“Ammana Ledinke”

1. Ammana mageeshshi geeshsha hasiissannote? (Umi misile lai.)

‘ANI isi Yihowa bayira qarra gatise sayise haaro alame eessa hasiꞌranno manni gedeeho?’ yite hedde egennootto? Hatte yannara gate saꞌꞌate addi addi coyi hasiisannoha ikkirono, hawaariya Phaawuloosi mitto lowonta hasiisanno coye qummi assino; isi togo yiino: “Ammana nookkiha Magano seekkine hagiirsiisa didandiinanni.” (Ibi. 11:6) Ammana shota coye labbara dandiitanno; ikkollana, “ammana woꞌmunku mannira noo coye [ikkitinokkita]” dea dihasiissannonke. (2 Tes. 3:2) Kuri qummeeshshuwa ammananke kaajjishiꞌra mageeshshi geeshsha hasiissannoro huwanteemmo gede kaaꞌlitannonke.

2, 3. (a) Pheexiroosi ammanate daafira borreessino hedonni maa ronseemmo? (b) Aanchine hiittee xaꞌmuwara dawaro afiꞌneemmo?

² Hawaariya Pheexiroosi “fonqolante saꞌino ammana” “Yesuusi Kiristoosi xawanno yannara galata, gaacheenanna ayirrinye afiꞌnanni gede assitannota” coyiꞌre, ammana lowo geeshsha hasiissannota xawisino. (1 Pheexiroosi 1:7 nabbawi.a) Bayiru qarri gambise dayinota hendiro, ayirradu Nugusinke Armagedooni yannara daanno wote galatannonsa manni widira kiirammeemmo gede assitannonke ammana noonketanna teꞌee buuxiꞌra dihasiissannonke? “Heeshshote heeꞌnanni gede assitanno ammana noonsari gedee” manna ikka hasiꞌneemmoti dihuluullissannote. (Ibi. 10:39) Hattoo manna ikkate, “Ammanaꞌya jawaata ikkitanno gede ati kaaꞌlie!” yii manchi gede eeggifante huucciꞌneemmo. (Marq. 9:24) Woy Yesuusi hawaariyaate gede, “Ammana ledinke” yineemmo.—Luq. 17:5.

³ Konni birxichira aante noo xaꞌmuwara dawaro afiꞌneemmo. Ammananke kaajjishiꞌra dandiineemmohu hiittoonniiti? Ammana noonketa leellisha dandiineemmohu ma garinniiti? Ammana ledinke yine huucciꞌneemmo huuccattora Maganu dawaro qolannota huluullammeemmokkihu mayiraati?

MAGANO HAGIIRSIISSANNO AMMANA LOSSIꞌRA

4. Ammananke kaajjishiꞌrate kaꞌneemmo gede ayeoo lawishshi kaaꞌlankera dandaanno?

⁴ “Balaxe borreessamino coyi baalunku ninkera roso ikkara borreessaminoha” ikkino daafira, Qullaawu Maxaafi giddo kulloonnihu batinyu ammanate manni xaggenni ronseemmori no. (Rom. 15:4) Abirahaami, Saara, Yisaaqi, Yaaqoobi, Muse, Reaabi, Geediooni, Baarqinna wolu batinyu mannire kultanno xagge nabbambeemmo wote, insa xagge uminke ammana layiꞌneemmo gede kaaꞌlitankera dandiitanno. (Ibi. 11:32-35) Qoleno, dirinkera jawaata ammana noonsata leellishshino roduuwinke xagge nabbawanke, ammananke kaajjishiꞌrate murciꞌne kaꞌneemmo gede assitankera dandiitanno.b

