite iillinonke qarra dandee saꞌꞌate kaaꞌlo hasiissannonke. Tennera huuccatto kaaꞌlitannonke?

Qullaawu Maxaafi togo yaanno: “Isi irkisannohena, yaaddokki Maganu aana tugi; isi keeraancho qeelamara wore dilaꞌꞌanno.” (Faarso 55:22) Tini lowo geeshsha jawaachishshanno hedooti. Ikkina, huuccatto kaaꞌlitannohehu hiittoonniiti? Maganu gara ikkitino doogonni huucciꞌrittoro qarra dandiite saꞌꞌatto gede kaaꞌlannohe.—“Huuccatto Kaaꞌlitannohehu Hiittoonniiti?” yitanno saaxine lai.

Huuccatto Kaaꞌlitannohehu Hiittoonniiti?

Giddiidi keere

“Hasidhinoonni coye Maganoho kuꞌle. . . . Mannu hedora aleenni ikkinohu Maganu keeri, Kiristoosi Yesuusinni wodanaꞌnenna hedoꞌne agaranno.” (Filiphisiyusi Sokka 4:6, 7) Yaachishinohere Maganoho kuꞌlittoro, wodanaaꞌmite gara ikkinore assatto gede kaaꞌlannohe.

Maganu aanno hayyo

“Kiꞌne giddo egenno xeꞌinosihu heeꞌriro, Magano huucciꞌro; Maganuno aannosi. Isi ayeno mishikkinni baalunkura elate shooshaqa Maganooti.” (Yaiqoobi 1:5) Qarru giddo heeꞌnoommo yannara, danchare doodhineemmokki woyiti no. Egenno woy hayyo afiꞌrate huucciꞌrittoro, Maganu kaaꞌlannoheha Qaalisi Qullaawu Maxaafi giddo nooha batinye xintu seera qaagatto gede assannohe.

Jawaantenna shesho

‘Tini jawa wolqa Maganunnite ikkinnina ninketa diꞌꞌikkitino.’ (2 Qorontoosi 4:7) Yihowa Woꞌmanka Dandaanno Magano ikkino daafira, isi qarrakki dandiite saꞌꞌatto jawaante aannohe. (Isayaasi 40:29) Qullaawu Maxaafi Yihowa “jawaante baalate Magano” ikkinota kulano. Isi “qarrinke baalu giddo jawaachishannonke.”—2 Qorontoosi 1:3, 4.

HUUCCATTO ASSIDHE KAAꞌLO AFIꞌRA HASIꞌRATTO?

Yihowa iso huucciꞌratto gede giddeessannohekkiti egennantinote. Hatteentenni isi baxillunni huucciꞌrattosira koyisinohe. (Ermiyaasi 29:11, 12) Maganu alba huuccattoꞌya dimacciishshinoe yite hedattoha ikkirona? Hatto ikkiro, dadillitooti woy hexxo mudhitooti. Baxillaanchu anninna ama qaaqqinsara isi hasiꞌrino garinni woy isi hasiꞌrino yannara kaaꞌla hooggara dandiitanno. Annunna ama qaaqqinsara roore woyyinore wolere heddinoha ikkara dandaanno. Ikkihano ikkiro, shaqqadu anninna ama qaaqqonsa kaaꞌlannoti dihuluullissannote.

Maganu Yihowa taalle nookkiho baxillaancho Annaati; hakko daafira isi kaaꞌlahera hasiꞌranno. Konni birxichira laꞌnummoha Qullaawu Maxaafi biddishsha seekkite xiinxallattohanna loosu aana hosiisate sharramattoha ikkiro, Maganu baalantenni woyyitino doogonni huuccattokkira dawaro qolannohe!—Faarso 34:15; Maatewoosi 7:7-11.