Olunna Kipho Uurritanno Gara

MAGANU MANNU GASHSHOOTE HUNANNO

Maganu Armagedoonia yinanni olinni mannu gashshoote baala hunanno. (Yohaannisi Ajuuja 16:16) Hatte yannara, “gosa baalate mootoolla” “Woꞌmanka Dandaanno Maganihura batiꞌru barri olira” gamba yitanno. (Yohaannisi Ajuuja 16:14) Armagedooni oli gedensaanni, baattote aana wolu oli horonta dikaꞌꞌanno.

Maganu mannu gashshoote hune, hakko baycho isi gashshooti annatanno gede assanno. Maganu Gashshooti gordoho heeꞌre gashshannohonna horonta baꞌꞌara dandaannokkiho. (Daanieeli 2:44) Maganu Beettosi Yesuusi Kiristoosi gashshootisira Moote asse shoomino. (Isayaasi 9:6, 7; Maatewoosi 28:18) Yesuusi rosaanosira daanno gede huuccidhara kuli Gashshootib hakkoyeti. (Maatewoosi 6:9, 10) Mannu ooso baalanti Yesuusi anga galannohu mittu kalqete Gashshooti hunda mittimmatenni heedhanno.

Yesuusi mannu gashshooti gede, biilloonyesi umisi qiniitira dihoroonsiꞌranno. Isi baalanka mitte illenni laꞌꞌannohanna taashshannoha ikkino daafira, sirchisinni, heeꞌranno gobbanni, woy gaꞌresinni kainohunni miincannie woy deameemmo yee yaadannohu mittu manchino diheeꞌranno. (Isayaasi 11:3, 4) Qoleno qoossosira gaaramannoha dianfanni. Mayira? Korkaatuno Yesuusi, mittu mittunku manchi hobbaatenna keeri agaramanno gede assanno. “Qarraataamo woshshiꞌrannosi woyite gatisannosi; buxichonna gadadaamo kaaꞌlanno. . . . Gadadaamma shettotewiinni fushshannonsa.”—Faarso 72:12-14.

Maganu Gashshooti urdenna bagado baalanka baattote aaninni hunanno. (Mikiyaasi 4:3) Qoleno olama agurate maahoyye yaa giwannohanna wolootu keere booreessannoha busha mannano hunanno. (Faarso 37:9, 10) Aye manchino, meyatino qaaqquulluno baattote aana aye bayichono masikkinni haꞌra dandaanno.—Hiziqeeli 34:28.

Maganu Gashshooti baatto gashshanno yannara, mannu baalunku dancha heeshsho heeꞌranno. Manna olaho kakkayisanno qarri lawishshaho buxima, hudenna minu hoongi diheeꞌranno. Mannu baalunku falakkinota dancha sagale afiꞌre hagiidhanno; qoleno heeꞌrannoha injiino mine afiꞌranno.—Faarso 72:16; Isayaasi 65:21-23.

Maganu Gashshooti olu abbino gawajjo baala badhera qolanno. Hattino bisu mada calla ikkitukkinni, mannaho olunni kainohunni wodaninsa madiꞌrino madanna tiiu gawajjo baalano hoꞌlitanno yaate. Reyino manni nafa reyotenni kae koye uullate aana heeꞌranno. (Isayaasi 25:8; 26:19; 35:5, 6) Babbaxxite keeshshitino maate mimmitu ledo xaaddanno; qoleno “albi ikkito saꞌino daafira,” mannu alba ikkinoha busha coye diqaaganno.—Yohaannisi Ajuuja 21:4.

MAGANU CUBBO HUNANNO

Maganu Gashshooti baatto gashshanno yannara, mannu baalunku mitto halaalaancho Magano Yihowac calla magansiꞌranno; isi ‘baxillunna keeru Maganooti.’ (2 Qorontoosi 13:11) Hatte yannara mannu mimmitu ledo keere heeꞌnanni gara rosanno. (Isayaasi 2:3, 4; 11:9) Rosinore loosu aana hosiisannohu baalunku cubbunni wolaphe guuta ikkanno.—Rooma 8:20, 21.

MAGANU SHEEXAANENNA AGAANINTESI HUNANNO

Mannu mereero gibbonna gaance kalaqqannore Sheexaanenna agaanintesi Maganu Gashshooti hunanno. (Yohaannisi Ajuuja 20:1-3, 10) Manna olaho kakkayissannori insa heedhannokki daafira, ‘keeru’ woꞌmanno.—Faarso 72:7.

Maganu olanna kipho uurrisate eino qaali woꞌmannota addaxxa dandaatto. Ola uurrisate isira hasattono wolqano noosi.

• Maganoho olanna finqille uurrisate hasiissanno egennonna wolqa noosi. (Iyyoobi 9:4) Isira wolqate aleenni ikkannosihu mittu coyno dino.—Iyyoobi 42:2.

• Maganu mannu qarramanna laꞌꞌa dibaxanno. (Isayaasi 63:9) Qoleno isi “bunshenna beebba assa baxxannore” giwanno.—Faarso 11:5.

• Maganu woꞌmanka woyte qaalesi wonshanno; isi kaphara didandaanno.—Isayaasi 55:10, 11; Tito 1:2.