5. Eeliyaasi jawaata ammana noosita leellishinohu hiittoonniiti? Isi lawishshi ma assineemmo gede kakkayisannonke?

⁵ Lawishsha ikkitannonkete Qullaawu Maxaafi xagge giddo mitte masaalaanchu Eeliyaasi xaggeeti. Hanni Eeliyaasi Yihowa woꞌmunni woꞌma addaxxannota leellishino gara hedi. Yihowa moolle abbara hedinota Eeliyaasi Akiaabira kuli yannara mittoreno huluullamikki togo yiino: “Heeshshote Magani Yihowa [suꞌminni] xaareemmo, . . . ani hajajummoro ikkinnina gobbate loju woy xeenu diheeꞌranno!” (1 Neg. 17:1) Eeliyaasi Yihowa moollete yannara isiranna wolu mannira hasiisannonsare aannonsata ammanino. (1 Neg. 17:4, 5, 13, 14) Isi Yihowa reyino qaaqqo kayisannota ammanannota leellishino. (1 Neg. 17:21) Qoleno, Eeliyaasi Qermeloosi Ilaali aana shiqishino kakkalo ittara Yihowa giira soyannota horo dihuluullamino. (1 Neg. 18:24, 37) Moolle hunate Yihowa dinyino yanna dagguta, Eeliyaasi xeenu dayinota leellishannoha hili malaate nafa laikkinni, Akiaabira togo yee kulino: “Biite xeena ganara guganni noo daafira, hadhe sagale iti, agi.” (1 Neg. 18:41) Togoo xagge, togooti jawaata ammana noonketanna teꞌee layiꞌneemmo gede kakkayissannonketa diꞌꞌikkitino?

AMMANANKE KAAJJISHIꞌRATE MAA ASSA DANDIINEEMMO?

6. Ammananke kaajjishiꞌrate Yihowawiinni maa afiꞌra hasiissannonke?

⁶ Ammananke kaajjishiꞌrate ninke sharro calla diguddanno. Ammana Maganunnihu qullaawu ayyaani gumi widooti. (Gal. 5:22) Konni daafira, Yesuusi uyinonke amaale harunsine Maganu ayyaanasi lede aannonke gede huucciꞌranke hayyote; korkaatuno Yesuusi iimi Anninke “huuccidhannorira qullaawa ayyaana” aannota coyiꞌrino.—Luq. 11:13.

7. Ammananke jawaata ikkite heedhanno gede assiꞌra dandiineemmo gara lawishshunni kuli.

⁷ Ammananke jawaata ikkitu gedensaannino, lossiꞌra agura dihasiissannonke. Ammana giirate ledo heewisiisa dandiinanni. Giira giirranni wote, wala yite bubbara dandiitanno. Ikkollana, hakkuyi gedensaanni facci assine agurranniha ikkiro, kashilu callu gatara, hakkiinnino buluulu nafa qiidara dandaanno. Agurrikki haqqe worranniha ikkiro kayinni, bubbanni heedhara dandiitanno. Hatteente gede, ganyine Maganu Qaale sagaꞌlineemmoha ikkiro ammananke jawaata ikkite heedhanno. Yannate kiiro Qullaawa Maxaafa xiinxallinummoro, Maganunna Qaalisira noonke baxilli lexxanno; konni garinni ammananke jawaata ikkite heedhanno.

8. Ammananke kaajjishiꞌratenna jawaata ikkite heedhanno gede assiꞌrate kaaꞌlannonkeri maati?

⁸ Ammanakki kaajjishiꞌratenna jawaata ikkite heedhanno gede assiꞌrate wolere maa assa dandaatto? Cuuamattora albaanni rosootto coyinni calla kassi yitooti. (Ibi. 6:1, 2) Qullaawu Maxaafi giddo masaalleenna woꞌmitino masaalo huwatate woꞌnaali; korkaatuno togoo masaalo ammanakkira kaajjado xinta ikkitahera dandiitanno. Hakkiinni saeno, ammanakki jawaata ammana noonsa manni assanno yinoonnire assatto gede kakkayissannohe gedeeta ikkase buuxate Maganu Qaale horoonsiꞌra dandaatto.—Yaq. 1:25; Yaaqoobi 2:24, 26 nabbawi.c

9, 10. Aante noori ammananke kaajjishiꞌrate kaaꞌlitannonkehu hiittoonniiti: (a) danchu jaaloomi? (b) songote gambooshshi? (c) qanchu soqqansho?

⁹ Hawaariya Phaawuloosi ammanate roduuwisira ‘kuꞌu kuꞌuyi ammananni mimmito jawaachisha’ dandiitannota kulino. (Rom. 1:12) Ammanate roduuwinkewa aanneemmoha ikkiro, hakko iso “fonqolu giddoonni saꞌino ammana” noonsari ledo honseemmo wote kuꞌu kuꞌuyi ammana jawaachinsheemmo. (Yaq. 1:3) Bushu jaaloomi ammana hunanno; danchu kayinni ammana kaajjishanno. (1 Qor. 15:33) “Mitteenni gamba yaa” lashshi assa agurre, ‘mimmito jawaachinsheemmo’ gede amaalloonninkehu mittu korkaati konneeti. (Ibiraawuyaani 10:24, 25 nabbawi.d) Wolu korkaati kayinni, gambooshshu yannara shiqanno rosi umisi ammananke kaajjishannoha ikkasiiti. Tini hedo Phaawuloosi yiinori ledo sumuu yitanno: “Ammana heedhannohu macciishshinanni coyinniiti.” (Rom. 10:17) Songote gambooshshiwa ammanate roduuwikki ledo ganyite aanatto?

