Yannankera Maganu Ola Laꞌꞌanno Gara

Umihunni, Maganu yannankera alamete aana noo qarra laꞌꞌannotanna mala abbannota afanke sheshifachishshannonke. (Faarso 72:13, 14) Maganu Qaalisi Qullaawu Maxaafi giddo ‘qarru iillannonsarira fooliishsho aansara’ qaale eino. Tenne assannohu mamarooti? “Mootichu Yesuusi iiminni wolqaataamma sokkaanosi ledo xawanno yannara . . . Magano affinokkirenna Mootichinke Yesuusi daafira kulannohu danchu duduwira hajajantannokkire rabbisanno woteeti.” (2 Teselonqe 1:7, 8) Yesuusi konni garinni xawannohu albillitte “Duuchanka Dandaanno Maganihu bayira barra kaꞌꞌanno oli” yannara ikkinota Qullaawu Maxaafi kulanno. Konni olihu wolu suꞌmi Armagedooniiti.—Ajuuja 16:14, 16.

Albillitte kaꞌꞌannohu hakkuyi oli yannara Maganu bushuulle hunate manna ikkikkinni Beettosi Yesuusi Kiristoosinna wole ayyaanu kalaqo horoonsiꞌranno. Iimidi olanto gadado baalanka huntanno.—Isayyaasi 11:4; Ajuuja 19:11-16.

Maganoho olaho noosi lao xaano disoorrantino. Isi yannankerano ola laꞌꞌannohu gadadonna bunshe hunate kaaꞌlanno coyi gede asseeti. Ikkollana, hundinni kayise xaa geeshsha togoo ola olamannohu ayetironna olammanni yanna doorannohu Magano callaho. Aleenni laꞌnummonte gede Maganu albillitte bunshe hunatenna miicantinorira rabba qolate olu kaꞌꞌanno gede assannohu albillitteeti; qoleno hakkonne ola olamannohu Beettosi Yesuusi Kiristoosiiti. Hatto yaa, xaa yannara mannu ola kayisanno korkaati gara lawiro nafa yannankera mannu olamanni noo oli Maganu fajjinoha diꞌꞌikkino.

Hanni mitto lawishsha laꞌno: Lame ooso anninsa mine nookkiha giwantanni noohu gede assite hedi. Tini ooso giwansho agurte anninsara silke bilbiltu. Insa kuꞌu koꞌoye ganeennae ganoommo yitanni mimmito bushiishshu. Lamunku anninsa kaaꞌlo afiꞌrate isira kuꞌlitu. Ikkollana, annu lamunku yitannore macciishshihu gedensaanni giwantannokki gede kulensa qaera higanno wote coye biddi assannota kulinsa. Lamunku roduuwi mite yanna geeshsha giwama agurtu. Ikkollana shiima yanna gedensaanni galagalte giwantu. Anninsa qaera higiti, insara hanqi; qoleno isira hajajantinokki daafira lamenka qorichishi.

Hatteente gede, yannankera ola olantanno daga duucha wote Maganu kaaꞌlannonsa gede huuccidhanno. Ikkollana, Maganu yannankera mannu olamanno olira anga diwodhanno. Hatteentenni, isi Qaalisi Qullaawu Maxaafi giddo togo yiino: “Aye manchirano bushu coyi bayicho bushare assitine qoltinoonte,” hattono, “Kiꞌne umiꞌne rabbisidhinoonte.” (Roomu Sokka 12:17, 19) Qoleno, Maganu mannu ooso isi Armagedooni olinni qarra hunanno yanna ‘cincite agadha’ hasiissannonsata kulino. (Faarso 37:7) Daga Maganu bunshe hunanno yanna agadha gibbe olantannoha ikkiro isi eessannonsakki coyi giddora eꞌinohu gede asse laꞌꞌanno; tini qolte iso dihagirsiissannosi. Konni daafira Maganu Armagedooni abbe hanqosi leellishanno; qoleno ‘Uulla woꞌmate aaninni ola hune’ daga layinkita gibbo kayissannokki gede assanno. (Faarso 46:9 Isayyaasi 34:2) Ee, Armagedooni, ola baalanka hunanno olaati.

Maganu Mangiste abbitanno atooti giddo mittu ola hunate. Yesuusi mitte egennantino huuccatto giddo tenne Mangiste daafira coyiꞌranni togo yiino: “Mangistekki daggo. Fajjokki iima ikkitanni noonte gede, uullano ikkito.” (Maatewoosi 6:10) Maganu Mangiste ola baalanka huntannoha calla ikkikkinni olaho qara kora ikkitinota bunsheno coꞌo assite huntanno.a (Faarso 37:9, 10, 14, 15) Yesuusi harunsaano Maganu Mangiste abbitanno atoote afiꞌrate quqquxante agadhansa garankolla.—2 Pheexiroosi 3:13.

Ikkina, Maganu Mangiste qarra, gadadonna bunshe baalanta huntanno yanna agadhineemmohu mamooti geeshshaati? Yannankera woꞌmitanni nooti Qullaawu Maxaafi masaalo heeꞌnoommohu ‘goofimarchu barruwara’ ikkinota leellishshannote. (2 Ximootewosi 3:1-5)b Muli yanna giddo Maganu Mangiste tenne goofimarchu barruwa Armagedooni olinni gumulantanno gede assitanno.

Aleenni laꞌnummonte gede, Armagedooni olinni baꞌannori ‘Mootichinke Yesuusi daafira kulannohu danchu duduwira hajajantannokkireeti.’ (2 Teselonqe 1:8) Ikkollana, Maganu aye manchino wole agurina bushuullu reyitanno wote nafa hagiidhannokkita qaagi. (Hiziqeeli 33:11) Isi Armagedooni olinni “mittu manchino baꞌꞌara hasiꞌrannokki daafira” goofimarchu daara albaanni Mootichinke Yesuusi daafira kulannohu danchu duduwi “daga baalantera naqaashe ikkanno gede, uulla woꞌmate sabbakamanno” gede assanni no. (2 Pheexiroosi 3:8, 9; Maatewoosi 24:14; 1 Ximootewosi 2:3, 4) Ee, Yihowa Farciꞌraasine alame woꞌmate aana loossanni noohu sabbakate loosi, yannankera mannu Magano afanno gede, Yesuusi daafira kulannohu danchu duduwira hajajamanno gedenna albillitte olu nookki yannara heeꞌrate qixxaawanno gede kaaꞌlanni no.