¹⁰ Qanchu soqqansho fulle soqqammeemmo wote, wolu manni ammana calla ikkikkinni uminke ammanano kaajjitanno gede assineemmo. Hundi Kiristaaninte gede, woꞌmunni woꞌma Yihowa addaxxine aye bayichono waajjinummokki sabbaka ronseemmo.—Looso 4:17-20; 13:46.

11. Kaaleebiranna Iyyaasura kaajjado ammana heedhansara dandiitinohu mayiraati? Ninke insa gede ikka dandiineemmohu ma garinniiti?

¹¹ Heeshshonke giddo Yihowa kaaꞌlinonke garanna huuccattonkera dawaro qolino gara huwanteemmo wote ammananke lophitanno. Kaaleebinna Iyyaasu heeshshonsanni tenne laꞌino. Insa Hexxote Gobba qottu yannara Yihowa addaxxitannota leellishshino. Ikkollana, hakkuyi gedensaanni Yihowa heeshshonsa giddo kaaꞌlannansa laꞌu kiiro ammanansa albinni roore lophitino. Iyyaasu Isiraeelete mannira togo yee mittoreno huluullamikki coyiꞌrinohu iseraati: “Maganiꞌne Yihowa asseemmo yee coyiꞌrinohu danchu coyi baalunku giddo mittu qaalino [digatino].” Isi gedensoonni higeno togo yiino: “Konni daafira Yihowa waajje, hattono isira mishsho nookki garinninna ammanantine soqqamme . . . Aninna miniꞌya manni Yihowara soqqammeemmo.” (Iya. 23:14; 24:14, 15) Heeshshonke giddo Yihowa danchumma laꞌnummoro, ninkerano togoo ammana heedhankera dandiitanno.—Far. 34:8.

AMMANANA NOONKETA LEELLISHA

12. Jawaata ammana noonketa leellinsheemmohu mayinniiti?

¹² Jawaata ammana noonketa leellisha dandiineemmohu hiittoonniiti? Rosaanchu Yaaqoobi tenne xaꞌmora dawaro ikkannore coyiꞌrino; isi togo yiino: “Ammanaꞌya loosunni leellisheemmohe.” (Yaq. 2:18) Assootinke jawaata ammana noonketa leellishanno. Hanni mito lawishsha laꞌno.

13. Sabbakate looso loosanke ammana noonketa leellishshannohu hiitte doogganniiti?

¹³ Ammana noonketa leellinsheemmoti mitte kaajja doogo sabbakate looso loosate. Hatto yineemmohu mayiraati? Konne looso loosanke, Maganu yiino garinni tenne alame goofimarchi ‘keeshshikki’ rahe daanni noota ammanneemmota leellishshanno. (Imb. 2:3) Ammananke jilba bikka dandiineemmoti mitte doogo, soqqansho mageeshshi geeshsha soqqama hasiꞌneemmoro layiꞌrate. Wolqanke assitu deerrinni soqqammanni, hakkiinnino saꞌne soqqanshonke halashshiꞌrate faro hasiꞌnanni heeꞌnoommo? (2 Qor. 13:5) Ee, ‘gato’ afiꞌra dandiineemmo gede ammananke ‘faajjete duduwanke’ wodaninke giddo ammana noota leellishshanno.—Roomu Sokka 10:10 nabbawi.e

14, 15. (a) Heeshshonke giddo ammana noonketa leellisha dandiineemmohu hiittoonniiti? (b) Jawaata ammana noonsata loosunni leellishshino maate woꞌnaalsha kuli.

¹⁴ Heeshshonke giddo qarru iillannonke woteno ammana noonketa leellisha dandiineemmo. Iillinonke qarri dhibba, hexxo mudha, quwa saꞌino yaaddo, buxima woy wolere ikkirono, Yihowanna Beettisi “kaaꞌlo hasiissannonke yannara” kaaꞌlitannonketa addaxxineemmo. (Ibi. 4:16) Yihowa kaaꞌlannonke gede huucciꞌneemmoha ikkiro, togoo ammana noonketa leellinshanni heeꞌnoommo. Yesuusi maalaamittete hasiisannonke coyi daafira lawishshaho, “barru sagalenke” aannonke gede Yihowa huucciꞌra dandiineemmota coyiꞌrino. (Luq. 11:3) Qullaawu Maxaafiti addi addi xagge Yihowa hasiisannonkere aannonketa buuxissanno. Isiraeelete gobba oolle gantu yannara, Yihowa Eeliyaasira sagalenna waa uyinosi. Eeliyaasira “haraqeessu soodonna hawarro daabbonna maala abbannosi; hattono isi buetenni waa aganno” yee Qullaawu Maxaafi kulannonke. (1 Neg. 17:3-6) Ninkeno hasiisannonkere afiꞌneemmo gede Yihowa coye qineessankera dandaannota addaxxineemmo.

¹⁵ Qullaawu Maxaafiha xintu seera harunsineemmoha ikkiro, maatenkera hasiisannore afiꞌra dandiineemmota dihuluullammeemmo. Iisiyaho heedhannoti Rebeka yinanni rodoo tini halaale ikkitinota huwattino. Isenna maatese Maatewoosi 6:33 nna Lawishsha 10:4 yitannore harunsite Maganu Mangiste balaxisiissino qolteno chaachaarte loossino. Rebeka minaannise loosanno loosi maatensa ayyaanaamitte gawajjanno gedeeha ikkino daafira, hakkoye looso agurinota coyidhino. Ikkirono, noonsata shoole ooso towaaxxa hasiissannonsa. Rebeka togo yitino: “Sagale rainse hira hananfummo. Konni garinni heeꞌnummo diro baalanka, Yihowa horonta tuge agurinonkekkita huwantoommo. Inteemmore hoonge diegenninoommo.” Atina Qullaawu Maxaafi taalle nookki biddishsha aannota ammanattota leellishatto faro afiꞌrootto?

16. Magano addaxxineemmoha ikkiro maa afiꞌneemmo?

¹⁶ Maganu biddishsha harunsinummoro, uminkera horo afiꞌneemmota huluullama dihasiissannonke. Phaawuloosi Imbaaqoomi ayyaanunni borreessino qaale qummi asse, “Keeraanchu manchi ammanatenni heeꞌranno” yiino. (Gal. 3:11; Imb. 2:4) Konni daafira, addinta kaaꞌla dandaanno Magano addaxxa hasiissannonke. Phaawuloosi Maganu “giddonke loossanni noo wolqasi ledo sumuu yaanno garinni, huucciꞌneemmo woy hendeemmo coyi baalunkura aleenni ikkinore assa [dandaannota]” coyiꞌrino. (Efe. 3:20) Yihowa soqqamaano fajjosi assate dandaaminsare baala assitanno; ikkirono, dhukinsa deerra affino daafira Yihowa sharronsa maassiꞌrannota addaxxitanno. Maganinke ledonke noota afanke tashshi diassitannonke?

MAGANU AMMANA LEDINONSA

17. (a) Hawaariyaate ammanansa lexxitara xaꞌmidhino xaꞌmora dawaro afidhinohu hiittoonniiti? (b) Ammana ledinke yine huucciꞌneemmo huuccattora dawaro afiꞌneemmota huluullammeemmokkihu mayiraati?

¹⁷ Kageeshsha ronsoommo rosi, ninkeno hawaariyaate Mooticha “Ammana ledinke” yitu gede yine huucciꞌneemmo gede assankera dandaanno. (Luq. 17:5) Insa 33 M.D. Phenxeqosxete barra qullaawu ayyaani dirreennansa Maganu mannu oosora hedinore albinni roore huwattu yannara tenne xaꞌmonsara dawaro afidhino. Tini ammanansa kaajjitanno gede kaaꞌlitinonsa. Hakko daafira, hakkuyira albaanni ikke egenninokkiha sabbakate zamacha hanaffino. (Qol. 1:23) Ninkena, ammana ledinke yine huucciꞌneemmo huuccattora dawaro afiꞌneemmo? Ee, korkaatuno Qullaawu Maxaafi Maganu “fajjosi garinni huucciꞌneemmo” huuccatto macciishshannota buuxisannonke.—1 Yoh. 5:14.

18. Yihowa ammanansa kaajjishiꞌranno manna maassiꞌrannohu hiittoonniiti?

¹⁸ Kageeshsha laꞌnummonte gede, Yihowa woꞌmunni woꞌma addaxxanno manni iso hagiirsiisanno. Yihowa ammana ledankera huucciꞌneemmo huuccatto macciishshanno; hakko garinni ammananke baasa lophiteenna ‘Maganu Mangiste ragidhannori widira kiirammeemmo.’—2 Tes. 1:3, 5.